ОД КОЙСЭ

Аварць менелесь. Истя аварць Еляяк, кода полустанкав якась Васянь ильтямо.

— Кода ней карман ськамон эрямо? Таго кисэнь пшкадицян а улить.

— Иля аварьть, сяткинем. Кавто иень ютазь велявтан. Карматанок вейсэ эрямо.

Сторожось састыне лиссь вакзалнэстэнть, кавксть вачкодизе баяганть. Сырьгась поездэнь кондуктороськак.

— У-р-р-р-р! — човине вайгельсэ ранкстась свистоксонть.

— Т-т-у-у-у-т! — ранкстась каршозонзо паравозось.

Сырьгасть чарытне пиже ваготнэ ало.

— Ну, прощай... Илямак стувт тонгак.

Вася остаткадо кутмурдызе Елянь. Кеместэ палызе. Седе курок кирнавць пестэ колмоце вагононтень.

— В-ва-а-с-сь-а!

Вайгельсэ рангиксэль Еля — вайгелесь эзь лисе, сельветне поцёрсо чудесть. Эссе нее, кода раужо гуй лацо ютась ваксканзо поездэсь.

Неизе ансяк, кода Вася шапканзо саизе, месть бути пижнесь.

Весе од цёратне, Вася марто молицятне, ульнесть эсинзэ волостьстэ. Конань-конань сон содызе — вишка пинкстэ алаша ваксс яксесть. Маласо паксяст велетнень.

Пиземе пельтне ков бути сралесть, салавине лиссь сёксень чись. Вагон ало чарытне весёласто кортасть:

— Тра-ка-ту-ка... ту-ка ту-ка. Трака тука... Тррака-так... тра-ка-так...

Косто бути вагононь уголсто „призовщик“ таргась мешоксто гармония.

— И-и-й-й-э-е-х, цёрат! Месть судонк нолтнинк, прок невольниктядо?

Вася гармониянть малав арась. Кунсолы. Седейстэнзэ стакась новольсь.

Велесэ лацо сон ранкстась весёла моро. Пильгензэ сынсь кармасть топаеме. Чарытне седе чуросто вачкоесть. Марявсь паравозонть кувака вайгелезэ.

Вагонось лажакаць:

„Кода тирень авинем Монь эйсэ и-ильць, Весе роднян ды раськень Пурномкшность, чийсть...“

Прядовсь морось.

Эшалонось лоткась ошонь станциянть ваксс. Вакзалонть ашо стенанзо кувалт аштить музыкант труба марто. Кодак вагонсто лисеме кармасть „призывнойтне“, ранкстасть „Интернационал“.

Интернационалонть Вася пек содылиссе.

Ошонь робочеень цёратне лиссть икелей, промсть вагонсто лисицятнень перька. Лицяст ланксо празник.

— Ура! призывникам, — рускс пижнесть ошонь од цёратне.

— Здоровте-е... Шумбра-та-до.

Васов марявсть вайгельтне. Истя вастызь уездэнь ошсо.

Недлянь ютазь Васянь ильтизь васов... Иень ютазь Вася а содавильгак: ашо чама, шинелезэ пачк урядазь, кемензэ цивтердыть.

Те иестэнть сон совась партияс.

Якстере армияв туимадо икеле Вася батракокс эрясь ниле иеть. Еляяк ульнесь батрачка, сюпавонь кецэ эрясь. Васянь ули сыре авазо. Елянь — кияк арасель. Еля Васядо колмо иеде од. Секс кода косояк каршозонзо понгиль — Еля виздиль Васядо.

Виздиль... Лия цёратнеде пелиль, сынь киска лацо нарьгить, пеедить. Васядо Еля а пелиль. Сон сэтьме. Сон лиясто пшкади.

— Еля, аштек... Озак ваксозон... Басяк.

Васня Еля ваксканзо ютыль. Мейле яла седе сеецтэ кармась лангозонзо варштнеме. Седе мейле ютась весе виздимась-пелимась.

Вансак косояк кавонест аштить, местькак салавине гулькине лацо гулдордыть.

— Ванык, таго нетне вейсэ... — аватне кортасть эйстэст.

Васянь авечкицянзо ульнесть сюпавонь цёратне. Сэтьме-чинзэ кис а вечкилизь. А вечкилизь Елянь кис. Мейсь Еля яки сонзэ мельга. Те мазый Елясь сынст ланкс а варштыяк.

