ЧЕРЬКСТ

— Ну, ёвтнек! — састо мерсь политотделэнь начальникесь.

Колхозонь председателесь варштась кенкшенть ёнов ды, кода неизе, што сон пекстазь плотнасто, сэредезь ладсо пурдызе кургонзо ды авулдась кедьсэнзэ.

— Аволь ёвтнемс, Ильин ялгай, рангомс эряви, полок чавомс! Васень сокамо лисеманок позорна лондадсь...

Теде мейле председателесь варштась Ильин-ялганть сельмс, прок арсесь содамо, кодат виевть ульнесть сонзэ валонзо, ды друк кармась кортамо бойкасто, васня салава вайгельсэ, мейле натой пижнезь.

— Колхозниктнэнь сюрост машсь... Сёксня салсевтизь, ней — пейсэ калцкаек! Лиява омбоце чи уш видить минь... минь яла эщо митинговатано, Ильин ялгай! Исяк вемберть промксонок мольсь: толковинек, ладсинек, тандавтнинек натой колхозсто панемасояк... Кевкстемс, мезе те макссь? Лондадсь весе тевенек. Кода эщо лондадсь! Ды весе те лиссь скалтнэнь кувалт... Турезь саинек эрьва скалонть! Аватне рангить. Минь тенст кортатано: «Эдь аволь печкемс пурнатано скалонк, тынсь карматадо эйсэст сокамо. Пелемс а мезде» Ков!.. Валонь ёвтамо а кадтадызь. Зярс озинек аватне марто, сундерьгадсь. Истяк и эзь саво лисемс тече видеме. Главноесь — ярсамо пельсэнть. А ёрты тенек районось сюро, ёмась рудазга видемась! Мон парсте содаса, Ильин ялгай, мезе тень эйстэ качады, меремс, монень: эли ней эли а ламодо седе мейле озан тюрьмас... Но мезе теят те народонть марто? Рудазга видема... Тевесь те — од. Истямо саботаж моли!

— Кулакось мути? — кевкстизе Ильин ялгась.

— Мень кулак? Тельня эщо колхозонть урядынек. Некак, вейкеяк а минек ломань эзинек кадо. Ды мезе? А моли тевесь. Кал ладсо пикстерьдят. Чинек-венек пильге лангсо. Арсят, весе ойметь путовлик... Арась, а сыргавтови тевесь таркастонзо! Ды эщо мон ськамон. Ячейкасонть секретаренек арась. Лепштят партиянь педаленть лангс, колхозось карми крамойдеме. Лепштят колхозонть лангс, партиянь роботась кешнямо карми... Кодаяк а савтови. Мезе теят, чуман: саинк партбилетэм! Сезия рудазга видеманть...

— Эрявиньдеряй — сайсынек! — арсезь мерсь политотделэнь начальникесь.

Председателесь нардызе ливезев чаманзо, каподсь зепстэнзэ махорка ды састыне кармась цигаркань тапардамо. Кедензэ сорность.

Ильин ялгась чатмонезь вансь, яла сонзэ чаманзо мельга, прок мерят нейке тарги эсь паксянь сумкастонзо кистычка ды карми рисовамонзо.

— Вана месть, Комаров ялгай! — кода бути чевстэ пшкадсь политотделэнь начальникесь. — Тонть веляськадсть преветь тветнень а молемадост. Тынь меньстиде колмо чить. Те берянь! Но те витеви. Карматано пештямо меньстязенть.

Стенанть пачк марявсь виев жалт, прок веёндо пиземе сась.

— Марясак? — овсе лия вайгельсэ кевкстизе Комаров политотделэнь начальникенть, сонсь невтсь прясонзо жалтонть ёнов, — мекш веле прок бизны.

Те шкастонть капшазь совась од цёра. Сон талнось.

— Беляков — коммунист! — ёвтызе Комаров совицянть лемензэ.

— Ильин ялгай! — мерсь совицясь. — Народось учи эйсэть! Цяпить прок театрасо... Учить спектакля!

Кода политотделэнь начальникесь мольсь клубонь сценанть лангсо столенть малав, жалтось а ламонь а ламонь кармась лоткамо ды кулось. Ломаньтне ветстнизь пряст. Сядот а кемиця сельмть прок щупасть сонзэ, пиже гимнастеркасо, якстереармеецэнь шлемсэ, а ламодо мендявозь ды раужо покш сакал марто ломаненть. Сон яходсь истямо большевик ёнов, кодамокс сынст рисовакшносызь границянь томбалень газетнэсэ, неявсь кежевекс.

— Эщо вейке комиссар сась!

— Минь истятнэнь некшнинек! Ламо ней лавгицятне появасть...

— Те, келя, видьстэ Московсто!..

— Ки содасы... Миненек эдь, ават, седе шождыне тень эйстэ а ули?...

— Кодамо а мазый!

Политотделэнь начальникесь кундсесь пштистэ мариця пилесэнзэ не валтнэнь ды а ламонь а ламонь кармась весёлгадомо. Кода сон каизе прястонзо шлемензэ ды путынзе судонзо лангс бабинень сельмукшонзо, сон пек дивавтынзе весе колхозниктнэнь. Ней уш сценанть лангсо сынст икеле аштесь покш, штавтозь коня, ловтаня лиця ломань, ды сонзэ можналь ней ловомс докторокс эли книгань сёрмадыцякс, кодамо некшнесть колхозниктнэ календарь лангсто.

— Эно, ялгат, карматано басямо? — кеме вайгельсэ ушодызе кортамонзо Ильин ялгась. — Мейсь истя тынь обижатадо эсь начальникенк? Ней, зярс тынь тесэ шумиде, тынк председателесь, Комаров ялгась, пеняцясь лангозонк. Сельведьс панинк ломаненть... Ды вана, вечкема ялгат, мон салавинька арсян ёвтнеме тенк сень, мезть кортась тынк кувалт председателенк. Мезть, келя, ней монень тейнемс те народонть марто, лиякс меремс, тынк марто? Эзинек кенере, келя, тече валске марто баяганть вачкодеме, кода весе кудотнестэ ёртозь-ёртовсть, сеске кильдтнизь эсь скалост, лишмест ды чокшнень самс видизь паксянть пелензэ. Ванды, мери, сверхранней видеманть прядсынек! Вандыде мейле, мери, коть колхозонтькак пансик — тейнемс а мезть... Ков те маштови? Сень таркас, штобу васня раздемс кирьга-парьтнень, пинжнемс а ламос, саботировамс, валомс а ламошка сельведькеть эсь скалнэнть кис — тень весень таркас тынь паметтэме ургатиде сокамос. Мон кевкстнян весе тынк эйсэ, колхозник ды колхозница ялгат, нать истя лади тейнемс? Нать честной колхозниктнэ истя тейнекшнить?..

Колхозниктнэ чатмонсть. Сынь талакадсть неть апак учо валтнэнь эйстэ.

— Давайте, ялгат, кортнеде, мезть карматано тейнеме седе тов, меремс, коть ванды? — апак пееде кевкстнесь политотделэнь начальникесь.

Кувать эсь муеве кортамо бажиця. Но вана удалдо стядо аштицятне розь ладсо лыйнезевсть, лиссь потстост алкине ды эчке атя ды ютась икелев.

