Налксемась 1-це

Ве. Ков валда. Ульця. Бояронь сад-пире бокасонть скамия. Кудыне, кеншнезэ улицяв. Сценась аламос чаво. Садстонть лисить Каштанов ды Приказов.

ЯВЛЕНИЯСЬ 1-це.

Каштанов. Кальдявсть эрямотне, седе кальдявомс а ков. Тезэ вана мон чачинь, касынь. Дедам покштям ютавтызь откс пораст... Тесэ вана, крепостной праванть пинкстэ, лутасть розгасо котмере кедест сокицятнень. Эщо аволь умок мон ульнень тесэ и пас, и инязор, а ней?... Ней сынь отряд марто. Сынь штобу варчтамс ды пурнамс тия-тува кекшень паро чим... Эх!...

Приказов. Иля ризна!... Курок таго улят азор. Ловажаст эйстэ вачкатано дворецт.

Каштанов. Те эщо а неяви... Якстеретне Казанонть саизь одов, эцить тей.

Приказов. Мезе теи те штапо ордась? а одижаст, а припасост... Орудиясткак насмехень кисэ. Лотка алга пурнызь армияст. Ха ха ха!

Каштанов. Ленин ютксост.

Приказов. Ленин!.. Мейле мезе?.. Ленинэнь минек генералтнэ пряшылдымензэ тапасызь ды морозо морави, Ленин!... Ха-ха.

Каштанов. Сон превей ломанесь... Машты массатнень организовамост...

Приказов. Тон тонськак бернят. Клас клас лангс сыргась, эряви улемс кшниде калгодокс... Ки ули седе калгодо...

Каштанов. Се прякс ары, хочеш мереме? Мон тень умок чарькодия.

Приказов. Сокицятне мельганок туиньдеряйть — минь ульдяно... Минь прятне ульдян?

Каштанов. Туить ли?

Приказов. Эрьва сокицясь — собственник... Эрявить парынестэ картамс... Теде веде сыть эщо комсешка вооруженнойть... Тейдяно мобилизация.

Каштанов. Улезе тонь правдась правдакс.

Приказов. Улияк, минек маро весе военной спецнэ. Хе хе-хе!..

Каштанов. Истямо паро чокшнесь ашолгадомс чолидить?..

Приказов. Да... Ки марто истя ютась чокшнэ ашолгадомс чолидить.

Каштанов. Тейтерне ули тесэ, тошнадо, горядо шка ютавтнянь маронзо.

Приказов. Мазый?

Каштанов. Аволь берятнеде.

Приказов. Цюр! Моньгак частем улезеэ эйсензэ.

Каштанов. Васня монць балуван. Хе-хе-хе.

Приказов. Тон эно бойка!... Военнойкс. Ха-ха-ха.

Каштанов. Монь эйстэ а оргодеви (Туить)

ЯВЛЕНИЯСЬ 2-це.

Лисить Тая ды Матря.

Тая. Боярось некак?

Матря. Сон.

Тая. Кона причасто появась?

Матря. Колмоце чи ули, кода састь.

Тая. Вай!

Матря. Котошканест састь... Ластет... Панжизь бояронь кудонть ды эрить.

Тая. Кузнецень Зоянть чей пильгензеяк а токшить.

Матря. Мекс?

Тая. Юрась-яжась яла тензэ козяйкакс.

Матря. Кинень?...

Тая. Бояронтень.., Ха-ха-ха!.. Сайсы ней сонзо боярось!?.

Матря. Сайсыяк, мазый причась.

Тая. Гимназиясо тонавтнесь, минек ялганть вакска варма юты, судозояк прядонзо верев кепедезь.

Матря. Учоной ломанесь уш яла истяня.

Тая. Улко ашти озадо эсист икеле... Илька токизе. Ха ха ха!

Матря. Мейле?

Тая. Кумацекс велявсь. Необразованнойть, мери, тынь. Ха-ха-ха! Попось оно Филянь черничкантень яки. Тожо нать, токшесы образованнойкс.

Матря. Маньчат! Карми ней поп истямо тевга якамо!