Секс сынь радувасть, кода службав тусь Вася. Сех пек лавшник Спирькань цёразо Эмель, кона мик грозясь:

— Монь эйстэ а туят... Е-л-л-я... Яла теке монь улят... М-о-о-нь...

Кода бути троицядо икеле Еля ялганзо марто вирев якась. Вирь поляна чиресэ торгувицянь цёрась ванстась эйсэнзэ. Кодак лиссть тейтерьтне полянас, Эмель вешкезевсь. Лиссть вете-кото цёрат — ялганзо. Ношкстасть тейтерьтнень мельга.

Елянь ялганзо ношкснесть. Тандацть. Эзь кенерьть оргодеме Еля. Сонзэ кинзэ пиризь. Эмель кундась эйзэнзэ.

— А-а-а... Ней а туят ковгак... Васят тезэнь а сы... Кирьдеде, цёрат.

Месть улевельть, а содави... Пижакаць Еля мезе ульнесь виезэ...

Лажакаць виресь. Виренть чирес лиссь ласте ломань. Цёратне тылкадизь Елянь. Ношкстасть.

Цют пачкоць кудов Еля. Молемень перть сорнось.

Улевель авазо — кармаволь горянзо эйсэ ёвтнеме. Арась авазо. Умок кулось. Вечкима ялгазо Вася. Сеяк васоло. А пшкади кисэнзэ.

Лагерьс туемстэ Вася кучсь Елянень покш сёрма.

Сон сёрмаць:

Вечкима ялгам Еля!

Телесь эзь юта стяк. Мон стройде башка тонавтнинь политшколасо. Апрельстэ лисинь эйстэнзэ. Ней мольдянок лагерев. Мон партийноян. Тонетькак эряви комсомолс сёрмацтомс. Пек иля мелявт. Весёласто эряк. Яксек промксос. Кунсолок месть кортыть ошсто якиця ялгатне. Ловнок газет. Иень ютазь вейсэ ульдяно. Сёрмат седе сеецтэ.

Вася.

Кизэсь ютась — эзь марявгак. Еля ледима ланга, нуемстэ, пултонь усксемстэ зняро виезэ ульнесь роботась. Ансяк илизь мурне. Ансяк кодаяк седе таштамс ярмак кинигань рамамс.

Сёксня весть велень советэнь секретаресь пшкаць тензэ:

— Еля, мон маринь тон комсомолс арьсят совамо. Мейсь эно кувать? Адя сёрмадан теть заявления.

— Эряволь... мон уш умок яксян комсомолецнэнь промксозост... Вана улко кудазором мурнесь эйсэнь: „Э-э, тон комсанть марто лыднят, тонськак комсаят“. Ну, эно сёрмат.

Вейкеяк вайгель эзь марявт Елянь каршо, вейкеяк кедь эсть кепеде „против“ примамстонзо.

— Примамс... Сон умок мартонок роботы.

Седе мейле Елянь неилизь эрьва кува. Комсомолонь промкссо сонзэ вайгелезэ маряви, партиянь ячейкань промкссояк сон ульнекшнесь.

Кудазорось васня пек кежейстэ варштась лангозонзо. Эзь нолда... Еля мольсь батрачкомнэнь, ёвтась... Седе мейле вал а пшкадиль сюпав азорозо. Ансяк турванзо сусксы.

— Аштеде вана... Мусынек тарканк...

Омбоце кизэ ушоць Васянь туимадо мейле.

Елянь тевензэ ламо. Комсомолонь промкссонть кортасть яслядо. Седе мейле ульнесь авань промкс. Кочксесть яслясо эйкакшнэнь мельга якиця.

— Елядо башка а муят... Сонзэ, сонзэ эряви...

Цела кизэ Еля ульнесь яслясо. Батрачкасто тусь.

Остатка пултнэнь ускизь паксясто... Сёксень валдо читнестэ тинге пиретнесэ увнозь роботасть...

Оземь паксянть ланкс прась кельме. Кулдорцо кельмезь кинть ланга велить чарытне... Ускить станцияв сюро...

Ульнесь вельсоветэнь промкс. Ве членэсь сась седе мейле, эзь кенерть промксонь ушодумантень... Ёвтнесь:

— Станциясо течи празник... Станциянь комсомолецнэ, пионертнэ флагост марто эрьва поездэнь каршо лиснить. Яла учить демобилизованнойтнень эйсэ...

