Цветяк, од шкам! // сборник Васень цвет; автор: Прончатов, И. Н.; 1936. Мордовская библиотека

Книга: И. Прончатов. Васень цвет. Стихотвореният. — Мордовской Государственной Издательствась, Саранск, 1939. — с. 6—7


<< Нудейть комасть леенть вельксэс << >> Весь солы >>
ЦВЕТЯК, ОД ШКАМ!
Цветяк, цветяк, монь шкам — одат!
Ийтьнесэ а сормсемс шачот,
Тон верив сталмост а содат —
Лия ийть зорияст каршот.
Эзимезь кадо тетянок
Шачомо цепсэ кершавозь.
Сынь сезизь сонзэ, штоб шканок
Эсь мелест кандыцякс стяволь.
Секс пингень учовозь мелест —
Цветязевсь вийдеть масторось.
Сон увны, прок маень келес
Ломатне кепедить моро.
Косо ней, зорясо вастозть,
Тевтнесэ невтить од виест.
Ваннокшнозь, кода минь кастано,
Ки сырестэ а одыи?
Ки одонь, валдо сельместэть
Эрицятнеде а неи
Се толонть, конасо весень
Казимезь вождь Прометеекс.
Се толось, куть покш пандтнэсэ
Эль полюссо, содак эжди
Эрямот седей лембесэ.
Велькссэть свал чикс свети вождесь —
Сталин мердяно сонензэ.
Цветяк, цветяк, ды свал икелев
Мольть, пандов кис путык виеть.
Штоб сэрейстэ, моданть келес
Лыйневельть, прок знамят иеть.
Штобу свал сонзэ лыйневксэсь
Тердевель ваксозост ялгат
Куземе, конат ней пингсэть
Шкань топавкстнэнь ланга чалгазь.
Цветяк, цветяк, монь шкам — одат.
Ийтнесэ а сормсемс шачот,
Тон верив сталмост а содат —
Лия ийть зориясть каршот.
1936 ие.
<< Нудейть комасть леенть вельксэс << >> Весь солы >>
Сборник Васень цвет; автор: Прончатов, И. Н.; 1939.

Последнее обновление страницы: 2016.09.19
На главную