КАВТО ВАЙГЕЛЬТЬ

I

Латконь кавто черева аштить пезнавтнезь олксо вельтязь кудотне. Вальма сленикань таркас эцезь сумань панкст, нулат. Не панксов кудынетне ютксо улить паро кудоткак. Сынь вельтязь лайсэ эли жестьсэ. Истямо Килей веленть поназо.

Те велесэнть эрить эрзят. Ламо иеть не эрзятне ланксо нарьги бояр Будищев. Те бояронтень лездыть велень сюпавтнэ. Секс Килей велесь нусмакадозь ваны.

Тундонь праздник. Велесэнть кияк арась. Конат войнасо, конат паксясо карыть яла мода. Сюпавтнэнь умок уш сокавсть сокамост. Бояронть паксясо умок уш пижелдыть пинеметь, сурот (просат). Бедной сокицятне яла сокарить коське моданть эйсэ. Сельведь марто ваныть пси менеленть ланкс. Учить, знярдо пиземесь лопавцынзе покш покольтнень.

Ульцясонть колмо эйкакшт нузялдозь сокить лаз песэ вишка умине. Пряст пондакшт, панарост каладот. Покшонть ланксо суманень понкст. Кецэнзэ рошксе-куво. Вармась пувси ашо кудрянзо эйсэ. Латко потмакссо сор куцясо сокарить кавто сараст. Покш эйкакшось капоць кев.

— Трошка! Адядо тей. Саеде кевть. Давайте сараснэнь ланкс леднеме карматано. Ерманской война тейдяно.

— Мезе войнась? — кевкстизе Трошка покшонть. Ёга, нать, войнась — война?

— Аволь война. Войнась — ерманской. Тонть тетят ерманской...

Кувать ёртнесть эйкакшнэ латконть потмаксов. Сараснэ котнозь ливтясть леенть пелев.

Латконть вакссо каладо кудыне. Кудопрянть вармась сезнизе панксонь-панксонь. Кадовсть ансяк ирдезэнзэ. Удало — пельс чувозь канава. Знярдо бути кудонь азорось арьсесь эмеж-пирень пирямо. Пиресэнть касыть маршт ды пургине пиципалакст.

Кудонть икеле, ведь боцька вакссо, кавто атят. Вейкенть лемезэ Яхим. Сон уш сыре. Иензэ кодгеменьде ламо. Вецюмазо юксезь. Ашо сакалонзо чинть каршо од ловкс цивтёрдыть. Омбоцесь седе од. Сельмензэ бутравт. Яла теке не бутрав сельтне парсте ладить тензэ.. Лицязо кежей. Яхим-атя састыне кармась басямо:

— Ёмамо-чи Петра... Хоть кандо-ласт эстеть анокстак, живстэ калмс эцек... арась паро эрямо. Эрятано кискадо беряньстэ. Мон сырединь, ато кадовлия те шайтян веленть. Басить — чи лисима ёно паро эрямось... арасть тосо боярт. Мода ламо. Сергей цёрам живстэ сыньдеряй, местькак тейдяно. Вай... и ... и ... таго бокасон пеельть лазыть... вана, бокасто саезь седеем виц теке ношка пеельсэ пелить сывелем эйсэ.

Кундызе Яхим-атя боканзо, пеень сускозь кувсесь. Мейле куродызе козома. Петра апак вано сокарясь пильге сурсо моданть эйсэ.

— Истя Яхим леляй... Эрямонок кальдяв. Вишка эйкакшнэнень амезе максомс... Ловсо арась, каша арась. Мезде поти-пакшат андомс? Рошксе куводо? Те ломанень пеедима — пингеть ютамс ловажат-карязот яжак, — а ярсамс, а оршамс... мезеяк арась. Эх-эх-эх. — Не валтнэнь ёвтынзе стакасто укстазь. Мейле кармась вайгельсэ кроямо. Яхим-атя стясь. Бокань кундазь кармась якамо мекев-васов. Петра варштась Яхим-атянь ланкс. Кувать вансь. Боцька чарысь сельмензэ икеле кармась чарамо, кудось кармась чиремеме.

— Чорт месть карминь нееме, Яхим леляй, превень кода бути чаракацть. Хоть таргамс эряви. Конёв костояк а муят?

Яхим-атя эзь кунсоло Петрань эйсэ. Сон прянь нолдазь арьсесь стака арьсимат. Прок эстензэ кортась сорнозь вайгельсэ.

— Вейке цёрась войнасо. Омбоцесь — кудосо кулось... Кадовсть колмо вишка эйкакшт. Андомс сынст амезде. Урьвась лисьмас ваясь... кода мон вечкелия цёрам... Кодамо паро ульнесь урьвась... Саинзе пазось кавонест... истя нать эряви... Васня цёранть, мейле урьванть. Эх, эрямот...

