ВИАРД

Хоть меки мрдак

I

Эряйхть шобда мокшень велеса Иван мархта Иванорясь. Ярхцайхть, симихть удыхть, стяйхть и таге меки мадыхть... Лия мезевок аш мяльсостка. Эряйхть сятявняста, киньдигя аш валнясна. Пуромксс мзярдонга аф якайхть, мезевок аф содайхть и афи ёрайхть содамдонга.

Синь кивок аф содасыне и аф эрявихть пяк содамска. Азса аньцек, што сисем шабасна: ниле стирьсна и колма цёрасна. Оцю цёраснон лемоц Васька, а мярьгихть теенза Воргяй Вася. Сон комсомолец, аф озонды.

Сась очижинь карша комсомолонь ячейкась путозя; „морафтома куца тиемс доклад тундань видемати анокламать колга“... Коза и тусь Васькась. А Иван (Васькать аляц) тусь заутрьняв, шкайти озондома. Но ётама пачк лоткась морафтома кутть ваксс и кенькшть фтала аф ламос кулхцонць, мезе корхтайхть комсомолонь пуромксса. Ся пингть комсомолонь ячейкать секретарец корхтась, кода и мес штамат видьмотне формалинца, мес видьмотне эрявихть сортировандамс, мес эряви рана сокамс парена паксясь, мес эряви сокамс лов-алу, кода организовандамс колхост, артельхт и кодама синь эздост пользась. Мекпяли мярьксь, што совецкай правительствась путозя касфтомс тядде сёронь шачемать.

Ивантть мяльс нят корхтаматне ашесть ту и тусь церькав пяли мотордозь: „хвормалин, хвормалин, аф парс матольхцень!.. Коста б‘ди мусть тага кати-мезень колхост, артельхть. Тячи Христозсь живолгодсь, синь ёрайхть шкайфтема сёронь шачфтомать кеподема...

Аф максондяряй шкайсь пизем, хвормалинонтень мархта тингя юматада аратада!...“

Заутерьняста Иван ашезь сашенда куду обеднять лисемс. Ётась обеднясь. Иван сась куду. Авац кизофтезя:

— А коза ётафтыть мархтот сявеньтьф алхнень?

— А мзяра сявоньдень? — кяжьдонза пшкяць Иван — Аньцек кота алнят!.. Попть палайня, — кафта максонь, дьяконтть мархта христосендань — алне максонь, псаломщекть мархта христосендань, фкя путонь пайгоняти. Иляць фкя. Киньди максса?.. Думандань эсь пачкан, ванан, пефчайхне фкя-фкянь мархта христосендайхть, ды монга сувань ёткозост. И... апак талакатт паламань монашка...

Иванорять мялезонза мекпяльдень валхне ашесть ту, мес мирьдец палась монашка и ушоць сюдома. Но Иван лятфтазя, што тячи оцю празнек и Иванорясь пелезевсь „шкаень“ кяжьде, лоткась сюдомда.

Ётась очужись, ётась така лама „оцю“ празникта, а Иван станяк якай церькаву озондома и аш мяльсонзонга ароптомс и штамс видьмонзон.

II

Сась видема пинксь. Беднайхне сембе штазь видьмоснон формалинца. А Иван „шкайти“ озонды ломань, сонь апак штаконга „шачи“ сёроц и фкявок содука аф ули.

Комсь бедняконь хозяйства тусть поселкас и пуропцть колхоз. Теест пандомда макссть сортовой видьмот, машинат, и синь сембода инголи лиссть паксяв сокама.

Ушоцть сура видема. Срхкась Иванга. А Васькась сура видемань карша сась поздна пуромксста. Ашезь кенере матодовомс, аляц стяфнесыни:

— Стяк корсомол! Аря суроня видетяма.

Кармасть срхкама паксяв. Иванорясь самай ушць Панжозя пянякуд трубанц, пянакуд инголи пуць пенгяне. Сувась Иван пирьфста куду. Васенда озась шрать ваксс, а тоса стясь, арасть аванц мархта „шкайть“ инголи и кафксть-кафксть комасть мастору — эняльгацть „шкайти“.

— А путоть алнят сура видиеньди? — Кизефтезя тумстонза Иван аванц.

— Путонь путонь — весяланяста отвецясь Иванорясь.

Иванонь ули сонцень содама-шиц: суронь видемста обязательна эрявихть сявомс сараз алхт, конат видьмя мархта ёрямат умать ланкс и азомс аньцек ниле валхт: „Тяшкат-улест-сура-прятне“.