— Атят! — варштась сон перть пелев ды аламос чатмонсь. — Мон, Иван Иваныч Нужайкин, прок меремс, трудиця елементан. Паро! Ды таго мерян... Тесэ политотделэнь начальник ялгаськак кортась. Сон тесэ, нама, критика ветясь минек саботациянть лангс. Мон, атят, ёвтаса эсинь мелем. Хрестиянтнэ икеле кода эрясть? Виднесть а ламонь а ламонь сюрыне. Эрьвейкесь эрясь эсинзэ кис. Пек уш капшамс кода бути эзь эрявкшно... Мон, илядо кежеявт валозон, помещикень кедьсэ плугарькс ульнинь. Сомовтнэнь кедьсэ, ульнинь Лунёвтнэнь кедьсэяк — пандо экшсэ сынь эрясть, ней тосо коммуна. Нетне коть зярдо виднильтькак ламо, пурныльтькак ламо. Но сынь, атят, капшасть, шкадо икеле лисьнесть паксяв видеме? Эзть. Мекс? Прок эзть пиштевте теде. Таго яла скалтнэнь кувалт мерян... Скалось — лавшо скотина, аволь нарьдев. Мутьфать сейсак потмонзо! Сон аравтозь ловсонь кис, сокамс ули лишме, эрьва кодат верблюдт... Ней саботациядонть валом ёвтаса. Минь колхозонть каршо а мольдяно. Колхозось мелезэнек тусь, вана а тукшны млезэнек ансяк модамарь ды капста лангсо аштемась... Максовольть бу сюрыне, вант тевеськак лиякс туевель! Ладс кортан, атят?

— Ла-адс!.. — ливтясь те валось прок ве, пандошка покш, грудьстэ ды сорновтынзе стенатнень.

— А макссынек скалонок!

— Капста лангсо аштитяно.

— Косот трахторонк?

— Ловсовтомо арсетядо кадоманок...

— А макссынек!..

Ломаньтне пижнесть, стукась пильгсэст, цяхасть, вешксть ды цийнесть.

Друк марявсь казямо ды виев вайгель. Весе општ мольсть.

— Атят! Вал монень... Вал вешан!.. — аватнень тулкаезь, капшазь мольсь сценантень сэрей ды, прок циган раужо, колхозник.

— Вал максан Алексей Тимофеевич Кузнецовнэнь! — яволявтсь Комаров.

— Ялгат! — кармась Кузнецов. — Вана тынь пижнетядо, шум кепедиде... Кинь каршо шуматадо? Кинь истя тандавтнетядо? Мезе вештядо?

— Сюро! — марявсь косто бути ве ёндо.

— Сюро — дразнизе Кузнецов вайгеленть. — Мезень кис истя те сюронть тенек макссызь? Келей кирьга-паренек кис, штоли? Эли мазый сельменек кис? Мезе тенек а сатни паро эрямонь ладямонть кис: штобу весе сатоволь, штобу веседенть улевель байтяк — роботавлитькак, ярсавлитькак — штобу весе улевель! — мезе тень кис тенек а сатни? Моданок паро... Эсинек! Скотинанокак ули. Моданок пелензэ сокасы Мэтэес. Седе ламо лангс зярс кургт паншнемс а мезть — трактортнэ а сатнить. Мень лихой тенек, атят, эряви? Тесэ кортась монь кумом Иван Иваныч. Содатано, чоледемадонть сон мастерь... Келезэ а понги! Но мезть сон кортась? Сон кортась помещиктнэде. Вечкема кум, тон важодить сынст кедьсэ кемень иеть, мон карязт-пакарьть яжинь лангозост комсь иеть... Кинь седе кемемс? Эка, бухадизе: помещиктнэ. Тон помещиктнэсэ сельмс иля нерькстне! Сынь удость кашлангсо, ярсасть калацядо, минек котьмерьганок цётмарка яксесь. Минь вана раздятано кирьга-паренек... Мень эщо рудазга видема! Мейсь сон тенек? Чаво колгант! Парсте сюронь шачомань кис — вана мейсь! Кода кортнесть седикеле превей ломаньтне? «Видик, кортасть, пинементь рудайс, улят чиряз». Ды видеяк: чиде икеле видесак, недлядо икеле нусак...

Политотделэнь начальникесь мезть бути сёрмадсь эсь книшказонзо. Кузнецов кармась кортамо седеяк гайтевстэ.

— Пандя, атят, кельтнень човсемс! Роботамс эряви... Эли меленк эзь моле веца-ямдонть? Мон сонзэ эйстэ нильтякадынь — седе а ков... Уксноман кепсетить, эйстэнзэ! Ки ай арси важодеме, кода мелезэ. Но артельсэнть нузякстнэнь кирьдемс аволь эрявт! Центрасто сыця начальник ялгась пеедсь лангсонок... Мезе, атят, нать аволь ладс? Нать, атят, минь эзинек срама колхозонок? Пандя сацтнемс! Шка кундамс превс, атят!

Кузнецов покш эськелькссэ тусь тарказонзо. Заласонть таго кепедсь жалт. Политотделэнь начальникесь кевкстизе Комаровонь.

— Ки те атясь?

— Колхозник, — отвечась председателесь.

— А маштови а неемс истят ломаньтнень. Аравтык сонзэ бригадирэкс. Тонавтнек пельдензэ. Кеме атясь!

Жалтось лоткась. Ильин ялгась лиссь столь экшстэ ды ютась сценанть крайс.

— Мезть, ялгат, ванды карматано видеме эли а карматано?

— Карматано! — отвечасть зяро бути вайгельть.

— Ансяк давайте видеме аволь истя, кода течи. Ней адядо тукшнотано кудова! — прядызе валонзо Ильин ялгась.

Ломаньтне чатмонезь лиссть промкс кудостонть.

Летке вармась анеявикс кедьсэнзэ видесь раужо паксянть ланга ловонь пухкетнень. Тундонь чись васня штавтызе моданть лангсто ашо вельтямксонть ды, кода неизе сонзэ штапо цитниця рунгонзо, визьдезь кекшсь пондакшов пельтнень экшс.

Ненастиянть лангс апак вант, Кузнецовонь бригадась роботась псистэ. Васень звенась сокась лишмесэ. Тесэ ульнесть ансяк цёрат. Омбоце звенасонть седе ламольть аватнеде; сынь эзизь нолда цёратнень скалсо сокамо. Ансяк плугарькс нолдасть кавто колхозникт. Лия кавто плугтнэсэ роботасть ванькс ават.

Сонсь бригадирэсь тече чоп а кадносы омбоце звенанть. Скалтнэнень стака молемс варманть каршо, сынь снартнить яла пурдамо ве ёнов, коламо борознанть. Пансицятне а нолдыть. Плугарьтне весе виест путыть — ветить плугтнэнь, кодаяк бу а кадомс целезна.

Марина валске капшамонь пачк стувтынзе варьганзо. Сонзэ кедензэ якшамодонть сэньшкадсть. Вармась скири яла седеяк кежейстэ. Плугось прок иредсь, ноки прамо — нолдамс а кода. Сельведьтне састыне гирагстыть чамаванзо, васня сынь пицить щекатнень, мейле эй покольнекс прыть сивензэ экшс.

— Тон, дочам, некак, аварьдят? — кевкстизе Маринань Кузнецов, сонсь жалязь варштась чамазонзо.

— Кедень кельместь — а кирдевияк!.. — видькстась Марина.

— Ужо полавттан! Моньсне тонадсть якшамос.

Кузнецов кундась плугонтень, Марина грабля пей суронзо марто а ламос мольсь мельганзо борознаванть, верьс сусконесь турванзо, кирдсь авардеманзо.

Оймсема шкасто кирпець пона лишме лангсо ласте сась авань куцянтень колхозонь председателесь.

— Ардтнят, покш пря! — кежейстэ вастызе сонзэ скалонь пансиця Захаронь Поля. Сон учозь вансь Комаров лангс ды налксесь кшнань локшосонзо. — Тон вана пансевлитьдеряй скалтнэсэ истямо вармастонть эли якавлитьдеряй Маринань таркас плугонть мельга — курок куят правтовлик!

— Мекс пек кежейстэ? — пеедезь мерсь Комаров ды валгсь лишменть лангсто.

— Сак тей! — кармавтозь сергедсь Поля.