Кулаксонзо кармась чавомо грудензэ, Петра чийсь малазонзо.

— Яхим леляй! Пандя! Мейсь истя прят эйсэ чават? Стувтык весе апаронть... мон содаса — горясь покш. Яла теке эряви весе кандомс.

— Кодгемень ие кандан... ней пек сырединь... а кандуви. Пильгень пупорькшнить... ансяк аздан знярдо пран. Ней таго поти-пакшанть марто беда: ловсо арась. Скалонть уш колмо недлят стадав а паньсесынек. Суксыясь рогазо. Кшуманцявгак орожия мельга якинь, — арась паро. Коня поцонть сукснэ бузмолдозь-бузмолдыть. Ней весе прянть саизь. Сывелесь рогатне маласто весе кармась наксадомо.

Те шкастонть Яхим-атянь кудостонть кавто ёнов сяворькшнезь лиссь Яхим-низэ. Урнозь кармась аварьдеме. Черензэ эйсэ азаргадозь раздясь. Яхим-атя ды Петра васня ашолгацть, мейле кирнавцть икелев. Яхим-низэ пиже-ожо вайгельсэ ранкстась:

— Ях... Ях—и—им; тон тесат... скалось повавсь сляникас... у-у-у... уху... лахан веденьтень сляника... пакшатне...

Чийсть колмонест кардазов. Скалось лаханонть бокасо празь ашти. Куватьс пря чавсь. Санонзо лаказь лакасть. Куркстонзо лиссть кесаксо тюжа човт. Сельмензэ бутралгацть. Кувакасто сорнозь паразевсь:

— Му-у-у... Му-у-у-у...

II

Ютасть скалонть куломодо мейле колмо недлят. Яхим-атя седе мейле эзь стякшнояк. Те омбоце горясь седеяк мендизе. Кармась сэредеме. Кшесь майшсь. Низэ колмо пакша марто тусь пурнамо лия велев. Кавто недлят ущ кода „христа ради“ кше веши. Лиясто аламошка канды сускомнеть, лиясто вачонь-пешксе сынсь сыть. Вишка пакшанть Яхим низэ кантли кецэнзэ. Седе покшкетне кетьте-кец кундазь якить мельганзо. Кода кшевтеме сыть — куть кудостонть орготь: пакшатне рангить, пидемс амезе. Лият паксясо сокить-видить, Яхим-атя таркасо ёжовтомо ашти. Лездыцят арасть. Ансяк Петра шабразо жализе. Стякодо сокась кавто умат. Ансяк сон сакшны Яхим-атянь варштамо.

Яхим-атя кудосонть ськамонзо.

Ламо эрьва кодат арьсимат эцесть Яхим-атянь пря поц. Лець мелезэнзэ пакшакс-чизэ. Чийни латко потмова. Кулось авазо. Ней сон ашти церкувасо. Аванзо велькссэ палыть штатолт. Попось моравты „вечная память.“ Лець мелезэнзэ цёразо. Подушноень кис ашти пекстазь кельме карцо. Совась цёранзо варштамо. Пилесэнзэ нейгак эщо марявить цёранзо валонзо: „Тетяй, пек кельме кардось. Грудем кармась сэредеме“.

Течи Петра рана сась паксясто. Перьгавтызе алашанзо. Варштась салава Яхим-атянь кудонть ланкс ды салава кармась кройсеме.

— Шайтян саессэ... шут мень наказаният кучни пазось. Ломанесь истякак обижавсь: кулось скалозо, сонсь кармась сэредеме. Эх-хе-хе.

Истя кортазь совась Яхим-атянень. Яхим-атянь лицянзо ожо саизе. Сельме чиресэнзэ карвотне радувазь потясть нулконть эйсэ. Прязо каязь бокав. Алонзо розь олгонь ацамо. Ланксонзо каладо шубазо. Петра куватьс аштесь кенкш порогонть ланксо. Куватьс кунсолось, кода таркси оймензэ эйсэ сэреди шабразо. Састыне мольсь кроватенть малав. Озась сэредицянть ваксс.

— Яхим леляй, живат?

— Ж-ж-ж-ива-а-а-н... пазоськак... к-кулома а мак-сы... Састыне, кокнозь отвечась Яхим-атя Петрань каршо. Чамаванзо эрексия поколькс кеверсть кавто сельветь. Петра стака седейсэ вансь лангозонзо. Вешни лацима валт:

— Кодаяк... Марить, кодаяк эряк эщо. Колмо пакшат теть эщо кастомс.

