С.  ШЕБЯЕВ

Од мяльса

Петя тонафни школаса 4-це кизось. Тонафни пяк лац, азозя эсь прянц ударникокс, сёрматфць пионеркс и сёрматсть социалистическяй фкя-фкянь ётама договор кафта экземплярса коза пуць эсь инголенза пяшкодемс тяфтама пунктт: I. Васеньце семесторонь тонафнемань перьф аф нолдан фкавок урок и вестеньге аф позднаса школав сашендомать: 2) Школав сашендан ялан уряднайста, кядне и шамазе ялан улест штафт, панарозе и штананя ялан чистайхть. 3) Фкавок книга аф вадендян, лопансон мзярдонга аф мяньцайне. 4. Уроконень, конатнень макссесыне учителезе Андрей Степанович, сембонь куца лувсайне кафксть, а задачатнень сембонь решандасайнь эльбятьфксфтома. Мезе максы Андрей Степанович сёрмадомс, сёрмаца и аф тиян эльбятькста лама мзярдовок, тонафнесайне лацкас сембе морятнень, пандтнень, пролифнень, залифнень. Сембе миронь оцю ошнень, а сембодонга пяк СССР-нь и Мокш-эрьзянь автоном. Областень картать. 5) Карман школаса вятема общественнай работа — эрь стенной газетти сёрмадан аф фкя заметкада кржа, карман лездома 2-та васеньце группаса тонафниенди, конатненди мярьги васеньце группа учительсь. Нят шабанятнень тонафцайне лац лувома и сёрмадома. 6) Куца тонафца тядязень сёрмас-лувома и сёрмадома, 9) Атязень кудса карман вятема агитация, штоба тундань видемати сувафтомс сонь колхозу.

Петянь договоронц 5-це пунктонц сёрмадомста ляцть мялезонза сембе нят, конат ётасть эсь пряванза васеньце тонафнема кизонянза. Сон мольсь школав 7 кизоса афоль машта 10-ти лувомас теенза ульсь пяк стака. Лувомода башка Петенди ульсь пяк стака букватнень валс ладямасна. Например; Степановть сон лувозе — Сапонюкс, и стак тов. Вага сяс сон сявсь эсь лангозонза обязательства лездомс кафта I-це группань тонафни шабаньди, конатненди мярьги Лук’ян Гаврилыч.

Пете сёрматф договоронц лувозе партасонза ащи тонафни Володя ялганцты и терьдезя сонь соц. фкя фкянь ётама... Володе васенда киге бта эвоць, коста договорть кулцондозя педа-пес весяласта пшкяць Петенди, «Пете коста тон тянь смекайть, коста маряйть, што тиеньдыхть тяфтама фкя-фкянь ётама соц. договорхт“.

— То вдь содасак монь алезе колхозса председатель — корхтай Петя Володяти. Весть ащи кудса шраньконь ваксса, инголенза кагод лист: ванан сёрматф листь васеньце ширезонза. „Соц.-фкя-фкянь ётама договор“. Тянь няине мон июнь ковть 15-це шине. Алязе сёрмадозя договорть Перляень 5-леткать лемса кохозт мархта, кие сяда лац и сяда курок урядасы сёронзон и кие сяда курок пяшкоцы государствати сёронь максома планонц.

Алязе договорознза путць; што аф юмафтомс паксяти фкавок сёра пряне, а тиньгти — фкавок зёрнане. Роснень урядамаснон аделамс июнь ковть 27-це шинцты, а пинепнень август ковть 2-це шинцты. Государствати сёронь максомать аделамс сентябрь ковть 30-це шинсты. Вага коста Володя ялгай сявине тя договорть кепотьксонц, но мон сёрмадыне сонь аф сёронь урядамать колга, а лац тонафнемать. Вдь тяни мон маряйне ЦК-сь путозе, штоба школаса шабатне тонафнельхть лацкас, а то тонафнихть тонавнихть, а велети писарькс и колхозу счетоводкс кивок аф машты. Середняй школав весеньце ступеньста повида содамс коря пяк кржа. — А ся мезе ЦК‑ась? мон вдь содалине ЦК-сь — партиять Центральнай комитетоц.

Ну Володя тя договорть мархта мон тонь терьте соц. фкя-фкянь ётама. Кда сембе пунктонзон мархта согласиндат, то путк кядьцень.

