Роснень ланкса, автор: Чумаков И. Ф. // сборник Васень аськолкс; 1931. Мордовская библиотека
Книга: Васень аськолкс. Мокшонь писательхнень сёрматфсна. — Государственное издательство художественной литературы (ГИХЛ), Моску, 1932. — с. 47—53

<< Сокайть мороц << >> Ударница (Е. Пьянзин) >>
РОСНЕНЬ ЛАНКСА

Росня щафтозь
Тюжя щамснон,
Сюконязня
Синь люкайхть.
Прокс — ни кадозь
Пижя ланкснон,
Мярьгат вели,
Комсезь сайхть.
Розьсь колхозонь,
(Сельмот кайсесть).
Ащесь кода
Тумонь вирь,
Тюжять потмос
Розьти вайсесь
Сай колхозу
Мокшонь стирь.
Розьнясь комай, —
Няеви Агась
Розьнясь кеподи, —
Юмай,
Эрязаста
Ага ялгась,
Куду кенордазь
Сон сай.
Росьнень мархта
Корхтась Агась,
Кенянць сон,
Мес малаць велесь:
Пачкоць куду,
Няйсь сон ялгат.
Шумбрат Ага.
(Марявсь келес)
Тяфта ялганза
Соннь корхтасть,
Азонцть теенза
Кулят.
 ............
Велесь од,
Колхозсь работай, —
Тяни пинкня
Састь лият.
— Тячи пуромкс —
Пшкяць Машу
Агась, ялгат,
Тусть синь тоза.
  ............
Корхтай Агась:
— Сувак, тон, ашу,
Сувак од эряфти —
Колхозу.
Машинат, трактор,
Полафты шиця;
(Росьнень минь
Ляцайнек марса).
Откстоми эста
Тонь киця,
Эста лисят
Сиря карцта.
Пуромкста меля —
Колхозу
Ашуфт,
Середнякня сувасть:
Фкяфкянь колхозу
Синь тернесть:
— Тячиень шити
Кундасть;

* * *
— Эй, тон атяй,
Эй, тон ашу,
Удость Омбоця тундать!
(Корхтась Агась,
Корхтась Машу):
Сргость, сргость,
Сатк тон эряфть,
Большевиконь
Кить кундак.

* * *
Вельхтяф шовдавась
Расаса,
Шинясь нингя
Пря изь няфть:
Колхозсь покась
Розть кучкаса,
Вишкста касыхть
Розень лятьфть.
Жнейкат уенцть
Пецек... пецек...
Пейснон эса
Керезь розть,
Каяйхть марнят
Серьцек... серьцек...
Аф юмафттам
Фкяв розь пряня,
Сембя ули
Минь — колхозть.
Агань жнейканц —
Лятьфонц меля,
Содыхть пулфнень
Стирьхть и цёрат.
Эй, тон каст
Ударнай веля,
Морот тяни
Отт марак.
Жнейкась розьти
Морай морот,
Росьнень эса
Крмозьсь фатни,
Кчкалцть, лиенцть
Паксянь Ёрт,
Шуморявихть
Розь уматня.
Розть урядамс,
Содомс, лядемс,
Аньцек ветя
Максфтольхть шида,
Паксять колма
Шис — илядняс....
  .........
Синь исть пель
Илятта, псида.
Тракторть меля,
Кода мар,
Валяфт грандазти
Хрястецть;
Тракторсь уски,
Ноляй пар, —
Ускомати
Тракторсь пець.
Весть сон уски
— Ветя грандаст,
Меки арды
Агась паксяв,
  .........
Вишконяста
Пулфнень кандыйнть.
Эй, ударникт,
Эй, тон Макся!
Ускомати
Вашот лездыхть,
Читорр... читорр...
Ускфня молихть —
Вишкста ускихть
Росьнень эзда
  ...........
Эй, тон сивай,
Молефть штоли...
Кафта пяли
Шитня ётасть,
Пулфня паксяста
Юмасть, —
Ланксост вишкя
Вий — Работась,
Паксять лангоц
Тингу сась.

* * *
Тяса оцю
Капань тингя,
Кели, такор
Токня лапоцть:
Марявсть вайгяльхть:
Ёряк нингя.
Ёряф пулфня —
Токти цяпоцть.
Марявсь увф,
Машинась зорнась,
Крукса молихть
Шарфтыхть вашот,
Шужярьхня лисихть,
Пяярсь зёрнат.
 .........
Машинат тяляйхть,
Тяпецня — Ашот!
Тона песа
Тяляйхть, тяляйхть
Тракторть мороц
Аньцек кштись,
Тяса вашот
Вишкста кялихть,
Тока лангса
Дуборць шись.
1931 к.
<< Сокайть мороц << >> Ударница (Е. Пьянзин) >>
«Роснень ланкса», автор: Чумаков И. Ф. // сборник Васень аськолкс. Мокшонь писательхнень сёрматфсна. — 1932.

Последнее обновление страницы: 2017.08.25
На главную