— Э-э-э-э, Петра брат... Монь эйкакшон кастав-в-всть...

Вальманть алга мешок марто ютась сулей. Мельганзо кавто вишка эйкакшт. Петра радувазь панжизе кенкшенть.

— Маря патяй... Чей сизить?

— Кода а сизят. Сырединь чей... Колмо пакша марто цёраяк а цидярды. Пек эщо пси... койкак пачкодинек. Пакшатнень марто врадумам сась. Течи кадовкшность... Матидевинь роща ваксс, сынь рощас орголесть...

Яхим-низэ ламо нужат ёвтнесь. Течи сынь вете вайгельбе ютасть. Аламошка кше сускомот пурнасть.

Вальма суликанть ки бути палкасо стукадизе:

— Хозяин дома? — сергець эчке вайгель.

Петра тандадозь варштась. Кенкш удало марявсть кеме вайгельть. Бойкасто совасть старуста урядник марто. Урядникесь ургатець пижнеме, — прок кинишка ловнось.

— Яхим Курков должен подушных 15 целков. Если не уплатит за этот месяц, то продадим его дом...

Остатка валтнэнь ёвтынзе ранкстазь. Пакшатне урнозь эцесть галанка удалов. Урядникесь Яхимень токши:

— Чего дрыхнешь. Притворяешься хворым... Слышишь, плати-и...

Яхим-атя кедензэ венстизе, месть бути мериксэль, келезэ эзь велявтовт. Сон валонть таркас кармась икнэме.

— И-и-и... Р-о-о плати-и... не-не... Петрань пеензэ чикор тейсть. Варштась амазыйстэ урядникнень ланкс. Урядникесь састыне кармась удалов потамо. Старустась кирць кенкшенть эйсэ панжадо.

Петра сорнозь мерсь тест:

— От греха. Азёдо... Лиседе... ков тейсынк сельменк? Ломанесь тынтеменккак кулома ланксо.

Пакшатне лажность апаро вайгельсэ. Старустась конштась урядникентень. Урядникесь лисемстэ сергець:

— Мисынек кудот.

Петра сорнось, прок азаргадонь тигра. Яхим-низэ кувсесь. Вальманть таго стукадизе ки бути, но седе састо.

— Яхим дедай, Сергей цёрат пельде сёрма сась.

Петра совавтызе сёрманть. Буквань-буквань кармась ловномо. Сёрманть сёрмадызе аволь Сергей, сонзэ ялгазо.

— „ ...Сергеень ранизь... ней пичкси больницясо. Курок сы кудов“...

— Вай, вай... Сергей цёрынем ранявсь, кудов сы. Яхим, марить, Сергей кудов сы, — чийнезь кортась Яхим-низэ.

Яхим стясь. Мекев прась. Весёласто варштась Петра ланкс.

— Сы... ней чи лисима пелев мольдя-яно.

— Мольдяно, — састыне мерсь Петра.

Весь ютась парсте. Яхим-атя эзь кувсе. Пакшатне парсте удость. Сизесть пек. Ансяк ашолгадума малав Яхим-атя пек кармась корномо.

Ашолгаць. Пролкаванть ютасть стадатне. Пулесь мельгаст качамо лацо копачизе веленть. Озяснэ тарад ланксо чикорцть пакся цирькункс. Пакшатне кутмордазь удость ватула поцо. Покшось онснэнзэ музолсо пеець. Яхим-низэ канць коське калк. Уштызе пецьканть. Яхим-атя корномадо лоткась. Кепедизе прянзо. Варштась. Прязо новольсь мекев.

— Маря-я. Симемс... П-потмом палы... осподи-и.

Маря пазавань каршо чекась. Яхим-атя кармась новолеме. Кедензэ сэньшкацть. Лицязо ловташкаць. Ансяк кавксть кургонзо автизе. Оймезэ лиссь.

— Я-я-яхи-им... Чи валдынем...

Баксордызе Маря Яхимень беримазонзо. Прянзо эйсэ стенас чавсь. Кармась разьдямо черензэ. Пакшатне весе сырьгойсть. Кунцесть покштяст эйс. Друк Петра кижнэзь чийсь:

— Куд-о... Куд... Кудо прянк палы...

Пожаар-р!

Олгонь кудо прясонть толось налксезь налксесь. Прок якстере одеялсо вельтизе кришанть. Шалтось пачкоць весе велентень. Народось чийсь. Раужо качамось вельтизе весе ульцянть.

Баягась урнось вачо вергизэкс, Петра беримасонзо ливтиньзе кавто пакшатнень. Яхим-нинзэ эйсэ кирцть кавто атят. Кудо прясь кармась сявореме. Толонь кесакнэ гуйкс ливтнесть кудотне велькска. Сяткнэ менельс токасть. Толонь морясь вельтизе весе пролканть.

