29

Колмоце шись Варламов ащесь кудса: исть мярьге врачне стякшнемда. Кафта шит симондсь лекарствада, лишнайксть ашезень шарфне боконзон. А тячи марясы прянц шумбраста и эстейнза васта аф мушенды: тесна кудса эрямась.

Эрь шиня кафксть-колмоксть варжамонза сашендсь Шиндина. Сонь вельденза Варламов надияфнесь, мезе эряви тиемс райкомса. Весть али кафксть сувсесь Зобов. Степашкин Варламовть пяле вестенге ашель, но эрь шобдаваня и илядня корхнесь врачнень и Василиса Михайловнать мархта, надияфнесь, што кда эряви, эстокиге терди самолётса врач Саранскяйста.

Тячи Варламов ёрась хоть кой-коза звонямс, но телефоноц изь работа. Тяштсь записка почтав, кучезе омбоце стирнянц, Ленать. Почтань начальниксь звонясь Варламовти и азозе, што телефонть валхнефтозь Василиса Михайловна и Степашкин. Варламов аназе Степашкинть телефононц и апак шумбракстт пшкядсь:

— Значит, арестовандамасть?

Афкукс корхтай Варламов или шутендай, Степашкин ашезе шарьхкоде, и отвечась видеста:

— Тейть, Степан Иванович, телефонць аф эряви.

— Чаят, тевфтома карман ащема? Кучеда машина, колхозу туян!

— И, кода грехонди, фкявок машина аш‚ — васькафнесь Степашкин. — Курок пялот молян монць.

Варламовти тиемс ашель мезе. Сютямсь. А Степашкин звонясь Василиса Михайловнати работама вастозонза и азозе, што Варламов срхкай тумс кудста.

Василиса Михайловна содасы, што мирденц седиец пяк лафча, эряви ванфтомс сон инфаркть эзда: нинге рана стямс. Сяс эстокиге кадозе работанц и тусь куду.

Варламов ёфси сятявгодсь: лоткась срхкамда колхозу, веляфтсь вастозонза. Василиса Михайловна азондозе, што тячи васенцеда няезе инженерть Порговть и пяк тусь мялезонза.

— Ёню и культурнай, сай кулхцондомаце, мзярда корхтай.

— Коста няить? — пейньбачк кизефтезе Варламов.

— Сашендсь пеенц мархта. Тонь эсот кизефнесь.

— Сядынголе тон Степашкинтьке шнайть.

— А мес Степашкин? Деряй, кальдяв сон цёрась?

Варламов тянемс ашезе азонда рьванцты, кода лиссь тевсь райкомса.

— А тон содасак, кие матомань?

— Содаса, содаса! — лоткафтозе Василиса Михайловна. — Аньцек, пожалуйста, тяк кепсе вайгяльцень, корхтак озадонь седихть.

— Тон тят ван, што сон...

— Тейнь сембонь азондозь‚ — Василиса Михайловна озась мирденц ваксс, палазе.

— Наверна, шумусь мон? Тейть тяфта азозь?

Василиса Михайловна ёфси сятявняста пшкядсь:

— Ащек, ащек спокойнайста. Илять сай пялонк Степашкин и корхтак мархтонза. А тяни ащек.

— А коста содасак, што сай? — дивандазевсь Варламов.

— Содаса. Но пингстонза тяк кепсе вайгяльцень, корхтак мархтонза спокойна. Сон тожа ломанць ёню, сай мархтонза корхтамаце.

Варламов кулхцондозе рьванц и дивандась.

— А тон нинге Леховоньконь аф содасак. Ся васенце номер культурнайсь, — пеедсь Варламов.

— Сяцка аф кальдяв. А рьванц содасак? Деряй, кальдяв? Аф лама районцонк стама авада.

Варламов ванць рьванц лангс и кургоцка изь панжев каршезонза. А Василиса Михайловна стаки изь лотксе:

— Тон тят кяжия, азса видеста. Тинь Салмовть мархта эводеде нят ломаттнень эзда и сяс корхтатада мархтост пейнь сускозь.

