| Чинь валгума, автор: Артур Моро // сборник Васень сятк; 1928. | Мордовская библиотека |
| Книга: Васень сятк. Эрзянь морот ды ёвтнимат. Пурнынзе А. Дуняшин. — СССР-энь Наротнэнь Центрань Издательствась, Москов, 1929. — с. 152—153 | |
| << Од пинге << | >> Тикше ледимань моро (И. Н. Цыганов) >> |
|
ЧИНЬ ВАЛГУМА
Лисинь паксяв, чевцтэ пуви вармась, Дроцни сырьнень колоснэнь эйсэ. Ней народось нуеме уш кармась: Жнейкасо, пелюмасо, мейсэ... Пелюмась вешки тундонь цёковнэкс, Чупавтни колоснэнь потмова. Пельтне аштить вере ашо ловнэкс; Од тейтерьть а якить лугава. Дергун жнейкась явши лапасонзо Мушко коморкс розень кудрятнень. Самавяскась цярны моросонзо, Живиявты превест эрзятнень. Тестэ неят ашо балаганнэ, Тосто марят эйкакш аварьди, — Пандо прясто чись лангозост ваны, Сэтьстэ цецят пекшесь певерьди. Стака пултнэ пракшность моданть ёжос: Кочколдыкень валтнэнь кунсолыть. Келей паксясь вельтявсь олго-ожос. Менельсэнть тештетне цивтёрдыть. Самаваскясь лоткась цярномадо, Крандаз ало пелимась оймси. А маряви жнейкась дернимадо, Ансяк толонть варминесь пувси. Ансяк марят, эйкакш мацти ава Стамбарнэстэ моразь: „Бай-бай-бай“... Сизезь ярснить алашат лугава. — ...Истя ульнинь... паксясо, Оляй. ★
|
| << Од пинге << | >> Тикше ледимань моро (И. Н. Цыганов) >> |
| «Чинь валгума», автор: Артур Моро // сборник Васень сятк. Эрзянь морот ды ёвтнимат. — 1929. | |