Елянь седеезэ явшк тейсь. Сонзэ пельде вельсоветэсь кевкснесь доклад — яслясо роботадонть. Весе неизь, кода Елянь чамазо якстерьгаць, кода курвайсть сельмензэ, кода маризе „демобилизованной“ валонть.

Промксось ульнесь чокшнэ ёнов. Еля вень перть парсте эзь удо.

Валське, кодак аламодо валдомсь чи лисима ёнксось, Еля уш ки ланксо. Чись сэрейстэ куйсь виренть вельксс. Еля пачкоць кшнинь кинтень.

Васолдо неявсть комсомолонь флакнэ. Марявсть весёла вайгельть.

Не вайгельтнень марязь Еляяк седе пек весёлгаць. Станциянть маласо кона-кона комсомолецэсь сонзэ содызе.

— Кинь учат, Еля? Кинь каршо лисить?

Виздезевсь васня. Мейле истя кенярдозь пижакаць:

— Якстереармеецэм вастаса, Васянь каршо лисинь. Васянь туимадо мейле ютасть ансяк кавто иеть. Не иетне прок полавтызь эрямонть.

Истямо жо сёксь ульнесь. Васянь службасто самсто ансяк чись эзь аварьть. Сон валдосто, лембестэ, кенярдозь вансь станциянть ланкс, весе аштицятнень ланкс.

А чудить сельветь Елянь чамаванзо. Чинть лацо сон палы. Якстере пацянть марто а содави чамазо...

Васолдо кармась марявомо паравозонть вайгелезэ. Семафоронть томбальде кувакасто укстась.

— Ау-у-у-ут!

Куця качамо ды пар ёрць куркстонзо. Семафоронть вакска вихерькс ютась „раужо вашось“. Конясонзо покш якстере теште. Прясонзо якстере паця. Пулозо пиже гуень.

— Р-р-р-р-т... Ту-ту!

Лоткась.

Куншкасо вагононть икеле комсомолецнэ куродызь якстереармеецнэнь, кевкснить эйсэст:

— Ну, кода служиде? Стака а стака ульнесь?

— Месть кортатадо?.. Стака? Неень армиясь — школа. Минь тосо ламос тонадынек. Кона ловномо эзь машт — тонаць...

Елянь прясо теште марто картуз. Кудрянзо козыренть алдо суркс лацо лиссть.

— Вася, моненьгак лади картузось... Вася пееди. Сон велень овтонь кондямо цёрасто теевсь пичень кондямо видекс.

„Э-э-й, Дуня, Дуня, я-я-я, Комсомолочка моя“.

...раказь раки вагонсо гармониясь. Комсомолецнэ, якстереармеецнэ морыть вейсэ.

Чись толкс палы...

Секе чокшнэстэнть лавшникень Эмель пурнынзе ялганзо.

— Сась... Якстере причась. Ней, вансак, урьвакстыть... Каршозонзо лиснесь станцияв. Вейсэ тосто састь.

— Минь баня теть тейдянок. А стувцамизь...

Вася мездеяк эзь думсе. Омбоце чокшнэстэнть мерсь аванстэнь:

— Мон течи куватьс а сан. Ялгатнень эряви неемс. Еля мартояк кортан...

Авазо содыль, кода Вася вечксы Елянь. Сонгак арьсесь кодаяк вейс „эйкакшкетнень“ пурнамс.

Ялганзо ютынзе Вася, здоровакшнось мартост. Совась Елянь кис.

Кетьте-кец кундазь чокшнэнь перть якасть ульцява. Вася ёвтнизе весе Якстере армиясо службанзо: кода тонавтнесь, кода партияс совась. Еля ёвтнесь эсинзэ роботадонть, яслятнеде, советтэнть, комсомолдо.

Эзь хватяяк Вася, кода пшкаць:

— Ней урьвакстомс эряволь, Еля, молят?

— Месть кевкснят, Вася, — марявсть кода бути Елянь састо мерезь валонзо. Апак хватя васоцть сынст турваст ды понавсть ве таркас кедест. Чокшнэнь чопудась кекшинзе не кавто од ломатнень лия ломанень сельме икельде.

Якамодо лоткасть. Озасть шочко ланкс утом икелев.

Шкась сась кудов туемс. Весе валтнэ ёвтнезь. Кода икеле-пелев кармить эрямо, кода велень комсомолстонть теить велень коммуна.

...Ы-й-й-г-г... х-о-опп, хоп! Васянь кутмерс вачкодевсть кавто кевть.