— Вана! — дивазевсь председателесь.

— Дай рукавцятнень! — бойкасто ноцковтыязе Поля Комаровонь кедьстэ овчинань рукавцятнень ды максынзе сынст Маринанень. — Нейсыть, кедензэ сэньшкадсть!..

— Ловка, плутовка! — чаравтызе прянзо Комаров.

— Тон ёвтык, ормаза коммунист, мейсь сыргавтнитядо превтемень тевть? Нать истямо ловнэ виднекшнить сюрот? Весень тынк тевенк марто нерькстамаль бу... кискань пулалов!.. Видметнень ансяк ёмавтнетядо ды минек, аватнень эйсэ, муцятадо. Нать сокамось — авань тев?

Комаровнэнь мольсь якстере сельме ава, кона те шкас аштесь а ламодо ве ёно, ды аварьгадсь.

— Ялакскем, нолдавтык кудов монь скалнэнть! Сэреди сон... Весе потензэ куво саинзе... Жалить эйкакшон!... Модамарьденть ансяк пекс касыть...

— Иля мелявт, Устя патяй! Течи минек колхозонтень сюро хлопочинь.

— Мень а паро эно, непутной, чатмонить те шкас? — кенярдозь рангстась Поля.

— Ламо? — кевкстсь Кузнецов.

— Кавто тоннат товзюронь пулокст ды вете тоннат суро. Седе а ламо максыкэльть, политотделэнь начальникесь пшкадсь кисэнек.

— Ну, — дивазевсть аватне.

— Ды эщо кода кисэнек аштесь! — ёвтнесь Комаров. — Мекс? Неизе роботанок. Мон тензэ максынь вал, што ванды прядсынек рудазга видеманть. Кемть, меринь, Ильин ялгай, минь уш валонок кирьдсынек. Ладс мон тензэ меринь? Прядсынек?

— Эряви прядомс! — мерсь Кузнецов.

— Вай, кода можна манявомс ломаньсэнть! — прок эстензэ кортась Захаронь Поля. — Промкссонть пейдимизь, буто уш миньшкадонок берянь ломаньтькак арасть, ней сонсь ашти кисэнек. Виде ломанесь!

— Кода эно скалонзо марто? — пшкадсь Комаров бригадирэнтень ды невсть Устя лангс.

Устя друк визделгадсь. Сон, неявсь, умок уш стувтызе скалонзо, прянь венстязь кунсолось кортнематнень.

— Не кавто читнень кадык уш яки!.. — капшазь мерсь Устя. — Чокшне одаронзо ойнесэ ваднеса — паряк чевтеми.

— Эй, работамо! — сергедсь Марина, ды сырьгасть весе плугтнэнень.

Кузнецовгак туиксэль звенанть марто, Комаров лоткавтызе.

— Мон, Алексей Тимофеич, ней ютамсто токшинь тракторонь колоннантень ды.. — Комаров кармась козомо. — Тосо лиссь... Пек страшна мезеяк арась! Тонть цёрась натой а чумояк.

Кузнецов ловташкадсь. Вить пиле бокасонзо чова санозо бойкасто кармась кепсевеме мекев-васов, тень эйстэ чамасонзо менькстнэ седеяк ламолгадсть.

— Якшамо, — пильгалонзо ванозь ёвтнесь Комаров, — сон ашолгадомсто саезь те шкас яла сокась тракторсонть. Лиятнень полавтызь, сонзэ полавтыцязо, нать, оргодсь МТС-тэнть. Полавтыцят арасть. Сон согласясь роботамо чокшнес. Нама, кельмесь... Текеде весе лисськак! Эжемадонть эли эщо мезде солась вейке подшипникезэ... Машинась стуки, сон а мари: прязо весе тапарязь. Солась омбоце подшипникесь. Те шкастонть самай сась политотделэнь начальникесь. Тракторонть лоткавтовтызе, сонзэ эсинзэ савсь кедь лангсто валтамс. Сонсь эзь валгово... прок мерят педясь озамо таркантень. Эли якшамодонть эли, паряк, жальть тензэ марявсть подшипниктнэ, — сонзэ ведь ловсть сех паро ударникекс, — теевсь мартонзо... ну, прок ёжодо маштнесь... Саизь больницяв. Подшипниктнэ, нама, аволь пек уш питнейть — тракторось стяко карми аштеме...

Кузнецов сельгсь кежень пачк ды азаргадозь рангстась.

— Нолго туло! Позоримем, шайтян левксэсь!

— Пандя, Алексей Тимофевич! Те лангс ваномс пек а эряви, — ладсесь эйсэнзэ Комаров.

— Кода а эряви! — сергедсь Кузнецов. — Монь кодгемень иень, ды монень пек а паро марямс, што монь цёрам — тюря!.. Цёрась улезэ тетянть коряс седе кеме, седе превей ды седе паро, а сон? Ёжодо майшсь! Визькс кулсономс...

— Стяко маштнетят... Пежеть, стяко! Содавлиньдеряй, ве валгак теть аволинь ёвта, — янгсезь мерсь Комаров.

— Кода стяко? Сон тосо машинат яжи, монень, паряк, тонть койсэ, пейдемс эряволь? Машинанть яжамо эрьвейке дуракось машты. Тон вана роботак лангсонзо вейкеяк винтэнь апак кола — тень кис шнатадызь... Э, аволь паро! — музгорьдсь бригадирэсь ды сюворясь мокшнанзо.

— Ки тесэ? — тандадозь кевкстнесь Варвара Осиповна, — сонсь ладизе пилензэ панжома варянтень, ве кедьсэнзэ кирдсь эчке штатол.

— Варюша, паншт! — тошкадсь содавикс вайгель.

— Тетяй, тон! — сергедсь авась ды кувать тензэ эзь панжовт кенкшесь.

Кода нолдызе тетянзо кудыкелев, Варвара Осиповна дивазь ванкшнось сонзэ тощамозь чаманзо, ды мейле поводсь кирьгазонзо.

— Оргодить эли истяк нолдыдизь? — кевкстнесь тейтересь ды вечкезь вансь тетянзо сельмс.

— Салавинька эрян! — отвечась сон.

Штатолось кармась сорномо. Варвара Осиповна абунгадозь потазевсь удалов.

— Тетяй, тон превстэ лисить! — кежейстэ рангстась Варвара Осиповна. — Эли ёмавтоманок арсят?

— Иля пеле, дочам, кияк монь эзимем нее, — а кемезь мерсь тетясь. — Чоподас вирьсэ лекшкадозь аштинь, велеванть удалга сынь. Штатолонть, пожалой, мадстик — вальмат, неяви, апак вельтя...

Чоподасонть кувать аштесть чатмонезь. Варвара Осиповна пуснось судосонзо, прок улав усксь.

— Тесэ тоньтеметькак тошна! — покорясь сон тетянзо. — Минь минськак суре вельде кирдьтяно. Васня монень педякшность — мекс мон лишенецэнь тейтерь, мейле — мирдем эйс.

— Сон яла счетоводокс роботы? — кевксть тетясь.

— Арась. Счетоводсто каизь — лавшокс ловизь. Кемень иеть роботась — пароль, ней друк мельс эзь туе. Тунда эщо аравтызь паксясо счётчикекс. Ды ней сэреди, мекс бути шишкат-палкат саизь. Больницясо мик лечить эйсэнзэ, — музгорьдезь кортась Варвара Осиповна.

— Паряк, учётчикекс?

— Шут содасы, паряк учётчикекскак?

— Мезть, дочам, ламонь велестэнть панизь? — седейшкава кевкстнесь тетясь.

— Тельня колхозсонть чистка тейнесть, — кежтеме уш отвечась Варвара Осиповна, — кавтошка эли колмошка судясть. Свешников Федянь, сон правлениясо ульнесь, Сибирев панизь, лиятне теск аштесть.

