ИЛЬЯ КРИВОШЕЕВ

Мон сюровидицянь-сокицянь цёран. Тетям ды авам эрзят. Тетям умок кулось. Сёрмас сон а маштыль. А машты сёрмас авамгак. Авам машты моронь лацеме ды лайшеме. Сонзэ кувалт монгак тонадынь эрзянь моронь лацеме-полалеме. Шачинь июль ковонть 23-це чистэ 1898-це иестэ Маяк хуторсо, Пылковонь волостьсэ, Петровской уездсэ, Саратовонь губернясо. Кода топоцть тень 8 иеть, карминь тонавтнеме учильнясо. 1910-це иестэ нолдымизь тонавтнеме 2-х классной учильняв. 1913-це иестэнть туинь тонавтнеме Казанень инородческой учительской семинарияв. Семинариясонть тонавтнинь ниле иеть. Прядыя сонзэ 1917-це иестэ. Секе иестэнть саимизь военной службав. Военной службасо аравтымизь тонавтнеме Военной училищав Казаньсэ жо. Тонавтнинь те учильнясонть 4 ковт. Нолдымизь прапорщикекс ды кучимизь 133 пехотной полков Самаров. Ниле ковдо мейле демобилизовимя. Туинь кудов. Аламос ульнинь учителькс. 1918-це иестэнть декабрянь ковстонть саимизь службав Якстере армияв. Якстере армиясо ульнинь 1921-це иес. Службадо мейле 1921—1923-це иетнень ульнинь учителькс I ступенень ды II ступенень школасо ды ульнинь секретарькс-инструкторкс Петровской уотнаробсо. 1923-це иестэнть туинь Саратов ошонь университетэв тонавтнеме. Тонавтнинь педфаксо. Тонавтнимам прядыя 1927-це иестэ. Секе иестэнть арынь преподавателькс Петровской эрзянь педтехникумс, косо роботан нейгак. Тонавтома предметэм — педология ды обществоведение.

Эрзянь моронь сёрмалеме карминь 1923-це иестэ. Васень мором сёрмадозель — „Пакшатненень“ —

„Май месецень Тынь цецинеть Маень тветэнь Тынь наряднэть!..   ........

Те порань шкас весемезэ сёрмадынь кавтошка сядо моро. Литературной псевдонимем (лемем) Илька Морыця. Мезде ды кода сёрмадан — морон ёвтасызь.

★