| Сёксь // сборник Васень цвет; автор: Прончатов, И. Н.; 1936. | Мордовская библиотека |
Книга: И. Прончатов. Васень цвет. Стихотвореният. — Мордовской Государственной Издательствась, Саранск, 1939. — с. 26—30 |
|
| << Арсема << | >> Мон эль сан >> |
|
Сексь. Вальмалга тардить, Теке штапот, ожо килейть. Нувсий тарадост авардить Пиземеденть. Ризксэст нильнезь Пирявтос нежелесть. Лопаст, Тошкаезь эрямонь шкадост, Арсить, зярс тарадга опазь Вармадонть тарномо кадовсь. Зярс а неявикс пужомась Правтсынзе: ванды эль нейке. Нолдызь пряст тарадтнэ, комасть, Правтыть петнявкст вейкень, вейкень. Ломатне жо ютнить алгаст Артозь свежа коштсонть, вийде. Килейть комасть эйзэст. Пейдить Ломатне ризнэмаст кувалт. Седеяк тошкамо кармасть, Зярдо кудряст ланга пувась Летькень кандозь экше вармась. Сексь, мон жо кенярдан мартот! Мерть коштот симезь иредьме. Ах, кода мазыйстэ артозь рунгот, Зяро видьметь кекшить эрьва творенияс! Эрьвасонть эри эрямо, Эрямотнь жо арась пезэ. Секс монь ней мелем — мештезэнь Эрьва каленть кутморямо Зярс саты монь одонь виесь. Вальмама панжозь. Сельмем конень. Паро. Коштось пургси сэньсэ.. II.
„А, Прончатов... вана тонеть...“Почтальононсь серма венсти. Мон ванан... прок чуди лава Сермадовксось. Вельксэст — „Сара“. Ловнан, ловнан.. тунь перькаван Ушонь лажноманть а марян. Прок те шкасто арасельгак Эриця масторонть мештьсэ. Ансяк чудерксэкс икельган Коневганть чудиця тешкстнэ. Ансяк сынь чудить прок кевга Лембе лейне лыйни, шольни, Кода лев левкст аваст мельга Кирнявтнезь, пулосост кольнить. Ды прок розат пиземеде, Конатнень мазыйть цветявксост, Тонь серманть лембе валтнэде Седейган цветить марявксом. То ловнан, то сынь седеяк Раштавить — эйстэдест ламо... Сынст кувалма мон тонь неян Икелень. Вана тон ська Озадат покш столенк экшсэ, Конатась книгадо пешксе, — Анокстат валскень уроктнэс. Комить арсезь книганть вельксэс. Пинге мельга, пингеть ютнить, Комсомолка, превей мельсэть. Вана муцявозь илотнэ Кепетить спартактнень чавмо... Мартост тонгак... седей токны... Вана кирвастезь Афины... Вана войскат кармасть явмо... Ломать, ломать урнить, чийнить... Весе тень сайт превезэть, Косо ульнесь, мезде, кода... Сексень чись пейдезь черезэть Сырьнень суреть чевтьстэ кодась. О тейтерь! кодамо валсо Эйстэть сави стих сермадомс, Штоб ен чидеть ловнозь, свал сон Увноволь июнень садокс. Штоб сонзэ, прок монь иетьне, Вечкимань кенярдксо пештязь, Зярдояк марявксонь цветэст Иляст пужт, ризнэмань лекштезь. Ведь тон аволь сынст кондямат, Конатне масторсонть куломс Ансяк сень теить — азгундить Ды тарновтнить „радикуласт“ Конат секс эрить, што тетяст, (Путовтонь камакшост пракшныть) Кольневтить „менелень цецькаст“ Ярмаккеть нарядос таштыть. Тон аволь, аволь сынст кондя Масторсонть ютавтат иеть. Тонавтнеманть ялгакс кундазь Максат тензэ васень виеть. Вана весе сёрмат ловновсь... Столь лангсо книгатнес путовсь... Частнэ вачкодсть кемгавтово... Капшан, капшан тевем туртов... Молян ошка. Перькан сёксесь Прок атине, палкас нежедсь, Ютыцянь вастомсто комсесь, Пижолдый шкадонзо ледстнезь. Секс нолды пиземень сельведть — Ломатькак ризнэсть сонзэ кис... Кевкстни ютыйть ильцезь, пелезь: Мезес жо панжи сонзэ кись? Ах, пужиця ожо сексе! Монсь ли тонь ризнэмат педи! Бути ней мештесэнь седей Кирвастезь вечкимань толсо Бути мон вечкимань вийденть Теке ансяк, ансяк шачозь. Неявить валдосто, пейдезь Масторсонть предметнэнь шачост. Мон ли ризнан... О эрямом, А содангак натой кода Эйстэдеть парсте морамо Сень кисэ, што тон пек одат Ды казезят ине шкасо. Вана пельтне тусть. Чись лисевсь Масторганть эрямонь вастозь. Кальтнень ланга сырьнень рисьметь Понгавсь. каплят цитнить. Озяст ливтнесть летьке китнес... Вечкимам! тонгак ведь истя Ушованть якамо лиснят Ды чинть каршо ванозь пейдят, Кода лампанть вакссо эйде. Таго варма. Тарадт комсить. Икелень таргавсь васов кись. Мон молян. Перькаван морсить: Вечкема, эрямо, сёксесь. |
| 1936 ие |
| << Арсема << | >> Мон эль сан >> |
| Сборник Васень цвет; автор: Прончатов, И. Н.; 1939. | |