| Пекшень дуткине, автор: Артур Моро // сборник Васень сятк; 1927, 28 августа. | Мордовская библиотека |
| Книга: Васень сятк. Эрзянь морот ды ёвтнимат. Пурнынзе А. Дуняшин. — СССР-энь Наротнэнь Центрань Издательствась, Москов, 1929. — с. 146—149 | |
| << Артур Моро << | >> Пингень эрямо >> |
|
ПЕКШЕНЬ ДУТКИНЕ
Мон молинь вирев, Керинь дуткине, Озынь лей чирев, Лейсэнть уткине. Уткинесь укшны, Сэтьстэ гогорди, Варминесь чейтнень Састо лыйневти. Чизэ валгумав Кияванзо тусь. Уткась ялгине Чей пулостонть мусь. Сынь вейсэ гогнозь Чейнетнень кадызь, Бойкасто лапнозь Пряст эйстэнь кекшизь. Варштынь леентень — Сынь а неявить, Кунсолан эйсэст — Сынь а марявить. Мейле дуткинем Курок теия, Моронь морамо Прям анокстыя. Од дуткинесэнть Карминь морамо, Дуткась ломанекс Кармась кортамо. — Вай, шачинь-касынь, Мон вирь потминес. Цецяка куншкас, Покш лей чиринес... Ламо паро тевть Тестэ мон неинь... Ламо мазый валт Тестэ мон маринь. Троицянь чистэ Од тейтерь, цёра, Монь алов озасть, Морынест моразь. Цецятнень лепштизь Раказь, пеедезь, Од пораст кортызь, Мерят, аварьдезь. Тейтерьнесь кармась Рангозь рангомо, Од цёрынентень Састо кортамо. — Эх, Ваня, Ваня... Тон сюпав цёрат, Сюпавонь тейтерь Козяйкакс саят. Мон — бедной тейтерь... Ланксон пеедят, Эрьва таркава Тон эйсэнь маньшат. Прок цецякс лепштик Монь мазый-чинем. Виензэ маштык Монь од седейнем Весе тумотне Пряст нуварьгавтызь, Вирень нармутне Морост лоткавтызь. Нолдызе прянзо Ваня, думазевсь, Аламос аштесь — Мейле кортазевсь. — Иля правт сельветь, Таня — ялгинем, Иляк калавтне Поцо седейнем. Кадык родноень Беднойть а вечкить, Кадык атятне Минек ланкс ирныть — Сюпав тейтерь ланкс Тонь а полавттан, Михалов малав Козейкакс сайдян: Таня пеедезь Ваня ланкс варштась, Вирьсэ килеекс Кавнест кутмордавсть. Кортамост кортызь Монь лопан ало, Мейле нармутне Кармасть морамо. Тумотнеяк пряст Верев кепедизь, Мазый чи-валдонть Лопасост вельтизь. Не од ломатне Уткатне лацо, Гогнозь тусть кудов Пек весёласто. Вана мезе тень Дуткинесь кортась, Вана кодамо Морыне морась. |
| << Артур Моро << | >> Пингень эрямо >> |
| «Пекшень дуткине», автор: Артур Моро // сборник Васень сятк. Эрзянь морот ды ёвтнимат. — 1929. | |