ЧОМБОЛКС ¹)

I

Федя-низэ стядо озны, салава молитва ловны, пек а шуми: илязо сырьгозе атязо, ансяк Федя-атя аламодо маряви носкомодо. Копст!.. таркастонть ёртозь ёртовсь друк Федя-атя.

— Эх, баба, он неинь... Берянь онось, пелян натой ёвтниманзояк.

Федя-низэ цюркставсь, кедензэ кодак чекамсто путызе конязонзо, истяк кадовсь тоск.

Федя-атя ёвтни: „Ливтян яла верев ды кода бути чирьстэ, бокав лацо. Кузинь верев, ковия, цют неяви масторось; мейле карминь валгомо. Валгинь, валгинь, понгинь покш ведь куншкас, веденть куншкасо буто столба — се столбанть пряс озынь. Арьсян: ков ней туемс? Перть пельга ведь... Сырьгозинь се веденть куншкас. Мейсь неиять те ононть — а содан.“

— Вай, Федя... онот аволь паро.

Федя-нинзэ окойники кедезэ конястонзо саевсь: — берянь онот, Федя: ливтямось — зыян, ведесь — сельведь, меньгак покш сельветь тенек улить. Аздан кода вашонть вере пазось ванызе. Чийть седе курок, варштык...

Федя-атя каподизе шапканзо, тонксь пильгезэнзэ ступнят, ношкстась кардазов вашонзо варштамо. Чийсь — вашозо псилгадозь. „Чомболкс эйсэнзэ куцтясь вень перть“, — арьсезевсь Федя-атя. Напустясь кудов, а неи пильгензэ аловгак. Кисказо каршозонзо арць, пильгензэ ало ёлны. Федя-атя цют эзь пра троксканзо. — Мень причат пильгалов эцят, — пижакаць сон, пстидизе кисканть коняс.

Чийсь кудов, нолдызе прянзо, кашт моли, пели — нинзэ кодаяк а тандавтомс.

Бабанть седей а кирьди, седе курок каршозонзо чийсь, кевксни.

— Да, — мери Федя, — „лукавоесь“ появакшнось, вашось ведь-тол поцо. Эно кенеринь лисеме, ато аздан месть уш улевельтькак. Чомболксось превей: кодак матидевинь — истяк сась. Эка стака мор саинзат.

— Вай, авакай, Федя, эряви молемс Яков-атянень, ато беда: аздан месть улитькак седе тов...

Яков-атя „весеме тевень содыця“, эйсэнзэ велесэнть кедь ланксо кантлить. Куть кодамо орма марто — чиить сонензэ, конань мезе тееви — сонензэ, кинь превензэ а сатыть — сонензэ. Весе превтне ды содамотне ансяк сонзэ, кияк зняро а соды.

— Мон молян тензэ, — мери Федя-атя, — энялгадан икелензэ.

II

Обеттэ мейле Федя-атя тусь Яков-атянень, сюконясь пильгезэнзэ, энялды:

— Яков Федорыч, жалямак, — тейть тень паро, монськак знярдояк а стувттан...

Яков-атя машнити. Ваны — весе тензэ сюконякшныть — пря лацевти.

— Мень сыре прясон лечамо якамо, — корты Яков-атя, — ловажангак весе калдордыть, тынь яла а кацамизь, берянь содыця ломаннень эрямось.

— Кода тейсак Яков Федорыч? — энялды Федя-атя. — Эрямсто месть а эрсить... Тон ськамот минек превей ломаненек. Жалямизь.

Яков-атянь солась седеезэ. Кортавсь.

— Адя эно, мезе тосо теевсь тенк...

Састь Федя марто Яков-атят, совасть Федянь кудос. Федя кармась ёвтнеме кода ульнесь тевесь. Яков-атя кунсолызе, кармась эйсэнзэ мурнеме:

— Пазнэнь а ознутадо, апак чека матьтядо, знярдояк крёст конязонк а тейдядо, безбожникт истят. Секс пазось эйсэнк наказы ды а лоткияк, бути карматадо апак чека маднеме.

Шумась кувать, знярс Федя-низэ эзь тарга бутулка „прякске“ ды эзь мере тензэ озамо столь экшс. Яков-атя оймась, валонзо чевтемсть, кармась кортамо апак шума. Сон пек уш винанть вечксы, кодак неизе, натой ёжозояк майшсь, сельмензэ налказевсть. Ламо кортась Яков-атя. Косто появась нечистой силась, кодамо сон зыянонть канды ломатненень. Федя атят-бабат кургонь автезь кунсолость.

Яков-атя тонавтызе Федянь, кода бороцямс „аванькс виенть“ марто.

— Тон, Федя, вана месть тейть вашонть кувалт: мук костояк паро ломань, кона ава-лемсэ а крои, аволь кежей, пазнэнь озныця ды виев. Кода истямо ломань муят, саеде кедезэнк эрьбат ды арадо кардо-кенкшенть кавто бокава, кодак сы „нечистоесь“, тынь сонзэ кундынк ды илейтнесэ яла меньгенерть, яла меньгенерть чаводо се шкас, знярс илейтнестэ кадувить ансяк комельтне. Кирьдеде эйсэнзэ, илинк нолда эрьбатнень раздявомс, тынсь кашт моледе. Сон, „нечистоесь“, ёжов, тееви сякойкс: ломанькс, скотинакс, эрьва мезекс; тееви кодамояк содавикс ломанькс, карми энялдомо, — илинк кунсоло, хоть родной тетякс теевезэ. Кодак истя тейдядо, сон мейле вестькак а сы, ойматадо эйстэнзэ.