— Мезень кис Федянь судизь?

— Сонзэ а мезень кис ульнесь судямскак. Мезеяк мельгано эзь некшневе. Жаль натой маряви: ульнесь ломанесь партийной, мезень кис ашти — а содатано. Ну, мусть буто сюронь растрата. Сёксьстэ эщо тевесь моли...

— Значит, кекшизь васов, — арсезь мерсь сон ды кармась вешкезь козомо.

— Аволь вадрясто, тетяй, лиссь самот марто! — тонавтсь тейтересь тетянзо. — Эдь уш ниле иеть топодсть, кода тонть панидизь. Ломаньтне умок стувтыдизь, прок светэнть лангсояк арасят.

— Нать ломаньтне тенень пек кенярдыть? — кежень пачк кевкстсь тетясь. — Паряк, тонгак радовавлить, бути мон больши аволинь уле?.. А?

Марявсь чоподань пачк, кода чикордсь Варвара Осиповна ало стулось.

— Мейсь монень теде кенярдомс. Тон монь — тетям...

— Ну, паро! — лоткавтызе атясь тейтерензэ. — Ломаньтне — тувот... Сынст пельде паро а неят. Грабимизь, кадымизь штапо, эсинь ёртымизь родной пизэстэнь ды эщо арсить, штобу врадовлинь козоньгак кискань таркас... А, эдь, монь пельде обчествантень ульнесь лезэ... Да, дочинем, ульнесь! Те колхозонть васня ки пурнызе? Мон! «Бойка сокиця» лементькак тензэ путыя мон. Теде весе содыть!..

— Ней лемезэ лия, — мерсь Варвара Осиповна.

— Кодамо?

— Сталинэнь лемсэ.

— Умок истя? — покордавозь кевкстсь атясь.

— Таго меля, таго мик маны эщо, зярдо монь цёрам кулось — сестэ уш... — укстазь мерсь Варвара Осиповна.

— Ну и мезть? — эзь оймаво тетясь. — Кода пурнасть колхозов? Васня минек эйстэде артельсэнть ульнесть, эдь, ансяк кемешка кардазт...

— Кода пурнасть? Васня якасть кудова: ули мелеть эли арась. Натой силой сёрмалесть... Сёрмадст ды пандя. Мейле се колхозось каладсь. Одов кармасть пурнамо.

— Ней кода? Колхозост кеме?

— Тундонть самс тевензэ ульнесть кальдявт. Ней витевсь, роботы вадрясто. Ды кода дружнасто роботыть паксясо! А то икеле яла скандальничасть...

— Мезде истя витевсть тевензэ? — кургонь пурдазь кевкстсь тетясь.

— Эзть карма вейке-вейке лангс надиякшномо. Ней кой-кить ламо получить сюро.

— Косто тон содат, ламо эли а ламо?

— Истя кортнить. Сюротне тедиде парт, — отвечась Варвара Осиповна. Сонзэ сась удомазо, секе тев автнесь кургонзо, но тетязо яла кевкстнесь.

— МТС тесэ ули? Содасак, мезе МТС-эсь?

— Марсинь, роботыть эйсэнзэ. Натой минек шабранть, — Кузнецовонь цёразо, — роботы Мэтэсэсэ. Мезть роботы — а содан. Некак, тракторсь...

— А политотдел ули?

— Те истямо правления, штоли? Ага, содаса. Тев яла сынст начальникест сакшны, салдатонь одижасо.

— Револьвер марто?

— Эзия приметя. Ды арази тевтеме сонензэ можна?

Варвара Осиповна кортась нузякссто. Чоподась седеяк увтясь прянзо эйсэ алов. Друк сон тарцк тейсь.

— Пекеть вачсь? Мон овси превтеме кадовинь! — пшкадсь сон тетянстэнь.

— Сусковлинь бу! — согласясь тетясь.

— Тон зярс лекшкадт каштом удалов, мон кирвазтьса штатолонть. Тосо ямом ули, жарянь модарькан.

Варвара Осиповна вергелесь спицькатнесэ, перть пелев ливтясь сятк, кирваземань эсть кирвазе.

— Беда не спицькатне марто. А кирвазить.

— Монь улить седе парт, — венстинзе спицькатнень тетязо. — Самарсто мик раминь.

Ярсась сон чатмонезь. Чоподанть лангс апак вано (штатолонть таго мадьстизь), сонзэ пенчезэ вакска эзь яка. Цямкась тулявкс ладсо.

— Я, козо ней ацамс теть? — кевкстнесь Варвара Осиповна.

— Паро мезеяк иля аца. Те кискань эрямодонть пель иешка уш банясо эзинь паря. Ули пинжаком. Мук мезеяк каладыне алксокс, — кортась сон.

— Эх-хе-хе! — укстась Варвара Осиповна. — А мезень кис муцить народонть. Весень човоризь, травизь вейке-вейке лангс — аволь эрямо, содом мень бути!

— Ламот, дочам, истя кортнить? Эрямось ломаньтнень мельс тукшны эли арась?

— Ки содасы! Кинь мельс тукшны, кинь мельс а тукшны.

— А бути, меремс, муевельть ломанть ды булга кепедемс? — прок аштемадо кевкстнесь тетясь сэтьме вайгельсэ.

— Тень кода чаркодемс — властенть каршо, штоли? — тандадозь сергедсь Варвара Осиповна. — Арась, тетюшай, паро тень эйстэ а лиси. Народось лавшомсь, тенень а кепедеви...

— Парсте тон содат, а кепедеви? — аволь кемезь кевкстизе тетясь. — А кортнемс ли тень кияк марто? Да бишь, косот ней Наумкань Яков, Потань Раман, Маркань Евсей?

— Пансизь сынст, пекстнизь. Ков эно лияв теизь?

— Оно кода! Да-а, те-евть!.. — дивазь мерсь тетясь ды стясь столь экшстэ. — Ульнесть алкуксонь ломанть, роботасть чинек-венек, ды сынст самай пансизь весе, кадызь веленть прявтомо... Нужай Иванка теске?

— Теске. Сон чай актив! Улко розь паксянь ванстыцякс кочкизь...

Варвара Осиповнань тетязо састыне мольсь эсь тарканстэнь, каизе пинжаконзо ды вельтясь. Сонсь Варвара Осиповна столенть нардамодонзо мейле штатолонть марто ютась удома таркав ды састо кармась кайсеме.

— Справна! — мерсь эсь пачканзо тетясь, зярдо тейтерезэ кадовсь ве панарнэсэ ды тулоскавтызе удалксонзо котанзо каямсто.

Ильин ялгась самокаткасо ардсь Сталинэнь лемсэ колхозов. Пси чись картузонь пачк прок мейсэяк ношкасо лепштясь човонензэ лангс. Опаня. Пулев кинть кавто ёнга нурсезь лыйнесь кенерезь розесь. Ардыцянть а кирдеви удомазо. Сельмензэ икеле уить, вейке-вейкень сасазь, эрьва кодамо менькс марто викшневкст.

Друк вармась кандсь цють марявиця мазый вайгель. А ламос аштезь вайгелесь виензась, мейле уш парсте марявсь:

— О-о!

Пильгтне ноцковтозь лепштясть педальтне лангс ды весе рунгонзо пачк ютась кельме.

Губоронть лангсто васняяк сельмс каявсь ломань. Сон мейсь бути киштсь ве таркасо ды аулясь кедьсэнзэ. Ансяк мейле кармась неявомо качамонь сэнежди брижась ды тюжа толось.

Зярдояк апак соксе лошмованть пеке киське лангсо састыне валгсь толось розь паксянтень, инегуй ладсо усксь мельганзо покш моцька пулонзо ды цяторсо порьсь кинзэ лангсто коське тикшенть.

