| А тандаттано // сборник Пурьгинень зэрть; автор: Артур Моро; 1929, август. | Мордовская библиотека |
| Книга: Артур Моро. Пурьгинень зэрть. — Центриздат, Москов, 1931. — с. 28—31 | |
| << Мон учан << | >> Трактор ды цёков >> |
|
Морак, поэт, Вайгелень апак жаля! Зэрнек пургинекс, Сельмет палось ёндолкс! Илязо кадов рунгот Апак каля: Мольть икелев, Апелиця чомболкс! Марясак тон, Кода налкси оркестрась, Налксимадонть Лымби модась? Благойстэ лыйнезь Знамятнень пест прасть Народонть велькс... Кирвайсь ульцясь! Ульцясь кирвайсь! Ульцясь лаки, прок моря, Ды народонтень пе-чире арась. Киньгак сельмстэ А неят нужа, горя: Мерят, прок ансяк Од эрямось сась! Но ков истя Народонь морясь айги Кеместэ, виевстэ икелев? Лажны, раки, вешки Ды гайги Кулаконь сювордазь Киень пелев? Ах, поэт, Сельмет, нать, тонь позакацть? Пиле-варят, поэт, нать, тонь Потомсть? Ведь азарьць кискакс Буржуйтне уракацть, Пеест мизилгавтызь, Минек масторс ёртовсть. Минек масторс Китаень границясто Буржуень генералтнэ, Прок инигуень полк, Ёртовсть, — Саизь Советской Россиясто Се чугункань кинть, Кува усксинек шолк. Кува робочей классось, Крестьянтнэ Полавтнесть, микшнесть, Рамсесть товарт, Косо Амур, Косо Алтаень пантнэ, Кува минек, — Сия сынест апарт. Ламо иеть Верьгезэкс пейсэст чикордыть: Тапамонок Умок уш, сынь арсить. Прок лопа ало Пешкс гуекс каштордыть, Грабамонок Оронь кецэст думсить. Минек травсить, Минек тердить туреме, Но, минь мирсэ Арситян эрямо. Минь а карматано Чаво пеень пореме! А карматано Удалов потамо! Бути токасамизь, То тест макстано звар, Штыксэ пещасынек Вачо кирга-парест! Лордтнэнь нолдасынек, минь, Весе тюшумбар! Валовсынек Поти гуень верест! Морак поэт! Морак, вайгелень апак жаля! Пштилгавт марямот, Валдомт сельмет: Илязо кадов Рунгот апак каля, Астяк трудиця! Астяк Поэт лемет! Астяк батрачка, Тонь, поэт, шачтынзеть, Астяк, поэт, Совить тон комсомолс, Революциясь Давол поцо кастынзеть, Ней покшат Ней палт Октябрянь толкс! |
| Август. 1929 ие. |
| << Мон учан << | >> Трактор ды цёков >> |
| Сборник Пурьгинень зэрть; автор: Артур Моро; 1931. | |