Лямбе кядьса, глава 15; автор: Ларионов С. С.; 1962. Мордовская библиотека
Книга: Ларионов С. Лямбе кядьса: Роман. — Саранск: Мордовскяй книжнай издательствась, 1962. — с. 87—93

<< Глава 14 << >> Глава 16 >>

15

Аф омбоце, аф колмоце шиня Варламов райкомса ашель. Поргов ашезе васьфне нльне эмтеэсонь директортьке, конанди эрявсь няфтемс предупредительнай ремонтонь планць и кярьмодемс тевти. Сембе районнай партийнай активть Варламов кемокстазе колхоснень ланга уполномоченнайкс и прважазень эсь вастоваст. Районць аноклась тишень лядемати и сёронь урядамати. Аньцек телефон вельде Порговти савсь корхнемс Салмовть мархта, азондомс планть. Салмов шназе и надияфтсь анокламс приказ, коса кемокставихть главнай инженерть расчётонза, и эряскофтозе Порговть куроконе петемс тракторхнень. Мастерскойса тяни работасть шобдаста шобдас.

Сембе участковай механикне, слесарьхне работасть колхоснень эзга.

Пцтай эрь шиня мастерскои сашендсь Шиндина. Ортатнень ваксс повфтафоль оцю наряжаф доска, коза тяшневсть, мезе сатсть бригадатне, кода пяшкодезь эсь графикснон тракторхнень петемаса.

Бта оду шачсть мастерскойнь рабочайхне и сембе механизаторхне. Эрь ломанць ёрась тиемс сяда лама, сяда цебярьста и сяда курок. Поргов сонцьке ашезе кадонда инструментонь мархта чемоданнянц, работась ряцок рабочайхнень мархта.

Кенярдсть эмтеэсонь экспедиторхневок, конат анокс содазь, кодама пингонди и мзяра запасной частьта эряви ускомс базаста. Ладявсть тефне бухгалтериясовок. Сембе наряттне мастерскойста, сведениятне тракторнай бригадаста сашендсть эсь пингстонза. Поргов ладязе тевть стане, кода заводса. Сонць эрь илядня ванондозень наряттнень и сводкатнень; няезе, мезе тись шити эрь тракторнай бригадась, а бригадаса эрь тракторсь.

Порговть пингста полафтсть Салмовтьке тевонза. Тяни кржа сувсесть кабинетозонза ломаньди колхозста и тракторнай бригадаста. Ашель мезь лангс жалбамс, а сембода пяк запасной частенкса. Тяни главнай инженерфтома ашельхть кода кучсечс работама автомашинатне. Кой-кона тевса Салмов марязе прянц стане, бта шятясть сонь кочкярянзон лангс, нюрьхкалгофтозь кядензон. Аф мялензонзольхть од порядкатне, салаване порсь Порговть лангс пейхть. Лияста Порговть мархта корхнемста азондсь аф сянь, мезе думандась, а думандась аф сянь, мезе корхтась.

Тяфта лиссь тракторхненди ремонтонь тиемать пингста. Сонць шназе Порговть планонц, ванозе графикть, макссь тянь колга приказ, но аньцек кенерсь Поргов кярьмодемс тевти, пяле вешкада учезе Варламовть куду саманц и азондозе Порговть «чудовищнай» планонц.

— Монць виноватан, путода лангозон кодама кельгода партийнай взыскания, но идесть районть, вдь сембе машинатнень калафтсыне, тракторфтома кадсамазь сёронь урядамать пингста. Колмоце весь ни аф утцян, брат... кеподсь верозень давленияц. Монць, монць виноватан...

Варламов сизефста мторгодсь:

— Ванды илять терттядязь райкому.

Омбоце шиня Поргов наряжась од костюмса. Сон кенярдсь, што тердезе Варламов. Тяни азсыне тейнза сембе планонзон тракторхнень и ташта комбайнатнень петнемаснон колга. Да и илядьське вельф цебярь. Яфодсь ару кожфкя. Од ковсь, бта пачк колаф тарелка, нюрьгозь нюрьгсь сенемаза менельса.

Ки кувалма сатозе Варвара Степановна. Мольсть ряцок, пеетькшнезь.

— Борис Константинович, ванды недляши, мезе кармат тиендема? — кизефтезе Шиндина и бта нарошна пупордась, и кярьмодсь Порговть кядезонза. Тяфта, фкя-фкянь кядьс кярьмотьфста, синь мольсть, ётасть вете-кота аськолкст, Поргов кенерсь ни арьсезевомс: «Вов кда фалу якамс кяденьбецек... Эрян, кода кельяса»...

Варламовть васенце кизефксоц ульсь ремонть колга. Поргов азондозе, мзярда и кодама профилактическяй ремонт эряви тиемс эрь машинати, кие эрь бригадаса работай механикнень эзда, и меколи мярьгсь:

— Сави комозьшка трактор лоткафтомс, а, пади, нинге сяда лама.