Ломанесь прок травсемань кис неркстнесь лангозонзо палкасо, то кирнавтозь каявиль чалксемензэ, то истя жо кирнавтозь потыль мекев.

Политотделэнь начальникесь Нужайкинэнь содызе ансяк овси маласто.

— Розбой! Ёмась розесь!.. Вай, ёмась!.. — бабань вайгельсэ пижнесь сон, кода неизе Ильин ялганть.

— Тон, мерзавец, мезть тейнят? — рангстась политотделэнь начальникесь ды таргизе зепстэнзэ браунингензэ.

— Аштек! Иля... Иля ледть! — кепединзе кедензэ верев ды потазевсь сон толонть ёнов. — Мон... Тарказон ледимак, аволь мон... Пель час уш пижнян! Вайгелемгак майшсь... Косояк ломань ойме арась... Вай, бедась, кодамо! Сакалонгак киртынь... Арази ськамот мадьстяви истямо толось?..

— Косо улить маласо роботыцят?

— Тосо... пандонть экшсэ жнейкасо нуить! — кенярдозь цийнесь Нужайкин толонть ёжосо.

— Вант, панарот палы! — невтсь Ильин ялгась ды чиезь кирнавтсь самакатканзо лангс. Капшамонь пачк сон каршавсь ды, а ламос пуртнемадо мейле, прок кеверезь кармась кевереме валаня кияванть.

Ардомсто сон зырыяксть нерькстневсь розень стенантень, кирнавтозь валгонесь самакатканть лангсто, мекев ойсесь, — апак жаля янгась машинанзо эйсэ.

Кода пачкодсь ниуцянь бригаданть видьс, сон кадызе самакатканзо ряд кинть крайс ды видьстэ тусь чиезь жниванть ланга. «Седе алга эряви нуемс» — арсесь сон чиемстэ.

Сэрей жнивась прок килькшсэ кундсесь пильгензэ эйсэ, чеерень карьксэсь тапарявсь кемензэ перть, чиемс стакаль.

Нуицятне лоткавтызь лишмест. Сынь талакадозь пижнесть ды аулясть кедьсэст. Комаров покш экскелькссэ ношкстась Ильин ялгань каршо.

— Капшадо! Тосо розенк палы... Жнейка марто!.. Ванодо лишметнень... илинк лазо! — пижнесь чиемстэ политотделэнь начальникесь. Мейле Ильин ялгась а ламос озась оймсеме. Эщо германской войнастонть газсо токазь седеезэ ней овси отказыксэль роботамодо ды аноколь сезевеме эли ливтямо таркастонзо.

Мекев Ильин ялгась ардсь ласте лишме лангсо. Перть пельде пожаронтень чийсть цёрат, ават грабля марто.

Толось келей чады ладсо эцесь розень иневеденть потс. Сон уш тейсь раужо модакс зярыяшка угол.

Ломатне само эщо эзть кенере. Ансяк Иван Иваныч ськамонзо чувтомозь аштесь толонть эйстэ ве ёно ды эйкакшокс чиремтизе прянзо — вансь пожаронть лангс.

Нуицятне колмо жнейкасо ютасть толонть икельга, керизь кинзэ ды ломаньтне ёртовсть каршозонзо туреме: веенстнэ граблясо урядасть икельдензэ олгонть, омбонстнэ чалгсесть эйсэнзэ пильгсэ, валясть модасо, хлопаесть нартемксстэ теезь теньстьсэ.

Жниванть ланга молемстэ толонть виезэ лавшомсь, яла теке мадстямозо стакаль. Лепштясызь толонть ве таркасто, сон сези эстензэ ки лиясто, ды назойстэ эци апак нуе розентень.

Ломаньтне чатмонезь потасть чаркодевиця, но кежев врагонь икеле, кона пакшторсо порсь сень, мезенть кис путсть сынь зяро вий.

Друк пувась каршо вармине. Толось скокадсь удалов, кода скокадекшни кискась, зярдо сонзэ апак фатя лоштясызь сельме-чама ланга локшосо. Колхозниктнэ каявсть талакадозь толонть лангс ды сасызь пензэ.

Политотделэнь начальникесь, мельганзо лиятнеяк, эщи пси следга сырьгасть пожаронь шачома таркантень.

Кирвазцитясь тейсь ёжовсто: лошмось, кува валгсь толось розь паксянтень, сюлмавозель покш латко марто, конань эйстэ вайгельбень тарка ушодовсть Узлань виртне.

— Ванодоя, спицькась якстере! — кепедсь Марина спицька пе ды мейсь бути максызе политотделэнь начальникентень.

— Своло-очь — дивазь вансь Комаров спицьканть лангс, — минек колхозсто истят зярдояк эзинь нее...

— Минек ашотнеяк аволь свал арсить, — пеедезь мерсь Захаронь Поля.

— Подлецэсь, котошка гектарт чентясь, — прок эстензэ кортась Кузнецов.

— Оргодсь гадинась, — кежейстэ сельгсь Комаров.

— Э, брат, кенгели! Советэнь союздонть васов яла теке а оргоди! — отвечась Ильин ялгась Комаровонь валонзо каршо ды а ламос чатмонезь мерсь. — Пек верьга нуйдядо, эряви саемс седе алга.

Стёпатянь чиремезь кудынензэ икелев лоткась од легковой автомобиль, конань ансяк не читнестэ получизе политотделэсь.

Чоп лытамодонзо чись сизесь. Сон пурнась-сэрьнясь уш кекшеме веленть удало пандыненть экшс, но друк варштась канаскадозь кудыненть вакссо цицердиця машинанть лангс ды пикстерьдезь лоткась: сон свал тестэ неиль кичкере сока, чувтонь изамо, навозсо валязь каладышка нурдо, нупоньсэ вельтязь боцька, кона кизэнь перть аштесь латало судонь сезиця чинев ведензэ марто ды седеень налкставтыця пулев, чеменев, лазновозь а мазый вешть, ней тесэ коштангалесь ды нулгодезь вансь макшов кудонть лангс автомобиль.

Кенярдозь ракась чись, мызылсэ пеедсь машинась, сиядовтсь сельть эсь лаксо велтязь лапасонзо, пиже кузовсонзо, ладс теезь чарысэнзэ. Стёпатянь кудось виздемань пачк седеяк нуварьгадсь, сон аноколь нейке каладомс, штобу вадемс те коштан инженть сельмензэ эсь умонь рудазсонть.

Ильин ялгась колхозонь председателенть марто лоткасть кардаз куншкас. Куроксто лиссь сонсь азороськак. Сон ливтсь инжетненень кавто табуреткат.

— Стяко стараят, Степан Григорич! — мерсь Комаров ды озась табуретканть лангс.

— Тынь монь илимизь судя, инжетнень терьтнесызь кудов, но тосо ней баня прок! — янгсезь ладсо мерсь Стёпатя. Сон невтсь кедьсэнзэ панжозь кенкшенть ёнов, косто марявсь тантей чине.

— Паро тескеяк. Ломатне минь эсинек! — мерсь политотделэнь начальникесь.

— Те виде, — согласясь мартонзо Стёпатя.

Сон талнозь якась мекев-васов, ливтсь столь, эзем, мейсь бути токшизе рукомойникенть ды мейле уш озась столенть малас.

— Содат мейсь ардынь теть, Грушин ялгай! — кевкстизе политотделэнь начальникесь Стёпатянь ды кирвастизе попиросканзо.

— Мейсь аволить ардо, коть зярдо тон — вечкема инже? — отвечась Стёпатя.

— Минь арситяно тонть кучомат краев ды озавтомот, меремс, ветешка иес...

— Теяк тев! — сергедсь Стёпатя.

— Нейке саемс тонть эли прощат семият марто — машинась учи? — секе вайгельсэнть кевкснесь политотделэнь начальникесь. — Семият ули?

