Лямбе кядьса, глава 30; автор: Ларионов С. С.; 1962. Мордовская библиотека
Книга: Ларионов С. Лямбе кядьса: Роман. — Саранск: Мордовскяй книжнай издательствась, 1962. — с. 182—186

<< Глава 29 << >> Глава 31 >>

30

Кафтова явови мешвеленякс увнась Карга велесь. Леховть бюрос тернемдонза меле ниге сяда ломань пуромкшнесь конюхонь куднять каршес и спорсесть, спорсесть... Финцне ащесть Леховть ширеса, омбонцне хоть и салаване, но анокласть ни лия председатель. Аньцек изь няфне пря Ульмов. Велеть келес алятне рахсесть лангсонза, лятьфнезь, кола Спиридон Спиридонович варчсезень пилеваксонзон.

Синтьф шуфтсь читорды, а азф валсь кулеви. Сембе, мезе корхнесть колхозникне, пачкотькшнесь Леховти. Кати виздсь, кати пельсь, но тяни сонга шуроста няенькшневсь алятнень ёткса. То шистонь ши эрьсесь вирьса, аноклась комсомолецнень мархта шочкт, то нюрьгондсь кардонь строяйхнень ёткса‚ хоть плотниконь кафцьке бригадирхне соньфтемонзонга лац вятезь тевснон.

Весть, обедта меле, Лехов лихтезе пожаркаста автобусть, коза сон кунара ни кяшфоль, и тусь машина кинь станцияв. Местема и мзярс, кивок ашезе сода. Ашезе сода тянь нльне сонцьке Лехов. Пачкодсь тоза, шарсь аф ламос возалть перьф, васьфтезе и прважазе васенда фкя поездть, омбоцеть, ювандсь-явандсь и мрдась меки, мзярда велесь кунара ни удось.

Сувась куду и ашезь маря семьянь танцти шиненя, кода уленкшнесь инголе: сай куду веть сизефста, панчсы кенкшть и кодак марясыне цёранянзон и рьванц вайме пожфснон, юкстасыне сембе сталмонзон, ётай сизефоц. Тяни шаволь кудоц. Аф весть ни сюцезе эсь прянц, мезенди нолдазе ня шитнень рьванц ошу раднянзон мархта васедема.

Лехов эряскодсь мадомс, но сонь сельминголенза ащесть Салмов‚ Ульмов, Суксов, бта ванцть лангозонза и пеедсть.

Ашезь кенерь Лехов кода эряви матодовомс, сргозсь меки и комотсь вастстонза, щафтозень пильгозонза тапочканзон, лаподезе лафту лангозонза плащенц и лиссь. Но ков веть молемс? Якась мековасу кудонц перьф, озась стенать ваксс, пштедсь шочкненди и марязе, кода стакаста кепсесть мяште пакаренза. Мекольдень шитнень изь валгонда прястонза заводсна, цехсь, коса сон работась, сельминголенза ащесть ялганза, конатнень вельде сон арась цебярь слесарькс и кассь цехонь начальникокс. Ламос арьсесь синь колгаст, пчкяль‚ лийксталь меки заводу, кадк кивок тя колхозста вестенге афолезе няй визди шаманц и горяскотф сельмованфонц.

Заводонь цехнень мархта марса Лехов няезень колхозонь паксятнень, жольнясть сёротне. А вов Карга велесь, фкя песонзоль од больниця, омбоцеса клуб, велеть кучкава ащесть водопроводнай колонкат...

Шись лиссь ни и кармась эждемонза Леховть щеканц, марязе, ёфси маласонза клокнась лефкс мархта нарвай. Сембонь тянь сон марязе, но пельсь панжемс сельмонзон. «Удан или аф?» — арьсесь эсь пачканза. Сельмокеронзон пачк марявсь шить валдоц. Панжезень сельмонзон и ашезе шарьхкоде, коса сон и мезе мархтонза тиендеви. Ульцять кувалмос, Мокшеть ширде, сай мациень стада. Атямацись инголе прянь шнафтозь аськолясь куду, мельганза вятсь колма авамацихть и комозьшка лефкс.