— Кядьцень путомда меле фкя экземплярть макссаськ Андрей Степаноченди, а омбоцеть кацаськ эсь кядензонок и карматама эрь 15-це шиста проверендакшнемонза, кода моли договороньконь пяшкодемац. Мельганк ванома и лувома, кода пяшкоцаськ лангозонок сявф обязательстватнень кармай Андрей Степанович.

— Мон Пете сембе пунктонзон мархта согласиндакшнян, но монь вдь атезе колхозник, а сяс колхозу одукс сувафтомс аш кода! — Тон сяфть эсь лангозот обязательства, штоба тундань видемати сувафтомс колхозу Ванька Иванонь. — Вай виде, виде Пете, мон сянь тийса. Ну тяни согласиндан сембе пунктонзон мархта. Давай пуцаськ кяденьконь. Эря сей омбоца экземпляртке, тозонга пуцаськ кяденьконь. Согласен сембе пунктонзон мархта, и сёрмадсь В-о л о-д-я Кандратьев. Степанов Пете, — вага и договорхне анокт. Тячиень шине карматама фкя-фкянди лездома. — Вай Володя, ся числать ашеськ пута мзярда сёрмадоськ договорть. — Путк 1932-це кизоне сентябрь ковть 10 шистонза. Точка...

Пете договорть фкя экземпляронц максозе Андрей Степановичнди, а омбоцеть кадозя эстеенза. Андрей Степанович сявозя договорть, лувозя и кармась кафта пяли прянц веляфнема — „ Айда Пете, мезе сон думондась, вдь монь школасон тяфтама договорхт мзярдонга ашельхть... Коста смеказя. И ушедсь арьсекшнема Петень алянц колга. Вдь Петень аляц коммунист,... колхозонь председатель... бывало... тонафнесь совпартшколаса...“ и стак тов.

Омбоце шине II-це сентябрьста Лук’ян Гаврилович пуроптць школьнай советть и пуць повестка дня. Фкя-фкянь ётама договоронь тиемать колга. Омбоцесь разнайхть.

Повестка днять кемокстамода меле Лук’ян Гаврилович лувозя Степанов Петень договоронц, конань сон тиезя Кондратьв Володянь мархта, 1932-це кизоне сентябрь ковть 10-це шине.

Сембе школьнай совець и учительхне ульсть пяк кенянтьфть, што Степанов Пете 3-це гуппань учениксь тийсь школати пяк цебярь ушеткс, кона Сузьгярьгонь школаса мзярдовок ашель.

Школьнай совеца учительхне Петень договоронц лувомда меле кармасть фкя-фкянь терьдемс соц фкя-фкянь ётама и сёрмацть сяка жа школьнай советонь заседанияда меле — фкя-фкянь ётама соц-договорохт. Договоронь сёрмадомста Петень договороц ульсь кода кепотькс и ульсь пяк лад мялезост, што тя тевсь лиссь тонафнихнень эсь ётксост. А самбедонга лад ульсь мялезонза Л. Г-ти сяс, мес Пете сонь ученикоц. Сон эсь пачканза арьсекшнесь; вага Степановть эса толк ули...

Петень договороц кода примернай и нинге васеньцесь ульсь сёрматф школань стенгазетав тяфтама заголовка ала,

„Степанов Петень и Кондратьев Володень фкя-фкянь ётама соц. договорсна“.

Нилецекс группань ученица мархта — Василь ва Райкань ульсь тийф Петень и Володень портрецна кода Васеньце ударникнень.

Стенной газетась ульсь повфтаф стенати сентябрь ковть 17-це шине илять. Шовдава сентябрь ковть 18-це шине кие аф сай ся сияк лоткай стенной газетать малас и лувсы, кие машты, соц. договороть, а васеньце кизонь якайхне аньцек кулхцондыхть и дивандайхть кода Петеньди Володянь мархта смекавсь тя тевсь.

2-цекс, 3-цекс и 4-цекс группаса и I-це группаса учительхне азондозь Петень договоронц, значениянц и терьдезь тонафнихнень штоба синьге сёрмадольхть фкя-фкянь мархта соц. договорхт, а стане жа учительхне макссть вал, што ванды эрь учительсь сёрмады эсь группанц мархта соц. договор, штоба анокламс тонафнихнень стане кода мярьксь ЦК-ть путфксоц.

Сентябрь ковть 18-це шинцты сембе тонафнихне 2-це 3-це и 4-це группатне ульсть пяшксеста фятяфть соц. фкя-фкянь ётама договорса, а васеньце группань тонафнихне, аньцек валса ульсть фятяфт, а договорсна фкя-фкянь мархта ашельхть. Но тевса, сякокс соревновандасть.

