Арсема // сборник Васень цвет; автор: Прончатов, И. Н.; 1936. Мордовская библиотека

Книга: И. Прончатов. Васень цвет. Стихотвореният. — Мордовской Государственной Издательствась, Саранск, 1939. — с. 23—25


<< Монь ули сазором << >> Сексь >>
АРСЕМА
Тон те шкас мик, вечкемнем, удат!
Мелеть васолов пачтинзе он.
Вана, сэнеждь пезьгуннэ кундат...
Вант, эль понги... но таго менсь сон...
Таго ливти. Мызолдыть, нейсынь,
Мако турват. Кеднетнень кепсят.
Сейрят цяпазь: „омбоцесь эль сы“...
Сэтьме, сэтьме. Икелекс лексят.
Ах, кодат валдот, зорявт иеть!
Косо истямо уцяскав эйдеть.
Кона масторсо, браткем, неемс
Тонь кондямотне налкшнить, пейдить.
Тон удат. Монь жо кепедезь прям.
Пингстэнь мирэнтень кумацень флагокс
Горизонтсто якстере зорясь
Лыйневтевсь — увновтсь масторонь лангонть.
Те эрицят мартонзо эль стить
Кода маень парадонтень — ламот.
Эрьвась ялганстэнь кеденть венсти
Ды вейсэ эль ушодсызь эрямонть.
Вант виест уш вальмало видьстэ,
Покш ды кеме фундаментэс недезь
Кевень мельга од кевень венстезь
Сэрей якстере кудот кепиди.
Ды содан, зярдо масторга сёксь
Кежей якшамо виензэ менстьсы,
Сынь якшамо, кежеензэ трокс
Прятнень менелень сэнентень венстьсызь.
Цветязевить потмоваст од валтнэ,
Прок цековонь ванькс чоледьксэст — парт.
Ды лопатнева чудиця ялткекс
Эрьва таркаст лекштядьсы кенярдкс.
Тон жо ней пек кеместэ удат,
Арась мелеть явомо ен ондо.
Мезеяк сеть тевтнеде аздат,
Кода вальмало цветявтыть тундот.
Но зярдо жо монь эйшка касат,
Зярдо ушодыть кенереме преветь,
Весе тень, мезе теить, нейсак
Ды чарькодьсак кенярдомань тевенть.
Тон пингентень соват прок тундос
Сти эрямось каршозот ен, ванькс.
Туят мартонзо кедте кундазь
Масторганть сех уцяскав ломанькс,
Чисэ пургсезь ульцява ютат,
Сэрей кудотнень ланга варштат
Ды кирпицтнень лангс ванозь ловнат,
Кода кандызь эсь кемесэст шкат.
Тон сынст сэрьга варшават пейдезь,
Чинь валдодонть ве сельметь конязь
Кевкстьсыть: „кинень тынь весе тейнезь?“
Сынь отвечить ве валсо: „Тонеть...“
Лия пезьгунт прят велькска ливтить.
Сынь а валгонить оймамо латов.
Можот тонсь сынст ветицякс улят
Монь вишка, вишка, цветиця братом.
1936 ие.
<< Монь ули сазором << >> Сексь >>
Сборник Васень цвет; автор: Прончатов, И. Н.; 1939.

Последнее обновление страницы: 2016.09.26
На главную