КАЗНА

Обедонь пингть колхознай правленияса лоткань работамда и тунь тинги. Сон ащи аф ичкозе правлениять эзда. Тингсовок тяляйхне лотксесть работамда и сраткшнесть ваймама, а тяда инголе кой-конат тушендсть Мокшу эшеляма. Ляткшнесь аньцек Егор Петрович, тингонь сторожсь, сияк азса, седи ваксонь кельгома сире ялгазе. Веселай сельмонза приметамазь монь. Сон мазиста мзолгодсь, бта идь, конанди нюрямсонза ляпе, лямбе, да и пекоцка топодьста.

Лаказь-лакась шись, конань аньцек коста-коста вельхнезь качамкс ащи уле туцятне и тиендсть йотамозост эшкс. Но сембе сяка ульсь опана ваймонь аф таргамшка. Сяс минь тинге лангста суваме рига потму. Озаме сонь мархтонза понжафтф капашка розь ворафть ваксс и кармаме калякондакшнема, кода сире ялгат, всякай тевонь колга. Мон, содамок, што сон содай лама сядингольдень баснят, кизефтине. Сон ашезь атказа монь кизефксозти и ушедсь:

— Эрясть-ащесть колма братт колмонест — сембе богатырьхть — фкя-фкянь эзда колма вайгяльбешка вастса. Инь оцю братсь эрясь Ошка пандса, омбоцесь Шувар пандса, а колмоцесь Копаз ляй пряса. Эряйхть и эряйхть, пингсь стаки шудесь ведькс. Сиредьсть барскяй вирьста тумокс. А золотадост сняра пуромсть, што аш коза и тиемска. Сявозь и калмазь синь модать потмос. Оцю братсна калмазень Ошка панду. Тон аф маляфтсак, тнярс тоса ульсь крез, и вот, крезть малас.

«Йотась лама кизот-тялот. Кармась тя казнась чудендама: то лиси золотонь боцькянякс пяле веста или обедонь кучкать, то лиси кукшиннякс, а то и золотой грива и пула мархта вашенякс.

Ламоксть лисендсь тя казнась и кенярьфнесь ломань седихть, но синь кядезост изь пов, мес ашесть машта сонь кундамонза. Конат-конат йоразь пяк вешемс, но коданга ашезь мув: то каршезост пильгонь-прянь синнезь арды тройка алаша, а копытаснон алда вяри ляцихть цяткт — тага шавонь кядть сави мрдамс, омбоцетнень каршес эвондай лии тол мар, колмоцетненди вов-вов ни таргамаль шувф варястост, кядьснонга ни венептьсазь, аф лац думондазевихть, цингордозь туйхть золоттне скрозть пачк. Нилецетнень каршес пови тага мезе-мезе. Стаки сон илядсь апак таргак!»

«Тя, брат, басня. Но тяфтаня ламотне сядинголе йоразь мумс эсь павазснон, мзярда улендсь кши сускомга аш, ды дацянгсонга крутясть...

Илятне павазонь вешендема шарондсть Сибирьге-куване, но мрдцесть тага шава кятть эсь шачем вастозост. А сембе сяка павазсна иляткшнесь апак мук!

Крьвязсь Октябрянь толсь. Машфтозень паукнень унжань котфснон мархта, конатненди, кода кару, тапарякшнесь минь браднеке, а меле потясь вяроньконь эса самай сиця бабань салайсь. Аньцек Октябрьда меле ломаттне музь эсь павазснон. Но аф сембе тячемс содазь, коса и кода мумс сонь».

— Мес станя? — ашень кирде и кизефтине, аф шарьхкодемок, кодама мяльхть кирди прясонза.