— Ашине сода, што мондедон лац содасайть районцонк ломаттнень, — тага тись пря рахайкс Варламов. — Сяда меле, кинь эряви содамс, кизефття тонь.

— Монь аш месть кизефнемс, тон тонць ладняс эсь перьфкат. А Степашкинть мархта, пожалуйста, тят сялонда, вов мезе тейть азан.

— Аф содаса, кодама мора тон, Васюта, моралеть‚ кда шуволезь тонь пильгалдот модать?

Василиса Михайловна урядась тона комнатанзон, а сяс ашезе куле, мезе азсь мирдец. Сон мрдась тяза тяльмонц мархта и кизефтезе оду.

— Мярьгонь: мезе тон азолеть, кда цебярьста пидеф лямозт каялень курмось сал? — оду пшкядсь Варламов.

— Нят ломаттне аф тяфтапт, штоба салыяфтолезь лямцень, — седи ваксста спорясь Василиса Михайловна. — Тяни сембонь содасайне синь. Сембе синь пяк цебярьхть, и аш месть тейть сялондомс мархтост.

Василиса Михайловна сяда ламоксть изь сувсе тя комнатав, и лоткасть спорямда.

Степашкинть самда инголе сувась пялост Салмов. Сон озась Варламовть ваксс и, кода родной алянц инкса, ризнась, апак лотксек сюцесь Степашкинть эса, бта ся дураконять сюнеда лиссь тя зиянць. Лятьфтазе Зобовть, мес ся арась Степашкинть ширес, мес атказась телефонограммать эзда, а меле ни, кодак Салмов няезе, што «вадевсть шарыхне», кармась азондома од тефт:

— Тракторхнень сембонь проверяйне. Мяляфтсак, тон мярьгондеть тейне тянь колга?

— Ну, ну? — пшкядсь Варламов, ащемок копоренц лангса.

— Мезевок аш. Тя стак эвфнемазь Поргов. Сембе тракторхне кармайхть работама. Ну, конешна, аф сяфтома, штоба кой-кона афоль эряв петемс. Стапт кармайхть улема. Да, — стряндась Салмов, — тячи звонясть тейне министерстваста. Вешендедязь тонь, но тон ашат, и корхтасть мархтон. (Варламовти кивок изь звоня, тянь прибавазе сонць.) Содасак, Поргофоньке тозонга ни кучсь жалба.

— Кодама жалба?

— Пеняцай, мес ашеськ прима тракторхнень петемаснон колга планонц, и тяни бта курок сембе тракторхне лоткайхть. Минь ашеме эводь, тяни ёрай тостотнень эвфтемс.

— Мезе азоть министерствати.

— А мезе азан? Мярьгонь, Варламов тя жалбать содасы, и тяльхть пель: сембе тракторхне работайхть и кармайхть работама. А мезе лия азат? Синьге тонь лацот кошардомазь нинге весть ладняс ваномс тракторхнень. А мон тейст азыне, што тонь указаниятнень коряс машинатне ванфт ни. Ну, кодак азыне лемцень, лоткасть кизефнемда.

— Нинге мезе мярьгсть? — Варламов няезе, што Салмовсь ёрай мезе-бди тага азомс.

— Может, саты ни, сизеть? — пеедезевсь Салмов. — Кда сембонь азондомс, лама тевда пуроми. Ня шитнень звонясь Валдаев, азозе, што Лехов аф макссы самоходнай комбайнать. Меле кизефнине Леховть, сон няфтсь Степашкинть лангс, бта ся изь мярьге максомда.

— Но вдь мон монць азыне азыне Леховти, штоба максолезе!

— Мярьготь, а кодак сярятькстоть, Степашкин лиякс тиезе, тяни сон азорсь.

