| Нудейть, автор: Цыганов (И.) Н. // сборник Васень сятк, 1929. | Мордовская библиотека |
| Книга: Васень сятк. Эрзянь морот ды ёвтнимат. Пурнынзе А. Дуняшин. — СССР-энь Наротнэнь Центрань Издательствась, Москов, 1929. — с. 155—156 | |
| << Тикше ледимань моро << | >> Моро марто призывев (А. Бабиков) >> |
|
НУДЕЙТЬ
Нудейть, нудейть — моронь прудейть — Эрзянь коень вешкимат. Чинзэ марто стявтат удыйть Лазат седейть вечкеме. Нудей, нудей — морот чудийть. Тонь вайгелеть дикама. Зорясь лазы — стявтат видийть... Морот аштить — ацама. Вирь крайс озат — морот ёзат, Нолдат вайгель вирь-крайга: Моразь кайсят цянавкс вайсят Борознава, лугава. Киштийть учат, вайгель кучат — Элякадозь нолдасак. Пангот, руцят пурнат куцят — Дыля моронть верьгицак. Тотазь, тотазь туить потазь — Туить киштезь потамо. Ботазь, ботазь яки котась — Туи каресь киштеме. Морот ацат — ойметь кацак Паро моронь морамсто... „Мазый сацо — ожо сацо“ Серьгецынк тынь оймамсто. Нудей, нудей, тон ли кортнят Ташто пингень кельнесэ? Седейшкасто тон ли ёвтнят Пинге потмонь вайгельсэ? Эщо весть нудей кандымек Вайгель песэть вирьтненень, Чуди лей ваксс озавтымек Ды ветимек гайтненень. Нудейть, нудейть — моронь прудейть Эрзянь пингень ёвтницят. Морот пек уш седейс педить, Пингень кулянь сравтыцят. |
| << Тикше ледимань моро << | >> Моро марто призывев (А. Бабиков) >> |
| «Нудейть», автор: Цыганов (И.) Н. // сборник Васень сятк. Эрзянь морот ды ёвтнимат. — 1929. | |