Истя тонавтынзе Яков-атя и шожда прясо тусь кудов.

Федя-атя Яковонь туимадо мейле, бабанзо марто, арьси, кинь терьдемс. Терьдемс Стёпанонь... истяк ломанесь паро, сэтьме, а кроияк, — виезэ мезеяк арась, ве сурсо тулкадемс — пры. Терьдемс Сёма-атянь, тона виевгак, пек уш кежей. Те ломанесь секень вант тевенть седеяк коласы. Молян терьца Федотонь, сон ломанесь вадря, пазнэнь озныця, а крои, аволь кежей. Сонзэ виезэяк ламо, ломанесь здоров, бука машты.

Тусь Федот мельга. Тона кодаяк а синтреви. Истя, кода — арась. Меельсь пелев кода Федя-атя алтась тензэ пондо ямкст, Федот синдевсь:

„Мон, мери, грехте пелинь, секс эзинь соглася. Но рас теть ломань эряви, мон пусублян, шабра шабранзо кис аштезэ“.

Шкась ульнесь чокшнэ. Кавто шабрат мольсть кардонть ваксс, сайсть кедезэст эрьба пуцягат, сюлмизь тенцтькекс, арасть кардо-кенкшенть кавто бокава, кода тонавць Яков-атя, — учить, знярдо сы „нечистоесь.“

Яков-атя кудов эщо эзь пачколе, яла тия-тува совсесь. Шкась уш поздаль тензэ кудовгак туемс. Сырьгась кудо ёнов; друг лець мелезэнзэ Федя.

— Сон проклятоесь а теи истя, кода мон сонензэ меринь, — арьси Яков-атя, — молян варштаса.

Тусь. Моли — сяворькшни, сонсь моткоди: „Мон молян, бути а кунсолат эйсэнь, пародояк а неят...“

Мольсь и эци кардо-кенкшентень. Федя марто Федот ваныть — ломань сы. Нать, „нечистоесь“... Кода кундасызь, кода кундасызь! — давай эйсэнзэ эрьбасо кува понксь: пря ланга, чама ланга. Ве паро тарка эсть кат эйзэнзэ, весе керьсизь. Яков-атя пижни:

— Истя месть тейнитядо?.. Те мон — Яков-атя. Эли ормаскадыде? Мон сынь варштамонк, арыде арась кенкшенть ланкс...

Федя марто Федот кашт молить. Сынь содасызь: нечистоесь эрьва мезекс тейневи, Яков-атякскак. Сынст истя тонавтызь: ки ули — чавт, тонсь кашт мольть.

Кавто шабратне чавить и чавить, кедесткак мик сизесть, эрьбатне яла целат. Кой-как янгавсть тенст эрьба пуцягатне Яков-атя ланкс. Менсь кецтэст Яков-атя, верь поцо ношкстась кудов.

III

Яков-атя кежиявць Федя ланкс. Велень келес срамизь сонзэ, Яков-атянь. Тень истяк кадомс а эряви. Яков-атя макссь лангозост суц.

Суцонть кортасть весе вицтэ. Яков-атя жалувась: „Мон жалиять те ломаненть, тонавтыять, кода бороцямс чомболксонть марто. Молинь варштамо — сынь кармасть чавоман. Зняро пижнинь тенст: те мон Яков-атя, сынь прок кснавдо кургост пештизь, вейке вал а ёвтыть, ансяк содыть вейке — чавить ды чавить. Тень кис эряви сынст судямс.“

Федя марто Федот те чумонть эсь лангозост а саить.

— Минек, мерить, сонсь истя тонавтымизь. Сонсь мерсь: нечистоесь ёжов, эрьва мезекс тееви; тынь, мери, лангозонзо илядо вано, чаводо ды весе. Минь Яков-атянь тонавтуманть коряс теинеккак: минь думинек нечистоесь Яков-атякс велявць, секс путынек тензэ паметь. Нать минь чумотано тесэ?

Судсь кунсолынзе не кортамотнень, ёвтызе эсь валонзо:

— Федя марто Федотонь чумост арасть. Сынь чопудат ломатне, сынст кода тонавцызь — истя кармить теемеяк. Чумось сонсь Яков-атя. Эсинзэ тонавтуматне прасть эсь котьмерензэ ланкс. Мезе тейсь — секень нейсь. Аместь ломань ланкс чумот тарксемс.

Судсь теке ланкс эзь лотка. Народонь маньшиманть кис Яков-атя ланкс пуць кемень целковойть штраф. Не ярмакнэнь судсь мерсь максомо секе велень культпросветс, рамамс лангозост кинишкат, конатнесэ толкувазь кодамо зыянонть кандыть орожиятне народонтень.

Яков-атянь мельс эзь тук судсь.

Федя-атя лоткась орожиянь кемимадо. Сон ней совась эрямо коллективс. Ялга ютксо басямсто, сеецтэ лецнекшнесы, кода Яков-атянень „ушнесть баня“ эрьбань пуцягасо.

— Шайтянонзо, мери, паньсинек. Аванькс вий маштынек.

---

^{1) Чомболкс — ласка.↩}