Аф пара вайме, автор: Заиграйкин В. П. // сборник Од вий; 1934. Мордовская библиотека
Книга: Од вий. Мокшонь уйфни писателнь и поэтонь сборник. Кочказе А. Кочетков. — ОГИЗ Молодая гвардия, Москва, 1934. — с. 99—106

<< Лувкссь мувсь (Весенин) << >> Аноклайхть (Т. Кудашев) >>

В.ЗАИГРАЙКИН

Аф пара вайме

Мариновкань школань заведующайсь Гавринць, ярмаконь ужяльдеманкса думондась станцияста молемс ялга, — кемонь вайгяльпет, сон надиясь молемс кафта частста и куду ёрась пачкодемс валдста, хоть шись ни алуволь.

Станциять песа, коса илядень кожфсь ульсь ни аруня и кельмоне, сувась сон крайнай кудняти и симсь бутылка кельме лофца. Тяда меле теенза ужяльста марявсь ся ярмаксь, конань сон пандозе лофцон инкса

— Афоль эряв ба рамамс, яраштоль ба ниле кемонь трёшнексь, да путомс нинге вете манетть, конатнень ашизне панда ускомода, сембоц улель ба 5 манетт 40 трёшнект.

Пяк сон каендась тянь инкса сяс, мес сонь тавароц мивсь пяк кальдявста, пользафтома. Васькафтовсь сон пяк ни сиволть мархта, конань инголе Москуса мишенчнезе сон 15 манет килоть, а велеста рамсекшнезе 3—5 манет. А тяни сонь грехозонза сивольсь ускомстонза лямботи шиниясь и цють мивсь сяка питнеда мезда и рамсезе соньць.

— Сяда сизьгемонь манетсь вармати тусь — досадаста думандась сон, но танга сяка пек ашезь лажна, сяс мес сон арьсесь эсь пачканза, што кода аф кода а сон нинге эряй аф прокс осалста. Пяк пеняцямс ашель мезь ланкс теенза. Анок содаф, што инголи эрьсекшнесь ламода сяда цебярьста, служась судонь чиновникокс, ульсть цебярь кудонза, видьсесь лама ломань мода, кирьць чайнай лавка, конац каннесь теенза пяк оцю доход. Революцияда меле сонь эряфоц ламода сяда кальдявгаць, хоть и ингльдень эряма ащема шиц сонь ульсь кяшьф, но сембе сяка ся эрьфсь ни аш, кодамса сон эрсесь инголе.

Вирьса, конань свежалгафтозе аф кунардонь пиземнясь, кожфсь ульсь пяк цебярь и танцти. Шобда, казяна кедь тумотне, акша стирь лаца келуфне, сери и виде пичетне сюконякшнесть фкя-фкянь каршес и весяласта либорьфнесть лопаняснон эса. Марявсь кстынь и пангонь шине.

Вдрук шобда велькксса вельхтявсь вирьсь, уназевсть шуфтне, атямонь вишкя дуборфсь шерькфтезя сембе вирть. Аф лама пинкта меле вачкоць вишкя кельме пизем.

Гавринць вестенге изь повонда скамонза атямонь пинкста, сяс сон тяни пяк эвоць. Сон вишкста тусь ласькозь вирьть потмос кяшемс вастонь вешема. Ласьксь сон аф ламос и няйсь шуфттнень ёткста пялес калада модаса таватф кудне.

— Тоза сяда курок, тоза — арьсесь сон эсь пачканза.

Мзярда сувась кудняти, путозя начка чемоданонц модать ланкс, кармась шукама ланкстонза начкть.

Шукадемода меле сон варжаксць перьфканза и няезе, што тяса сон аф ськамонза. Шобда ужеса ульсь кодама бди матф ломань. Васенда сон кенярьць, што сатовсь аф скамонза, но мзярда лац приметазя ломантть, кенярдемац полафтовсь эводемаса: Сон надиязь арьсесь эсь пачканза, што тя кодама, кодама вор, разбойник. Уды ломанць ульсь оцю, пильксонза карьхть и вакссонза ащесь кшнинь байдек, сонць ульсь марнек начка. Кальдяв и пулю шамац теенза няевсь кяжиста и тя нингя сяда пяк эйфнезе Гавринть.

— „Ну да аф пара вайме“ арсесь сон эсь пачканза, а сонць сяда курок щюпаць мяште зепозонза, коса ульсь ярмакта пяшксе кошялекоц.

Аф пара ваймось нолазень кяленц мархта эчкя, лазонтф трванзон и пшкяць:

— Кода, вишкста начфтонзя пиземсь?

— Да — валомне азозе Гавринць, а сонць цёрать эзда арась сяда шири.

