10

Сембе материалхнень и цифратнень, конатнень Поргов кочказень машинно-тракторнай станциять работанц колга, Салмов печатлафтозень и фкя экземплярть кучезе райкому.

Тяни Варламов иляденьберьф ськамонза якась кабинетонц туркс и фалу сельминголенза ащесь Поргов. Кадк лихтсь эмтеэсть работаса кальдяв тев, кадк корхтась сонь колганза Салмов, но инженерсь цебярь, тусь мялезонза. Поргов пейса сусксь машинатненди, содасы и кельгсы тевонц. А сяс и Варламов сонць веть звонясь Колхозниконь куду и тердезе райкому Порговть.

— Сельмоньконь панжить машинатнень работаснон колга, Борис Константинович, и тя пяк пара. Но монь мялезе кулемс, мес тяфта миньцонк лиссь? — ляпоняста кизефтезе Порговть.

— Эмтеэсса аф вятеви машинатненди планово-предупредительнай ремонт, тя главнайсь.

— Минь инженероньке аш.

— И тявок шоряй.

Варламов тяни мзолгодсь и аф ламос ванць Порговть сельмос, а меле пшкядсь:

— А кда тонь кядезть ба тя тевть, а?

Поргов комафтозе прянц. А Варламов стаки изь лотксе:

— Работась оцю, интереснай и как раз тонь видеват, а? Кода, Борис Константинович?

Поргов варжакстсь Варламовть лангс.

— Аф монь волясь, Степан Иванович.

— Монь звонянь ни Кочуринти, — сяда пяк весялгодсь Варламов. — Ся сембонь тисы, Москуву звоняй. Арьсека, Борис Константинович, ладняс.

Поргов тусь куду и ламос изь матодов. Ужяль кадомс заводсь, но мялец таргась тязонга, паксятненди. Паксяса и лугаса, ляй крайгянь кальхнень ёткова касозе сон серенц. Васенцеда паксяса марязе работать таньфонц. Арьсемста сельминголенза тифтедсть кели паксят, бта марязе касыкс сёроть жольняманц, тракторхнень унамаснон. Варламовське каясь потмозонза толня.

Омбоце шиня ранакиге Варламов тердезе колхозста Степашкинть и азозе, штоба тячикиге сон сявольхце Порговть ювандема-явандома тона эмтеэсть зонас, няфтелезень тостонь сембе цебярь колхоснень.

— Тяк юкста, знакомондак сонь райононь Советскяй властеньконь — Зобовть мархта, — меколи указовась Варламов, — сон машты тяфтама ломаттнень мархта корхтама. Синь обязательна ладяйхть. Кда мезе, сявость илять калонь кундама, Зобовть сембонза улихть, ладняс няфтесть Мокшеть.

— Мон шарьхкодьса стане‚ — строгайста пшкядсь Степашкин, — кадк Зобов вадьсы инженерть, штоба ся кяшельхцень Салмовть кой-кона грехонзон?

Варламов рахазевсь:

— А тон, ванан, афкукс кяжиять Салмовть лангс. Озак сяда малав и кулхцонтт, мезе тейть азан мон, сире и опытнай партийнай работниксь. Зря эста сялгадоть, Салмов мезевок кальдяв изь ти Порговти и, монь койсон, нльне ашезе обжа.

— А мон лувса Салмовть шкурникокс, — сядонга крьвязсь Степашкин. — Мон киза работан райкомса и сембе ширде шарьхкодине сонь.

— А мон кемгафтува киза работан Салмовть мархта и содаса сонь лиякс. Салмов — честнай коммунист, и азса: ужяль, што кржа тяфтама коммунистта районца. Да, кржа тяфтама коммунистта.

