Липни тол

Сёксь. Кизэнь лембе читне тусть васов. Паксясь чаво. Шождыне ливтнемс казямо вармантень урядазь паксяванть. Кой-кува неявить ансяк куцяс валязь чиньжарамо нетькснэ. Чилисема ёндо ливтить кесаксо шанжавонь коцтнэ. Весе менеленть вельтизь прок телефононь уськсэ.

Виресь шалнозь-шалны сёксень вармадонть. Чувтнэ эйстэ васов ливтить почарксазь лопатне. Ансяк сэрей поесь наряжась теке якстере наряцо, — эзинзэ певерть лопанзо. Вейке пестэ вармась урнозь канды лопатнень эйсэ омбоце пев.

Паро молемс киява. Кись кшнакс таргазь васов, васов. Минь кавонек сыргинек ошов. Икеле понгонить латк, пандынеть, сэть леень трокс. Пилькне шождынестэ кайсевить варманть мельга.

Чись кадовсь чувтонь сэрь, палозь-палы чивалгума ёнксось. Менеленть омбоце боксто туманонь кондят пельтне капшазь вельтить чивалгуманть эйсэ. Молемс комсь вайгельбе. Мон тандадозь меринь ялгам туртов.

— Чопотеме кармась... а пачкутяно...

— Кодаяк, паряк, чийсынек... шагат уставик...

Туинек бойкасто. Пельтне прок суманьсэ вельтизь чинть. Паксястонть кармась марявомо пиземе чине. Кись летькець. Мон эсь пачкан арьсян:

— Пиземе сы... карматано паксянть лайшеме... Ансяк кодаяк а кадовомс, кистэнть зря а туемс...

Мольдяно яла. Кинть ланкс валксь чавкань стая, клюкаизь певерень видьметнень ды шалнозь ливтясть виренть велькска.

Састыне, теке сувтемень пачк, кармась суводеме пиземесь. Чопулгаць. Виресь лоткась шалнумадо. Поназо чопуда модань кондямо, — понгатдеряй тозонь, пингезэть мекев а лисеват.

Рудазось пилькс педи шта лацо. Друк ялгам фатязевсь:

— Ванта. Аволь киява эдь мольдяно...

Кадовить...

— А тон эзить кадово? — пейдезь меринь ялгам туртов.

Ней уш молинек састо. Рудазось нергевсь чапакс лацо. Ведесь чольнесь пильгалонок, теке брага шакшсо чов. Икеле эйсэнек учось чопуда иневедь потмакс. Пильгалонок понгонить ямат, губорнэть. Апак фатя эшкевинь чувц. Эзинь кенерть пижакадомо, кода гиракстозь прынь крута стенаванть. Прамось монень марявсь ломанень пингешкакс. Телаван ютась пси пар. Аштян боком. Алксось чевте. Ало маряви бульдерди ведьне. Мезе вийсэ серьгединь:

— Ёга-а-а!

— А-а-а!..

Отвечась верьде вайгель. Пизементь пачк вайгелесь маряви тапань баягакс.

— Ёга-а-а!..

— А-а-а!..

— Тон прыть?..

— Прынь...

Састыне мольдяно пандо чирева. Начкинек пек. Озынек оймсеме. Экше. Туинек. Мольдяно. Мекев озынек. Пиземесь рисьни. Туманонь иневедесь салась эйсэнек потмозонзо.

Алдо липнезь липакаць толнэ. Радувамонь пачк карминек пижнеме. Липни толось яла малав сась. Те чопуда потмакссонть толось неявсь менельстэ тештекс. Пачкодинек. Вирь поцо кудо. Перть пельде пирязь плетеньсэ. Вальмало неяви атя, кецэнзэ газет, икелензэ липни толнэ.

Совинек. Кудонь лембесь пачканок ютась. Пелезь кевкстинек: можна арась удомс кудосонзо. Сон састыне сёрмав вайгельсэнзэ мерсь:

— Кузеде каштом ланкс. Эждинк ловажиненк...