Мзярда Сузьгярьгонь школась ульсь фатяф пяшксеста соц. фкя-фкянь ётама договор мархта, Сузьгярьгонь ученикне и педколлективсь терьдезь соц. фкя-фкянь ётама Петень, велень ученикнень и педколлективать.

Пете договоронц сёрмадомода меле кармась пяшкодемс сембе ня обязательстватнень, конатнень сон сявозень эсь лангозонза. Уроконзон, конатнень макссезень Л. Г-сь куду, 2-ксть эземс, лувондозень 3-ксть, задачанзон решандакшнезень сембонь, мезе максесь. Л. Г. сь сёрматкшнезень пяшксеста и эльбятьксфтома, школав яксесь эсь пингстонза и чистайста. Стане и работась Володеське и пцтай сембе ученикне. Сембе ванцть Пететь лангс кода васеньце соц. договоронь тяштить, кода пяшкоцыне сон эсь лангозонза сявф обязательстванзон.

Пете кармась лездома инь аф содай тонафни шабатненди, конатнень теенза няфтезень 1-це группань учительсь В. И-сь, стане жа кармась лездома Володяськя.

Пете сидеста кармась якама атянц пяли и сидеста корхнемс атянц мархта колхоснень колга. Сон лувонкшнесь атянцты „Мокшень-правдаста“ Средне-Волжскай — „Колхознай газетаста“ статьять, кода Волга ляйть кяржи ширестонза тунда лама колхоз видесть пинепть, тозерхт и лие сёрот вельф рана урдазти и нят уматьнень лангс пяк сёронь шачемать колга. Лувондозень крайкомть и крайисполкомть путфксонзон лов алу сокамать колга — сияк сёра урядамада меле и стак тов.

Атяц хоть бедняколь, но Петень лувоманзонды ашезь верондакшне и Петень каршес корхнесь: „Нят цёраняй сембе газетатне кяльготнихть, а вага улель газета лисендель Москуса „Беднота“ лемоц, вага так газеталь, най беднотать колга сёрмадоль, — а нят дряй козятнень колга сёрмадыхть!“

— Эх атяй, атяй! Ся станель „Бедноталь“ газетать лемоц, а теть арам кда ламоц беднота сяс и сёрмаць беднотать колга. Вдь, ся газетать нольнезе ЦК-ась.

— А мезе ся цякась?

— Аф цяка, а ЦК-а. Ся коммунистическай партиять кочкаф инь оцю органоц, конань кочксесазь сембе союзонь коммунистонь с’ездца.

— Мон Пете цёряй вага мезе тейть корхтан, кда пара улель колхозса, минь беднайхнень таза афолемязь терьне. Инголи баярхне коса пароль тоза бедняйхнень афолезь терне и афолезь нольне. Мон весть молень Рузаевкав и ёрань сувамс вокзалонь 1-й классти, а моньдине жандармсь нинге фкя ширьде: „ты куда мордвин прёшь. Вон отсюда“ — Вага и ваныне 1-й классть...

— Эх атяй-атяй... Ся вдь ульсь инголе, коста властць ащесь оцюазорть и помещикне мархта капиталисттнень кяца, а тяни власьць ащи рабочай классть и беднай сокай видихнень кяца. А кда власьць ащи рабочайхнень кяца и беднай сокай видихнень кяца, то тяста уж можна няемс тейтьке, што синь арайхть рабочайхнень и сокай видихнень пяли и тийхть эстеест цебярь эряф. Цебярь эряфть жа велеса можна тиемс аньцек колхоснень вельде; А колхоснень вельде цебярь эряфсь тиендеви няйсак вага кода. Колхозу примасазь васенда киге беднякнень и честнай середнякнень. Шовордасазь сембень марс, алашаснон и сембе сбруйснон. А конань ашель алашац сянь моданць стане жа сокасазь и вицазь и беднайсь мезевок аф панды, а работай соньцке колхозонь алашань ланкса. Вага тядде тунда минь колхозоньке 16-ва алашаса видесь и урядась 150 десятина мода. Но тя модать колхозникне урядазь аф государствать лезксфтома: райколхозсоюзсь макссь теест 3 жнейкат, 5 кярятт (плугт), 2 веелкат, тяляма машина и ст.тов, а питнеснон пандомат 10 кизода меле. А 10-нь кизода меле содасак кода колхозсь козякады! Во! Няфтезе Пете пяльхканц.

