МИКА

I

„Алексеевка“ сукнань кодамо фабрикась ламо иеть уш эри пакся куншкасо. Авасоло эйстэнзэ чугункань кинь станция. Малаванзо латкова чуди апокш лейне, конань кувалт сараскекс ланчесь велине.

Чизэ ков-чи яла седе верев кузи. Ловось олгине алдо солы. Лато ланксто чинь куншкава кольги ведне. Лоткасть кудо прясо пижнимадо псакатне, — ульнесть март ковонь кеветееце чи...

Оря, Груня, Устя ды Настя ёжовтомо капшасть: прядызь остатка чинь роботаст.

— Тынь ванодо, ават, эзь мерявткак, кода ютась телесь, — корты аватненень Оря. — Умок-ли сынек тезэнь роботамо. Умок-ли ульнинек нолго тулот, велень ават, ней вейке телес тонадынек станоксо кодамо. Вадря штукась — фабрикась. Тусь мелезэнь прясто пилькс.

— Тонеть нама туи: одат ды дошужат, — мерсь Устя, — тон ансяк ськамот станоксо роботат, монь мельс понань пувсимась ды кавшакавтнимась пек эзь тук. Ды семиямгак кудосо ськамонзо. Ливтязь кудов ливтявлинь — вандынь чись а учови. Кемголмово иинесэ цёра-пакшинем кудазоркс кадовсь, сонсь кшеяк пиди-пани.

Устя ёвтниксэль эщо ве тевде эсь пингензэ эйстэ, кода яла сон ёвтнекшнэсь эрьва чине роботадо мейле кудов молемстэ. Груня валонзо трокс прась:

— Минек весень вейкеть часиянок. Мон мирьдень кецэяк путём ладом эзинь эря, ламо эрьва месть ютасть пряван. Берянесь минек эрямосонть пек ламо. Кода маштомс те беряненть — теде вана басяка седе ламо. Икелев эряви ваномс, сазорт, — удалсенть кис аместь лайшемс...

— Фабрикась кода а кода лездась тень. Наживинь хоть аволь пек ламо, но икелень таштавкснэ марто алашине кодаяк раман. Цёрканть марто кодаяк майситяно. Паряк мирьдентькак костояк вере пазось канцы. Онок, Сидоркань Эхремде вейксэ иеть кияк эзь сода, — ней сась.

Истя шольдерьдезь мольсть аватне, кортасть кона ков тейсынзе наживазь ярмаконзо. Пачкоцть велентень, срацть удома таркава.

Оря ськамонзо наживась 150 целковойть. Груня — 100 целковой. Устянь Настя марто кадовкшность саемс ведьгеменень-ведьгеменень целковой, — пелест сынь саекшнызь икелев...

Саизь обед шкава 350 целковойтнень ниле гумашкасо. Оря весень кис лемензэ сёрмацтызе (сон ансяк ськамонзо сёрмас содыцяль). Стызь ве таркас апак полавт — Орянь лакумкас ниле гумашкатнень, обидасть-тейсть ды сырьгасть састыне эсист велев. Велентень фабрикастонть кемень вайгельбеть.

Чись ульнесь маней. Веть певерсь аламошка ловнэ — кинть почакавтызе. Аватне мольсть састо, кортасть мезде понксь.

Груня ёвтнизе, кодамо чуморкс тейтерь ульнесь оцто. Кода урядникесь плетьсэ чавизе паксясо, мейсь сон, Груня, эзь манявт ды эзь манявт тензэ. Лецтизе сеньгак, кода силой максызь пияниця, но сюпав Ваньканень мирьденень... Лецни Груня ютась читнень, конат эрязь сельведь поцо ды мельс апаросо, прок сельмень сиядозь мери:

— Шутя ней тейтерьтне эрить: модаяк тенст максыть, ульцясояк кияк а обидякшносынзе. Од цёратнеяк превейгацть: седикеле лацо а турькшныть. Шумбра улезэ не праватнень нолдыцясь.

Весе кортасть, ансяк Оря течи аволь весёлаль. Седеезэ мейсь бути ризнэсь.

Эсть фатяяк аватне, кода пачкоцть „Норка“ велентень. Пеле ки ютавсь, — мерсь Оря. — Вете вайгельбетнень кодаяк ютасынек, кудосо ульдяно.

Ютыть Орянь патянзо орта ланга.

— Мон, ялгат, сован аламос патянень — содавца, тынь моледе састыне, мон сасатадызь.

— Куватьс иля аште, минь учомат а карматано, — сергецть ве вайгельсэ аватне ды тусть веле юткованть икелев...

Патясь Орянень пек эзь радува, Оряяк истя. Повнясы Оря, кода тетянзо-аванзо куломадо мейле эрясь сон патянзо кецэ, кода те „родной“ патясь нарьксесь ланксонзо. Аволь сизе Оря, аволь соваяк патянстэнь.