Лехов визделгодсь эсь прянц эзда и эрязста сувась куду. Ёрась сембонь юкстамс, анокламс эстейнза ярхцамбяль и куроконе тумс паксяв. Крьвястезе томбалангста примусть, путсь лангозонза пачкалга, каясь вай и шулгсь вете алхт. Кода нарошна, примуссь ашезь карма палома. Толсь то увнась, то вяшксь. Ламос Лехов карась эсонза примусонь салмоксса, но примуссь ёфси мадсь, аньцек куйкс вяшксь и кода трубаста мольсь качамсь. Кркштадезе фкя сардонять, омбоцеть, колмоцеть, но тя пингс качамть эзда изь няев поталаксь. Примусть крьвястезе, но палсь аф увназь, а кеподсь копанашка толмар. Тяни кяженьбачк ёрдазе примусть пянакудть потмос, но толсь нинге сяда кассь. Шарьхкодсь, што примусть эзда эряви нолдамс кожфть, фатязе стенати повфтаф утиркать, начфтозе, ашкодозе эсонза кяденц. Мадсь якстерь толсь.

Бта каруфт лиендсть кудть эзга сод покольхне. Лехов ащесь куд кучкаса и сюцесь рьванц эса, местема сон тусь ошу.

Панжезень кенкшть и вальмятнень. Качамсь кода уштф баняста лиссь. Ласьксть тяза эвотьфста шабрань бабатне:

— Господи! Господи! — цють тарксевсь синь ваймосна.

— Аш мезевок, аш мезевок‚ — корхтась тейст Лехов.

Сон юкстазе вачашинц, учезе качамть ётаманц и пякстазе квартиранц.

Бюров тернемдонза меле аф озадонь седихть эрясь Белкинцьке. Ашезе сода, мезьста ушедомс партийнай тевонзон. Сон мяляфтсыне Порговть валонзон: «Марса Леховть мархта эряви ускомс усфсь». Но кайгсь пилесонза Варламовть валонзовок: «Лехов эряви овстамс!» «Мезе тиемс? Коста ушедомс работать? Коса ся усфсь, конанди эряви кильдевомс? Косот и кодапт ся овосне, конатнень мархта Лехов эряви вятемс виде киге?»

Сон учсь, што райкомонь бюроса азсазь эльбятьксонзон, няфтьсазь, мезьс тейнза кярьмодемс. Но тоса мезевок изь куле; спорясть, шумнасть, а тейст Леховть мархта мезевок исть аза. Сон нльне афи содасы, мезе ульсь бюроса.

Кота кизот ни работай Белкин парторганизациянь секретарькс, но вестенге кивок, кода эряви, изь корхта мархтонза партийнай работать колга. Ламоксть васетькшнесь Варламовть мархта, ламоксть корхнесь мархтонза, но Варламов фалу сюцекшнезе: васенда Суксовть инкса, мес ся симонькшнесь, мзярда ульсь председатель, а тяни сюци эсонза, мес аф ваны Леховть мельге. Белкин тяни сельме каясь Леховть лангс. Сонь хоть сюцесазь, но лувсазь руководителькс. А сон, Белкин, кие? Кодама спица шарыса? Кодамовок аш. Лядьсь мялезонза кукурузась. Вдь синь, коммунисттне, кеподезь велеть мотыжендамонза. Аньцек аделазь лангсонза работать, ётась пиземня, кукурузась кармась кеподема сельминголе.

Кочксемок прясонза сембе ня тефнень, Белкинти мезенксонга исть уркстов аф велень коммунисттне, аф Лехов, аф эсь пряц! «Вдь монга аф кальдявста ускан усфть эса»...

Тяни мялецоль хоть кинди-кинди панжемс потмонц, кизефтемс ётть. Тейнза ужялель Леховське, кона шары пря учакс изь мушенда эстейнза васта. Мезьса и кода озафтсы Леховть седиенц, мезе сон азы?

Срхксесь звонямс райкому, а, пади, нльне эряви молемс тоза? Пельсь тага лятьфтасазь «овоснень», а тя валть эзда мольсь ни сонь мялец.

Лядьсь Белкинть мяльс, што тяни синь колхозсост уполномоченнайкс путф Поргов, но сяцка ня шитнень изь няфне тяза пря.

Иляденди Белкин кулезе, што Поргов омбоце шись «Пиче кура» колхозса. Нльне кенярдсь, эряскодсь звонямс сянди, тердемс тяза, корхтамс мархтонза, кода эста, мзярда корхнесть синь утомса, панжемс тейнза потмонц. Тяфта Белкин и тись: звонясь Порговти, азондозе, мезе тиендеви Леховть мархта.