Тяфта Пете атянц мархта корхнесь сидеста. А Петень эрь тумда меле атянц пряс шапови Петень корхнеманзон эзда кода шапа. Скамонзовок думондакшни и ванонды, кода работайхть колхозса; — Пиже морсь месть корхни! Тусь алянц лаца колмунизмакс. Сявок шабакс тяфтамоль ялан воловочайхнень мархта корхнень (волочовайхне, нят революционнай рабочайхть и студентольхть, конатненди оцюазорть пингста аш кодаль эрямс ошса и фкя велеса 2—3 шида ламос. Стане синь судендафтольхть), и корхнель, штоба мон нольнелень волочовайхть удома. Коммуниза пиже морсь ули. А колхозникне виде лац работайхть, тевсна моли лац. Ватта кинь кинь кшиц афоль эря мзярдонга, тяни нят кши мархтот. Чигирев — кузнецсь ашезь работа паксяса 12—15 киза, а тядде нусь жнейкаса, нумань перьф, „сухойсь“ ётай пульхконц най странава, тяни работай паксяса, пуць кудне и сембе илядыхне работайхть илештень кядть...

Пингсь мольсь. Сузьгярьгонь колхозникне кунара киге урядазь ни сёроснон и урожайсна лиссь пяк цебярь. Розьда сявсть гаста 57 пуд. во кругу, чичивица 60 пуд. Государствати пандозь сембе лангозост путф заданияснон и нингя 5% пандсть сяда лама. Колхозникне явсть эрь трудшити 10 фунтт розь снав, 2 фунтт чичивица и фунтонь сура. Эрь алашати катцть 45 пуд фураженди пинем.

Сёронь явомда меле мольсь Пете атянц пяли и ламос азонкшнесь атянцты кодапт колхозть сатфксонза.

— Маряйть атяй, колхозникне мзяронь явсть сёрода? Маряйть мзяронь пуд, пинем кацть алашаснонды? А то корхнесть кулакне, „Мезе тии беднотась, синь вдь сокамовок аф маштыхть“. А тусть вага мезе, тя просто — чуда, кода мярьгондихть.

— Лад колхозникненди работамс, сявозь сембе цебярь модать вага и работайхть, шачсь сёросна. Максомс тейст „ Кев Эшине“ шамать (тяфта мярьгихть фкя сузг, пакся рашкти) эста вага катк шачель синь сёросна.

— Эх атя-атяй! Аграномтне корхтайхть „аш кальдяв мода, а улихть кальдяв сёра видихть“. Марсттонь вийса да нинге кда „Кев-Эшине шамать“ шарфтомс тракторса лов алу, и нинге почедемс наземняса ванолить „Кев—Эшине шамать“. Мезе эсдонза лисель?

„Пиже морсь вдь корхтай лац, эсь пачканза арьсекшни атяц, а мес „Кев-Эшине шамась“? виде кда почедомс няземняса ванолеть кодапт эсонза улельхть сёротне. А колхозникне виде тядде явсть ламонь сёрода...

Петень мархта тя корхтамода меле атянц повс бта кати мезе Пете каясь. Атяц ков аф моли арьси най колхоснень колга. Кода синь шовордазь марс алашаснон и сембе сбруйснон, кода кизонда лац работасть, мзяронь явсть сёрода и арьсекшнесь мезе тиихть колхозникне сай кизоть кда тядде синь тяшкава оцюфт сатфкссна. Да синь видесазь сембе паксять? Яровой культура алу сёксенда сокаф сембе модасна. А тунда видесазь синь ранакиге. Вага месть арьсекшнесь Петень атяц эсь потмованза кодак няйсы Петень, али кодамовок колхозниконь али колхознай калдазт: „Таки сёрматфтан колхозу“.

Сашенцть якшама тялонь шитне. Петень школаса тевоц мольсь пяк лац, договоронц сембе пунктонзон учебнай линиява пяшкотькшнезень мяк вельф, но общественнай работаса договоронц фкя пунктонц пяшкодемс нингя пцтай ёфсикс ашезь кярьмотькшне; — ся тедянц сёрмас тонафтоманц колга. Сёксенда тедянцты сёрмас тонафнемс — кода корхнесь Петенди тедяц — аш мзярдоль, яксесь работама колхозу, а сяда башка нингя колмоль шабанза. Пете пуць инголенза задача, што кармай тядянц сёрмас тонафтомонза декабрь ковть васеньце шистонза сявомок.