— Вана несынк! — мерсь Стёпатя.

Ды прок сонзэ валтнэнь кемекстамост кис чикордсь удалсе ортась ды вейке-вейке мельга совасть кардазов вейкетьстэ оршазь колмо тейтерть. Сынст ве ёндо ванозь можналь а човорямс бути ансяк сэрень кувалт.

Колмонест раужо сельть, чамаст прок свежа умарть, — тейтертне маласо седеяк вейкеть понасольть: весемень судост видеть, улост тоцязь, теке марто ульнесь чамасост такодамо вейке черькс, кона вейкеньдясь колмонест эйсэ.

— Тон сынст заказонь коряс печатыть! — дивазь кевкстизе тетянть Ильин ялгась, сонсь сельмень сиядозь ваннось тейтерензэ. — Ды весе-сынь тонть?

— Кинь букась аволь уль, вазтнэ весе минек! — отвечась Стёпатя.

Комаров вайгельсэ раказевсь, эзь кирдеве пейдемазо политотделэнь начальникентькак.

— Ламо колозкеть пурныде? — кевкстизе Комаров покшонть. — Васень участкань прядынк?

— Прядынек, — ве вайгельсэ отвечасть колмонест тейтертне.

— Тон, дочам, зяро пурныть, — лоткавтызе Ильин ялгась веженсь сазорнэнть, — пондошка?

— Лишмень граблядо мейле пондось киненьгак а пурнави. Колозкетне ансяк тия-тува — сик чийнек! — прок а мельсэ кортась тейтернесь.

Комаров варштась политотделэнь начальникенть лангс ды прок теньсэ мериксэль: «Нейсак, кода парсте роботатано».

— Ну, Степан Григорич, — мерсь политотделэнь начальникесь, — минь ней тонть кучтадызь краев икеле молиця колхозонь слётс, косо ёвтнесак весе кадовозьтненень, мекс ды кода тынк колхозось сайсь паро сюро ды шкадо икеле ускизе сюронзо государствантень.

— Вана те — зря! — тандадозь мерсь Стёпатя. — Мон анокан согласямо васень таркантень. Тосо седе шождыне. Инескеть, кадымизь! Весе тевенк коласа. Промкссо мон вестькак эзинь ораторнича... Кудосо, виде, човсян келем, но народ икеле — а ён... Мон а согласян, Ильин ялгай!

— Те уш решазь! — кеместэ мерсь политотделэнь начальникесь. — Давай лучи арсесынек, кода теть седе парсте теемс.

Тейтертне шлясть чамаст кардазсо лисьманть вакссо, вейкест-вейкест туртов валсть видьстэ ведрасто. Куроксто сась аваст цёрынензэ марто. Кодак сон неинзе патятнень, ношкстась тенст.

— Анка, инжетнень симдямаль чайде! — кортась Стёпатя нинстэнь.

— Паро! — прок моразевсь низэ ды тердизе покш тейтерензэ. — Вера, чийтя Кузминьканень самовар мельга!

Политотделэнь начальникесь пшкадсь састо Стёпатянень:

— Мон чайде а симан.

— Вана бедась: чайде а симат, вина кандтано, — пеедезь мерсь Стёпатя.

— Зярдо макссак мирьденень вана те тейтереть, — невтсь Ильин ялгась Вера лангс, кона капшазь ютась вакска шабрав, — сестэ можна ули копордамскак.

Стёпатя варштась калиткаванть совиця покш тейтерензэ — Маринань лангс — ды пеедезевсь.

— Мейсь тень, монь седе покш тейтерем ули!

— Нать сонгак тонть? — пек дивавсь Ильин ялгась. — Тон, неяви, пек сюпават!

— Шумбрат, Ильин ялгай, — венстизе Марина кедензэ.

— Сюк пря, ударница! — стясь Ильин ялгась.

Марина менель пона кофтасоль, чамазо неявсь ловтанякс, раужо сельмстэнзэ прок сятк верьгедсть. Апак тално ацась сон столенть лангс ашо ванькс столешник, мейле лазнось узерьсэ щепкат ды каясь самоваронтень ведь. Самоваронть вакссо аштемстэ Марина ве пилесэ кулсонось, мезде кортыть столь экшсэтне.

— Косо шоферэть? — марявсь тетянзо вайгелезэ.

— Мон артнян шофертэме.

— Тон, значит, ладс содасак машинанть? — кевкстнесь Комаров.

— Мон большевикан, большевикентень жо эряви содамс, — кортась политотделэнь начальникесь. — Кода тунда тесэ васенцеде молинь паксяв, ёжом пачк берянель. Ванат: ози тракторонть вакссо цера. Кедензэ ой потсот, чамазо содов, но косто содат, што сон аволь кулаконь цёра. Проверямс сынст сеске а ютколь. Ванат лангозонзо ды а содат: эли сон витни, эли яжи. Саия эстень правилакс: весе лангс ваномс а кемезь. Карминь ванкшномо, тонавтнеме, зярыя веть мастерскойсэ монсь, нама, книга марто калавтнинь ды пурнынь одов васня башка пелькст, мейле весе тракторонть. Тонадынь. Ней уш а манясамак! Истя до автомобиленть мартояк.

Самоварось тыжнэсь уш столангсо. Стёпанизэ кандсь кавто блидя лангсо ашо сюкорот, Марина путсь вакансо велькст, кармась чаень нуртнеме.

Стёпатя тердинзе инжетнень столь экшс.

— Ней эщо каванямкатне берять, — мерсь сон ды невтсь Комаров лангс, — вана скупой азорось — трудо-чис ансяк пелькилограмм макссь.

— Аштек, Григорич, не читнестэ видмень фондонть пештясынек — вагон сюро теть усктано! — прянь шназь отвечась колхозонь председателесь.

— Тон тенст лия кудо макст! — арсезь мерсь Ильин ялгась. — Правлениянть вакссо кинь кудось, кшнисэ вельтязесь?

— Маркань Эвсеень, ульнесь. Ней эйсэнзэ ловнома кудо...

— Мерьдяно эно видьстэ, Комаров ялгай, — перечизе председателенть Ильин ялгась, — минь те тевенть меньстинек. Эряви не читнестэ жо ванкшномс весе ударниктнэнь кудост. Кельметнень самс весень эрямо таркаст улест парт!

Стёпанизэ кенярдомань пачк эзь сода, мезть тейнемс. Од кудось онстонзояк эзь тукшно мельстэнзэ, ламо иень перть а ломанькс эрямодонть седеезэ истя налкстась, шкадо икеле мик сыредсь.

— Шка яжамс истят пизэтнень пенгекс! — невтсь политотделэнь начальникесь Стёпатянь кудыненть лангс, ды а ламос арсезь прок эсьтензэ отвечась. — Арась. Те кудонть а яжасынек, эзэнзэ тейдяно музей.

— Коть мезе тееде, ансяк тезэнь илимизь аравто монь заведующеекс! — рангстась Стёпатя. — Якстере армиясо ветнимизь истямо таркава. Куломс а вечксынь!

— Нать тонть сайнидизь? — кевкстизе Стёпатянь Ильин ялгась.

— Коть эйкакшон цела керькс, но монь эщо атякс илядо лово! — алялгалесь Стёпатя. — Мон вана тейтерень мирденень кшувавтсынь ды урьвакстан...

— Неяви, Анка патяй, а вечктянзат мирьдесь, марясак мезть корты! — пеедсь Комаров.

— Монгак сонзэ зярдояк эзия вечке, — витькстась Стёпанизэ, — лисинь экшэзэнзэ — тонадовсь.

— Зярдояк чавинзеть? — невтсь Комаров Стёпатянь лангс.