Егор Петровичсь аф ламда лоткась и пеедезевсь, сонць кармась пяльдемост акшаза усанзон эса и вадерямост шура сакалнянзон эса. Сон поладозе:

«Мяляфтсак, колхозу минь сувамя тьожянь вейкса сятт колмагемонь васенце кизоня, тунда пяли. Кармань работама. Весть савсь кати-кода васьфтемс Царюня попсь и корхтазевсь монь мархтон: «Мес тон, Егор Петров, аф якат аф обедняс, аф вечерняс?»

— Аш мзярда, — мярьгонь, «Аш мзярда! Работась, кода корхнихть, дуракть кельксы. Тон ванан-ванан прокс шкайть эзда атказакшнят. Тон мольхтякать весть обедняс, обедняда меле сувак сторошкав эряват пяк тон».

Омбоце недляшить молень церкаву. Обеднясь лиссь, и мон сувань сторошкав. Учень аф ламос — сувась Царюнясь и Козя Прохорсь. Шумбракшнесть-тисть мархтон и Прохорсь корхтазевсь: И мес шта тон, Егор Петрович, пяк старандат? А попсь: «Монга тяфта тейнза уш корхнень, прокс юкстазе вярдень шкайть. И кармай тонь рабацень инкса ваймоце страдандама тона шиса...?» «Грешникан, бачка». — «Да, видеце, Егор Петров, тон содак, што колхозсь... колхозсь сембе сяка срады, аньцек саза св. Петровть шиц».

И тяда меле мон лоткань работамда. Колхозсь лиссь сокама. Тя пингть, мзярда ушеткшнесь работань пингсь, мон сяван лафту прязон ульмот и Мокшу. Архт мумак, бригадир, кда сяват мархтот сисем борзай пинет! Ши-шишка мон пицеса тоса вярозень, а коста и веньберьфка рязондан берякса.

Тяфта мон йотафтыне кизонь кувака шитнень апак шарьхкодть. Весть савсь молемс вирьгя, и аньцек эста мон няине тюжя сьоксеть саманц.

Козя ульсь сьоксесь, но аф козяль тейнь: ломаттне мольсть утому сьоронь получандама алашаса, а мон сявине эсь тиф дроганязень алаша вастс, макссть вете путт розь — тя ульсь монь работафозе — и сембе. Тяса мон шарьхкодень, што работасть эстейст. Кяжне сась аф азомшка кода. Ожу, арьсян, няфтса правдась коса!

Тяка илять, кодак сюнергодсь ушесь, сявонь лафту прязон кайме, кядь пезон ведарка и тунь. Молян кигя, а сельме инголен мезевок нинге аф тифтетькшни. «Маряк удалай», — думондан эсь пачкан, лятфтамок баснять. Молень, молень, пачкодень Ошка панду. Труднай вастсь — ся аф оцю шуфта юрнятнень пачк йотамась. Стясть шяярьне, кармась сидеста тотнама седиезе — пелькс. Спасиба сери вирть тяста кярозь, сядонга пелькс улель. Но аш месть тиендемс, эряви жа молемс, а аф мрдамс шавонь кятть кда ни саф. И мон йотань. Кармань шувома ся вастть эса, косот золоттне — ся паршихне, конатнень таргамдост меле ни мон, Егор Петровичсь, аралень кода купец. «Тьфу, аф эряви жа думондамс сянь колга инголькиге, арьсян эсь пачкан. — Ингольдень думондафсь мзярдовок аф лиси».

Шувонь, шувонь ливесьпар потмоса, арань начка шееркс. Лоткань ваймама. Тага ушедонь. Шувонь сиземозон и кармань учсема варять вельхксса, кода катось шеерть, аньцек монь шалхкозе ашезь маря золотонь шине, кода катось шеерть шиненц. Учан пяле веть эса. А снярс хоть лангозон и арды пильгонь-прянь синнезь тройка алаша и копытаснон алда вяри ляцест толхтка — мон аф туян, а то мезевок аф лиси малад лангс.