Стане и тийсь. Ноябрь ковть 27-це шине Пете сась школаста и азондозень тедянцты сентябрь ковонь 10-це шине эсь лангозонза сявф обязательстванзон и башка лоткась обязательствань „6“ пунктонц лангс, коса корхтай вага мезе, „ Куца тедязень тонафца лувома и сёрмадома“, вага тядей монь мархтон договорозень тя пунктоц апак пяшкотть, а тя пункть значенияць пяк оцю. В. И. Ленин и партиясь путозь, што Октябрьскай революциять 10-нь кизонц топодемс РСФСР-са, штоба афоль уль фкавок сёрмас аф содай. Сембе, штоба маштольхть сёрмас; лувома и сёрмадома. А тя путф вага мес, што сёрмас аф содайхнень мархта, кода корхнесь Ленин атязя социализма аф тиеви.

— А мезе ся цёряй социализмась?

— Социализмась, тя цебярь эряф, — вага мезе. Вага мес и мон сявонь, а тяфта жа сембе ялгане сявсть эсь лангозост обязательстват тонафтомс тедяснон сёрмас. Мон тядей теть ванды кандан школаста букварь, и кагод и карандаш и карман эсот сёрмас тонафнема. Согласиндат?

— Да мес мле, кда ся парть тиелийть, мон куломозон тейть цёрай спасибакшнелень. Алеце куца няйсак иляста аф эряй, да танга вага ошса тонафни, кие тейне сёрмады сёрмат. А тинь сёрмантень лувомат и каршезост ответт сёрмадома. Кда цёрай тонафтолемяйть улель пяк пара, вдь нинге тейне 35-це кизось, а мелезе эрямс 75-шка киза. Да весть нинге повондонь Москуву. Молень аляцень мельге, а номерхнень аф содасайне. Кодама стамс 8-ця №-сь и кодама 12-есь, а ня трамвайхнень эса тейнек ардома. Вага лоткань Рязанскай вакзалть инголи и арьсекшнан, кодама трамвайс тейнек озамс, а пингсь ни позна. Кодак няян трамвай и арьсян тя матри 8-сь, омбоцеть няйса и арьсян тя матри 12-сь. Цебярь ломатть мле азозь, 8-це номерть и озань. Валгонь коза ни эряви, тага аф содаса кона 12-це номерсь. Тага цебярь ломань вельде озань, оцю визкс, эста нинге тейне 29-це кизоль! Ну думондан кие сёрмас аф содай ся ошса юмась, хотя и велесовок аф пак пара. Валгонь 12-це № трамвайста аф муви кудть 8-сь, муйне кудть аф муви комнатать №-ц.. Ну и маендань! Муйне, алезенди азондыне сембе ся якамазень, а сон рахай! — Вага няйсак кода сёрмась аф содамась аф пара. А вдь ёрань тонафтемс, ашень тонафне. Вага кондястель.

— Ну, тяни тядяй монць тонафтте. Нинге ашезь поздав! Ярашты. Ну сёрмас апак содай тядяй кальдяв,

— Эх Пете! кодак тонадолень сёрмас лувийне монць книшкаста Ленинонь эряманц колга. Эсь сельмонене мархта. А то коста видеста, кие азонцы. А монць лувилине педа-пес, сембе Ленинонь эряманц.

— Декабрь ковть 1-це шине Пете канць школаста книшка, „кагод и карандаш:“ Вага тядей сембе анокт аньцек давай тонафнетяма. Да кода и школаса ожу сёрмадон мархтот аф оцю договорне. Пете сязсь тетрадьстонза фкя лопане и сёрмаць договор: „1932-це кизоне, декабрь ковть 1-це шистонза, мон Степанов Петр и тядезя Пелагея Ивановна Степанова сёрмадоськ тячиень шине договорть сянь колга, што мон карман тядезень П. И. Степановань сёрмас тонафтома эрь шине 2 частт, 1932 кизонь декабрь ковть 1-це шиста сявомок и молемок 1933-це кизонь васеньце майти тонафтомс лувома и сёрмадома. Мон П. И. Степанова карман эрь шине 2 частт тонафнема эсь Петезень мархта. Сяван лангозон обязательства, што 1932-це кизонь васеньце майти тонадан лувома и сёрмадома, а стане жа тонацайне арифметикать 100 молемс. „Тяфта Пара! Пара, пара цёряй“, — Путк кятцень тядей.

