Лямбе кядьса, глава 48; автор: Ларионов С. С.; 1962. Мордовская библиотека
Книга: Ларионов С. Лямбе кядьса: Роман. — Саранск: Мордовскяй книжнай издательствась, 1962. — с. 285—287

<< Глава 47 << >> Глава 49 >>

48

Карга велесь няевсь праздниконнекс. Шись токадсь недляши, и сиренек-однек содазь Бугров атять шачема шинц колга. Шобдавакиге тяза сась Варвара Степановна, и Белкинть мархта аноклазь торжествать. Обед малати састь райкомста и райисполкомста. Райононь эрь колхозста тертьфоль собранияти фкя механизатор, састь лия велеста сире коммунистт, конатнень мархта Бугров работакшнесь коллективизациять пингста. Пуромсть Карга велень цють аф сембе колхозникне. Кие-бди учительхнень эзда рисовандазе Бугровть оцю портретонц.

Виде, райкомса кой-кит корхнесть, што афоль эряв кепсемс тяшкава шум Бугровть инкса, мезенди тя сембе эрявсь?

Порговти ламос савсь араламс эсь планонц. «Минь тя праздникть вельде няфтьсаськ, — корхтась Поргов, — мезе тии сире коммунистть и механизаторть цебярь тевоц. А ломанть цебярь тевонзон кельгомасна — тя мзярдонга аф лишнай минь странасонк. Кадк Бугровть инкса радовандайхть сембе велеряйхне.

Тячиень шись няфтезе Порговть видешинц. Бугровть шачема шиц арась праздникокс марнек районти. Атяти кие кучсь телеграмма, кие казнет. Меколи тяза сась Поргов и мархтонза кафта ломатть Саранскяйста. Колхозонь правлениять ваксс лихтьфтольхть шрат, скомнят, стулхт. Президиумть кучкас озафтозь Бугров атять и сонь рьванц. Именинниксь щафоль од костюмса, сатиновай од панарса. Сеентьф шаржу сакалоц вельхтязе марнек мяштенц. Тячи няевсь Бугров лиякс: ламода сяда тазаль, мазыель, ащесь сятявста, виздезь варжакснесь кафта шири ломаттнень ланга.

Торжественнай собраниять панжезе Поргов. Педа-пес азондозе атять эряфонц, а меколи азсь тейнза спасиба цебярь работанкса и цебярь идень касфтоманкса. Уназевсь марнек ульцясь, цяпазь сембе кядьснон, мзярда Поргов ашкодозе атять и палазе. Атят-бабат Бугрофне саворне нарнезь сельмоведьснон.

Республикань Верховнай Советть лемста Саранскяйста саф сире, Бугровть лаца шаржу ломанць лувсь Указ и макссь Бугровти Почётнай Грамота.

Торжественнай собранияда меле Лехов и Белкин Бугровть лемста тердезь инжихнень атять пяли. Хоть Поргов и пельсь «свадьбада», надияфнесь мезевок срхкафнемс, но тяни сонць изь атаказа молемс и симомс атять шумбрашинц инкса рюмка вина.

Бугровть пятистеннай кудоц пяшксель инжида. Синцень атят-бабат Шиндинась озафтозень эзембряти, а каршезост — синь цёраснон и унокснон: сембе тазат, мазыхть. Вдь аньцек ськамонза тя семьясь районть келес сокась-урядась пцтай кемонь тёжятть гектар колхознай мода.

Ашель тяса аньцек Алексейсь. Атясь фалу ванондсь вальмяти, учсь сембода ёмла и кельгома цёранц.

Кода и собранияса, Бугровть ваксса ащесь Поргов. Мзярда сембось аноколь, вальмять алу лоткась машина. Васенда лиссь эздонза сонць Алёшась, а мельганза валгсь Галина Васильевна Сараевась. Сембода пяк кенярдсь ня инжихненди Варвара Степановнась. Сон васьфтезень, озафтозень кафцьконь сире Бугровть каршес. Кивок ашезе няй, кода лофташкодсь атять шамац, бта новольсть сонь лафтунза.

Поргов кеподезе рюмканц. Кудсь сетьмось. Но аньцек ёрась мезе-бди азомс, азорсь озафтозе Порговть и сонць стясь вастозонза. Рьвац апак лотксек тозерязе атять кядьта, кяжиякшнесь, но ся бта мезевок изь куле. Сон ашезень кеподе ломаттнень лангс сельмонзон, корхтазевсь:

— Мон аф ёран, штоба шумбрашизень инкса симоль ломанць, конань сюнеда ламос ни сяряди седиезе, кудсон прафтф аф кржа сельмоведь.

Инжихне варжакснесть фкя-фкянь лангс, ёрасть шарьхкодемс, кинь колга азфтольхть ня валхне. Вдруг шрать ваксста эрязста стясь Галина Васильевнась, комафтозе прянц и ласькозь лиссь кудста. Алексейсь кяжвельде варжакстсь алянц лангс и лиссь Сараевать мельге.

Инжихне таяскодсть, мезевок изь шарьхкодев тейст. Лиссь кудста Шиндинаське, ласьксь ульцять кувалмос Сараевать мельге. Алёшась шарфтозе машинать, сатозе Сараевать, и Варвара Степановнать мархта вихца озафтозь сонь машинати.

Бугров атясь ащесь комадонь прят. Саранскяйста сафне кизефтезь Порговть, мезе лиссь.

Поргов тага стясь вастстонза и азозе, што мезе тяса лиссь — тя азорть тевсь. Синь синцень эсь ётковаст ули тевсна. Сон тердезень сембонь симомс сире Бугровть и сонь рьванц шумбрашиснон инкса.

Сембе стясть и венептезь рюмкаснон Семён Прокофьевиченди и сонь рьванцты. Тяни сембе тага весялгодсть, оду уназевсь кудсь.

<< Глава 47 << >> Глава 49 >>
Лямбе кядьса, глава 48; автор: Ларионов С. С.; 1962.

Последнее обновление страницы: 2016.05.25
На главную