Кевкснизе патясь, кодамо Орянь ёжозо, кода сон роботась фабрикасо, ламо аволь наживась. Шнызе Оря фабриканть, ёвтызе зняро наживась сонсь, зняро ялгатне, ансяк эссе ёвта, кинь кецэть ярмакнэ.

Кода маризе патясь, зняро ярмак наживасть ниле аватне, кедензэ вачкудинзе. Сеск чевтемсь, кармась каванямо.

Орянь патязо тусь мацтов пангонь кис. Мацсто лисемстэ вастызе мирьдензэ, салава тензэ тошкась месть-бути, кильдевць мирьденть кецтэ алаша ды сонсь совась панкнэнь марто кудов Орянь кававнямо.

Патянть мирьдесь — Мика ды шабрань цёра (ялгазо) — ардыть ёжовтомо веле песэ латконтень...

— Тия секень вант лисивдяно, — мерсь Миканень ялгазо.

— Адя, Оргав, ломанькс эщо прят ловсак... — Мика ялгадонть смел ульнесь. Вачкодизе алашанть ды тусь латконть потмаксов кивтеме.

— Моньсесь эли а лисиви! — ранкстась Микань ялгазо, вачкудизе алашанзо, ды тусь Мика мельга...

Вайгельбешка арцть лов потмова кивтеме. Алашатне кармасть сиземе. Чов тусь ланкстост.

— Секень вант поздаятано, — пшкаць Миканень ялгазо.

— Адя паньть мезе вий, — ранкстась Мика. — Те латко прясонть а сасасынекдеряй, мейле уш менить, — вейкеть таркасо чить а кармат.

Чись валгума ланксоль. Якстерьгадомо кармась менелесь. Алашатнень майшсь виест. Пезнасть шушмо поц, а лисивить. Азортнэ валксть ланкстост ды чиезь тусть икелев, алашатнень кадызь ловонть поц.

Шкась яла моли. Колмо аватне пачкоцть латко прянтень... Оря яла арась.

— Яла а неяви, — кежейстэ мерсь Устя ялганстэнь, — нать удомо кадовсь.

— Удомо а кадови, — мерсь Груня. — Мон патянзо содаса: апек седей мариця ломанесь, ульнинь кецэст сёксня, фабрикав молемстэ — Оря марто совсинек. Пек а капши каванямо; мирьдезэяк овтонь кондямо, лома ланкс парсте а ванувияк. Учосынек, ават, Орянь. Ськамонзо зняро ярмак марто кадомс а эряви. Меньгак берянь тев илязо листь...

Лоткасть аватне самай латко прянтень, учить Орянь. Юты вакскаст атине:

— Покштяй, вастыньдеряй каршозот молиця ава, мерть тензэ капшамо, минь тесэ учотано эйсэнзэ, — мерсь атинентень Груня. Атинесь отвечась каршозонзо ды тусь икелев сяворькшнэзь потаня кияванть.

Орянь седеезэ ризны — васов кадовсь ялгадонзо. Патязо эрьва кодат тевть таркси, ансяк кирьдемс седе куватьс.

Микань ялганзо марто келесткак лиссть — келить лов потмованть, капшить латко прянтень.

Лоткась Оря патянзо кунсоломадо, прощась мартонзо ды тусь чиезь лацо веле юткованть.

Аватне учить яла латко чиресэнть. Устя секень мери: — А сы, кадовсь удомо, адядо, а учови тенек. Груня содасы Орянь виде-чинзэ, содасы, Оря мезе мери — сень тейсы. Сон секень корты: — Сы, учомс эряви.

Вачо верьгизэкс сизесть Мика ялганзо марто. Путыть остатка виест. Ялгазо Микань кармась сиземе.

— Ну, Мика, стяко мольдяно, а кенердяно, те шкас уш ютасть латконть трокс. Монь виемгак майшсь.

— Аламо ланкс ванозь эли велявттано. Адя уш мезе ули, аволь васоло, кодаяк кельдяно, паряк таланозонок састо молить. Кармасть остатка виест путомо...

...Чинть пелезэ уш нолайшсь пандонть экшс. Мазыйстэ палы чи валгумась. Аватнень седеест кармасть ризнэме.

— Адядо, а сы нать, чопотьтяно, — мерсь Устя. Грунянь мелезэ арасель. Ялганзо сырьгасть, сонензэяк савсь туемс мельгаст.

Валксть аватне састыне латконтень.

— Аштек! Кеденк верев! — ранкстась Микань ялгазо. Чийсь, кундынзе Грунянь Настя марто. Мика кадовкшнось удалов — капши, чии, плащат путы. Чийсь, кундызе Устянь, кона кенерькшнэсь уш латкстонть лисеме.

— Караул! Разбой! — пижакаць Устя, но мариця кияк арасель. Атинесь уш васололь...

