Весь солы... // сборник Васень цвет; автор: Прончатов, И. Н.; 1936. Мордовская библиотека

Книга: И. Прончатов. Васень цвет. Стихотвореният. — Мордовской Государственной Издательствась, Саранск, 1939. — с. 8—9


<< Цветяк, од шкам << >> Моро >>
* * *
Весь солы...
Коштось тантей ды экше.
Пелень кустка
Эль олыть тешть.
Пек паро
Аштемась вальма экшсэ,
Зярдо валскенть
Пувты цеков вешкс.
Вана вант —
Тундонь мазызэ валске
Сэрьс экшилязь
Ванькс кельме росасо.
Кинь кисэ,
Пиже толсонзо налксезь,
Масторлангонть
Кирвазтеме сась сон?!
Умаринатьне
Ашолгадсть ловокс,
Увтявсть тарадост
Тикшетнень пряс.
Ды састосто,
Састосто ютковаст
Валнось
Инзеень соксо зорясь.
Кие ансяк
Эзь кенярдт сонензэ!
Нармунть чольнезь
Вастоманзо листь.
Ды певтеме
Морот икелензэ
Кодат ансяк
Нармунть эзть морсе!
Ах, а истя ли
Минек од порась
Мазылгавтомо
Пингенть касы.
Ды свет лангсо
Эрицятне моразь
Касоманок,
Прок тундонть вастыть!
1936 ие.
<< Цветяк, од шкам << >> Моро >>
Сборник Васень цвет; автор: Прончатов, И. Н.; 1939.

Последнее обновление страницы: 2016.09.20
На главную