Яхим-низэ мезе вий ноцковць — кирнавць толонть поц. Кудось лондаць. Остатка вайгель лиссь толонть поцто.

— Я х и-и-и-и-и-и м...

Истямо ульнесь васень вайгелесь... Мейле кияк мезеяк эзь маря.

III

Ютасть ламо иеть. Састь лия шкат. Тусь лия эрямо.

Аволь умок ульнинь Килей велесэ. Неке кудотне, ансяк ваныть сынь ланкс — весёласто. Яхим-атянь кудонть таркасо аволь пек покш кудыне. Кудонть икеле лазонь пирявкс. Пиринесэнть светясть шукшторовт. Кавто пакшат лейкасо валность цветка пандине. Молинь малазост. Кевкстинь кинь пакшатне. Кавонест варштасть лангозон. Мейле покшось мерсь.

— Курков Яхимень нуцькатано.

— Иля кемть, Ваня маньши. Тетянок коммунист, братонок — комсомолец, минь — пионерт, — пейдезь отвечась седе вишка пакшась.

Мон ансяк ней фатинь: сынст киргасо якстере пацинеть. Колмо уголсо пацинестэнть ловнынь: „Пионер, буть готов“. Варштынь пейдезь кавонест ланкс и туинь веленть кувалт. Чись ульнесь маней. Пиже рощасонть мазыйстэ морасть нармутне.

Велень совет икеле ульнесть ламо атят. Ютксост Петра. Сон ней велень советсэ председатель. Вейке цёра ливць якстере флаг. Пезнавтызь флагонть советэнть кенкш ланкс. Састо кортасть атятне.

— Валське Маенть празнувасынек.

— Паншсынек пакшань яслятнень? Петра, весе вишка пакшатнень тов эрявить максомс.

— Тракторсонть курок прядовсть сокамотне.

— Вий эйсэнзэ шайтят зняро.

— Кода эно.

— Онот, Сергейгак сы.

Кедень пинжаксо сась атятненень виев цёра. Весе радувазь здоровакшность мартонзо. Эчке вайгельсэ Сергей кармась:

— Адядо ячейкав. Течи промкс тейдяно.

Атятнень пелест саинзе мартонзо Сергей. Остаткатне кувать месть бути кортнесть Петра марто. Чись кармась валгомо. Паксястонть бойкасто паньсь пастухось ревень стаданть эйсэ. Локшосонзо авулдась икеле молиця ревенть ланкс:

— Эй, камунарка, ков капшат.

Валське мон сыргозинь позда. Чись ульнесь вере. Велесэнть ламонь таркава ульнесть пезнавтнезь якстере флакт. Советэнть пельде флаг марто мольсь, прок пиземе ковол народось. Лоткасть пакшань яслятнень икелев. Сергей авулязь пижнесь:

— Ялгат! Ламо минь неинек апаро, ламо нарьгасть ланксонок. Ансяк Октябрянь революциясь саизе ланкстонок стаканть. Арази знярдояк истя эринек? Арази икеле некшнинек валдо-чить?

Ней эрямонок эрьва чине вадрялгады. Веленек раминек трактор ды лия машинат. Курок раматано омбоце. Панжинек кавто кооперативт... панжинек опытной пакся. Больницясь роботы парсте. Весе пакшанок совазь пионерэнь отряцо, тонавтнить од эрямонь строямо...

Весе народось варштась не валтнэде мейле эсь эйкакшост ланкс. Пионерэнь отрядось ульнесь ве пеле. Сынь стядо аштесть, прок тонавтозь салдат. Якстере пацинетне киргасост неявсть чувтсто пизёлкс. Сергей кортась.

...Ней течи минь паншсынек пакшань яслянок. Весе вишка пакшанок кармить улеме паро таркасо. Ней...

Сырьгасть рощав. Тракторонть удалов понгавцть покш крандаз, озавтнизь вишка эйкакшнэнь. Мельгаст моразь мольсть пионертнэ. Кона пионертнэнь чияк неинь пиринестэ, ней сынь мольсть отрядонть икеле ряцо. Ванянь кецэ ульнесь якстере флаг. Кавонест пейдезь варштасть лангозон.

Куватьс налксесть пакшатне покшнэ марто пиже луга ланксо. Чись налксесь. Рощасонть чувтнэяк радувакшность те валдо празникентень. Нармутьнень морост марто човорявсть моронь валтнэ.

„Мы молодая гвардия рабочих и крестьян...“

Истямо вайгель марявсь од велесэ эрицятнень пельде. Паро Килей велесэ.