— Мон вдь бюроса ашелень, — отвечась Поргов, — и мезевок аф содан.

Белкин эняльдсь, штоба сон саль велезост.

Поргов ашезе сода, мезе тиемс, лама тевда ся колхозсонга: эрявсть нолдамс тевс тостонь комбайнатневок.

— А тон пуроптт партийнай собрания, — тонафтсь сон. — Тяда цебярь ёнень азы аф муят. А ванды, пади, монга молян.

Белкин бта салфтома сусксь: «Пуроптт партийнай собрания»... А мезе азыхть коммунисттне? Но тись Порговть лаца. Сяка илядня пуроптозень колхозонь коммунисттнень. Собраниять вятезе рядовой коммунистсь Тимкин. Тяни аф Лехов кизефнезень ломаттнень, а коммунисттне кизефнезь сонь. И хоть велеса коммунистта сембоц кемголмува, сякокс марявсь, што тя собранияса шавсь колхозть седиец. Тяса кивок кяжиста ашезень кепсе сельмонзон, ашезе касфне вайгяленц. Леховти аф фкянь крда савсь ливосьгодомс тозеронь видемать, кукурузать и траксонь фермать инкса.

Собранияса лятьфнезь Марфать кудонцка. Коммунистсь Бугров атя видеста азозе Леховти:

— Марфать кудоц кунара ни петемаль колхозть вийса. Эрявихть петемс и лия солдаткатнень кудсна.

— А карттнень? — кизефтезе сонь Лехов. — Сятнень кадсаськ?

— Кадк лучи фкя карда аф тиеви, — мярьгсь Бугров.

— Мес аньцек солдаткатнень кудснон? — пшкядсь Суксов.

Бугров кяжиста варжакстсь сонь лангозонза.

— А тон, Авдош, сельмодят синь лангозост? А мон аф. Ёфси аф сельмодян. Эрявихть касфтомс сиротатне, кадк синь содасазь, што аляснон вастс лядоме минь, колхозсь. — Варжакстсь Леховть лангс и поладозе: — А кда аф сатыхть плотникне, то вандыкиге кадса токть, монць сяван кядезон узерь.

Нюрьхкяняль валоц Мезинть. Сон азозе, што плотникне сатыхть, куттнень петемста синь кармайхть работама илять-илять.

— И фкявок карда апак тийхть аф каттама, — аделазе корхтаманц бригадирсь.

Тимкин кеподезе Суксовть колга кизефксть:

— Кукурузась сонь бригадасонзоль, мес аф отвечай видефть инкса? Леховть тернезь тянкса райкомонь бюрос. А минь давайте кизефтьсаськ шумуть — Суксовть.

— Комиссиять актса монь фамилиязе ашель, — мярьгсь Суксов. — Месть педендят?

Коммунисттне кяжиясть ня валхнень инкса. Но Суксовть колга кизефксть кадозь. Лехов азозе, што васендакиге шумусь сон, Лехов, и тя кизефксть аш месть кепсемс партийнай собранияса, но мярьгсь Суксовти:

— А мес тон мезевок ашеть пачфне правленияв тракснень колга? Вдь Спиридон Спиридонович аф весть тейть корхнесь, што траксненди эряви тиемс лапаз. А тон тейньге ашить пачфне тянь. Мес?

Суксов мторгодсь:

— Мон юкстайне тейть азомс, вдь лама тевда.

Собраниясь аделавсь пялеведа меле. Сембе срадсть кудгаст озадонь седихть, ароптф потмот.

Леховське тяни марязе прянц тёждяста, бта начка вельхтерда валхтсть лангстонза. Коммунисттне сюцезь сонь, но сон содазе, мезенкса. Сембода пяк кассь сонь седиец сянкса, мес сембе азозь‚ што кармайхть тейнза лездома и араласазь сонь рдазть эзда, конац лисендсь тяста жа, эсь велестост, маластонь ялганзон ёткста. Клеветникть лемоц ашель азф, но сонь сембе содазь.

<< Глава 29 << >> Глава 31 >>
Лямбе кядьса, глава 30; автор: Ларионов С. С.; 1962.

Последнее обновление страницы: 2016.04.16
На главную