— Да мон — тяфта аф маштан нинге сёрмадома.

— Сёрматт колма касой крест.

Поле начфтозя курсконза химическай карандаш петь и тийсь колма касой крест а, Пете сёрмадозе эсь лемонц и фамилиянц. — Ну тяни анок...

1933 кизоня февраль ковть омбоце шине Петя тонафнемада меле ласьксь атянц пяли и кармась атянцты азондома мезе путць Мокшэрзянь областень Исполнительнай комитеть 4-це пленумоц 1933-це кизонь тундань видемать колга, конац ульсь 10—12-це январьста 1933-це кизоне. Марясак атяй! Тячи Лук’ян Гаврилович лувондозя тенек Мокшэрзянь облисполкомть 4-цекс пленумоц путфксони Караулов ялгать докладонц коряс. — А ся кие стамсь Караулов ялгась? Корхтай атяц Петенди. Ся Мокшэрзянь областьца модань управлениянь заведующайсь. Вага мезе Лук’ян азонць: Мон сембень сёрмадыне тетрадезон. — Ну азонк коммунизма... — „Лов алу сокаф 441 тежянь га... Облисполкомть пленумоц путнесы:

Кемокстамс 1933-це кизонди сембе секторга и башка районга видемань площадть 800 тёжянь гас, сяконь потмоса зерновой культуранди, 511845 га, эздост тозерда 2600 га, пинемда 274650 га, чичевицада — 40374 га, снавда — 35893 га, и техническайда 72000 га... Маряйть? Мзярда 1933-це кизоне Мокшэрзянь областсь види сёрода? — Ай-ай. Да тнярсь мзярда сокави? Нят соказге аф урядавихть. Да, коста Лук’ян нянь лувозень — Мокшэрзянь обкомть 4-це пленумонь путфкста

— А маряк нинге мезе луван: „Пачфтемс сембе зерновой культуратнень шачемаснон среднайста 8,5 центнерс 1—гаста, (розьть 9,5 центнерхт, пинемть 8,5 центнерхт, суроть 8-са центнерхт, озимой тозерт 7,5 цен. яровой тозерть 8 цент., снавть 7,8 цент., чичевицать 7 цент., модамарь шачеманц пачфтемс 100 центнерс 1 гаста). Маряйть мезе путць пленумсь!

— Маряйня, маряйня! Тя аньцек басне. Кода тяфта коммунизматне мяльсна шарфтомс сёроть. А!

— А вага кода, кулхцонтт:

Пете тага кармась атянцты лувома.., Тиемс ловонь кирьдема 35 тёжянь гектар лангс: сятнень эзда 32 колхозга и 3-ма тёжять га совхозга. Путомс, штоба эрь бригадась тиель ловонь кирьдема эсь участканц лангс...

— А мезнди цёрай пленумсь киртьфцы ловть. А?

— Пленумсь? штоба шачель сёрось, вага мезнди. Пете тага атянцты кармась лувома;

„...Вельф рана рдазти видемс 56 тёжянь га, сятнень эзда 50-нь тёжань га колхозга и 6 тёжянь га совхозга.

— А мезнди Пете цёрай пленумсь сёроть видефцы рдазти? Вдь рдазса юмай, аф вельхтяви, кочкасазь нармоттне и ст. тов. Вага ся ни пленумсь корхтай зря!

— Эх атяй, тяни агронопне мусть ни закон, што урдазти видеф сёрось ялан сяда цебярь. Сяс и пленумсь мярьги колхосненди и совхосненди видема сёроть урдазти. Мон школаста лувондонь плакат коза сёрматф вельф рана видемать колга вага мезе: Пете кармась лувома тетрадьстонза „Вельф рана урдазти видемань агро — правилатнень“.

1. Вельф рана урдазти пяк цебярьхть видема тяфтама культуратне: тозерсь, кона пяк калгода сортць, пинемсь, лама кизонь тишетне, горчицась, канфсь и лие культуратне.

2. Вельф рана видемас эряви кочкамс стама вастт, конатне лиятнень ваксста тунда инголи штадыхть ловть алда и конатне нормальнай видема пингста, пцтай ялан эряйхть коськт.