— Косот ярмаконк? Максынк! — ранкстась Мика Устянь ланкс. Ялгазо тормошась Настянь Груня марто.

— Мень ярмак? — пшкацть тандадомань вайгельсэ аватне: — минськак доватано, пиштьтяно вачодо, — чей несынк месть ланксонок.

— Маньшеде эщо! — ранкстась мезе вий Мика ды таргизе Устянь вельксс пеелензэ...

Груня содызе Микань вайгелензэ:

— Минь, Мика леляй, кадынек тоско ярмакнэнь, эзизь макст тенек.

Микань эзь кирьдевть кедезэ... пеелезэ пезнась Устянь мешц. Сон фатясь Груня содызе вайгелензэ.

Ялгазо печкизе Настянь. Груня меньсь ды тусь чиезь, ёжовтомо, благой вайгельсэ пижнезь. Лиссь латко потмаксто — кияк а неяви. Миканень ялгазо пижни:

— Кирть, кирть — менсь.

Мика кадызе печкезь Устянь, ки соды косто появась тензэ эщо вий — напустясь Грунянь мельга. Сасызе... Энялдозь прась пильгезэнзэ Груня. Пеелесь Груняньгак эссе кат...

Оря лиссь веленть ушов... Каршозонзо атя.

— Покштяй, васолдо вастыть колмо ават? — кевкстизе атиненть Оря.

— Латконть чирестэ, сазор, тонть эйсэ учить. Мерсть седе капшавтомат. Мон теть, сазор, аволинь мере молеме. Сынь уш ней васолот, а сасавить теть. Чизэ чопотець. Сазор, эли арась роднят велесэнть? — теске удовлить. Веть ава ломаньнень аволь вадря молемс. Верьгист якить ды зрячей цёраяк обидятанзат.

Орянь мельс лецть ярмаконзо, потмонзо жуйк мерсь. Велявць амельсэ мекев патянстэнь.

Мика ялганзо марто кайсизь аватнень одижаст — вешнизь весе. Юкснизь пильгест, думасть цюлка поцо ярмакнэ, — тостояк эзизь мук.

— Эх, шайтян саевлинзе, — крои Мика, — виде кортасть аватне, эзизь получа. Мон те шайтян козейкантень сацтаса молимадо мейле, кирга орма ланганзо...

Вализь кулосьнень лов поц ды тусть алашаст латкстонть таргамо...

— Шумбра, патяй. Мекев сынь, — мерсь Оря ды ютась кенкш уголстонть икелев. Тона кежейстэ лангозонзо ванозевсь ды мери:

— Тонсь эщо мерят боевоян, пелят тонсить паксясо.

Мика-нинзэ седеезэ атаркасоль, — сон пельсь курок сы мирьдезэ ды маняви валдонзо.

— Мейсь велявтыть эно?

— Пелян, патякай, ава ломанян. Лиси кодамояк цёра ды нарьгасамам. Моньсинь питьнеськак зняро ды ялгатнень вачодо кацынь, пингем эрямс сюдоман кармить.

— Мейсь? — абунгадозь кевкстизе патязо, — эли ярмакнэ весе тонть кецэть?

— Ярмакнэ покшт, — мери Оря, — эсть полавтовт, весе монь кецэть. — Мика-нинзэ превензэ кармасть чарамо, азды месть ней тейнемс. Кортызе-теизе Орянь ды мацтизе полок ланкс.

Мика ялганзо марто пингест эрямс истя знярдояк эсть сизекшнэ. Таргизь лов поцто алашаст ды тусть кудо ёнов састыне.

Оря полокланксо а уды. Ризны, мейсь ялгадонзо кадовсь. Эцить пря потмозонзо эрьва мень арьсимат.

— Патяй, Мика лелям косо? — пшкаць полокланксто Оря.

— Шабрасо, нать, картасо налкси эли мезе. Эрьва чокшнэ симить самагондо ды налксить. Тевесткак теке, аместь тейнемс... Тон, сазором, эли яла а удат? Нать, эзить сизе? Шкась уш знярыя, — мать. Ялгат кис пек иля ризна, — сынь те шкас умок кудосот.

Мика-низэ эрьва кода мацьти сазоронзо. Содасы авась кодамо кежей мирьдезэ...

Оря прок чаркоць патянзо тевс-валс, теизе прянзо удыкс, сонсь эзь матидевть яла.

Совась Мика, кедензэ веревть.

— У, шайтян, тонгак эряват нолдамс сынст киява!

— Цу-цу, иля шума — ярмакнэ тескеть, — мерсь састыне, полок лангов невтезь, Мика-низэ. — Весе сазоронть кецэть. Шлить кедеть ды адя ярсак. Ковонзо валгомадо мейле усксак навоз марто.

