ВАСЕДЕМА

Август ковть васенце шиня Рыбкинань райкомть секретарец получандась телеграмма. Сонь эсонза ульсь азф: «Васьфтесть самолетть II, II». Эстакиге секретарьсь пачфтсь куля тянь колга Рыбкинань, Борковонь и Черемисонь колхозникненди (Черемиссь, Боркось ащихть Рыбкинать тифтень певанза тейнза петфтафста).

Народсь аф учемшка учсь самолетть сей лиеманц эса. Вага «Ленинонь киц» колхозникне омбоце шиня ранакиге паксясот. Синь содазь, што самолетсь сай кефкие частста, но кармасть сидеста варжакснема велеть ширде голубой менельти нинге рана, мзярда шись ульсь аф пяк вяре и сонь лученза кармосесть аньцек эста эждема. Сьормав, акша, определеннай формафтома туча пакшне саворста уйсть велеть пяльде, но мархтост самолетть стаки ашезь тушенда.

Кати-кие снавонь таргайхнень эзда менельти варжакстомда меле ичкозде-ичкозде приметась равжа точка, сяс кенярдезь азозе: «Сай! сай!..» Сембе мархтонза работайхне кадозь работаснон и оцю мяльса ванцть. Равжа точкась стаки сась, но аф шумондазь. Шарсь сон оцю круга велеть вельхксса и вишкста нолдась пря алу. Учихне эльбядсть: тя ульсь кавал, конац, улема, добычань няемда меле нолдась пря тинги саразонь курьхтть мельге.

Тяфта жа учсть эсь паксясост самолетть валгоманц «Борец» колхозникне, «Мокша» и «Путь Ленина» колхоснень колхозниксновок. Инжить эса учсть оттне, учсть сиретне оцю любопытства мархта.

Но ня вастса ломаттнень учемасна ульсь напраснай: синь ашезь сода, што сей лии самолетть руленц водендаец ули тостоконь летчик — земляк, Степан Иванович Филькинць, кона учида ладс содасы ков валгома, хоть и ашель шачема вастсонза ламос ни.

С. И. Филькин работай летчикокс-лейтенантокс II ошса. Сась тоста Мордовияв, шачема-касома вастозонза, Саранскяй аэроклубонь инь цебярь учлетонзон летнай школав вербовандамост. Саранскяйса ащемстонза кирдсь мяль лиемс родной велезонза, васьфтемс кельгома тидянц, своензон — раднянзон и ингольдень ялганзон. Сембонь мархта сон ламос ни ашезь няй, а сяс пяк скучендась тейст.

* * *

Сярдонь сюрокс тараткшни Мокша ляйсь Рыбкинать малава. Кизонь перьф, тундань пси шитнень эзда сявомок и сьоксеть вайме кожфонц маряманцты молемс, сонь беряконза эрь шиня вестевок ашельхть ломаньфтома. Вага тяниньге од вешник ала шуваргяльть лангоц пяшксе идта. Ламосна мадонтфтольхть пси шуварть лангс и пицефнезь теланяснон пиди шить каршеса, а конат комотнесть ведьти и уендсть фталу-фталу берякнень эзда, и эста синь шорсезь волнань тиезь ванома лаца ведь лангть спокойствиянц. Сяда меле ведьса крхкаста няеви менельске и эсонза ащи туцятневок шерьхксть. Берякти пачкодемок, волнатне йорясть пря тейнза нюрямса бесякоткшни идькс.

Тя пингоня иттнень пилес ичкозде-ичкозде кандовсь кати-мезень увнама. Васенда тянь лангс иттне ашесть шарфта мяль, а сяда меле, мзярда лятфтазь, што тячи йорай самс самолет, кенярдезь, фкя-фкянь йотазь, шуварть ланга комотнезь ласьксть крута берякть лангс и кармасть оржа сельмоняснон мархта вешема самолетть. И сяс, мес шить мархта аш кодаль няемс, синь путнезь кядьснон конязост, штоба тяфта перямс сельмоснон шить лучанзон эрьхтемаснон эзда.