— Арась! Минь зярдояк эзинек туре, эринек беднойстэ, эйкакшонок сатнильть!..

Марина стясь стольэкшстэ ды совась кудов. А ламос аштезь лиссь мекев. Лангсонзо оршазель ашо понань фуфайка, черензэ сюлмазельть пацясо удалов, марявсь эйстэнзэ одеколононь чине. Чайде симицятнень ваксс апак лотксе, сон видьстэ ютась ульцяв.

Орта лангсо мольсь малазонзо кедень пинжаксо сэрей од цёра ды кецек-пецек тусть вечкема тарказост — утом вакссо шочко лангс.

Чокшнесь капшазь сравтсь чоподанзо. Менельстэнть ансяк парсте ванозь можналь редямс лисиця тештиень. Куншка куросо пизэнь вешни сараз ладсо кармась котномо гармушка.

— Марина, — пшкадсь од цёрась, — мейсь тенк лоткась политотделэнь начальникесь?

— Монь чиявтоман сась! — бухадизе Марина.

— Эряват тон сонензэ, учок! Сон уш атя ды урьвакстозьгак. Одгак улевель, монь марто пелькстамо аволь карма. Сон соды, што тонть седееть монь кедьсэ! А нельгеви...

— Пек уш покшокс, ванса, эсь виеть ловат, — мерсь Марина. — Ванок, кирть седем эйсэ кеместэ, ато муть-фать меньстясак.

— Тенень а улемс! Седееть кис мартон пелькстыцят арасть.

— Маньшат, улить.

— Ну, ёвтык инескеть, кить неть ухачтнэ? — вальгейсэ рангстась од цёрась.

— Онот, автомобильсэ мик мельган сась, — кирдсь пеедьманзо Марина.

— Вана дивась! Мон мельгат тракторсо сан. Эщо весть мерян: автомобильсэ сыцясь пелькстамо мартон а карми. Минь сонзэ марто улко теинек вейкень-вейкень козейка лангс а кайсевема пакт.

— Сонзэ, мерят, низэ ули, тонть косо нить?

— Ванат! — мерсь од цёрась ды кеместэ кутмордызе Маринань.

Овсе маласто ойкстась васня ды одирьвакс кармась лейшеме балалайка. Чатмонезь кунсолы чокшнень сэтме коштось кезэрень пингень моронть, кона ёвтни тейтерень пайстомо эрямодонть, а вечкевикс мирденень максомадонть, тетянь кудонь кис тошна-чиденть.

— Марина! — пшкадсь од цёрась ды арсезевсь. — Мон не читнестэ пек ламо думинь, ве тевде. Кодаяк тень а савтовить петне. Те тевесь качамонь кондямо, неемс прок неяви, кедьс а саеви...

— Мезе таго превстэ лисневти эйсэть! — дивазевсь Марина ды айгсь ве ёнов.

— Виде Марина, мезе бути лисневти. Вана бу чаркодемс те «мезе бутинть», чулгомс пеште ладсо ды весенень невтемс аволь лукшонть, невтемс товонть!..

Марина штюпадизе од цёранть конянзо, аволдась кавто кедьсэ ды мерсь:

— Прят буто аволь пси, лабордат, цёра, а ладс...

— Марюша! Ки, тонть койсэ, кирвастизе минек паксясо розенть? — кевкстсь друк од цёрась.

— Вана мезде арсят! — сергедсь Марина.

— Цела недля уш, Марюша! Ютась оймсема чистэнть лисинь кардаз удалов ды апак фатя варштавинь пильгалон. Мезе, тонть койсэ, неинь пильгалдон? Якстере спицька! Карминь сокарямо шукш-прянть, эщо кавто муинь. Сор тозонь кайситяно ансяк минь ды Варка шабранок. Мон васня путынь тетянь лангс. Розь ванстыцясь кумозо. Сынь а умок сёвность, видьстэ меремс, сонзэ кумось покордызе. Тонань келесь, ведь, бритва. Ну, арсян, тетям пожарсонть кеж пандсь тензэ. Тон содасак, тетям — ломанесь пси! Кежень пачк мезть а эрить... Саинь зепезэнь револьвер ды тердия тетянь кардов. Аравтыя грудезэнзэ револьверэнть: «витькстак, сеерян тензэ, яла теке ледьтян». Содат, мезть сон мерсь тень? Сельгимем чамас, ды мон сеск карминь кемеме, што тетям а чумо. Косто саевсть якстере спицькатне, кода понгсть минек шукш-пряс — а содан те шкас...

— Мекс тон шабранть лангс эзить пут?

— Мирьдезэ се шкастонть больницясоль. Монсь натой кавтошкаксть содавтния. Варка лангс кодаяк а путат.

— Тетязо? — капшазь кевкстсь Марина.

— Косто? Сонзэ тетязо ветешка иеть уш... аштек!.. Марина, аштек! — ёзась конянзо од цёрась.

— Аштян Федюша! — мерсь Марина.

— Видеяк, мекс бу!... — арсесь Федя ды кенярдозь рангстась. — Мекс бу а оргодемс тензэ тосто! Марина, ульть шумбра сы оймсема чис. Мон ношкстан Ильин ялгантень!..

— Ну-с, кулсонан! — капшазь мерсь политотделэнь начальникесь.

Колхозонь председателесь юксизе папканзо ды таргась конёвонь покш лист.

— Вана, Ильин ялгай, казезень спискась — варштасак?

Политотделэнь начальникесь саизе конёвонть, бойкасто ютызе сельмсэнзэ ды пейдезевсь.

— Те спискась, неяви, сасасы петь? Кавксть уш лангсонзо аштинек, политотделэсь мартонзо согласясь, мезе эщо эйсэть кинедсти?

— Монь койсэ, — кармась председателесь разедеме пулакшонзо, — эряволь эщо нерькстамс тезэнь... Захаронь Полянь. Тон сонзэ а содасак?

— Кода эно!.. Пачк пеев авась...

— Коть ламоксть сюдымем, но роботась аволь беряньстэ! — кортась председателесь.

— Нать чевтемтеманзо арсят? — кевкстизе сонзэ Ильин ялгась.

Комаров тетькезь сурсонзо ёртынзе сельмензэ лангс новолезь черензэ ды кармась тензэ ёзамо судонзо.

— Мон согласявлинь максомо тензэ казне эсинь жаловнястонгак... Сон, ведь, пединьдеряй теть, верьс сраматанзат!

— Сёрмат тензэ тень кис паця! — мерсь Ильин ялгась. — Эщо мезе ёвтат?

Председателесь таргась папканть потсто модерязь конёв пангс.

— Вана заявления. Сёрмадыцязо пек энялдсь, штобу ванновлик течень промксонть самс.

Ильин ялгась саизе конёвонть ды кармась ловномо:

«Дорогому Начальнику Политотдела.

Прошу и умоляю Политотдел рассмотреть мое Заявление, так как я караулил колхозное поле и во время караула уснул, за каковое время Классовый врак поджог траву около ржи, где бабий оврак, и когда я проснулся, огонь потушить единолично не удалось, в чем считаю себя виноватым, а также не добровосестно перед колхозом, за что исключен из колхоза Имени дорогого товарища Сталина. Прошу и умоляю опять принять меня членом колхоза, простить мне первую вину, даю обещание што буду добросовестным колхозником и буду бороться со всякими и колхозными врагами.

Нужайкин И.».

Политотделэнь начальникенть промксось вастызе цяпазь. Ней залось неявсь седе валдокс. Ломаньтне аштесть озадо рядонь-ряд, сынь прок валозельть кшнистэ. Якстере, сэнь, ашо, менель пона пацясост аватне неявсть тветиця макокс. Соньськак Ильин ялгась ней ульнесь аволь икелень кондямо: лангсонзо сэнь костюм, сакалонзо ды усонзо наразь, сельмукшонзо раужо пинкске мартот.