Еля чаркоць... Ранкстыксэль. Кургонзо автизе. Мезень бути раужо одижа прязонзо каясть. Мейле мезеяк эзь нее.

Васолдо... латксто прок, марявсь глушазь вайгель.

— У-у-уух. У-уух!

«Машцызь» — думазевсь Еля. Седеезэ кармась сеецтэ чавомо... Превтне веляськацть, ёжозо майшсь.

Утомонтень совасть. Кенкшенть панжомсто марявсть ульцясто скалонь, ревень, вазонь вайгельть. Нать, аватне ансяк потявтызь скалост.

— Кода истя мон тезэнь понгинь?..

А... проклятойтне эцимизь.

Елянь прява ютась весе исень чокшнэсь.

— О-о-о! О-о-х-х!

Киякссо, верь поцо празь Вася.

Еля пикссэ сюлмсезь. Пацясь прястонзо валксь. Турванзо уголсо неяви слюня марто верь.

Ломатнень совамсто Еля местькак эзь корта. Ансяк сельмстэнзэ цяпорсо кармасть чудеме сельветь.

Байтяк пурнавсть ломатнеде утомонть ваксс.

Ютамсто басясть:

— Ванодояк. Эзь кенере службасто само, утомс годявсь. Эщо эсть урьваксткак... А виськс?

Кона маласо чавосьнень вакссо ульнесь, ёвтнесь:

— Лоткадо пеедимадо. Эли а несынк, ломатне чавозь, аволь сынсь совасть.

... — О-о-й, цёрынем, сяткинем. Кодамо киска сускинзеть? Кодамо пине чавинзеть? — Васянь пря песэ лайшесь авазо.

Састь комсомолецнэ. Седе курок ливтизь кавонест утомсто: Васянь рананзо шлизь, сюлмсизь ашо пацясо. Елянь ланксто пиксэнть юкснизь.

Вася яла эзь корта. Кодак токави чавозь таркас, пижакады:

— О-о-й!

Эсть карма кевкснеме. Тердизь милициянть. Тейсть следствия.

Роштувань чокшнэ клубось пешксе. Вечерняв тусть ансяк сыре бабинетне.

Клубсо течи диковина невтить. Истя кортасть велесэнть. Спектаклядо башка комсомолецнэ кавто недля ютко анокстасть морот.

Сех пек те чинтень анокстась коммунистнэнь ячейкась. Течи сон урьваксты вечкима цёра партиянь член, якстереармеец Вася. Сватось — ком‘ячейкань секретарь, ютась недлячистэ кувать кортась од сватонзо марто — комсомолецнэнь секретаренть марто.

— Ну, кода, ялгай?.. Эряволь миненек теевемс сватокс. Минек цёрась ней шумбралгаць. Больницядо мейле чамазо таго якстерьгадомо кармась.

— Мон, ялгай, анокан, — мерсь комсомолонь секретаресь. — Еля умок монень сакшнось. Мери — эряволь теемс свадьбанок клубсо, народ ванозо лангозонок... Содасак ведь кодамо сон тейтересь.

Истя кортасть кавто „сватнэ“ ютась недлясто.

Ней вана, течи чокшнэ клубсо ули свадьба. Поптомо. Пазававтомо. Ки марьсекшнэсь икеле истямо кой?

Сундирьгаць. Клубонтень кармасть промомо.

Икельсе рядонтень ойсесть советэнь члетнэ нист марто. Састыньке басить:

— Коесь ней кодамо... Куть кие совазо свадьбантень... Поп арась...

Удалсетненень тарка эзь кадовт, аштить стядо. Кенкшканть яла эцить.

— Кума... Эмель кувать карми аштеме тюрьмасонть?

— Марят, вете иеть макссть... Вана... Иля нарьга, азарць пине. Ялганзояк мартонзо аштить. Кавтонь-кавтонь иес озавтызь.

— Истя эряви...

Кавтов явтовсь ашо пологось сценанть ланксо. Вить кедь ёно якстере материясо сёрмадозь: „Весе масторонь пролетарийтне, пурнаводо вейс“. Керш кедь ёно флагось бисёронь буквинетнесэ мазылгавтозь. Бисёртнэстэ валт лиссть: „Шумбра чи коммунистэнь партиянтень!“

Столенть ланксояк якстере пацят. Столенть экшстэ стясь партиянь секретаресь.