Цёрась няйсы, што Гавринць эводсь пеедезевсь и пшкяць:

— Тят пель, мон вдь кодамовок осал тейть аф тиян. Ярмакне тонь тейне аф эрявихть, монь моньцень аф ламне улихть и тейне сатыхть. Тон, кода мон няйся, аф верондасамак? Арьсят што васькафнян? Ватт вов: — сон юксозе карьпулонць, каряньфтезе пяндра пракстанц и таргась сонь алдонза урдазу, марс ашкотф руцяня. Келептезе руцянять и няфтсь Гавринтти мар ярмак.

— Вов, няйсак? А тон ниньге пелят:

— Во-о, мзяра ярмактонза — арсесь Гавринць улема шавсь кинь-кинь, али нельгозень киньге кяцта!

— Мес сельме каят? — пшкядсь кудняса ломанць.

— Ну, месть тон зря корхтат.

— Аф зря, мон содаса тинь жаднайхтяда ломаттне, тинь мезе аф няйхтяда, сембе ба теенть эряволь, поладозе эсь корхтаманц алясь.

— Няеви, што аф минь ялганекат нужас нингя ашеть повонда кодамс минь повнттама.

Сон путозень меки ярмакнень пракстанц алу, содозя ингольцекс карьпулонц.

— А тон мезе тиендят? — пелезь кизефтезя Гавринць цёрать.

— Мезе тиендян? Мезе пови... Инголи работакшнень эсь велесонок козе алянди, тоса пуромсь велесонок колхоз, мон сувань тоза, сёрматфтонь комсомолу.

— А колхозса мялезт эряфсь?

— Колхозса? Мон аньцек колхозса кармань эряма кода ломань. Инголи эрьсекшнень аф эрямаса, а атт эса. Азорозе пикссекшнемянь, ашемань аннекшне топодемс, а работафнемянь кафта ломаньнкса. А колхозса мон монць эсь лангозон роботан, монць и эсь работафозень ланкса азоран. Шарьхкодеть?

Но, Гавринць хоть и шарьхкоць, а мезевок изь аза. Сон кяжиста моторгофтозень трванзон, варжаксць пинень сельмоса цёрать ланкс и, врагонь пеензон мархта сускозе алулдонь трванц.

А цёрась азонць:

— Васенда колхозса тевоньке аф марнек лац мольсь пяк ламоль кулакта ётксонок, а тоса кда лифтийнек кулакнень сялдазда, тевсь тусь вишкста инголи. Кафта кизот работань и колхозса и велень советса сембе виень путозь. Ламоксть макссесть премие цебярьста работаманкса. А тядень кизоть колхозсонок лама лишнай рабочай вийда, минь кучемязь работама Ленинграду „Экспортлесу“. Да вов аньцек изь удала, тов тумазе. Ётай недалять тярязе кучсь сёрма, куду терьди эсон, сяряди. Работань, добувань кинди ярмаконе, вов и тяни саян куду.

— Так вона кия тя, — арьсесь Гавринць. — Вона кодама нармонь мархта повонь.

Вдрук сонь малезонза ляць са пингсь мзярда сонь лифтезь кудстонза тяфтама жа коммунист и комсомолецт и сявозь сембе паршинц, мзярда сон лядонць анцек 5 тёжатть ярмак мархта, рамась лиянь документ и ворьгоць велеть эзда. Хть сонь эряфоц ульсь тянинге аф пяк кальдав, но тянь сон аф юкстасы куломозонза.

Пиземсь и вармась лоткась, менельсь кармась валдомома. Кармась няфнема прянц лофтана шама ковсь. Гавринць сявозя чемоданонц и срхкась лисема.

— Матт, вайматама афламос, а тоса марса тутама — пшкяць сондеенза цёрась. — Ков кенордат, марса сяда охотна ули молемс.

Гавринць стак ни лядоль, учелезе цёрать, но кда улель кие лия эсь кондямонза, а тянь эзда эряви сяда курок ворьгодемс. Тя теенза ульсь аф ялга, а враг.

— Аш мезевок, мон ськамонга аф пелян, кивок аф сивсаман — пейнь пачк пшкядсь Гавринць и кяжиста, сидеста аськолязь лиссь ушу.

Куднять эзда кинясь мольсь видеста шава вастти — полянати и Гавринць тусь ся кинять эзга.

— Ну мяньць ваймось тя инекуйть эзда — арьсесь эсь пачканза сон. — Ярмакнень хоть пади и афи сяволезень, а мезе-мезе нингя тиель мархтот.

Но... сон вдрук лоткась и кармась думондама. Аф ламос думондамода меля кармась истеенза корхтама:

— А вдь можна ульсь ся тевсь тиемс? Перьф пяле ряц вирь, аш косонга фкавок ломань. Да, да, вов аньцек мзярда и можна... Кие сонць? Колхозник, комсомолець, мон инь оцю врагозе. Хоть монь аф сон обижамань, но сонь ялганза жа, сонь кондямонза коммунистт и комсомолецт. Вов мзярда аньцек кяжень пандомаська.