Варламов кяжиясь:

— Колма шит ашан, и сембе кеподезь полуснон, — сон озась васта краезонза, щась лангозонза пижама, пильгозонза тапочкат, бта ков-бди срхкась. — А тейне корхтайхть, тят ризна тефнень инкса, тят лисенде работама... Варжака, тят лисе — и фкя недляста шарфтсазь районть омбоконц лангс. А отвечамс сави тейне. К чёрту, вандыкиге лисян!

Салмов таргась зепстонза каготкя, ванозе, нинге мезень колга корхтамс, и тага низелгофтозень пейнзон:

— Тага мезе? — сембе нинге кяжедсь Варламов.

— Леховти састь бурильщикт, кафта машинаса, фкя вышка тисть ни, ушедсть пялема артезианскяй эши.

— Вов пялязсь! Вов шавачась! Мезе тиенди? — Варламов лапиезень кядензон плманжанзонды: — Марнек розарясы велеть, мезе сай прязонза — сянь и тии.

— Кафта эшихть шувфты‚ — кода сукс карась Салмов. — Исяк молень тоза, ванан: сембе велесь работай жуватань городокснон перьф, алянек-аванек. Кие шуви, кие столбат стяфни, кие лакси. Главнайсь тоса, содасак, кие? Белкин, шинек-венек шары узеренц мархта. Но паксяса фкявок ломань ашень няй.

Белкинть фамилиянц лятьфтамда меле Варламов пеедезевсь:

— Ну кадк, кадк, Лехов тонафтсы соньге работама. Аф пара ульсь утопнень эса эшеняса, кадк пуштсы шись.

— Сараеваське шары шувихнень перьф‚ — эрязста поладозе Салмов. — Сонга срхкай Саранскяи, ёрай тиемс договор, тожа шувфты эши.

— Сяцка пяляскодсь? — кайгиста рахазевсь Варламов. — Ну и председательхть кучсть районозонк. А коста сяви ярмакт?

— Банкаста, ссудас эци. Тяни тоста хоть миллион максыхть.

— Ожу, ожу, — лоткафтозе сонь Варламов‚ — ссудатне максфт аньцек жуватань рамамс?

— Строямска максыхть, мзяра кельк. Тят пичеде, Леховсь и Сараевась лац содасазь сентябрьскяй Пленумть решениянзон.

Варламов кафта шири люкафтозе прянц и мезевок изь аза. Салмов кяшезе каготканц.

— Ну, пинге ни тумска, а то «азорсь» сюцесамань.

— Кие? Василиса Михайловна?

— Аф. Степашкин. Обедшкада якань райкому, азыне, што молян варжамот. Сон мярьгсь, штоба мезевок лишнай афолень корхта: пичеди седицень инкса. Ванат, кодама заботливайкс тиевсь? — рахазевсь кургонь келес: — Ужяльттянза тяфта... А сонць, наверна, калмонь шувихтьке аноклась ни, — пиндолгофтозень Варламовть лангс шееронь сельмонзон. — Ну ваймак, Степан Иванович. Тефнень инкса тят пичеде‚ аф кадсайне. Хоть и саты тейне: ков тят шаркста — ськамон. Но мезе тият? Вдь аф кадсайть тефнень, — и вармакс вишкста лиссь Варламофнень пяльде.

Сувась Василиса Михайловна. Сонь лакасть кяженза:

— Стёпа, кда тяфта кармат нервничендама Степашкинонь пингстонга, мон тейнза мярьган, штоба туль тяста. И киньге оду аф нолдан тейть. Ну, местема стять? Месть ризнат тефнень колга? Или аш кинди тиемс?

Варламов кулхцондозе рьванц, апак каштортт мадсь кушеткать лангс и вельхтязе прянц каньёвай одеялса.

Илядь малати учсть Степашкинть эса. Варламов арьсесь, мезень колга кармай корхтама, кодама тефт надияфтомс Степашкинти. «Бюроса скандалть, конешна, аф лятьфтаса, кадк сонць анай кядьстон прощения».

