Гарри Аизманць — ялганеськ, автор: Левчаев П. И. // сборник Од вий, 1934. Мордовская библиотека
Книга: Од вий. Мокшонь уйфни писателнь и поэтонь сборник. Кочказе А. Кочетков. — ОГИЗ Молодая гвардия, Москва, 1934. — с. 5—10

<< Редакциять эзда << >> Исть козякадов... >>

  П. ЛЕВЧАЕВ

Гарри Аизманць — ялганеськ

1928 кизоня, кона пингоня кенерихть сембе садонь имешне: — якстере шама вишнёфкатне, сембе кстыйхне и равжа веркс ащи виноградтне, эста капиталистонь идьтне ушецть аноклама скаутонь1 слетти, конань путозь ётафтомс Берлин ошса.

Кизонь шись шама варжамакс пиндолфтозе морять — рисовандакшнезень ветть ланкс вишнефка мархта шуфтонятнень. Морять берекса пращандакшнесть аляснон-дядяснон мархта капиталистонь, вишнёфка щёка, скаутонь слёту сырхкаф иднятне.

Синь эсост учсь акша, — кода маци, лама вальмаса морской парохоць, нинге аф ламос и сон ивади — азы латти сырхкаманц колга. Вдруг кати коста, якстерь флак мархта явондасть пионерхт. Синь стройнай ряца мольсть сатть эзга видеста пристани, — парохотть тейс.

Нингя сяда пяк верыясть скаутонь слёту молихнень шамасна, крьвязсь сельмозост кяжень толня, конань мялецоль инь вишкя пожаркс плхтамс флаконь кандыхнень.

А пионерхне, бта аф и няйсазь тянь синь ушецть вяшкондема и пейчнема капиталистонь идтнень ланкс. Тя пингова сембе пристантть маласта ломаттне, шашцть пионеронь колоннать малас, лувонцть пионеронь плакатнень и кулхцондозь мезя корхтась ящик ланкса ащи, 13-шка кизоса пионерсь. Сон корхтась скаутонь слетть каршес и ёрась азондомс кинь перьф эряви пуромомс сембе трудяень иттнененди. Тяка пинкть эзда арцть полицейскайхне и апак ужяльтть 10—13 кизоса иттннень, ушецть пиксема резинань байдекса, пионеронь демонстрациять паньцема. А ящикть ланкстоть, сявозь эсь мархтост.

Кие ульсть сембе азсть проклятие тяфтане тюри полицияти, а скауту молийхне, кеняндезь шавозь пухокс ащи ляпе кядьснон и весяласта кармасть сувсема парохотти.


Ши мадома малати, мзярда кожфсь тустоми качам шинеда, полициять мархта эйфнеф и пиксеф пионерхне кочкавсть калдаснень фталу, лятф кшни пялькснень тейс, синь порсть пейснон и салаване тошказь, гразясть, инь цебярь ялгаснон инкса. Гразясть и няфнесть аф оцю кядняснон, морять вельф ши стяма шири... Синь учсть и надиясть што тейст кие бди лезды, синь содазь, капиталистнень каршес тюрихть аф ськамост и коса-бди тага, шинь стяма ширеса, улихть альнякасна, — конат синь жа лацост тюрезь, сатозь воля шить.

Синь эсь идень седисост ёрасть плхтамс тя сембе сталмоть, понсемс капиталистнень пинеснон — капиталистнень и таргамс решеткатнень фталда эсь инь кельгома ялгаснон Гарри Айзмантть.

Гаррись, ульсь синь пуроптысна, сон ульсь синь вятисна и инксост ащесь.

А тяни, веры пинень сельмотьне, капиталистонь сивотьфне, фатязь и пякстазь, теест тяшкава питни ялгать.

Недяляшка меле, капиталистонь газетатне нолдасть басне, бта Гаррись, народонь кучкаса, цятадезе кядь лапасонза пеке ланга полицейскайть алашанц, — самай ся, полицейскайть, кона резинань палкаса, панезе пионеронь демонстрациять.

И вов, капиталистонь „миронь кельги“ и „правдань арьси суць, — алашать скорбиндамода“, 13 кизоса Гаррить судендазе 6 кизос! Аш изь кирьде Гаррить отрядонц седиец, — сон кочказень Нью-Йоркста сембе трудяень итьнень и тусь тёжяньцта ащи колоннаса Гаррить ареляма.

Аш исть ван тянь ланкс озадонь седихть и лия масторстонга покодиень иттня и синь алясна.

— Максода воля ши Гарри Айзманти! — Ювацть трудяйхне Англияста.

— Воля Айзманти! — Пишкоцть Китайса.

— Дясть шокша 13 кизоса шабать веронц, — капиталистнеди юваць Германскай пролетариаць, — дяйнть токафне веры пейнтень честнай ломанень, трудяень цёрати — ифке вайгяльса пшкяць 3 миллионнай пионеронь отряць СССР-ста!!!