Тая. Эно мезе! Аштекая аламос бути а сы...

Матря. А кемдян.

Тая. Моньсь неия... Те порава совась ды зорянь човор тусь Илька евтнизе, эрьва чокшнэ сакшны.

Матря. Дай ванстасынек течи.

Тая. Давай!..

Матря. Ки бутим сы... (Кекшить кавонест).

ЯВЛЕНИЯСЬ 3-це.

Лисить сацто Каштанов ды Зоя.

Каштанов. Кодамо паро чокшнесь!.. Дай озатано

Зоя. Пек паро. (Озыть).

Каштанов. Мекс кувать эзить са?

Зоя. А ютко ульнесь... Тетямгак кувать эзь маде.

Каштанов. Мезень а юткось?

Зоя. Сякой мезень... Ней эрьва тевесь монь ланксо: и кудо ушт, и лиясо робутак... Авам кулось.

Каштанов. Курок мезеньгак рудазов тевсэ а кармат пулькамо. Аразди сень кисэ шачить истямо мазыйкс.

Зоя. Ков молят а теят.

Каштанов. А кармат тееме... Наряжатан прок куклыне... Зоинем, седей пельскем!.. (Паласы).

Зоя. Истя иля... Истя несамизь.

Каштанов. Вачкасамак?

Зоя. А содан.

Каштанов. Ки-жо соды?

Зоя. Вечктян, умок вечктян... Кода туить тестэ — пачк седеем сэрець.

Каштанов. Молят тень козяйкакс?..

Зоя. А содан.

Каштанов. Таго а содан...

Зоя. Тон боярат... Тон сюпават...

Каштанов. Ней монь меземгак арась. Но... Ух... А басян... Вечксамак?

Зоя. Вечктан.

Каштанов. (Паласы). Истя умок меревлить (Паласы)

Зоя. Истя иля! Кияк несамизь, пеедеме кармить.

Каштанов. (Таго паласы). Кадык несамизь... Вандый молян чиямот?..

Зоя. Мольть.

Каштанов. Часиям монь... Радостькем... Весе ялгат сельмест кармить сявадомо.

Зоя. Монь эйсэ аламо радостесь: сокицянь тейтерян.

Каштанов. Одат, мазыят, учоноят, превеят. Менельсэ чиденть пароят. Паламак куть весть.

Зоя. А палатан.

Каштанов. Мекс.

Зоя. Виздян.

Каштанов. Эно мон а виздян (Паласы). Адя лоткасо уйнетяно... Ней паро!... Ведесь прок сиянь... Уйдяно виренть енов. Тосо ней цековт морыть.

Зоя. Мон пелян.

Каштанов. Мезде пелят?

Зоя. Эрьва мезде.

Каштанов. Примеркс?

Зоя. Ваямодо.

Каштанов. А кие уимадо сех кол велесэнть?.. Кие? Аволь тон?

Зоя. Мон.

Каштанов. Кода эно пелят?

Зоя. Тонь эйстэ пелян.

Каштанов. (Сюкони) Пасиба теть... Тонсть молят тень козяйкакс... Пасиба!..

Зоя. Монь превен чарыть ды седеем истя чави... (Сти). Проводямак лучи кудов.

Каштанов. (Тоже сти). Адя провудятан, ансяк аволь кудов, а оно ведь чирев,.. Озатан лоткас. (Сайсы кавалалдо). Моньскак ваксозот озан.

Зоя. Мон прок ирецтан.

Каштанов. Те эри... Шлят ведьнесэнть ды юты... (Туить).

Тая ды Матря лисить.

Тая. Чиявтызе, ней лодкасо уйневсы.

Матря. Чей венчасы косояк.

Тая. Эно мезе... Учок кискань пельде пачалксеть — бояронь пельде паро.

Матря. Жаль юми тейтересь.

Тая. Састо!.. Ки бутим сы... (Кавонест кекшить).

ЯВЛЕНИЯСЬ 4-це.

Лисить Ваз Илька, Нумол Вася ды Огрань Кузьма.

Илька. Аштедэ, церат, тесэ кие-бутим кекшезь.