Варламовть арьсеманзон бта шарьхкодезень рьвац, и стулхнень эсь вастоваст путнемда меле кизефтезе мирденц:

— Бюроть колга, чяй, аф карматада корхтама?

Варламов штафтозе прянц и ашезе сода, мезе азомс. Васенда ёразе уркстомс, штоба сон афоль эцекшне аф эсь тевозонза, тоса лятьфтазе, што Василиса Михайловна сединек-ваймонек ужяльди эсонза, кизефтезе:

— Мярьгат, карматама чайда симома? А кода тон арьсят, Васюта, тейнза аф визькс ули шраньконь ваксс озамс?

— Мес визькс? Вдь сон содасамазь минь?

Варламов анась журнал «Огонек» и кармась лувома. Но прястонза ашезь тушенда, мес Степашкин ашезе максфта комбайнать. «Значит, монь распоряжениянень полафнесыне... А районть инкса отвечан мон... Ну и кадк тии сянь, мезе мон мярьгонь».

Крылец лангса кулевсть корхнемат. Варламов ванозень частонзон: «Степашкин сай. А кие мархтонза?»

Васенда сувась больницянь главврачсь, Николай Иосифович Бунчик — средняй кизоса, аф пяк сери, галош пря аля. Сонь мельганза сувась Чуйкин, а сембода меколи — Степашкин.

Сяшкава кенярдсь Василиса Михайловна, што ашезе сода, коза озафтомс инжихнень. Сонь пароль мялезонза, што Степашкин сась аф ськамонза: ня ломаттнень пингста мирдец аф кармай споряма. Степашкинть мархта кядьта шумбракстомста Василиса Михайловна варжакстсь сонь сельмозонза, шарьхкодезе: ня ломаттнень вятезень нарошна, штоба сяда весяла улель.

Варламовть комнатазонза кандсть стулхт, озсесть кушеткать перьф.

Бунчик сявозе Варламовть кяденц, варжазе пульсонц:

— Пара! — аф ламос кулхцондома меле мярьгсь сон. — Нинге колма-ниле шит и можна стякшнемс и лисендемс ульцяв.

Туркс сельмот варжакстсь Варламов Бунчикть лангс и тись пря шутендайкс:

— Тон рахсят лангсон, доктор?

— Мес рахсян? Тя мон тяфта арьсян‚ а ванды самолётса сай областьста главнай терапевтсь, ся, пади, недяля нинге кирттянза боком.

— Ванды колхозу туян, розсь аф учи, кенерсь ни.

— Сон тоньфтемотка кенери, — и Бунчик яфодезе кяденц. — Вона кодапт тонь помощникне, — няфтсь Степашкинть и Чуйкинть лангс. — Кафта райононди саты вийсна.

Варламов аньцек тяни варжакстсь Степашкинть лангс и кодак васьфтезень сонь оцю, круглай сельмонзон, кармась кизефнема:

— Мезе однясь райкомса? Прважайть обкому мекольдень протоколхнень? Кода районнай сводкась, анок?

Ответонь вастс Степашкин таргась зепстонза кяскавняса доминот и шукадезень стулть лангс.

— Минь аф кабинетозт саме, Степан Иванович. Месть сембонди тиендят допрост?

Сембе рахазевсть, но сембода весялаль Василиса Михайловна. Сон кафта стул лангс ладясь чемодан, пеедезевсь:

— Вов тейнть и доминоса налхкомань моркш.

Варламовське весялгодсь. Кавлалонза пуроптозень тодуфнень и цяпазень кядензон:

— Вов тя, да! Пара, што шарьхкодеть, Васюта, мезе кандомс.

Варламов кельгсы доминоса налхкоманц. Лияста вень-вень ащекшнесь шрать ваксса и налхконкшнесь доминоса. Виде, районца тейнза шуроста сашендови озсемс налхкома, аньцек оцю праздникста, мзярда синь миртть-рьват якайхть Бунчикнень пяли инжикс, или сашендыхть сят. Но лама частонь налхконкшни ошса, мзярда лия районцтонь секретарьхнень мархта пуромкшнихть обкомонь пленумс или кодама-кодама совещанияс.