Кармань кулхцондома, штоба кулемс веле пяльде атекшнень морамаснон, синь пяле вень азомаснон. Кармасть молема телаван эйхть: и пелькс и якшама сьоксень веня. Сельмонень инголи кармасть повондома всякай аф пара. Мон синь коньцайне пакарькс. Панчсайне — тага тифтедихть. Кеподелине вяри — начас вельхкскат лийкстай тол мар. «Сембе сяка, коньцемс аф эряви, — арьсян, — а то казнать лисеманцка аф няйсак».

Вдруг: «Ку-ку-рю-ку-у-у»!.. — пачкодьсь пилезон велеть пяльде. «Слав богу, — арьсян, — кивок аф эвфтсаман. Тяни аньцек иляды ваномс и ваномс шувф варяти». Рязонь, рязонь варять вельксса, а эздонза мезевок аф няеви, афи маряви. «Ва, — арьсян, — курок кодак пиндолгоды варяса, цап мадянень мархта. Аньцек, Егор Петрович, проворнайне сяда ульхть».

Шинь стяма ширеса кармась тиендевома шовдавань зарясь. Валом-валом сяда меле кармосесь улекстовома ушесь. Ва тяни ни тейнь савсь срхкамс добычафтома куду, кода охотниксь коста-коста вирева шарондомда меле сай аньцек ружьянц мархта, а мон лафту прясон каймозень, да кядь песон шава ведарказень мархта, — визькс эсь эздонга. И штоба кивок афолемань няй, мон куроконя эряскадонь перетнень алга.

Кодак пачкодень куду, лаподень карда пряста шужярьхнень лангс и матодовонь богатырскяй удомаса. Няян он. Онцтон ащан боком пянакланкса. А ве, аф удан. Вдруг кати-кие кармась сейхтема кенкшть эса. Сейхтьсь-сейхтьсь, кенкшсь читоргодсь и панжевсь келес. Сувась сон куду, кармась нолсемост кяпе пильгонень. «Ну, пезе!» — арьсян эсь пачкан. — «Ну-ка варжакстан фкя сельмоса, хуш ванца кие сась аделамон». Кодак варжакстонь, цють эзь сокоргод сельмозе валдть эзда. И мезе няян: парогть лангса ащи золотой вашеня, гривац пиндолды, пулонц яфиесы кафта пяли, маряк кенярдсь, мес мон стянь. Валдоптозе сон сембе кудть уженек-мезнек. Эводемда меле ашкодомань монь кенярдемась. Фатянь пянаклангста пенгя плаха, эстакиге комотень и кодак стаса вашенять коня ланга, и срадсь золотсь цингордозь кияксть келес. Афи содаса, коза тиемс тняра паршить — и повозон каян, и карманнонди, и элезьти, йорань нинге марамс, но сргозень. Маряса казфоне сярядихть, кядьневок и пильгоневок шулгфтыхть, прязе бта кшниса пинготьф.

Ва тяса сась ни прязон, што монь Царюнясь и козя Прохорсь васькафнемазь. Ляць мялезон синь Пятру шисна, визькс тянинге, брат.

Сяда меле ни мон кармань честнайста работама колхозса. Сьоксенда мон молень ни утому сьоронь получандама, няить, аф эсь тиф дроганяса, а колхозсь кильдсь кота алашат, кода васень ударникти, и флаг мархта ускозь работаф сьоронень каменнай утомозти».

Егор Петровичсь сявсь крупнай, штакс ащи, пакарькс коське рость васень курмоззонза. Синь пяярьсть меки ворафти эсь сталмоснон мархта.

— Ва коса казнась, — няфтезе сон ворафть, — коса путф марстонь трудсь, конань йоткса, кода розьнясь ворафса, ащи монь седи ваксонь трудозе! Ва мзярда и монга, кода и сембе колхозникне, муйне эсь павазозень. Тя аф басня, а действительность!

Тя пингть кармасть пуромкшнема тяляйхне. Тяляма машинась увназевсь, и тингса тага вишкомсь ударнай работась.

Март, 1937 к.