КРЕЗ

Росьне кенерсть. Сембе ломаттне, кода колхозникне, станя и единоличникне шинь-шинь паксясот. Эряскадыхть куроконе урядамс кенерьф роснень, конатнень гразясыне шукадемс вармась.

Колхозть паксяса шум. Тяса нуйхть жнейкаса и лобагрейкаса. Синь ушеткшнихть работама рана шовдава. Сянкса колхозникне сьоронь урядама пингть эряйхть паксянь станца.

Колхозть паксянц ваксса — единоличникнень умасна. Тяса, кода и инголе, нуйхть тарвазса.

Сась обедонь опана пингсь. Колхозть паксясонза лоткась жнейкань и лобагрейкань кальдердемась. Сембе колхозникне пуромсть паксянь стану ярхцама. Курок ашесть няев ни единоличникнень кепсемасновок.

* * *

Нумаса сембодонга эряскодсь Ларинонь Гаврясь. Пяк эряскодсь! Единоличникнень йоткста сонь нуманза аделавсть сембодонга инголи и ускфтозень сяда курок розень кресканзон единоличникть, Лешань Федять кядьста, Гаврянь раднянц Алежень ригав. Сонцень Гаврять алашанза ульсть сявфть, мес кулак. Мезенкса эряскодсь Гаврясь — содасазь аньцек сонь тядяц и кельгома авац Александрась.

* * *

— Слава богу, — мярьгсь Александрась мирденцты, мзярда нумаснон аделамда меле омбоце шиня, шовдава ащесть квартирасост и думондакшнесть всякай платт. — Нуманьке аделафт, розень крандасне пачфтевсть вастозост. Тяни синь куроконе тялямс и калмамс ювнек, эста синь аф колихть. А совету аф максома фкявок розьня, фкявок розь курмоське. Шкайсь ванца, минь тунда карматама порендеме акша копшаняда.

— Ух, чорт возьми, ушедсь кяжиста Гавряське, пеень порезь, оцю горбонь шалхконц пачк, — мон фкявок зернаня... — Лоткась тя валонц лангс и аф ламода меле йотась лия корхтамати: «Сембе паксясот? Кивок изь ляд?»

— Аф, — отвечась каршезонза авац, — илядсь Ванькась. Синць азорхне тусть ни.

— Тярязе сай — тялятама мзяровок тячи. Эряви эряскодомс, ату сайхть вракне...

Гаврилсь озафоль шрать ваксса прянц кафцке кядензон мархта кундафста. Зверень кяжсь ашезь тяльгонде сонь потмозонза. Сон марязе прянц люпштафста. Петнезь седиенц ся мяльхне, што сай пинге, мзярда сонга ласьтяй колхозникнень копорьс, кода ласьнесь аляц велень ашуфнень копорьс Советскяй властть саманцты молемс. «А сяпингть самс эряви терпиндамс», — корхнесь сон. Сонь кяжензон касфтозь сядонга пяк, мзярда шрать ваксста стямда меле варжакстсь вальмава и няйсь кафта этажса кирпичнай кудснон, коса тяни колхозонь правлениясь.

Сон ведьс ваяйть лаца вешсь лисемда тя положениянц эзда всякайкс.

Гявря сявсь узерь и лиссь пирьфи.

Мзярда сась сонь тядяц, Аннась, синь колмонест тусть тяляма Алежень ригав. Иляденди, мзярда сембе сашендсть паксяста, синь састь квартиразост — единоличникть Ефимонь Прошкать кудс.

Омбоце шиня ярхцамда меле синь тага тушендсть тинги тяляма. Кудса иляткшнесь Ванька цьоранясь. Тейнза савсь сувамс карду и няйсь тоста од крез. — «Кинди шта тиф? Бта кулывок песонок аш», — думондась эсь потмованза.

Тячиень шиське йотась. Сась ков валда весь.

Ковсь валдонц мархта палсезень сембе куттнень, саттнень, паксятнень. Илять ульцяса весялаль; марявсть одонь рахамат, стирень морамат, гармониянь вайгяль. Но кодак сась пяле весь, атекшне кукорясть, стирьхне и цьоратне моразь лядыкс мороснон, конанц морсесазь эрь веня куду тумстост: «Времась пара, — куду тумась весяла»... И тушендсть ульцяста кудга, эряскодсть удома, а ванды тага шиньберьф паксяса ударнайста розень урядама, пакся йорхнень мороснон кулендема.

Велесь сетьмось. Аньцек коста-коста колсезь тя сетьмоть пинень уваматне. Кода курок матодоват танцти удомаса сетьме-сетьме веня и ся йоткть Мокшеста вешникть аф оцю шумнянц нюряфнеманц эзда. Тя — бта нюрямонь валфтома мора. Сонь эздонза удось сембе велесь колхознай сторожда башка.

Но ашезь уда тя веть Ларинонь Гаврясь. Вага сон сявсь эстейнза ялга Фомать, конань колга велеса корхнесть: «Коза вармась, тоза и сон», и аноклазь тингса апак понжафтф росьнень кяскавс. Тусть синь калма лангс и кармасть тоса шувома калма «покойниконди». Лоткть шувомда меле Гаврясь ласьксь куду крезть инкса. Крезть кандозе, и кармасть каннемост ригаста розень кяскафнень лоткти. Максакатнень лаца синьге анокласть шувф варязост сьорот тялонди.

Тя пингть вельсоветса ульсь партийнай собрания. Сон таргавсь пяк ламос, пцтай варьхмодемати. Сонь аделамдонза меле коммунисттне лисендсть и тушендсть кудга. Вельсоветонь председательсь Семенов и вельсоветонь членць Маркин валгсть ульцять кувалмова, конанди тястоконь велэряйхне мярьгихть «Церькав панда», и самстост приметасть калма лангста кати-кодама пульхкома (калма лангсь ала, веле песа). — «Тя аф стак», — мярьгсь Семеновсь. Эстакиге синь тусть ласькозь калмотненди.

Гавря и Фомась пцтай аделакшнезь ни эсь работаснон. Вага Гавря стяфтозе ни крезтьке. Сонь прязонза сась мяль: «А ашемазь няй ли кивок?» Сон йорась кати-мезе азомс или кизефтемс ялганц кядьста, но ашезь кенерь: ся пингть, мзярда вельхтязь лоткть и ушеткшнесть марама калма мар, маласа ащесть кафта ломатть. «Кулыень» калмайхне тязк и шуфтомсть. «Имасть копшатне!» — тифтедсь ужяльди мяль Гаврянь пряс.

Государствать эзда сьоронь прдайхне ульсть кундафт. Шовдава тя сьорось ульсь тоста мараф. Ускомстонза путозь и Ларинонь Гаврять крезонц сьоротнень лангс, штоба ванолезь сембе ломаттне кулакть «покойниконц».

1935 к.