Лац содазе Степашкин азорть тя лафчашинц и сяс тячи сон пуроптозень тяза доминонь кельгихнень.

Мзярда шорясь Бунчик картатнень эса, Чуйкин азозе, штоба налхколь Василиса Михайловна.

— Тейнза макстама лия тев, — азоркс мярьгсь Степашкин, — кадк путы самовар и симдьсамазь чайда.

— Тя тев! Тя тев! — Варламов шназень Степашкинть валонзон.

Пара мяльса Василиса Михайловна шарсь кухняса: аноклась каванямс инжихнень.

Варламов налхксь докторть мархта, а Чуйкин — Степашкинть. Эрь картать путомстонза сяшкава эрьхнезь чемоданти, нльне ульцяв кулевсь. Аньцек Варламовти ашель кода эрьхнемс, боком ащезь аф пара ульсь тейнза налхкомс. Но лияста сонга видемкшнесь, эрьхнезе картать и мзяра ули вийц пешкоткшнесь:

— Стяда!

Куду пуромсть Варламофнень стирнясна. Верась — аргозсь, конанди топодсь ни кемгафксува киза, тядде аделазе средняй школать. Сон сувась, шумбракстсь инжихнень мархта, ётамбачк эрязста ванозень, кит ащесть пялост и кяшсь спальняв. Степашкин васенцеда няезе Варламофнень Вераснон. Кода од почконя сон няевсь Степашкинти, мака панчфокс панчсь стирнять ликоц.

Верась тядянц лаца ульсь равженя, пиндолдсть равжа сельмонза. Мзярда сон ётась, Степашкинти эрявсь путомс карта, но эрьхтемать вастс новольсь сонь кядец, а картанц путомда меле эскокс пезсть сельмонза спальнянь кенкшть шири.

Налхксть частта лама. Тяни синдезь ни васень мяльснон, сяда лафчста эрьхнезь картатнень. А Варламов налхкомбачк кармась кизефнемонза Степашкинть районца тефнень колга.

— Корхтайхть, министерстваста звонясть, кизефнесть тракторхнень колга?

— Шавк пенц! — ювадсь Степашкин Чуйкинти, ашезень куль Варламовть валонзон. Кодак Чуйкин путсь карта, эста ни отвечась:

— Кивок изь звоня. Путт, доктор!

Ётасть тага фкя круг. Варламов оду кизефнесь:

— Мезе Леховть мархта возсетяда комбайнать перьф?

— Докторсь вакска? — тага пешкодсь и рахась Степашкин.

Ся афкукс ётась, ашель стама картац. И аньцек мзярда якась Степашкин, сонць кизефтезе Варламовть:

— Кодама комбайнань колга корхтат? Путт, путт, Степан Иванович!

Варламов апак каштортт путсь карта и азозе:

— Леховть ширде фкя комбайнась эряви ётафтомс Валдаевти.

Степашкин ванць‚ кодама картат путнихть ялганза. Пачкодсь сонь рядоц и шавозе Чуйкинть пустышканц.

— Мезе тиендят?! — пшкядсь ся.

— Э-э! Мезе тиень! — Степашкин эрьхтезе кядьлапшса конянц. — Тя тонь сюнедот, Степан Иванович. Ушедоть комбайнатнень колга и шорямайть.

Василиса Михайловна ащесь налхкихнень фтала и тердсь эсост чайда симома. Няезе, кода Степашкин ашезь ёра корхтамс мирденц мархта тракторхнень колга, и сонга пшкядсь:

— Степан Иванович, тон тят шорсе тейнза, местема эцят эсь кизефкснень мархта? Аряда: самоварсь кенерсь!

