Григорть силосоц, автор: Весенин (Пинясов Я. М.) // сборник Од вий; 1934. Мордовская библиотека
Книга: Од вий. Мокшонь уйфни писателнь и поэтонь сборник. Кочказе А. Кочетков. — ОГИЗ Молодая гвардия, Москва, 1934. — с. 87—90

<< Ударник трактористти << >> Лувкссь мувсь >>

Григорть силосоц

Комсомолец Григорсь тонафнесь Од-Выселкань ШКМ-са. Тейст азондозь силозть эрявома шинц и кода тиемс.

Григорь цебярьста исце кулхцонт преподовательть азондоманц, стукаць седиец кеняндемати и мярьксь:

— Ну, кодак молян каникулс тиян силос, ваток траксонеськ кармай лама лофцта максома.

Ну вов, изь ёта кафта недялят Григорь мольсь куду. Пуроптозень эсь перьфканза ялганзон, и цють аф потянь кады тётькамнень и кармась силоснай лотконди вастонь варчсема. Тусь пере киняснон эзга, яфиесинь кеняньдезь кядензон токсесыйнь аф пяк шаморды пильксонза тишетнень и корхтай.

— А тинь пуста тишет, мянь тнярс касодондя шава вастнень эзга, норак мон тинь буксирсь сяфтядязь.

Мольсь вирень маренать алу, варжаксць кудряв маренать сельмос, топстадезе види пильксонза юронц и мерксь:

— Аа, месть ванат лангозон? Мон тонь юрозт тяникигя ушоптан силоснай лотка, и вешкозевсь:

— Ссь, ссь, — сада сей цёрат! — сонць яфиясь кода атаман кяцонза. —

А нятни — работниконза, перяфкятнень ланга, кода уча гурхконя, кона канды кшнинь кргама, кона узерь ушепцть маренать алу лотконь шувома.

Сонць Григорьсь няфнесы, мерсесы, а ниле ялганза шувихть ни модать эса и синцень конястост шуди ливссь.

Шинь перьф шувсть, и шувсть лотка, кода калма, кафта аршитть серец, пяле аршин келец, кафта аршитт кувалмоц.

— Эй! Малышт, кочкада кой-тишет, кой шинжарма юрхт, кой палакст, штоба тячик пяшкодемс, штоба кожф тяль сува, — корхтась макссесь команда работникненди.

Эх! А шабатне, кармасть сембе пяльде вяшфтема, то шиньжары кореть, то палакс, ато маршть, каждайсь канць кода панжавсь усксесь эсь алонзон панжав кайти.

— Ну, тинь каннеда, а минь ветенек карматама пяшкодема, — мярьксь кайги вайгяльса Григорсь.

Григорсь лоткть эса шаронды, кода офта лефкс и топстиясыйнь пильксонза кормотнень, конатнень ёрясазь Митрись и Ляксейсь.

Ся пинкста пере киняваст мольсь Григорьть дедац — Лукаш атя кормос, шаронць копонц эса кормонь кандома кептерец.

— Ах, прафтальдязь аф пара мор, ватт тинь мезе тиедя, маренанять косьфтасасть и кинять гастясть!

Григорь варжась кяжиста деданц ланкс и мярьксь:

— Эх, дедай, норак мон траксть лофцонц сафца, синь танцтихть улихть нят кормотне.

— Эх, озорниктада, — пеедезь пшкяць Гришань дедац и тусь тага пере кинять эзга. Лукаш атя шатнезень косолапай пильгонзон, лапиясть оцю карь прянза и аф вишкста корхтась:

— Кати мезе стапт ушопнихть, шапама кормот да месть, ули тише и пара!

Лотксь пяшкотькшни, Григорь варжась Мишка брадонц лангс, и мярьксь:

— Мишка? архт салхт кантт, кормотнень салыяфцайнек.

— Коста кандан, архт да кантт, а мон аф молян, — отвечась, акша шяярь брадоц.

Лиссь лоткть эдда Гришась сонць и кяжеттонза тусь салонкса.

Мольсь шувамнять фатязя, конац ульсь салда пяледа вярьга и кандозя силозть тейс.

Кармась салыяфтома. Салыяфтозень сембе салхнень и валязень модаса.

Переста ётамста Гришань дедац кизефтезя:

— Мезенди тяза салонь шувамнять кандыйть?

— Мезенди кандые, кормотнень салыяфтыйня, — отвечась Григорь.

— Тфу... — прафтольдязь лямбя суцясь, аньцек рамайнь салнятнень, а тон-ни кенереть фатямс.

— Дят дедай ювачне, шапама кормось аф салхт тии, — мярьксь деданц каршес Гриша.

Штафтозень кафта ковда меле силозонц и кандозень калдазти и путозень эсь тийф аномазонза, конань сон тиезя силозонь путнема вастонди. Силосне ульсть наксатт, равчт и яфоць эздодост аф пара шине, сянкса мзярда сувафтозень калдазти, то учасна лазонкшнезь коняснон и орьгоцть, кода врьгазда, и тракссновок ванць кода офта ланкс. Калдазсь пяшкоць шинеда Григорь паньцы траксть синь теезост, а тракссь кепоцы пулонц и потай эздодост меки.

— Мес аф ярхцайхть идолонь жувататне, — арьсесь эсь пачканза Гриша.

Гриша аньцек стясь удомста, и кулси дедац шумнай.

— Мезе тоса шумнай — корхтась Гриша эсь пачканза и лятфтазя шапама кормонц — молян варжаса, пади сивозь эряви путомс нингя и лиссь ушу.

Калдазть эса мезе няят, повфтаф андомати траксть пряц и каннесы андомать прясонза, то кепоцы, то валхцы, а пулоц ащи кода локша, а учатне — марса, ужетнень эзга.

— Кати мезе комсомолец шут, тяфта тиендят! — тон тя силозцень мархта жувата урафтат, андомацевок кодама! Ювачнесь кяжеттонза Гришань дедац и фатнесь траксти!

Кувать арьсесь Григорь мес аф ярхцайхть жувататне сонь силозонц эзда и тоса стряндась, што шапафтозень аф лац и исце кулхцонт учительть корхтаманц-

— Ну тяни васькафтовонь, а сай кизонда колхозти шапафттама корма, штоба сявольхть кепотькс, што силозсь арси инь оцю кормонь базакс.

<< Ударник трактористти << >> Лувкссь мувсь >>
«Григорть силосоц», автор: Пинясов Я. М. // сборник Од вий. Мокшонь уйфни писателнь и поэтонь сборник. — 1934.

Последнее обновление страницы: 2019.11.21
На главную