| Мазый моро марядоя // сборник Монь вайгелем; автор: Илька Морыця; 1932, май. | Мордовская библиотека |
| Книга: Илья Кривошеев. Монь вайгелем: Морот 1924—1934. — Саранск: МордГИЗ, 1935. — с. 32—33 | |
| << Наянна << | >> Цветяк >> |
|
Мазый чувто умарина Твети мазый цецясо, Тантей чине качакады Умарь-садонть ульцясо. Тосо налксить октябренокт, Налксить луганть элесэ; Налксить-чийнить пионертнэ Весе садонть келесэ. Вейке тейтерь, пионерка, Мерсь ялганстэнь: „Марядоя! Мон тенк моран мазый моро. Садо малав, учодоя”! — — Мазый теште, зоря, палы... Валдо струят садга каи. Истя палы, истя саи, Седейзэнек вана ваи. Мон, Олёнка, пионерка, Учинь яла тундонь чи: Мазый садось кода твети, Умаринась кода панжи. Сась мелезэнь, сась келезэнь Весе тундонть келезэ „Ворошилов Клим” колхозонть Кода касыть тевензэ. Авам кочказь бригадиршакс, Весе планонть топавтызе; Колхоз виенть кемелгавтомс Васень тевекс аравтызе. Варштак, ялгай! Варштак паксяв! Колхоз-моря весе пиже. Ламо вийсэ, оля чисэ Сюро канды куя кизэ. Тесэяк сон а кадови, Бригадирка, вечким авам; Тесэяк сон а удови, Большевикень кирди планонть. Бригадазо сех икеле Атякш маро сыргозеви, Сюронь планонть топавтемга Премияс сон аравтови. Мон, Олёнка, пионерка, Учинь яла тундонь чи: Мазый садось кода твети, Умаринась кода панжи. Пионертнэ, октябренокт Весень, весень сынь кунсолость, Кода Ленка, пионерка, Мазый моро сынест морась. | |
|
| << Наянна << | >> Цветяк >> |
| Сборник Монь вайгелем; автор: Илька Морыця; 1935. | |