Степашкин изь карма споряма васенце секретархть мархта, а Варламов кармась корхтама бта цёранцты:

— Тон нинге одат, Роман Романович, киза, кода лисеть партать ваксста. Тят думанда, што партийнай школать аделамда меле сембе панчфне панжихть тейть. Партийнай работась — тя оцю и стака тев, аф сразу сонь тонадсак, Роман Романович. А Салмовть кувакат ни юронза тя тевса. Лама вий путсь тя тевти. Кадк сонь улихть афсатыксонза, а синь улихть: чаят, мон аф няйсайне синь? Кода кядьлапш лангсон ащи сон, — и няфтезе кяденц. — Виде, ломанць сон крута... Но тевсь тонь, кода ванат Салмовть лангс. Аньцек партийнай работаса кяж аф кирнихть...

Степашкин пеедезевсь:

— Кодамовок кяж тяса аш, но кальдяв работац пачкодсь мянь Москуву. Аф тячи, так ванды сави каршек вадердамс Салмовть понанц, обязательна сави.

— Ну и ведердасаськ! Партийнай работаса всякай эрси. А кяжиямс аш месть. — Варламов пеедезевсь, стясь вастстонза. — Мон тейть, Роман Романович, корхтан стак, тят кяжия, тон вдь эряват тонафтомс.

— Спасиба, — цють пеедезевсь Степашкинга.

— Мяляфтсак, кода Ленин корхтась кадратнень ванфтомаснон колга? — тяни сядонга сятявста корхтась Варламов. — Аф кунара тонафнить Ильичть работанзон, ашить юкста?

Степашкин тага пеедезевсь:

— Ленин тонафтомазь кадратненди улемс принципиальнайкс, а аф мековасу шашнема инголест.

Варламовсь малость обижавсь, озась вастозонза и азозе:

— Районть инкса, Роман Романович, васендакиге отвечан мон. Сембе кадратне, кит работайхть мархтон, кассть сельминголен, содасайне синь, кода эсь сурнень, — няфтезень фкя кядьста суронзон. — И содасак: аф Салмов, аф лиясь аф молихть партиять сентябрьскяй Пленумонц решениянзон каршес. Тяфта, ялганяй. Ну, сявсак мархтот Порговть?

— Пожалуйста, мес аф сявса.

— Но корхтаманьконь, надиян, Порговти аф пачкотьсак?

— Деряй, можна! А видеста азомс, Поргов сонцьке лац няйсы Салмовть.

* * *

Лухоминскяй эмтеэсть маласа Степашкинть и Порговть васьфтезень сонць райисполкомонь председательсь Зобов. Тяса, Лухоминка ляйть туркс, районць строяй оцю седь. Ляйть кафцьке берякстонза ичкози таргавсь шуваронь сери насыпь, конань кучкасонза няеви седть каркасоц. Ведть берякова штабельса и ёряфста ащесть шочкт, бта салмокс салайхть шарондсть тракторхне. Тяса жа работась пилорама, ичкози яфодсь пичень смола шинесь.

Зобов инжихнень вятезень брезентонь палатказонза, коса ащесть колма кроватть, моркш и телефон.

— Тон повфтак палаткать пряс вывеска, — шутендась Степашкин, — штоба народсь няелезе, коса тяни райисполкомсь.

— Мезе тият, — пеедсь 3обов, — седсь эряви куроконе строямс. А райисполкомть колга тят пичедь: сембе содасазь, што тяса.

Зобов — коськана, сатомшка эряф ломань ни, шура шяяренза сеентьфт фталу, пяк весяла и кельгсы шутендаманц. Пцтай фалу кургсонза трубкац.

Поргов кизефтезе сонь, мезенди тяшкава сериста кеподезь ляй берякстонь кить.

— А-а, мзярда Мокшеть лангс кармайхть строяма межколхознай электростанция, эста тя вастсь кяшеви ведьса.

Шись якстерь шаркс нюрьгсь модать вельхксса, шонгара туцятнень пачк, кода пикст, таргавсть сюролданза, бта вельдест шись эряскодсь валгомс и кяшемс модать алу. Степашкин кадозе Зобовти Порговть, а сонць тусь маластонь колхозу, коса надияфтсь тячи ётафтомс партийнай собрания.