Комаров талнозь кармась тееме отчёт колхозонть роботадонзо, кедьсэнзэ кирдсь блок-нот, конаньстэ шкань-шкань ловнось цифрат.

Президиумсонть политотделэнь начальникенть вакссо сэрьцек озадоль Кузнецова. Сон стараясь яла кекшеме сюрдов-сярдов ды понав кедензэ, но стувтомань пачк мекев путылинзе столенть лангс.

Ве стенанть кувалт якстере рамка экшсэ ульнесть патретт ды эрьва кодат лозунгт. Омбоце ёно сценастонть саезь весе стенанть кувалт покш буквасо сёрмадозель: «Лиянь кше лангс курго автни ансяк лодыресь!»

Комаровонь валонзо прядомадо мейле политотделэнь начальникесь каподизе столангсто конёвонь листэнть ды козкстась.

— Ялгат! Политотделэсь вейсэ тынк колхозонь правленинть ды ячейканть марто ударникекс роботамонь кис казинзе вана неть ялгатнень...

Прок командань коряс весе колхозниктнэ ноцковтозь кепсизь пряст ды кармасть ваномо Ильин ялганть вакска ков-бути ве ёнов.

Самай те шкастонть сценанть удалдо совавтсть покш ящик, кона вельтязель сэнь конёвсо, ды аравтызь столенть ваксс. Беляков пеедезь кандсь цицердиця ашо самовар.

Ильин ялгась кармась сеереме лемть. Эрьва колхозникень, кона мольсь президиумонтень казнензэ мельга, залось ильтясь пек цяпась.

Мекев тарказост молемстэ казезьтнестэ веенстнэ кандсть од ботинкат, лиятне шнасть пря мазый тьвет материясост, анок понкст-панарсост, шальсэст, фуфайкасост.

— Степан Григорьевич Грушинэнь, — марявсь политотделэнь начальникенть вайгелезэ, — сех паро видицянть, каземс штанасо ды од кудосо! Сонзэ тейтерензэ, Марина Степановна Грушинэнь, каземс самоварсо!

Залсонть прок динамит сезевсь. Иредезь ладсо мольсь Стёпатя столентень, саинзе вить кедезэнзэ штанатнень ды мейсь бути кепединзе верев.

— Атят! — рангстась Стёпатя. — Кортамо мелем сась... Кунсолодо! Мон кенярдан!.. Монь таргимизь чопода варясто. Атят, монь теимизь ломанькс! Мон уш ней рунгом видемтса!..

Кортыцясь нардызе штанатнесэ ливезев конянзо. Залсонть кармасть ракамо.

— Аштеде! — лоткавтсь сон ракицятнень. — Мон эщо кортан. Атят, арази мон икеле эринь? Аволь эринь, пужозь-пужинь эсинь макшов кудынесэнть! Монь ниле тейтерень... ули, нама, цёрамгак. Мон сонзэ а ледьстнеса... Кадык касы! Мон арсян кортамо тесэ тейтерьтнеде. Эх, атят, ламо а паро копордынь сынст кувалма! Ламо!.. Лисят, бувала, народс, прядо пильгс пеедьтядызь тейтерьтнень кисэ. Больчом, лезэсь эйстэст эзь неяво. А ней? Ней моньшкан часияв ломань а муят. Ней мон эсь тейтерень марто вете сядт пондо сюро нажовинь. Мон монсь нажовинь сядо понт, Марина — сядо комсь! Вана тенк тейтерь... Ней колхозсо ды од порядкатне пингстэ аватне — вий!

Аватне, мельгаст цёратнеяк кармасть виевстэ цяпамо. Стёпатя путынзе штанатнень кавалалонзо ды тусь тарказонзо. Кода цяпамодо лоткасть, Захаронь Поля сергедсь тензэ.

— Я, мейсь туить? Кортак!

— Мезть пек лабордомс, — залганть молемстэ уш кортась Стёпатя, — усксть монень вете сядт пондт сюро... Пут тезэнь модамарьтнень, капстатнень-мезтнень. Ней уш монь пулакшом а кинети!

Таркас пачкодемстэнзэ друк ледсь мезе-бути мелезэнзэ. А ламос арсемеде мейле рангстась мезе вий:

— Пасиба казнетнень кис!

Стёпатядо мейле Ильин ялгась сергедизе Захаронь Полянь. Комаров сравтызе парцеень пацянть кедензэ ланга ды арась сценанть крайс.

— Вай, кодамо мазый! — кенярдозь мерсь Поля ды сеске сюлмизе пацянть прязонзо. — Тетям-авангак истямо тень эзть рамсе.

— Сех паро бригадирэнть, — чуросто ловнось Ильин ялгась, — Алексей Тимофеевич Кузнецовонь каземс од кемсэ!

Цяпамодонть вальматне кармасть мик зэрнеме. Комаров сельмень конязь учось жалтонть лоткамонзо. «Прок сядо валёксо муськить» — арсесь сон эсь пачканзо.

— Кирть! — мерсь Ильин ялгась ды сонсь максынзе кемтнень Кузнецовонь кедьс.

Саинзе Кузнецов кемтнень, укстась кувакасто ды лазовозь вайгельсэ мерсь.

— Сырединь уш. Кодгеменьтненьгак исяк ютынь. Жаль... Ансяк ней бу эрямс! Эх, улевельдеряй кода ушодомс эсь пингенть одов ды эсь икелень виенть, конань мон ютавтыя помещик ды кулак лангс, максомс колхозонтень!..

Кузнецов авулдась кедьсэнзэ ды озась. Колхозниктнэ чатмонсть. Политотделэнь начальникесь путызе конёв листэнть столангс ды витинзе сельмукшонзо.

— Ялгат! — мерсь Ильин ялгась. — Мон те сценастонть кортан тенк омбоцеде. Васень кортамодон мейле шкась ютась прок овсе аволь ламо. Но кода промксозонк совамсто тече варштынь лангозонк, тынь, ялгат, эзиде содаво тень... Лиякс неявдадо тынь ней. Виде, леменк кадовсть секеть, сельменк-чаманк прок одс теезь. Ды сэрьскак касыде!

— Визькс улевель а касомс, Ильин ялгай, тонсь содасак кодамо пиземевель тундось, — рангстась таркастонзо Марина.

— Тон кортамонь таркас саевлик лучи столангстонть эсь самоварот! — покорязь ладсо мерсь Беляков. — Валскес штоли аштемс тень вакссонзо?

Сон кепедизе верев самоваронть ды прок сиянь ковсо валдомтынзе колхозниктнэнь пееди чамаст.

— Мезе ульнесь, — таго кармась кортамо Ильин ялгась, — тынк колхозсо тунда? Ульнесь талакадозь председатель, кона аноколь прянзо каямо чопода омутс...

— Ансяк ведесь кельмель! — видькстась Комаров.

— Ульнесть, — секе вайгельсэнть кортась Ильин ялгась, — бакланонь чавныця ды стяко пижниця колхозникт, кулаконь саботаж, дисциплинань а вечкема, колхозонь тевентень а кемема, ульнесть одонть лангс салава кежень кирдицят, таштонть кис тошналгадыцят. Мейле колхозонь чарынть снартнесь лоткавтомо видема шкасто тарькс якшамось, степнестэ сыця саранчась, классонь врагонть ёндо пожарось ды певтеме лия а неявикс вишка зыянтнэ. Ней те весе ютазь! Ней уш теезь сех главноесь: колхозникесь кармась правтомо роботас, сон кармась сэредеме колхозонь парочинть кис. Но те, ялгат, ансяк ушодкс. Икеле ламо тевть!

Промксонть прядомадонзо мейле Маринанень мольсь Кузнецов Федя ды лездась тензэ самоваронть кандомо.