Каштом кирьпецьне солазь солавтымизь. Мон кевкстия:

— Нать, бодяй, вечксак газэтэнь ловнуманть?

— Да, вечкса. Умок уш карминь вечкиманзо... Кода арась газет — ёжо а муян...

— Мекс ськамот эрят?

Путызе газетэнть икелензэ. Варштась кудонть уголс. Састо, лотксезь-лотксезь кармась басямо.

— Стака пек лецтямс ютазенть... Стака ваномс те уголонть ланкс... Тесэ ластнэ начтазь верьсэ... Сырединь, кодгемень ие эрян мастор ланксо. Вана комсьветее иеть служан лесникекс. Инязоронть пинкстэ ловнуманть эзия содаяк... А мезе ульнесь ловномс. Получинь грошт. Кода теевсь революциясь...

Укстась кувакасто. Чама санонзо кармасть сорномо. Лампасонть толось састыне пеець. Кармась секе вайгельсэнть ёвтнеме. Теке мерят аволь сон ёвтни, ёвтни толось.

— Монь ульнесть кавто цёран... Покшось урьвакстозель. А ней ськамон... Цёратне эсь олясо якасть... Якстере гвардияв. Кавонест ульнесть комунист. Войнасто састь... Парсте эринек... Народось вечкимизь. Весть истя тельня... Ужинамсто. Марясынек ластеть арцть. Ружия марто совасть кемешка эсинек велень сюпавонь цёрат... Сынь весе ульнекшнесть бандасо. Минек цёратне отряд марто сакшность сынст кунцемест... Те шкас эрясть вирьга. Цёратне эсть кенерь стямо... Бандитнэ лецть. Кода варштынь... Кавонест верь поцот... Вишка цёрась тарнось. Ансяк кенерсь пижакадомо: — а-ы-ы-х...

Кавто покш сельветь прасть штёканзо кувалт газетэнть ланкс. Прянзо чаравтозь басясь яла.

— Монь сюлмсимизь... Кавтотне урьвам панаронзо сезизь... ды... ды монь пинкстэ гадизь... Мейле кармасть муцямонзо... Керизь грудензэ... Кургозонзо керявксонть эцизь... Вейкесь пижакаць:

— Потяк эсь вереть эйсэ... Симдик остаткадо эсь прят тонсить ловсодо...

Урьвась яла эщо живель... Куркстонзо аксорясь верень кесак... Мейле ливтизь ушов. Монь прикладсо кармасть чавомо.

— Вант, — мери, — кода урьват пикс вельде райс нолдасынек. Седилка пикссэ повизь кирганзо... сельмензэ ланкс лиссть...

Ялгам састыне аварць. Атяськак сельведь поцо. Монь кирга парьсэнь пеельть лайсть. Буто колият нилинь. Атянть эйсэ эзинек кунсоло, валтнэ сынсь эцесть седеенек пачк. Атясь яла кортась:

— Мон ёжовтомо напустинь... А повняса месть мартон тейнесть, ансяк мария лецть кавксть, мейле прок пандо лепштимем ды подпилкасо човасть удимем эйсэ...

Сась тень ёжо. Прям, чамам саизе верень эй. Вересь эйкс кельмесь. Повняса, кискась велькссэнь урнось... Совинь кудов. Пиень вересь прок лаксо валынзе киякссо ластнэнь.

Валске марясть. Монь саимизь больницяв. Цёратнень ды урьванть калмизь музыка марто... Бандитнэнь муизь ды леднизь секе недлястонть.

Ней совет максы тень пенсия. Маны тесэнь комсомолец тонавтымем ловномо. Невтнинзе букватнень. Ней састыне яла ловнокшнан...

Сювордызе кеместэ газетэнть ды сельведень пачк кармась ловномо. Лампасонть толось нимилявкс липаесь.

Вемберть эзинь удо. Сельмсэнь тештекс липнесь вирь поцо кудонь толнэсь.