3. Вельф рана видемс эрявихть тяфтама модатне конатненди мярьгихть тёждяне модат (супесчанайхне, тёждяне черноземсь, каштановай модатне), паксятне конатне ащихть уклонцна обед мархта шинь мадома шири и штоба паксятнень лангсна улельхть ровнайхть:

4. Вельф рана видемась ётафневи лов алу лац сокаф модас, конань лангоц ащи бта валнань-валнань и валнатнень серьсна сембень фкат (валнакс ащихть борозда прятне) и модась улеза аф пяк сор тиши):

5. Колосовой сёроть вельф рана можна видемс 3 приемса: а) эйндаф модати, мзярда сон нингя солась най лангоне 3—5 сантиметрань серса, а алула модась нинге эи; б) видеста урдазти, мзярда сокама слойсь марнек солай: в) 3—5 шида нормальнай видемада инголе, лиякс мярьгомс, эста мзярда борозда петне кармайхть суфтома (1932-це кизоне пцтай сембе вастова вельф рана урдазти видемась ётась 3-це 2-це периоттнень коряс).

6. Вельф рана видемась ётафневи кяца видема способть коряс (кяца видемать и аэропланца видемать коряс).

— Вага ни цёраняй аэропланца видемать кодонга аф верондан. Да, кода стане корхтайхть лии аэроплан мяк пизем пеельхнень тона бокува, а види сёра модати, да тя тага мезе ули.

Тя корхтамань шовор сувась атять овоц Митрош и стане жа лападезнь бокозонза кядензон и дивандондай.

— Васкафнят Пете. Аэроплантне лиендихть аньцек войнаса, а сёрот аф видндихть. Мон Москуса няень „Ходынскай“ площадьть вельфке лиендихть, а видеме ашень маре и ашень няй!

— Да тон коста марят и няят кли вестеньге аф кодамовок газет, аф кодамовок журнал мзярдонга аф лувондат. А вага мон няень картинка фкя „Наука и техника“ журналста коса азф, што Средняй Азияса аэропланца видихть рис. Тон атезень мархта радиотинге ашеть верондакшне, а мзярда путцть эсь велезонок, тон тяфта жа ламос ашеть верондакшне и корхнеть: „тя грамофон корхтай, а аф радиоть вельде маряви Москусь.“ Пете сонцьке ладнякс аф содасы кода видсихть аэропланца и лиякс Митроженди отведтонь максома ашезь машта, но Митроженди тя ответське ульсь пяк кеме, сон вдь виде ашезь верондакшне ламос радиоти.

— Ну панде Пете луфтка тага мезе сёрматф, тетрадезт вельф рана видемать колга пшкяць Митрош Петенди Петень ответта меле.

— Ну кулхцондода лувса 7-це пунктть „Вельф рана видемста видеме норматне эрявихть касфтомс обычнай пингонь видема норматнень коряс 10 - 15%, конат путфт рана сеелкаса видемати

8. Видьмотне кода правила эрявихть вельхтямс (заделать) эста мзярда кенери почвась, лиякс мярьгомс эста мзярда лов алу сокаф боразда прятне кармайхть сувфтома. Видьмотнень заделкасна тиендеви обыкновеннай „Зиг-заг“ инзамаса, 2 слеца. Аф эряви тиемс стане, штоба модать лангс улельхть апак кяшть видьмот.

9. Аф эрявихть видьмотне кяшендемс урдазста. Видьмотне эрявихть кяшемс 2—3 шида модать кенермода инголе.

10. Ня модатнень эзга тядона пяк ульсть кевакотфт, то тяфтама васттнень эзга видьметнень эрявихть вельхнемс диссковай инзамаса, или культиваторса, конань мельге эряви нолдамс тёждя инзама фкя слеца.

11. Ня случайхнень пингста мзярда видьмотнень кяшендемда меле модать лангс арай пейс (корка), ся пейсть эряви сязеньдемс тёждяняста инзазь, пейть васеньце аральда меле сияк жа“.

— Вагот атяй и Митрош эзнай, агроправилатне, конатнень эрявихть содамс тяниень пингть сембе колхозникненди и башка эряйхненди. А няфтома тяни кальдяв? Вага атяй кда „Кев-Эшине прять“ тяфта видемс, то эста можналь тоста сявомс 9—10 центнерхт розь. А мезе тяни кли июльста сокасазь паринаснон, а яровойснон иляста мянь июньцта и учихть цебярь сёронь шачема?

— Виде, вага ся виде цёрай! Мон няйса, што исполкомсь и коммунизматне кярьмоцть тазаста сёронь шачемать касфтоманцты и няйса касфцазь, кли школаса тонафнихне содасазь, кода сёрось видема. Давай Мит-рош сёрматфттама колхозу. А? Вдь куронясонок кржа иляць аф колхозникта. Ванат минь сувамдонок меле тага кивок сувай. Да кда теест тяфта азондомс сембень мезе тейнек азонкшни Пете синь сембе сувальхть, кой-конат может мондедонга инголе. Ну Митрош мезе арьсекшнят? А!