Тая. (Лиси). Илядо шума! Минь вансттано, кода попось Филянь-черничкантень сы... (Лиси Матряяк).

Кузьма. А яй?

Тая. Правдый.

Вася. Миньгак кадовтано.

Кузьма. Учосынек, кода сы ды пекстасынек кудонтень.

Вася. Те мезе! Вальмава лиси, оргоди шайтянось.

Илька. Намо лиси... Дайти лучи куянзо сорновсынек.

Вася. Коданя?

Илька. Таргатано пикс ульцянть трокс ды тандавсынек. Сон ношксты ды диньговсы човонензэ мастор-вакс.

Кузьма. Лац ули.

Матря. Ванодо илидезь чумондо.

Кузьма. Мезень кисэ!.. Сон роспутничи, минь чумот ульдяно!..

Илька. Отец духовной тожо!.. Бабинетне келензэ палцить!.. Кузьма, тынь Вася марто азьдо пиксэнь добувамо, а мон тейтерьтнень марто ванстомо кадован.

Вася. Кургот пек уш мазый, дурак ваз!.. Азе тон, а мон кадован.

Илька. Вирев оргодят, превей нумоло. Ванстомат сестэ ванстовить...

Кузьма. Тейтерьтне ськамосткак аштить. Адядо мирем. Тон, Илька, колияк ланксэк, а минь Вася маро пикс костояк салатано.

Вася. Мон эсинек ождят туян.

Илька. Мон эно колият лаксян. Кузьма, пущай кадови теск, ата шайтян тейтерьтне оргодить.

Вася. Кузьманень кадовомка.

Кузьма. Кадован. Азьдо ней бойкине.

Вася, Илька туить.

Тая. Тонгак кудов азе. Козяйкат ухват маро лиси вешнимат.

Матря. Азе, азе! Миньгак чумот ульдяно.

Тая. Урьвакстонь цера марто а мень ульцювамо.

Кузьма. Састо!" Сы!" (Кекшить).

ЯВЛЕНИЯСЬ 5-це.

Лиси Попось, Моли кенкшентень.

Попось. Кияк, некак, арась... Насила учовсь оймамось. (Стуки) Дуня! Дуня панчт!

(Кенкшесь панжови Попось сови). Кузьма, Тая, Матря лисить.

Кузьма. Лац!

Матря. Мон эзинь кем.

Тая. Ней кемат?

Матря. Вай, прахось саессэ!"

ЯВЛЕНИЯСЬ 6-це.

Лисить Вася, Илька.

Илька. Сась?

Тая. Тесэ.

Вася. Кува таргасынек пиксэнть?

Кузьма. (Невти) Вана тия.

(Таргасызь пиксенть, кода седе ен,)

Илька. Повнясы ней черничка ланга якамонть.

Кузьма. Ней рушадо стенанть ды кекшеде кодак лиси.

Матря. Минь нейке кекштяно.

Вася. Кекшеде.

Матря. Вай, месть тейнян! (Кекшить. Тая лиси)

Илька. (Стуки стенанть) Пожар! Пожар!

Кузьма. Лиседе!" Лиседе!" (Стукить эрьва ендо).

Попось (лиси. Весе кекшить)

Попось. Косо? Косо пожорось?

Кузьма. (Шуми каткакс). Мяау-у!

Илька. Мяв! Мяв! Мяв!

Весе. (Мявкснить). Мяау-у! Мяау-у!

Попось. (Ношсты ды пры пиксэнть трокс.) Владыка! (Сти ды ношксы).

Весе. Ха-Ха-Ха! Улю. Улю. Кирдедэ! Кирдедэ! Ор, ор, кирдедэ!"

Кузьма. (Лиси). Лац тенци улицянть кувалт.

Вася. Владыканть лецнизе, нать, вейсэ яксекшнэсть.

Илька. Сень уш бабазо арась, а минекенть паро галанкашка.

Тая. Кудов, кудов пора.

Илька. Аштеде аламос... Моратано морошка,

Матря. Ашолгады курок.