— Мон сясы тердедязь, — мярьгсь Варламов. — Ушедоде оцю тев, ёратада тиемс порядка машинатнень мельге якамаса. Тянкса спасиба, но сембось ли арьсеф тя тевса? Вдь курок ушеды сёронь урядамась, тракторфтома пильге аф аськолдат.

— Тя сембе арьсеф, Степан Иванович, — отвечась Поргов. — Пади, сави тя пингть кой-кона бригадаста ётафтомс тракторхт лия бригадас?

— А кие макссыне?

— Кода кие? Директорсь максы приказ, и ётафтсаськ. А бригадирхне тянь сембонь содасазь, мон корхнень мархтост.

Варламов кайгиста рахазевсь:

— «Якстерь тяштьса» мезе, арьседе тиемс?

— Тоста тяфтама кафта тракторхт.

— Лехов сельмотнень таргасыне, мянь шкайти кармай жалбама.

— Мес тяфта корхтатада сонь колганза? Монь койсон, сон ломанць дисциплинированнай и козовок жалбама аф кармай. Да лиякс аш кода тиемска, вдь машинатнень аф кадсайть ремонтфтома.

— Тя графиксь, Степан Иванович, тиф марса. Ванондозе директорсь, монга содаса, — вастстонза апак стяк пшкядсь Шиндина.

— Кодама графиконь колга корхтатада?

— Кода, кодама? Тракторхнень петемаснонды тиф график, — тага азозе Шиндина.

— А, пади тейньге няфтьсасть сонь?

Поргов моркш лангс келептезе графикть. Варламов эрязста кармась ванондомост цифратнень.

— Аф весть ни пуропнеськ мастерскойнь рабочайхнень, — тага азондсь Шиндина, — ванондоськ тя графикть, тифт соревнованиянь договорхт, и сембе кундасть тевти кода эряви.

Варламов кадозе ванондоманц, кяжиясь:

— Мон аф содаса, кодама график тинь тиеде: аш пингозе лац-ряц ваномс. Но тракторнай парксь аф налкш, и шутендамс мархтонза аш кода. Минь тяса, райкомса, корхтаме кой-кинь мархта и арьсеськ, што вандыкиге эрявихть меки нолдамс сембе машинатне работама. И нинге, моньфтемон тяда токсе фкявок трактор. Содасть, што сембе платтнень инкса васендакиге отвечан мон! Ну, тинць ванода, кода стане лоткафтомс тракторонь паркть пяленц? Кда тя тевсь пачкоди партиянь обкому, Фёдор Михайловиченди, сон мярьги, а тон, секретарь, косолеть? Мезе ваноть?

Порговть крьвязсь потмоц. Тейнза ашезь шарьхкодев, мем Варламов тяфта ваны машинатнень лангс? И смелста пшкядсь:

— Эмтеэсса машинатнень инкса, Степан Иванович, васендакиге отвечан мон, и кизефтьсамазь монь, эмтеэсонь главнай инженерть.

Варламов яфодезе кяденц:

— Мон содаса, ялганяй, кие и кода отвечай. А тиесть тевть стане, кода мярьгонь мон.

Поргов шарьхкодсь, што Варламов пяк кяжиясь, сяс и полафтозе вайгяленц:

— А содасасть, Степан Иванович, мезе может лисемс тракторхнень мархта? Лоткайхть синь как рас сёронь урядамста. Эста мезе тихтяма?

— Тон, Борис Константинович, бта шабаня эвфнят. Тяк юксне, што минь Салмовть мархта аф исяк шачеме и аф васенце кизось работатама районца. Тракторхнень инкса тят пичеде, аф лоткайхть, а кда фкясь лоткай — омбоцесь туй, фалу тяфта эрси. Пожалуйста, аньцек меки нолдасть сембе тракторхнень, конатнень кенереде калафтомс, и сяда лама тяда токсе. — Варламов полафтозе корхтамать: — Да, Борис Константинович, мес Митричсь тусь работаста?

Поргов и Шиндинась варжакстсть фкя-фкянь лангс.

— А, деряй, сон тусь? — кизефтезь марса.

— Мон тинь кизефнетядязь, а тинь монь. Тейне мярьгсь, што тусь. Аш мялец работамс главнай инженерть мархта. Тя афкукс?

— Ну, няйса, тон тонць содасак, мезенкса тусь, — обжафста азозе Поргов. — А мон васенцеда кульса.

Варламов шарьхкодсь, што тись аф лац, Митричть колга мезевок афоль эряв азомс. И эрязста ломаттнень нолдазень ваймама.

— Кода тихтяма машинатнень мархта? — тумстонза тага кизефтезе Поргов.

— Мон азыне аш кода, — тага кяжиясь Варламов.

Молембачк Поргов кувакаста тарксезе ваймонц.

— Месть куфкснят? — дивандазевсь Шиндина. — Тракторхнень колга тят пичеде, кочкайть меки и кадыть, мезе кельгихть, сянь и тиихть мархтост. Тянь колга тяшттяма обкому. А Митричть вандыкиге тердьса. Тя тага мезе-мезе срхкафтсь Салмов. А тон тят пель.