— Сёрматфтт, а мон мельгат... тон чай сяда оцюват.

— Ну Пете сёрмат заявление...

Пете сязьсь тетрадстонза кагод лист и ушець заявлениянь сёрмадома. А атять мяленза кати куванят. Арьсекшни эсь пачканза, што сон кармай колхозсса лац работама, тии тоза сядонга цебярь порядка, арай конюхокс и анцыне и кармай алашатнень мельге пяконя якама... Колхозсь видесыне уманзон вельф рана и сай кизоть шачи сёра... Сокасазь колхозса „Кев-Эшине прятьке“ и тозонга кармай шачема сёрось и ст. тов и ювадевсь... Да минь колхозсса карматама „Мотеть Васяц“ эряма стане, што кодамовок козе але стане инголи ашезь эря.

Пете сянь аделазя заявлениянь сёрмадоманц и кармась атянцты лувомонза.

„Од ки“ колхозонь правленияти:

Сузгярьге велень

Конст. Дмитриечень Степанов эзда.

ЗАЯВЛЕНИЕ.

Тя заявлениять мархта эняльдян колхозонь правленияти, штоба монь прималемясть колхозу членкс. Умане озимонь алу сембе видефт. Алашазень, сбруйнек, нурдозень и крандазонь шовордасайне марс. Колхозонь уставть мархта знакомаян.

Степанов

13/II-33 кизоне.

— Ну путт атя кядьцень. Атяц сявозя Петень кяцта карандашть нолазя пенц и заявлениять алу сёрмадсь П. Т. Степанов.

— Малость кальдявста путовсь кядезе, ну да пара. Эряскадонь.

— А тон Митрош мезе ванат, али мяльце илядомс эздон.

— Да мон нинге батькай нарван...

— Мезе нарват Мотеть Васяц. Давай нява сёрматфт!

— Мон сёрматфтолень да стирьце аф мярьги!

— Эх тон!.. цебярь тевс д аф мярьги, а скамонза мезе сон тии? Нетошта аф мярьги, а кенерьди, чай няезень кода ётай кизоть работасть колхозникне!

— Ну мезе ули, да ся Пшкяць Митрош — сёрматт Пете мондинге! Пете сязсь тетрадстонза тага фкя листке и сёрмаць сяка заявлениянц коре Митрожендинге, аньцек путозя Степановть эземс Митрожень сонцень фамилиянц и лемонц.

— „Куроконе Митрофанонь эзда“. А мзярда Пете тяштезя Митрош путозя кяденц — Ну тяни атяй, эзнай! Мон тинь поздравляю! Ареда правленияв и максость счетоводтти. Пете Атяць и Митрош тусть правленияв кенерьфста заявлениянь кандома. Сувасть правленияв, а правленияса кругом картинат, Ленин, Сталин, Молотов и лият, а якстерь ужеса ащи плакат, эсонза колма вельф рана рдазти види алят. Васенкие Петянь атяц думандакшнесь Ленин, Сталинонь и Молотовонь колга, кода рабочаень и сёра видиень вождень колга, а сяда меле сияк жа кармась арьсема вельф рана видемать колга... сёронь шачемать касфтоманц колга... Ляц мялезонза Мокшэрзянь Облисполкомать 4-цекс пленумонц путфксоц Караулов ялгать докладонц колга.

— Ну атяй Макск штоли корхтай Пете — кинди максома? — Макск наява Мишанди, (счетоводть лемоц) — Нака церай... заявление кандонь... шовордамясть моньге ломань ёткс... Пете сёрмаць заявления... колхозу сувамать колга... — Миша... соньтейнгя сёрмадсь! — Ну и пяк цебяр, пшкяць Миша. Ванды моледа изба-читальняв илять собранияс, тоса колхознай правлениясь и общай собраниясь ванцыне примамс тине или аф. — Вага нинге эсь пачканза думондей аф приматядязь... Да аш мезенкса аф примамс...

А Пете атянц заявлениянц максомда меле кодак лиссь колхознай правленияста афи марязя кода ласьксь куду. — Ну, тядяй! Мон пяшкодине договорозень сембе пунктонзон. Атязевок тячи макссь заявление колхозу!