Мазыель илядьсь. Шись кяшевсь вирть фталу. Кармась качадома ляйть кувалмоц. Седень и кинь тиихне крьвястсть кемоньшка вастова толхт. Сиретне шарсть таганц повфтаф котелхнень перьф, пидесть ужин, а оттне занязь ведть и ламос кивок изь ёра тоста лисемс.

Крьвязсть менельса тяшттне, ведть ланга ичкози таргавсть толхнень цильфсна, маземсь сембе тя вастсь. Морасть балалайкаса, гармонияса, пайгонякс горнясть сиде моронятне:

Цебярьхть, цебярьхть стиреньке, Сяда цебярьхть цёраньке...

Ужнамда меле Зобов ётафтсь седень строяй бригадирхнень мархта совещения и эстокиге Порговть сявозе палаткав. Тусь сонь мялезонза Поргов, как рас стамоль специалистсь, кона пяк лама содась странасонк промышленность касоманц колга.

Поргов азондозе, кодама задачат путсь Правительствась синь заводснон инголи ЦК-ть сентябрьскяй Пленумдонза меле и кодама машинат маластонь пингть синь кармайхть ноляма велень хозяйствати.

— Эста курок получатама од машинат? — кеняртьфста кизефтезе Зобов.

— Вакскант аф ётайхть. Машинат получатада цебярьхть, аньцек эряви мельгаст ваномс, аф ёрямс палакснень потмос. — И ашезь кирде Поргов, азондозе, мезе сон няйсь райцентрань эмтеэсть пирьфса.

— Кулине, кулине, кода корхнеде тона недяляня райкомса, —хитрайста азозе Зобов. — Но тинь тяда ван Салмовть лангс, сон минь тяфтамка. Варламов обжамс аф макстанза. А машинаньконь колга видеце: порядкатне тоса аф пяк цебярьхть.

— А мес тянь колга тейнза аф азсасть видеста?

— Азонкшнеськ, — пеедезевсь 3обов‚ — но кичкору шуфтсь эсь ронгонц аф няйсы. Ну, тя ладна, лучи азк тейне, мес минь заводоньке и инженероньке кржа ноляйхть зернань чистендама машинада. Содасак, мзяра зёрна эрь кизоня юмси колхознай тинкнень лангса? — пеняцясь Зобов. — А содасак, мзяра трудошида колхосне карьхцсихть тинголангса сёроть перьф? Лияста кафксть сяда лама, мзяра карьхцяви касфтомстонза и урядамстонза, содасак тянь?

Од пингстонза Поргов сонць ульсь комбайнер, сяс и шарьхкодезе Зобовть пичефксонц. Лятьфтазе, кода сёроть мархта марса комбайнань бункерти повондыхть тише прятне, а эздост тинголангса летькоми и зёрнась.

— Ага, тонць содасак?

— Содаса. Содаса сяньге, што тяса виноватт комбайнерхне, — азозе Поргов. — Комбайнерти эряви цебярьста содамс, кодама сифтепт ладямс тозерть и розть урядамста и кодапт — кедихненди.

— А, деряй, комбайнерхне тянь аф содасазь?

— Аф сембе. А лиятне содасазь, да аф ваныхть тянь мельге. А мес аф тийхтяда механизированнай токт?

— Ётай кизоня минь фкя ток тиендеме. Тядденге ёратама тиемс. Аф содаса, мезе лиси.

— Мес фкя? — дивандась Поргов.

— Кода-бди аш инициатива миньцонк, — виденцясь Зобов.

— Монга ёран тиемс механизированнай ток. Кафта кизошка ни аноклан проект. Но стама, штоба ломаттнень вастс тингса работаль аньцек фкя моторист и кладовщиксь.

— Пара тя улель ба, — шабакс кенярдсь Зобов. — Ушетт минь районцонк, а мон карман лездома, кельгса строямазень.

Зобов тяни сяда плотнайста сёлгозе палаткать, аралазе инжиенц сяськнень эзда.