Маторонь гулсь кармосесь сядонга марявома, и тя пингть Мокшеть омба беряконц ширде, сянгяре вирть вельхксста иттне приметазь самолетть.

Самолетсь стаки малаткшнесь. Вов сон ни, оцю нармонць, Рыбкинать вельксса, колма-ниле куд прянь серешка вастса, талой тязк вага, пацянзон эса няевихть кафта кядень яфиемат. Роман атя, конац аньцек кенерсь самс тингста, эрязста ульцяса пешкодоматненди тожа лиссь кудста и мзлгодозь мольсь ульця кучкаса пуромф бабатненди.

— Ну и нармонь, пилетнень сязенди! — мярьгсь сон и вадердазень аф оцю усанянзон бта танцтиста ярхцамда меле.

Самолетсь тись кафта крукт и тусь Рыбкинать вельхксста.

Сонь приметазь и паксяса работайхневок. Кажнайсь эсь инксонза йорась тердемс ваксозонза тя кельгома инжить, пяк старандазь алятне яфиесть картузса, а аватне руцяняса. Синь няезь, кода тянь каршес самолетста яфиесть кафта кятть, и самолетсь тусь фталу Черемисонь велеть шири и плавна нолдась сядонга алу. Аф ровнай вастть мархта ашезь няев сонь валгомац, но сембонди ульсь содаф, што сон тусь валгома.

* * *

Радостть ашель границацка, мзярда ламос аф няемда меле С. И. Филькинць васедсь родной ширть мархта. Сонь саманц колга кулясь вишке волнакс йотась велева. Конашкаль кенярдемась, мзярда азсть латта Елена Ивановнати сонь цьоранц саманц колга! Бабати бта шачсть пацят, и сон аф молезь, а лиезь лии самолетть ваксс. Тя пингть эсь прянц сон марязе йофсикс одкс, бта кати-коза йордавсь лангстонза сиредемась, кона сонь кичкоргофтозе, тись шамазонза срмот, кизоста-кизос пяярдезень пейнзон. Бабась йотнезень луганяв моли ломаттнень, конат тожа эрязста мольсть тоза. Сон, аньцек цьоранц Степан васьфтеманц колга кенярдемань мяльхненди сувафсь, афи стряндась, кода пачкодсь самолетть тейс, и ашкодозе сонь родной цьорац, цьорац, конань сон шачфтозе, конанц касфтозе аляфтома, нужань няезь.

— Степка!.. идьнязе... роднойнязе... тядянц сельме ведень тузь ня валонза тостядсь цьоранц седи ваксозонза и зрнафтозь сембе ронгонц, синь тиендезь сонь сядонга пяк мужественнайкс.

С. И. Филькинць ванкстсь перьф пяли. Шись приветлива мзлгодозь палась инжить эса. Кудрявай од вирьнясь, конань очаровательнай потмосонза йотась Степать идькс пингоц, старандазь, балвондай варманять эзда сюконясь тейнза и бта тердсь сяка васттненди.

Нилицке ширде эрязста стаки шудесть тя веле песа пачкалгокс ащи ровнай луганяти, коза валгсь самолетсь, ломанень потокне. Аватне, конат сьорматф панарса, конат нуласа, рузавакс наряжафста. Сайхнень вельхксса либердсть якстерь флакне. Содамок, што самолетса лиись Степась, кажнай родняц, содафоц и ялгац эряскодсь люпштамс седи ваксоня сонь кяденц, азондомс тейнза эсь эряфснон колга.

* * *

Самолетть ваксс пуромсь ни вете тьожяньшка ломань, но тяза нинге састь и састь маластонь велетнень эзда.

Митингть панжезе ВКП(б)-нь райкомть секретарец, РСФСР-нь Верховнай Советть депутатоц Гидаев ялгась. Сонь мельганза ушедсь корхтама сери, военнай формаса, шуваня и кувака шама аля. Тя ульсь аэроклубонь комиссарсь Чернечков ялгась. Оцю докладсонза корхтась Якстерь авиациять колга, Советскяй летчикнень героическяй подвигснон колга, корхтась, кода кармась сидеста тарксеме ваймонц войнась, кона моли ни Испанияса, Китайса и кона равжа тучакс учи тавадоманц сембе мирть вельксонц...

