| Кафта розь паксят // сборник Эряфсь панжи; автор: Пинясов Я. М.; 1931, август. | Мордовская библиотека |
Книга: Я. Пинясов. Эряфсь панжи (стихт). — Саранск: Мокшэрзянь государст. издательствась, 1933. — с. 47—49 |
|
| << Лядемста << | >> Розень нумста >> |
|
Кели паксяса, Колхозонь розть ваксса Касы осал розь Тише потмоса. Люкай шужарьняц, Кода шяярьня — Аш сонь прясонза Цебярь видьменя. Ащи и ризнай, Олькси, — аварьди — Шава прянц эса Тов—тей комафни. Розьнясь ольксезня Азоронц пеняцяй: „Ватта монь эсон Кода сон муцяй...“ Колхозонь розь паксясь Ольксить кулезе, Пяле кяльняса Сонь кизефтозе: Мес тон, розь ялга, Ольксят—аварьдят, Сокай—видицень Ризназь пеняцят? „Кода аф аварьдян, Кода аф пеняцян, — Норак азса тейть Кода мон витьфан... Алдон моданясь Сокаф сокаса, Тоза йордафан Атянь коморса. Сянкса тишеса Ацаф юрозя. Толгакс леборьди Шава прянязя... А тон розь ялга, Кода сокафат, Аф монь кондяксон Модас йордафат. Тонь вастоняцень Соказь тракторса, Модас валядязь Тонь машинаса... Сянкса розь ялга, Юрця эчконя Люкай пряняце — Розьда пяшксеня. Сянкса аварьдян, Сянкса монь ризнан, Мон тейть азыня Коданя витьфан“... |
Август 1931 к |
| << Лядемста << | >> Розень нумста >> |
| Сборник Эряфсь панжи; автор: Пинясов Я. М.; 1933. | |