— Киньге эзда мон аф пелян, Варвара Степановна, — рахазевсь Поргов. — Аф Салмовть, аф Митричть эзда. Аньцек кода-бди аф пара тяфта... пейнь сускозь марса аф работакшнихть.

Мольсь апак каштортт. Поргов апак учсек кундазе Варвара Степановнать кавлалда.

— А мон учсень ёфси лия. — Тяни весялгодсь Поргов. — Чаянь, Варламов тердемазь механизированнай токнень колга корхтама. А сон, няить кода, качафтомазь кафцьконь?

Шиндина варжакстсь Порговть лангс и пеедезевсь: «Ватта, ватта, месенди «шуфтонь алясь?» — тяфта сон эсь потмованза мярьгонкшнесь Порговти, мес ся тнярс изь шарфне лангозонза кодамовок мяль.

Ковсь куцсь ни вяри, кичкор шамац кальдявста валдопнезе ульцять. Ошень паркть ширде кулевсь баян. Морось то юмсесь, то тага тифтетькшнесь вень ару кожфть эса. А Шиндинать мархта Поргов ашесть мушенда валхт, учсезе Шиндинась тя шить, мзярда инженерсь ляды мархтонза ськамонза. Лама ёрась корхтамс, мялецоль азомс Порговти цебярь валхт, кодапт сон кирнесь прясонза, кда ськамонза думандакшнесь Порговть колга. Но тяни ков-бди юмасть ся валхне, изь панжев кургоц, учсь, мзярда кармай корхтама Борис Константинович...

Поргов весть ни кельгсь, мзярда-бди корхнесь кельгома валхт эсь Анфисанцты — танковай бригадань радисткати. Тяфтама жа ков валдонь пингста макссть синь фкя-фкянди вал куломозост аф явомс, но войнась явштозень, бта моря тиевсь ёткозост, нльне аф содасы, коса сон. Поргов пичефтезе Анфисать нинге сяс, мес содазе, што Анфиса аф ськамонза, а касы стирец или цёрац. Но косоть синь? Кодама давол сурдазень синь масторть лангста? Поргов вешендсь эсост войнать пингста, ашезе лоткафне вешендеманц войнада меленге, но коцамовок след изь мушенда. Эстоньбере сёлговсь Порговть седиец, бта ёмла Анфисаня ащесь потмосонза и изь мярьгонде киньге кельгомда. А, пади, и аф сяс изь кельге Поргов? Пади, ашель сонь тянди пингоц? Госпитальста лисемда меле сон тонафнесь институтса, а мзярда лиссь инженеркс, шинек-венек мушендовсь тев. И вов тячи сон кундась стирень кядьс, и бта омбоконц лангс шарсь седиец. Ёрась азомс мезе-бди цебярь, панжемс скучендаф седиенц, но кенярдембачк ашезе сода, мезе азомс Варвара Степановнати, бта кемготува кизостонь цёрокш, юмафтозе кяленц.

— Тяряфтк работак тяфта, кяттне новолихть, — меколи пшкядсь сон, хотя сонць содазе, што Варвара Степановна аф ёрай кулхцондомс тяфтама валхт.

— Лоткак ни, саты тянь колга, — уркстозе ся, — муйть мезень колга горявамс.

— Да тя мон стак, мон аф пичедян, — шабакс азозе Поргов. — А горять колга аш месть корхтамска, монь аш горязе. Кочкасайне инструментонень и туян меки заводу, тоса эздон аф атказайхть. Тулеть мархтон тон, Варвара Степановна? — нльне эстейнза апак учсек кизефтезе Поргов, а сонць лоткафтозе Варвара Степановнать, кундазе кафцьке лафтуда и ванць лангозонза. — Тулеть мархтон заводозонк?

Шиндина нльне эводсь Порговть смелшинц эзда. Сон няезень Порговть серай, пиндолды сельмонзон. И ответонь вастс кярьмодсь Порговть пиджаконь пунязонза.

— Тулеть мархтон, а?

Варвара Степановна оду варжакстсь Порговть сельмос.

— А мезе кармалень тоса тиендема?

— Тев мулеме! — Поргов офтокс вишкста фатязе Варвара Степановнать и палазе.

— Тон ёфси ёньфтомат‚ — тошказевсь Шиндина и комафтозе прянц Порговть мяштьс...

Туцянять фталу кяшевсь ковсь, бта нарошна сон конезень сельмонзон. Цифторгодсть тяшттне. Весь ульсь сетьме, лямбе.

Ляйть ширде уфась ни шобдавань кельме кожф. Тяни Варвара Степановна шарфтозе Порговть эсь кудонц шири, но кодак пачкодсть ки улоти, Поргов шарфтозе сонь меки, и тага састь ингольдень вастозост. Тяфта аф весть ётасть мековасу. Омбоцеда моразевсть атёкшне, но кадомс тя лямбе и сетьме весь кафцьконди ужялель.

<< Глава 14 << >> Глава 16 >>
Лямбе кядьса, глава 15; автор: Ларионов С. С.; 1962.

Последнее обновление страницы: 2016.02.18
На главную