ЛИПНИ ТОЛ

Сёксь. Кизэнь лембе читне тусть васов. Паксясь чаво. Шождыне ливтнемс казямо вармантень урядазь паксяванть. Кой-кува ансяк неявить куцяс валязь чиньжарамо недькст. Чи лисема ёндо ливтить кесаксо шанжавонь коцтнэ. Виресь шалнозь-шалны сёксень вармадонть. Чувтнэ эйстэ васов ливтить почарксазь лопатне. Ансяк сэрей поесь наряжась теке якстере нарядсо — эзинзэ певердть лопанзо. Вейке пестэ вармась урнозь канды лопатнень эйсэ омбоце пев.

Паро молемс. Кись кшнакс таргазь васов, васов. Минь кавонек сыргинек ошов. Икеле понгонить латкт, пандынеть, сэдьть леень трокс. Пильгтне шождынестэ кайсевить варманть мельга.

Чись кадовсь чувтонь сэрь, палозь-палы чи валгома ёнксось. Менеленть омбоце боксто туманонь кондят пельтне капшазь вельтить чи валгоманть эйсэ. Молемс комсь вайгельбе. Мон тандадозь меринь ялгам туртов.

— Чопотеме кармась... а пачкодтяно

— Кодаяк, паряк, чийсынек. Шагат уставик!..

Туинек бойкасто. Пельтне прок суманьсэ вельтизь чинть. Паксястонть кармась марявомо пиземе чине. Кись леткедсь. Мон эсь пачкан арсян: «Пиземе сы!.. Карматано паксянть лайшеме... Ансяк кодаяк а кадовомс, кистэнть зря а туемс».

Мольдяно яла. Кинть лангс валгсь чавкань стая, клюкаинзе певерень видметнень ды шалнозь ливтясь виренть велькска.

Састыне, теке сувтемень пачк, кармась суводеме пиземесь. Чополгадсь. Виресь лоткась шалномадо. Поназо чопода модань кондямо — понгт тозонь, пингезэть мекев а лисеват.

Рудазось педи пильгс. Друк ялгам фатязевсь:

— Ванта, аволь киява, эдь, мольдяно!.. Кадовить.

— Тон, нать, эзить кадово? — пейдезь кевкстия ялгам.

Ней уш молинек састо. Рудазось нергевсь чапаксокс. Ведесь чольнесь пильгалонок, прок морась тенек эсинзэ моронзо. Икеле эйсэнек учось чопода иневедь потмакс. Пильгалонок понгонить ямат, губорнэть. Апак фатя эшкевинь чувтс. Эзинь кенерть пижакадомо, гиракстозь прынь крута стенаванть. Прамось монень марявсь ломанень пингешкакс. Рунгован ютась пси пар. Аштян боком. Алксось чевте. Ало маряви бульдерди ведне. Мезе вийсэ серьгединь:

— Ега-а-а!

— А-а-а!..

Отвечась верьде вайгель. Пизементь пачк вайгелесь маряви тапань баягакс

— Ега-а-а!..

— А-а-а...

— Тон прыть?..

— Прынь...

Састыне мольдяно пандо чирева. Начкинек пек. Озынек оймсеме. Экше. Туинек. Мольдяно. Мекев озынек. Пиземесь рисьни. Туманонь иневедесь салась эйсэнек потмозонзо.

Алдо липакадсь толнэ. Кенярдомань пачк карминек пижнеме. Липни толось яла малав сась. Те чопода потмакссонть толось неявсь менельстэ тештекс.

Пачкодинек. Вирь потсо кудо. Перьть пельде пирязь плетеньсэ. Вальмало неяви атя, кедьгэнзэ газет, икелензэ а покш лампине.

Совинек. Кудонь лембесь пачканок ютась. Пелезь кевкстинек, — можна арась удомс кудосонзо. Сон састыне сёрмав вайгельсэнзэ мерсь:

— Кузеде каштом лангс! Эждинк ловажанк.