Корхтасть тяса лама. Но народсь крьвястьфоль пяк оцю желанияса кулхцондомс эсь земляконц. Вага сон средняй сереса, коренастай, горбон шалхка, бритваса нараф прясь, военнай формаса, трибунать лангса шаштсь сяда инголи и кармась корхтама. Сембе тяса ащихне внимательнайста кулхцондсть сонь восторженнайста корхтаманц. Кажнайсь старандась аф нолдамс Степань фкявок валонц. Сонь ламос моли корхтамац тейст афи марявсь кода йотась.

Тоса сявсь вал Филькинть тядяц, тя славнай цьорань шачфтысь-касфтысь, Елена бабанясь. Сон тяда инголе ащесь тожа цьоранц ваксса; оцю радостьса ашкотфсь, сон то ванкснесь цьоранц лангс, то сонь, тяни модать лангса тутмань кеподезь ащи нармоненц лангс.

Сонь потмонь оцю волненияц ашезь кирдев тейнза — кармасть сидеста путьняма сельме веденза. И сяс, мес сон тяфтама торжественнай вастса, пефтома мзяра ломанень инголе, вестевок ашезь савонда нинге корхтамс, валомне, бта кафта-колма ломаненди, шарфтомок мяленц цьоранцты азозе:

— Ну цьорай, кли ни арать летчикокс и лиендят аф кальдявста, вали лиендть нинге сяда цебярьста и тюрьхть вракнень каршес пощадафтома. Путыть вага мялезт тидяцень валонзон.

Тядянц ня валонза кеподезь цьоранц сембе чувстванзон. Сон взволнованнайста и станя, кода ба приказонь получандамда меле, мярьгсь:

— Тидяй, сембе эряфозень максса, кда эряви, Родиназень ареляманц инкса. Врагти аф удалай синдемс Социалистическяй крепостть. Минь, летчикне, Сталинскяй летчиктяма, и горя сянди, кие срхкафты тюрема минь мархтонок кожфса. Мон, кода тинь велеряенте и тя бабанять цьорацан, — сон няфтезе сурса вакссонза ащи тядянц, — вярозень лядыкс путьконц шудеманцты молемс карман тюрема социализмать ареляманц инкса. Мон старандан оправдандамс партиять и кельгома вожденьконь И. В. Сталинть монь лангозон максф доверияснон...

Митингсь, кона лемтьфоль Авиациять шинцты, аделавсь. С. И. Филькинць тага аноклась явома родной крайть мархта. Сон учсь тяни кудозост кучф фкя содаф ломанть. И сяс, мес сонь самац нинге ашезь няев, а С. И. Филькинти эрявсь эряскодомс, сон мярьгсь:

— Курок штоли кандыхть марьхть?

— Учт, цьораняй, ащек хуть аф ламняс тязк, — пшкядсь тейнза тядяц.

— Аш кода.

— Эрь, эрь.

Курок кудозост кучф ломанць сась.

— Ну, тядяй, эряк шумбраста. Тейнь тума.

— Кучсек ина сьорманят сиденяста, — азозе бабанясь и невольнайста тусть сонь тага сельмеведенза.

Тядянц, раднянзон, содафонзон мархта, родной велеть мархта прощандамда меле, летчик-лейтенантсь С. И. Филькин ялганц, комиссарть мархта тусть самолетти. Курок моторсь кармась увнама и самолетсь инголи вишкста ардсь модать ланга, а меле оцю нармонькс кеподсь вяри и лийсь ни кожфкава вяри куцезь. Ламос-ламос, мяк самолетть кяшемс, сембе модать лангса ащихне, конатнень йотксоль и Елена бабаняське, яфиезь кядьснон, прважамок смелай соколть — землякснон.

1938 к.