— Нолдасть воляс Гарри Айзмантть, тясть шокша эрекста пижя шабать веронц.

Сембе масторхнень ланкста кулевсть Американь капиталисттненди трудяйть валонза.

Ранакиге, нингя аньцек юваць васеньце гудоксь, а Гаррить ялганза анокласть ялгаснон васьфтема. Аш изь сат буржуазиять кемя ширец, исть кирьде уторанза, Гаррись эрявсь нолдамс решеткатнень фталда.

Тяшка радозть инкса, Гаррить отрядоц и нинге лама лия трудяень идть, тячиень шиня ёрасть няфтемс эсь сяськфснон капиталисттнень мархта тюремаса Гарри ялгаснон инкса.

Сембе масторлангонь пролетариать лезксонц мархта, синь кошардозь капиталистнень тиемс сянь, — мезе эрявсь теест. Тянь инкса синь тячи танга ётасть якстерь флакснон мархта рабочай кварталхнень пачк — Гаррить мархта. Синь сядонга пяк серемсть седисна, сяда кемоста арась мяльсна педа-пес, капиталистонь сталмоть каршес тюрема!

Сядонга пяк кармась вятема эсь тевонц Гаррись. Сон изь эводе капиталистонь сутть эзда, сембе вийса лезць пролетариатть тевс, апак трнатт калгода аськолксса сон ульсь эрь рабочаень демонстрацияса, васеньце рятть эса.

Шистонь-шис и эрь минутаста, капиталисттнень кргапарьс Гаррись пезонць кода оржа пакарь, сяда кемоста полициясь ванць Гаррить мельге, сонь мялец ульсь, кода — аф кода, но кяшемс сяда фталу тя „нинге лофцу трва“ коммунистть.

Тянь инкса, Гаррить эрь аськолксоц ульсь ванф полициять мархта.

Курок омбоце кизось-ни топоди, кода скауттне тушенцть слету, кафта кизот, — кода Гаррись ульсь „урядаф“ — алашать скарбиндамода.

Омбоце кизось Гаррись исце лоткафта и эрьшиня работай сяка тевсонза. Кодак коса демонстрация — Гаррись инголя, кодак коза пуромсь народ, — Гаррись куци мезенге ланкс и корхтай сембе робочаень иттнень лемста.

Низельгофтф пей полициясь старандась тиемс мезенга муворкс и кода — аф кода, урядамс Гаррить сельме ингольде.

Весть Нью-Йоркса робочайхне тийсть кодама бди праздник, кочкавсть сембе фкя васц и тусть кварталть кувалма. А Гаррись, якстерь флакть мархта сембеда инголя. Марявсь народонь морять вельхксса, волнакс геворьсь тёжань вайгяльса:

„Минь сединеке кяжса лайкайхть.
Тргадомс вятихть сяконь ватт...!“

Курок синь каршезост лиссь полициясь, и ушепць тиема эсь тевонц: — алу кятть, кие повсь сянь резинань палкать эса мацы, прять али сельмоть ланга — сембе сяка.

Савсь явовомс и лоткафтомс мороть, пякни лама алаша ланкса арни пинеда.

Фкя пинесь, няезе фкя шаба ашкодозя якстерь флакть и ёрась кяшемс сон полицескай пинетьнень сельме ингольдя, кода кафта аськолмада тейстонза ащи полицейскяйсь комоць теенза и фатязе флагонек — шабанек.

Тя омбоцеда повсь революционнай Гаррись.

Мзярда сон ульсь серьгятьф омбоцеда сьякожа „правдань арьси“ судьять инголи, — сон кеподезень очканзон и пилькста пряс ванозе Гаррить.

— „Минь тонь мархтот знакомайхтяма“ — рахсемянь инкса пшкяць Гаррити.

Гаррись кшмордазе сядонга пяк кулаконц, арафтозя аф оцю мяштенц инголи и, аф пелезь, ёфси аф эводезь, отвечась:

— Да, мон содатядязь китада сембе тинь, служендатада, сивочнетяда прянтень капиталисттнеди, арелятада синь покойснон, да канттада пинень служба.

Нят валхне кяжияфтозь судьять и сянь инкса, кода хуть цютькяне эйфтемс шабать, сон сембе вийста юваць.

— Мес март ковть 6-це шиста ашелеть школаса!?


1 Скаутт мярьгихть капиталистонь идень союзонь члентненди.

<< Редакциять эзда << >> Исть козякадов... >>
«Гарри Аизманць — ялганеськ», автор: Левчаев П. И. // сборник Од вий. Мокшонь уйфни писателнь и поэтонь сборник. — 1934.

Последнее обновление страницы: 2018.07.29
На главную