— Ялгат, течи минь тезэнь пурнавинек аволь ансяк спектаклянть ваномо. Течи коммунистэнь свадьба. Весе содасынк, киде мон кортан?

— Содасынек... Вася-я-я. Еля-я-я. Лиседе икелев.

Вася од гимнастёркасо. Мешцёнзэ якстере лента. Кетте кец арасть столенть малав.

— Кинь председателькс кочкасынек? — кевкснесь ячейкань секретаресь.

— Тонсь ульть, тонсь.

Хорось лиссь икелев. Кеветее од вайгельть вейсэ ранкстасть:

— Вставай, проклятьем заклеймённый, Весь мир голодных и рабов...“

Васня морыця кружокось ськамонзо морась. Мейле, кода эчке вайгелесь ушодызе:

„Никто не даст нам избавления,“ куншкасто школасо тонавтницятне чова вайгельсэ прядызь покшнэнь марто:

... „Ни царь, ни бог и ни герой, Добьемся мы освобожденья Своею собственной рукой...“

Остатка валтнэнень. „Это есть наш последний и решительный бой“ — удалдояк салава марязевсть вайгельть.

Парсте а чаркодевить валтнэ. Яла теке „Интернационалонть“ пензэ морамсто клубось кепетець.

Потолокс вачкодевсь велень виев вайгелесь. Колмосят вайгельть, кона кода машты, лажакацть:

... „С Интернационалом воспрянет род людской“.

Озасть весе. Чатьмони клубось. Кенкшесь лоткась чикордомадо. Удалсе рятнэяк кашт молить. Лоткасть чиньчарамонь чулксемеде.

... — Осподи... Шумбра-чи макст эйкакшнэнень...

Уголсо кодамо бути бабине ансяк кепедиксылиссе кедензэ крёстонь тееме, — комсомолонь секретаресь, мезе ули виезэ, пижакаць:

— Ялга-а-ат! Минек ютксо Еля ульнесь вечкима комсомолка. Ков а кучсак, мезень тев а максат, — весе сон тейсы, валгак а пшкади. Ламо минь паро сонзэ пельде неинек, ламо сон роботась велентень. Течи Еля лиси мирьденень Васянь экшс... Вася... Еля... Седе вадря пара а муят. Сыре ломатне поптомо ковгак а яксильть. Минь поптомо эрятано. Течинь свадьбанок весеменень невцы, кода можна эрямс поптомо, церькувавтомо. Шумбра-чи улезэ од койсэ те пингенть теицятненень...

— Шумбра-чи... Шумбра-чи... — Лажнось клубось вайгельсэ. Шумось марявсь ульцявгак.

Кортась вельсоветэнь председателесь. Эщо кавто-колмо ломать.

Удалсе ряцтонть стясь ава.

— Максодо моненьгак кортамс. Месть тия-тува якамс? Эряви вицтэ ёвтамс: Еля яслясо монь эйкакшом пингензэ ванстызе. Сонтемензэ ёмаволь эйкакшом... Кулан а стувца... Аволь ансяк мон. Весе аватне пасиба ёвтыть... Басядо. Эх... Улевельдеряй тона азарсь кискась, сельмензэ коцкирявлинь. Стяк чавизе цёранть... Ну, эрядо...

Лиссь Еля.

— Вася мерсь монень сонзэ кисэяк кортамо. Сонзэ эщо лавшо вайгелезэ больницядонть мейле... Мон, ялгат, кувать а кортан. Ансяк ёвтан тенк: пасиба весеменень. Пасиба сень кисэ, од коень свадьбанок шнасынк. Надиятано, миньденек мейле попонть доходозо лавшоми.

Хорось морась „Мы кузнецы“...

Прядовсь свадьбась. Васянь ялганзо кармасть мартонзо здорувакшномо. Елянь эйсэ тейтерьтне палсесть.

Появась гармонь. Сценанть ланксо пологонть экшсэ анокстасть спектакль. Клубонть куншкасо гармонистэнть перька пурнавсть морыцят, киштицят. Киштеме лиснесть кавтонь-кавтонь. Шумдонть, теснадонть пси теевсь клубсонть. Вальматне кармасть соламо.

Спектаклясонть налксесть Вася марто Еляяк. Пелеведе мейле кармасть сралеме кудова.

Мейле кувать велесэнть лецнесть комсомолонь свадьбанть.

Клубось эрьва чистэ ульнекшнесь пешксе.

★