Тяфта арьсемодонза меля сонь седиец кармась вишкста шавома, пряц кармась увнама, кяденза трнацть:

— А мезе, кда мрдамс, ды...

Кяжиста варжаксць вирьть потмос. Тоса ковнять валдонц вельде, вирьть сиде вастонц эса цють няевсь куднясь, коса ульсь сонь врагоц.

— Мрдамс, мрдамс! Тнярс сон ни матодовсь — арьсесь сон, — А мезьса? Ах, да — сон аньцек тяни лятфтазе, што чемоданцонза ули оцю пеель, конань сон сявондезя мархтонза сиволень керьсемс.

Зверькс сон варжаксць кафта пяли, костонга мезевок изь няев. Эряскадозь панжеза чемоданонц, таргазя тоста пеельть, кемоста люпштазя курмось потмознза и салаване кода ката тусь меки вирьть потмос. Мзярда пачкодсь вирьть малас, лоткась и кармась кулхцондома. Кудняста марявсь вишкя крнама.

— Ага, уды.

Салаване варжаксць куднять потмос, а колхозниксь ков валдонять каршеса удось копоренц ланкса. Гавринць кармась валомне сонь малазонза молема.

Пеельть кирьдезе сон анокста.

Мзярда пачкодьсь удыть вельхксс, арась плманжа ланкс, конезень сельмонзон и вишкста озафтозя пеельть сонь мяштезонза. Цёрась ойксць, кармась пильгозон кядензон шавома и кармась инголцеть коряс сяда пяк крнама. Версь кода боцькя тулова лиссь пеельть вакска. Штоба афоль стя сон нинге кафксть озафць цёрать мяшц пеельса. Мзярда цёрась лоткась шерьхкомода, сон комоць и лиссь ушу.

Ляцть сонь мялезонза ярмакне, завидась синь лангозост, мольсь меки и савозень ярмакненге и сонць танга эряскадозь тусь куднять эзда.


Шава комнатасонза сон лувозень ярмакнень, эздост ульсь 41 манет 75 трёшнект.

— Мес бди кржа арьсесь сон — няевсь аф тняра. Но сон тянь колга аф пяк пичеди, теенза аф ярмакне эрявсть. Ярмакнень ёткса ульсть кафта синнеф мяньцеф каготкат, сон кода арьсесь нят ульсть справкат, конатнень эзда сон кармай содамонза кинь шавозе. Сон кенордазь венептезе фкя кагодкять, мольсь лампать ваксс и ушодсь морафтомонза. Каготкаса сёрматфоль: „Справка, максф, „Од Эряф“ колхозонь члентти Митрейкин Прокоп Назаровиченди сянкса, што сонь колхозонь правлениясь кучсесы, кода лишнай рабочай виень, эсь воляса „Экспортлесу“ работама кота ковонь пинкс: Председательсь (подпись) Счетоводсь (подпись)“.

Омбоцесь ульсь временнай комсомольскай удостоверение.

Гавринць оцю вайгяльса рахазевсть, путозень фталонза кядензон и пшкядсь:

— Ашень васькафтов. Фкя повсь! Да тя аф тяка, тя аньцек ушодкс, а машфтомась ули эста, мзярда тяфтамонь кемоньчка вайме кадь алган лиси. Улеза Гавринць шиса, лифцийне эздонт сембе паршинзон, аньцек ба аф повомс коданга.

Комсомолец Сергейсь ётась Правлениять ширьде и варжась Гавринтть вальмава, а Гавринць варчсесь Комсомольский билет тольть инголе.

— Коста сявозя зверьсь тя билетть, — арсесь Серьгей.

Сяка илядне кулевсь печкфть колга кулясь.

— Э... эй! минь шавить мусаськ, — мярьксь Сергейсь комсомолец ялганзонды, айда, — и тусть комсомолецень келесост милиционерть мархта.

Галанкати ёрдафтольхть билетонь пяльксне, конатнень музь комсомолецне.

Мзярда печкфть тейста меразь батинкань следонзон и ладясть Гавринть батинкань слец. Тяда башка цебярьста содавсть сонь кочкяргастонза резиновай шарамнятне.

Гавринть сявозя ГПУ-сь и кулевсь меле ни, Гавринць судендаф ляцемс.

<< Лувкссь мувсь (Весенин) << >> Аноклайхть (Т. Кудашев) >>
«Аф пара вайме», автор: Заиграйкин В. П. // сборник Од вий. Мокшонь уйфни писателнь и поэтонь сборник. — 1934.

Последнее обновление страницы: 2020.01.31
На главную