П. ДОЛГОВ

КОЛМО КИЯВА

Бобаскенть лацо — эрзянь Тюмань колмо цёранзо: Ваня, Петя ды Федя. Эрить сынь казак ютксо, Оренбургонь мазый паксясо. Веленть Аршав лемезэ. Велесэнть весе руст, ансяк Тюма цёранзо марто эрзят. Знярдо бути, сядошка иеде икеле, Тюмань покштянть панизь тезэнь эрямо, казакокс велявтызь.

Иетне ютасть. Кайсть Тюмань цёратне. Ютась войнась немец марто, сась Советэнь властесь. Тюмань Петя эщо теде икеле тукшнось ошов тонавтнеме. Учильнястонть сонзэ казакнэ сразу саизь служамо. 1918-це иестэнть Петя уш ульнесь паро казаконь офицер. Сёксня Петя ласте сакшнось велентень. Мазый погонт лавтом ланксонзо, кемензэ ваднезь мейсэ бути — чикордыть, кем кочкарятнесэ шпорат.

Ульцяванть юты Петя — тейтерьтне ваныть лангозонзо. „Вана минек Петясь кодамо, иля пельть, начальникнэяк вечксызь сонзэ“. Акувать эрясь Петя кудосо. Марявсть Троицкой ёндо якстеретне сыть: атятнень, мери, чавныть, аватнень пленс сайнить, эйкакшнэнь колия ланкс...

— Молемс, не кискатнень панемс, штобу пильгесткак тия авольть яка, — мерсь Петя-офицер. Човизе саблянзо, ванськавтынзе шпоратнень ды поготнэнь.

Тюма ней знярдояк а несы мазый цёранзо. Тусь Петя робочейтнень, сокицятнень чавомо. А несы Петянь ней уш авазояк. Васов панизь ашо салдатнэнь якстеретне. Сибирев панизь генералтнэнь. Китай маласо Петя прянзо песок ланкс кадызе. Ве робочей колмо пулят нолдась эйзэнзэ.

Ютасть 1919-1920-це иетне. Советэнь масторсо эзь кадовт вейкеяк буржуй. Оймсеме кармасть якстереармеецнэ. Кона паксясо сабан мельга яки, кона завоцо молотка марто ашти, кудот-чить пурныть. Властентень лездыть.

Сась 1921-це иесь. Кодамо бути НЭП нолдасть.

Ваня кодак марясь базарга торгувамс можна, сразу эсь пачканзо кармась думамо: „Торгувамо карман, кадык тетям Федя марто сокить. Торгувамс седе шождыне, ярмакнэяк седе ламо зепезэнь сыть“. Кармась торгувамо. Рами алаша, мисы, кемешка целковойть кадовить тензэ. Сюросо Ваня торгувась, маньшесь беднойтнень. Сех пек наживась беднойтнень пельде Ваня вачо иестэнть. Яжи пондо товзюронь почт, ваз максыть тензэ пондонть кис; вете хунтонь кис вачо ломань максы Ванянень од шуба.

Ваня наживась пек се иестэнть. Нейгак яла эщо а вечксызь Ванянь се иенть кис: торгувамонть кис лем пуцть тензэ нэпман. Берянь эрямо-ки кочксесь Тюмань Ваня.

Федянь лия кизэ. Сон эщо призовсояк арасель. Сон неизе, кода Петя ульнесь кудосо, кода Ваня ломатнень маньшесь. Эсть туе мелезэнзэ братонзо. Кодак якстеретне састь веленте, сон тукшнось мартост ласте ашотнень чавомо. Мейле пиже бандатнень вирьга вешнесь ялгатне марто. Ней сон умок уш комсомолец.

Ленинэнь куломадо мейле Федя мольсь коммунистэнь ячейкантень ды мерсь: „Саимизь моньгак юткозонок, мон карман роботамо тынк лацо, карман велень од цёратнень ютксо роботамо, тонавцынь сынст кода парсте эрямс. Вейсэ тевтнень парсте ладясынек“. Примизь Федянь партияс. Ней сон васенце ломань велесэ. Бедной ломатне яла сонензэ якить, бути сюпавтнэ обидясызь. Мелят Федянь советс кочксизь.

Тюма-атянь седойть сакалонзо. Лия шкастонть ашти, ашти ды арьсезеви: „Эть Федянь мон сех пек вечкса. Сон кодамо бути лия: а сими, а тарги, киньгак, иля пеле, а обиди. Эх, колмонест цёран истят улевельтьдеряй. Нать эрьва кодат китне улить“.