Каштом кирьпецне солазь-солавтымизь. Мон кевкстия атянть.

— Нать, бодяй, вечксак газетэнь ловноманть?

— Вечкса. Умок уш карминь вечкеманзо... Кода арась газет — ёжо а муян!..

— Мекс ськамот эрят?

Путызе газетэнть икелензэ. Варштась кудонть уголс. Састо, лотксезь-лотксезь кармась басямо.

— Стака пек ледстямс ютазенть!.. Стака ваномс те уголонть лангс... Тесэ лазтнэ начтазь верьсэ. Сырединь, кодгемень ие эрян мастор лангсо. Вана комсь ветее иеть служан лесникекс. Инязоронть пингстэ ловноманть эзия содаяк. А мезе ульнесь ловномс. Получилинь грошт. Кода теевсь революциясь...

Укстась кувакасто. Кармась секе вайгельсэнть ёвтнеме. Теке мерят аволь сон ёвтни, ёвтни толось.

— Монь ульнесть кавто цёран... Покшось урьвакстозель. Ней вана ськамон. Цёратне эсь олясо якасть Якстере гвардияв. Кавонест ульнесть коммунист. Войнасто састь. Парсте эринек. Народось вечкимизь. Весть истя тельня... Ужинамсто... Марясынек ластеть ардсть. Ружия марто совасть кемешка эсинек велень кулаконь цёрат. Сынь весе ульнесть бандасо. Минек цёратне отряд марто сакшность сынст кундсемест... Те шкас эрясть вирьга. Цёратне эзть кенере стямо... Бандитнэ ледсть. Кода варштынь... Кавонест верь потсот! Вишка цёрась тарнось. Ансяк кенерсь пижакадомо: а-ы-ы-х!..

Кавто покш сельведть прасть щоканзо кувалт газетэнть лангс. Прянзо чаравтозь ёвтнесь яла.

— Монь сюлмсимизь... Кавтотне урьвам панаронзо сезизь... ды... ды монь пингстэ гадизь! Мейле кармасть муцямонзо... Керизь грудензэ! Кургозонзо керявксонть эцизь... Вейкесь пижакадсь: «Потяк эсь вереть эйсэ!.. Симдик остаткадо эсь прят тонсить ловсодо!» Урьвась яла эщо живель... Куркстонзо аксорясь верень кесак. Мейле ливтизь ушов. Монь прикладсо кармасть чавомо! «Вант, — мери, — кода урьват пикс вельде райс нолдасынек!» Седёлка пикссэ повизь кирьгадо. Сельмензэ лангс лиссть...

Ялгам састыне авардсь. Атяськак сельведь потсоль. Монь кирьга парьсэнь пеельть лайсть. Атянть эйсэ эзинек кулсоно, валтнэ сынсь эцесть седеенек пачк. Атясь яла кортась:

— Мон ёжовтомо напустинь. А повняса, мезть мартон тейнесть, ансяк мария ледсть кавксть, мейле прок пандо лепштимем ды подпилкасо човасть удимем эйсэ. Сась тень ёжо. Прям, чамам саизе верень эй. Вересь эйкс кельмесь! Повняса, кискась велькссэнь урнось... Совинь кудов. Пиень вересь прок лаксо валынзе киякссо лазтнэнь. Валске марясть властне. Монь саимизь больницяв. Цёратнень ды урьванть калмизь музыка марто!.. Бандитнэнь муизь ды леднизь секе недлястонть. Ней Совет максы тень пенсия. Маны тесэнь комсомолец тонавтымем ловномо. Невтнинзе букватнень. Ней састыне яла ловнокшнан.

Сювордызе кеместэ газетэнть ды сельведень пачк кармась ловномо. Лампасонть толось нимилявкс липаесь.

Вемберть эзинь удо. Сельмсэнь тештекс липнесь вирь потсо кудонь толнэсь.