Лямбе кядьса, глава 47; автор: Ларионов С. С.; 1962. Мордовская библиотека
Книга: Ларионов С. Лямбе кядьса: Роман. — Саранск: Мордовскяй книжнай издательствась, 1962. — с. 282—285

<< Глава 46 << >> Глава 48 >>

47

Финц сельмоветтнень эзда Поргов тусь, омбонцненди сась. Варвара Степановнась платьянек-мезнек прафоль вастонц туркс. Вакссонза ащи тядяц и ваны стиренц лангс, кода ловажа лангс. Поргов кеподезе Варвара Степановнать прянц, ёразень паламс начка сельмонзон, а сон аварьгодсь нинге сяда пяк, кяшезе тодути шаманц и мторгодсь:

— Тямак токсе, Борис...

Пелагея Афанасьевна нардазень сельмоведензон, лиссь комнатаста. Поргов озась рьванц ваксс, кармась леснемонза:

— Варюша, но мон вдь аф виноватан... Мезенкса тяшкава шавсак пряцень? Минь тонь мархтот фкя-фкянь кельгоме и карматама кельгома. Тон монь законнай рьвязят.

— А Ася? Цёраце? — летнямбачк кизефнесь Варвара Степановна.

Поргов ламос ашезь арьсе, отвечась:

— Анфиса кода эрясь, станяк и кармай эряма. А цёразе? Цёразе — монь! Мон сонь эздонза аф атказан. Мон тейть азонкшнине, што коса-бди ули идезе, ашихтень васькафне.

Варвара Степановнась кеподезе прянц и путозе Борис Константинович лафтунц лангс, стакаста-стакаста куфкстсь:

— Ох, конашка горя тиевсь!

— Тя горясь аф тонь, Варюша. Тон ёфси тяса аф виноватат.

— А кинь мле горясь? Кие виноватсь?

— Горясь монь и Анфисань, а виноватсь — войнась! Аф авардема, а сюдомс и сюдомс войнань срхкафтыхне!

Веньберьф Поргов и Шиндина ашесть уда. Аф весть корхнесть сянь колга, кода тяни кармайхть эряма. Варвара Степановнась сембода пяк пичедсь: кода васьфтьсазь ломаттне, кода тяни няфти пря работама вастса и колхозса.

Омбоце шиня работама кафцьке ашесть лисе. Поргов шобдавакиге тердсь машина, озафтозе Варвара Степановнань и шоферфтома тусть вири, штоба тоса хоть аф ламняда шукадемс седиснон лангста исяконь шямонть. Иляденди Шиндина сяда весялгодсь, кой-коста нльне пеедсь, шутендась.

Весялакс прянц няфнезе Порговське, бта эряфсост мезевок изь лисе, а седиенц эса карасть салмоксса.

Илять мирьтть-рьват сувасть Зобовть пяли, ся нинге сембе сярядсь. Васенда корхтасть азорть урманц колга, но авань седись изь кирде, и Шиндина сельмоведьбачк панжазе сяряди потмонц Зобовти:

— А минь, Максим Софронович, оцю горяньке...

Зобов нльне эводсь, варчсесь кафцьконь лангс, ёрась шарьхкодемс, мезе лиссь ётксост. Варвара Степановнати сяда лама мезевок изь азов.

Кармась азондома Поргов, а мзярда аделазе, Зобов сявозе Шиндинать кяденц, вадерязе саворне, корхтась, што тяса кивок аф виноват.

— А ломаттнень эзда тон тят пель, — сютяптсь Шиндинать эса Зобов‚ — цебярь ломаттне шарьхкодьсазь, а кинь мялец корхтамс, сянь кургоц сельмоведьсот аф пандови. А тон, Борис Константинович, тяни кода ёрат тиемс? — родной алякс кизефтезе Порговть.

— Мон азыне Варати, кода ульсь, станяк и кармай улема. Вара монь рьвязе.

— Тя пара! — азозе 3обов. — Вов и ладяф сембе тевсь, — нльне кенярдсь сон. — А мезенкса нинге авардемс?

Шиндинась нардазень сельмоведензон.

— Минь жеребс каясаськ Борять, — рахазевсь сон, — кинди саты, ся и сявсы.

Рахазевсть алятневок.

— Мон аф учанян, штоба каямс жеребс, — кенярдсь Порговсь рьванц весялгодаманцты, — монь улихть монцень мялямне. А интересна улель ваномс, кода каяледе жерепт райкомонь секретарть инкса.

— Как раз тянкса мон и пичедян, — лоткась пеедемда Варвара Степановна, — кда улелеть аф секретарь, а учаня, сотолень сялдазозт пикскя, сяволихтень лугав и сик ванондолень лангозт. Кивок афолемазь няй, афолемазь куль. А тяни содасак, мезе кармайхть корхтама Салмофнень кондяпне?

— Э-э, милайняй! Тянь эзда тон тят пеле, — нльне аф сярядиень вайгяльса корхтазевсь Зобов. — Районца ули партийнай организация. Канькстайхть Салмофнень пейсна.

Райисполкомонь председательсь марнек весялгофтозень миртть-рьват Поргофнень, и тяни синь тага кармасть корхтама Зобовть урманц колга.

— Пупайхне муцямазь, — жалбась Зобов. — Мон чаянь, эйндафтонь, хозяйказе грелкаса эжнесь эсон, а Бунчиксь лия урма мусь: корхтай, седись коленди. Аф мярьги нльне стякшнемда, кирдьсаман копорезень лангса. Обидна тя пингть сярядемс.

Поргов азозе, штоба сон афоль пичеде работать инкса. Ладняс пчкяль.

— Няемс, морайне ни морозень, — меколи азозе Зобов, — сави пенсияс тумс.

— О-го-о! Пенсияс! Содасак, нинге кода карматама работатама мархтот? — кундазе сонь лафтуда Поргов. — Кочурин лемнезе электростанциять строяманц, корхтай, кизефкссь ванондови вяре и, наверна, тя ковня ули арьсеф, сембе вастова кирдьсазь районть ширенц.

Зобовть крьвязсть сельмонза, нежедсь кенеренц лангс.

— Курок кабинетстот макетть вастс эвондайхть платт, чертёшт, кармат работама инженерхнень, техникнень мархта.

Зобов кулхцондсь и пеедсь, кассь мялец:

— Электростанциять строяманц обязательна няйса. Аф карман пчкама райисполкомса работама, туян пенсияс и сиводян пря тоза сторожкс. Но обязательна сельмоне няйсазь тя станциять. Вдь колмошка киза ни хлопотиндан тя станциять инкса. Мон содайне, што обкомсь кирдьсы ширеньконь.

Зобовть ширде Поргофне тусть весяласта. Варвара Степановнась нльне шутендась. Омбоце шиня кафцьке ранакиге лиссть работама.

<< Глава 46 << >> Глава 48 >>
Лямбе кядьса, глава 47; автор: Ларионов С. С.; 1962.

Последнее обновление страницы: 2016.05.21
На главную