Тая. Стиньдеряйть авидинь, истямо невтить моро (Туить Матря маро).

Вася. Иля нолда.

Илька. Кадык туить. Правдыйкс курок ашолгады.

Вася. Мон алаша вакс туян.

Кузьма. Косо тонь тертязь?

Вася. Леенть чиресэ, Илькань тосот.

Кузьма. Моньгак тосот, адядо вейсэ.

ЯВЛЕНИЯСЬ 7-це.

Лиси Костя.

Костя. Аштедэ, ялгат! Мон теньк евтан од куля.

Илька. Бойка басяк... Монь удомам сась.

Костя. Валцке удомат явавсызь: Каштоновнень сась отьяд. Вандый теить мобилизация. Самай тыньк годонь чачовтнэнь сайсызь.

Кузьма. Косто тон содат?

Костя. Марить басямодо эсь ютковаст. Приказ тусть, штобу сокицянь цератне араст Советской властенть каршо туреме бояртнэнь ды сюпавтнэнь паро-чист кисэ.

Илька. (Невти кулак) Тень вана танстэнзэ васня кадык штюпатьсызь.

Вася. Мон уш а молян войнав, лучи урьвакстан.

Илька. Монгак урьвакстан.

Костя. Вандый урьваксттадызь, кода минек урьвакстымизь германской войнась... Кие советэнь кисэ — орготь вирев, нярц эзидизь керча!

Кузьма. Миненек а кедь енкс бояр маро.

Илька. Вирев. Валцке вирев!

Костя. Прощайте знярц, Мон эщо кой-кинень кортан.

Илька. Адядо вейсэ! (Туить)

ЯВЛЕНИЯСЬ 8-це.

Лиси Приказов.

Приказов. Истя, истя!.. Хотел Каштановонь якамо кинзэ следямо, но эшкевинь советской агитатор ланкс... Хе-хе! Ламос а пачкодят.

(Туи мельгаст).

ЯВЛЕНИЯСЬ 9 це.

Лисить Каштанов ды Зоя.

Каштанов. Вандый таго мольть ведьчирев.

Зоя. А содан. (Кутмордасы). Иля туе!

Каштанов. Мон сизинь, удомам сась. Прощай!

Зоя. Мон кортыкселинь марот.

Каштанов. (Автне кургонзо). Ванды кортат. Удомам сась.

Зоя. Тон чиямон сыкселить, кона порава учотадызь?

Каштанов. Кенерят... Прощай!.. (Туи).

Зоя. Сергей! Сергей! Тусь... Манимим... Последний ломанькс теимим ды тусь... Тусь! (Пры ежовтомо. Сценась чаво).

ЯВЛЕНИЯСЬ 10-це.

Приказов вети сиведе Костянь кецензе револьвер.

Приказов. Мон теть невтян народонь мутямо. Мон теть невтян!

Костя. Нолдамак... Мон мездеяк а содан?

Приказов. А содат?.. Хе-хе! Шпион, агитатор! Монць маритинь... Валцке теть суд тейдяно... Хе—хе. Ней азе.

Костя. Валцке, валцке! (Ношксто)

Приказов. (леди мельганзо, Костя пры). Вана теть валцке... Минек судонок нурькине коммунистэнь кувалма. Агитировак ней мода мекшнень. (Туи).

Зоя. (сти). Косан? Кие леднесь? Неужли эсь прянзо ледизе? Сергей! (Моли) Сергей! (Велявсь) Ды те лелям. (Верев). Сон ледизе... Сон... (Пры кумажа ланкс). Леляй! Лелинем!

ЯВЛЕНИЯСЬ 11-це.

Лисить Илька, Кузьма.

Кузьма. Мезе теевсь?

Зоя. Лелям кулозь. Каштанов сонзо, ледизе.

Илька. Истя сынь минек маро!..

Кузьма. Сон поди жив. (Кунцолы седензэ). Кудов кандомс седе курок. Сон жив эщо.

Илька. Кудов... Седе курок. (Кепетьсызь).

Зоя. Лелинем! Лелинем! (Ранги вайгельсэ).

ЗАНАВЕС