Мика путызе суронзо турванзо ланкс и пелезь невць потолоконть ланкс.

— Уды, ансяк яла хорнось... — мери Мика-низэ ды кармась ужинэнь пурнамо.

Оря пшкадиксэль сеск, кодак совась Мика, ды эзь сато виезэ. Музгорьдевсь прок удуманзо пачк ды таго оймазевсь аламос. Мика нинзэ марто яла ярсыть.

Валксь Оря, буто удуманзо пачк полок ланкстонть ды кармась кенкшенть пелев молеме.

— Патяй, кискась а сусксамам? Ушов лисян.

— Арась, арась, — каик лангат шубанть, ато простудяват псилгадомань пачк.

Лиссь Оря кардазов. Таргизе оймензэ кувакасто, ёртызе шубанть плетень велькска, ды сонськак кирнавць мельганзо.

Вансы Оря, шабрасо тол, — думась совамо сынест удомо... Мольсь Оря вальманть алов, ансяк стукиксэль калиткаванть, — вансы тосояк верев кедень шлиця. Эзь таргавт Орянь оймезэ. Прыксэль сон сеск вальманть алов ды соракацть превензэ. Ёртызе ланкстонзо шубанть ды мезе вий напустясь мекев Алексеевка фабрикантень.

Учить Мика Мика-нинзэ марто — Оря а сови, учить а сови. Лиссть кардазов вешнемензэ, косояк арась... Мика чийни, талны, крои козяйканзо эйсэ. Лиссь ушов. Мика чийсь ялганстэнь. Вансы вальмалост Орянь шубазо. Чаркоць Мика кодат тевтне. Совась ялганстэнь, талакавтызе сонзэяк. Кундызь алашаст ды таго тусть ласте Оря мельга: Мика фабриканть пелев, ялгазо — кудо пелев.

Оря ёжовтомо алашадояк пек некак чии, — путы остатка виензэ. Оймезэ пись. Кадовсь квартиразонзо эщо пель вайгельбешка. Прась Оря ловонть ланкс ёжовтомо.

Мика те шкане каявсь вицтэ фабрикантень, думась Оря тов чии, — ютась велев пурдазь кинть вакска. Оря аштесь аламос празь ловонть ланксо, оймавтызе седеензэ ды тусь таго чиезь квартиразонзо.

Стявтызе Оря азоронзо. Тейсть булга. Оря сонсь чийнесь фабрикантень. Муизе милициянть. Кильцть алаша. Милициясь сайсь кавто комсомолецт-робочейть понятойкс ды Оря марто ношкстасть мезе вий Норка велентень.

Муизь Норка велень милициянть ды сонзэ марто пекстызь разбойникнэнь валськес арестанскойс. Валське тейсть допрос. Тевенть максызь суц. Микань ялганзо марто пекстызь, Мика-нинзэ кадызь эйкакшнэ марто судонть самс.

Читне-ветне ютасть, сокицятне сокасть, цветясть уш луга ланга цецятне... Сась судямо чиськак.

Мика-низэ тарка-эзем эзь мук — мелявць: судось судясы тюрьмав.

— Моненьгак нать валське суцонть кортамс сави? — кевкстизе Мика-низэ Орянь. — Чей сазор, суцонть а витькстат монь кувалт? Эйкакшнэнь хоть жалить. Пазось парот знярдояк а стувцы, кисэть озномо эйкакшнэ кармить. Ки думизе те тевенть? Содасак тоньськак Микань, кодамо розбойникесь. Тетянзо ирецтэнь пачк кабакс сонсь жо маштызе, — каясть кабачикенть ланкс. Панизь ломаненть Сибирев.

Оря кашт мольсь, седеезэ тол поцо, пельсь.

— Моньгак пекстыньдерясамизь, сазором, эйкакшнэ вачо кулыть, — таго яла энялды Мика-низэ.

Мика-низэ яла энялць, Оря мезеяк тензэ эзь мере, — сонзэ мельсэ ульнесть ялгатне; сон эзь вановт виде сельмсэ патянзо ланкс.

Судиясь панжизе судонть — весе ломатне шапкаст сайнизь.

Кевкстизь Микань. Кевкстизь ялганзо. Кевкстизь Мика-нинзэ. Весе тевенть толкувизь лиякс, Мика-нинзэ чумостонть овси ливтизь.

Пачкоць кортамс Орянень. Ёвтнизе Оря лиякс тевенть — истя, кода ульнесь. Мика-низэ вансы понгавтызь те тевентень сонзэяк, прась кияксокс ёжовтомо.

Судсь совещаниядо мейле мерсь: Микань ледемс ружиясо 48 часонь ютамс. Ялганстэнь кавксо иеть тюрьмасо ащемка амнистиявтомо. Мика-нинзэ туртов, аваксчинзэ кувалт, макссть ансяк кавто иеть исправтруддомс...