Докторсь мярьгсь стямда Варламовтиге, озафтозе ваксозонза. Ярхцасть и симсть свежай варения мархта чайда, кажнайсь азондсь, мзярда и коса пяк цебярьста налхксь доминоса.

Васенцекссь стясь моркшть ваксста Степашкин, азсь спасиба Василиса Михайловнати и срхкафтозень ялганзон куду. Варламов озафтозе Степашкинть ваксозонза и тага кармась азондома тефт.

— Лисят работама и тонць сембонь тисайть, — отвечась Степашкин. — Тят пель, районть тоньфтемот аф плхтасаськ и аф симсаськ, — и оду прощандась азорхнень мартах. Но штоба афоль кяжия лангозонза Варламов, сон азозе: — Ванды шобдавакиге сай Варвара Степановна, и азсайть тейнза сембе тефнень.

— Мес-бди тячи ашель тяса, — цють аф жалбась Варламов.

— Сон заняфоль, сявозе райкомста «Победать» и тусь станцияв: прважазе Порговть тядянц поездти.

— Деряй, сашендсь?

— А тон аф содасак? Да, тя тондедот меле ульсь, — Степашкин кармась азондома: — Сашендсть Порговти заводста, усксть кодама-бди оборудования, кона кармай валома чугуннай детальхть машинатненди, переноснай электросварочнай агрегат и тага мезе-бди.

Варламов кулхцондсь и мялезонза ульсь, што синь районозост усксть тяфтама эрявикс оборудованият.

— Сашендсть кафта грузовой машинаса, — стаки азондсь Степашкин, — и Поргов тядянцка усксезь. Мархтост сашендсь кодама-бди инженер, ванондозе «Возрождениять» переснон, вона Чуйкин содасы, мезе тоса тиендсь ся инженерсь.

Тяни озадонь седихть кармась кизефнема Варламов Чуйкинть.

— А мезе азондомс, мярьгсь: ведсь можна нолдамс перети, кучи проект. Сявозень мархтонза Порговть сембе чертежензон.

— Няйсак, кодама тефт тиендевихть районца! — пшкядсь Варламов. — А монь нльне телефонозень валхтфтость.

— Но вдь тефне — тефт‚ — отвечась Степашкин. — Пуромоме бюронь сембе члеттне, тердеськ райкому заводста представительхнень. Азоме спасиба заводонь сембе коммунисттненди, рабочайхненди и прважайнек ломаттнень.

— А Салмов тосоль? — аф ламос ащемда меле кизефтезе Варламов.

— Тосоль.

— А мес ина тейне ашезе азонда тянь? — цють аф эсь потмованза пшкядсь Варламов.

— Наверна, юкстазе... Ну, ладняс пчкак, Степан Иванович! — и оду люпштазе сонь кяденц.

Мзярс корхнесть Варламовть мархта Степашкин, Бунчик сявозе шири Василиса Михайловнать и азозе, штоба Степан Иванович афоль стякшне.

— А терапевт ошста афкукс сай?

— Обязательна.

— Может, афоль эряв ни, вдь тяни лучи ни тейнза: стякшни, якай...

— Тевсь аф монь, — азозе Бунчик‚ — врачть обкомть вельде тертьфтезе Степашкин. И тя пяк пара, кадк ванцы.

Мзярда срхкасть куду и лиссть инжихне коридору, Василиса Михайловна лиссь мельгаст и люпштазе Степашкинонь кяденц:

— Спасиба, Роман Романович. Сувсек пялонк, пожалуйста, сувсек. Тят вана Степан Ивановичень лангс, сон ломанць тяфтамка ни, онцтонзонга няйсы работанц, а нерванза козонга аф пчкяйхть.

— Мон азондыне ни тейть: ашень ёра кальдяв тейнза... А лиссь...

— А тон мезевок тят думанда, Роман Романович, — лоткафтозе корхтамда Василиса Михайловна и пилезонза тошкась: — Сиденяста сашентт варжамонк, стирнень мяльс пяк туть.