Пачкоцть умать ланкс. Валхнезь, мезя эряви, крандазста и путозь крандаз алу. Иван арась шинь стяма пяли, валхтозе прястонза вазенц и ушоць озондома. Сяда меля путозень сараз алхнень видема кептерезонза и кармась ёрямост сура видьмя мархта умать ланкс, а ёряма пачк азозень содама ниле валонзон, конатнень пяк лац кулезень.

Иван пачкоць умать пес и серьгяць Васькати:

— Тон тят уда! Ваныть алхнень, каба равжа варсихне афолезь сала, эста хоть меки мрдак!

А Васькась, аньцек аляц тусь аф ичкизи ума петь эзда, комачазя прянц сиблекть потмос и матодовсь межанять ваксс. Удомста няи сон он: б‘та сяви урьвякс мази стирь, и корхтай стирьти: „вестенге аф пиксте!“

А умать омба пестонза Иванонь сашендомозонза и Васькать ононц няеньдемс равжа варсийхне фкявок ал ашесть кад! Иляткшнесь фкя ал, д‘аньцек кармась Иван нежедма умать пес, равжа варсись эвоць и мархтонза сявозя иляды алтьке.

Кяжьясь Иван, сяшкава кяжьясь, нльне ракакс якстергоць и аф содасы, мезе тиемс. Ёразя Васькать пряс щафтомс видема кептерть и сяшкава шавомс, штоба оду сонь удомацка афоль сашенда! Но аньцек нежець крандазть малас. Васькась сргозсь и стясь. Иванонь кяженза састь тага сядонга пяк, мес ашезь сафт Васькась пиксомс удомань пачк. Кяжьдонза сельксь колмоксть модать ланкс и аф эсь вайгельхть кизефтезя Васькать:

— Косот алхне?

— А мон мезьснон содан, — отвецясь Васькась сельмонь нарнема пачк.

— Кода станя аф содасайть, юмаф-араф ломань? Лазса пряцень польцяса!.. Месеньдема тяни?.. Хоть меки мрдак. Эх!.. Сюдуфан, сюдуфан! Стадонга шкайсь тонь корсамолец шицень кувалма кяжьясь лангознок и вов колмоце кизосьни, кода лоткась шачемда сурозя, эх сюдуфан! Кафта алашане урацть, врьгасне учанень повсезь, д‘аф цебярь онозень коряс — каба афолемя крьвязь тага!.. Пец, пец тейнь сась! А тяни ёфсикс шкайсь сонць няфтезя, што хоть меки мрдак, хоть тят и виде! Улеза пизем киза, шачеза сурось, сякокс шкайсь кяц сонь аф максы. Туян куду!

Кильдезя колма пилькса алашенц и тусь. Аньцек пачкоцть кить ланкс, ваныхть коста бди каршезост арды агрономсь. Пачкоць ваксозост, шумбракшнесь Иванть мархта и кизефтезя:

— Мес тяфта рана туят куду?

Иван цють аф авардезь, азондозя горянц и агрономть ингольде врьгяць Васькать лангс, но тоса визделгоць и ашезя тока. Агрономсь васенда рахазевсь, тоса сюцезя Ивантть и мярьксь:

— Ня алхне — сембе попонь васькафнемат. А умась эряви видемс, лацкас сокамс, цебярьняста инзамс, штоба афольхть иляд покольхть. Шачи тише — эряви времастонза кочкомс. Тяддень кизось ули пизем киза и сурось шачи. Кулхцондомак, архт видек умацень! Вдь, кда кацак умацень апак видек, визькс ули ломаньде!

Хоть аф седи вакска, но агрономть Иван кульцондозя. Васькать кучезя куду, штоба тяза шорься, а сонць мрдась видемя.

Кармась Иван уманц аделама, а эсь потмованза моторды:

— Н-ну, аньцек тяза шача сурось и юмаза трудозе, начка курга агрономть, лазса прянцка!

Аделазе уманц, кильдезя алашанц и тусь куду.

Кивок мезевок аф содай, кода ульсь тевсь. Содасазь аньцек алят-цёрат кафонест и кафцке учихть сёксеть эса, бта кати-мезя.

Лама Иван няенць кизонь перьф онда, кода равжа варсихне салазь сура прятнень и лия аф цебярь отт. Лама ононь содай кизефнесь, мезень кальдявс няеньди тафтама аф цебярь отт. Сембе ононь содайхне корхтасть аф фкакс, а фкя ононь содайсь влхтай мярьксь: „атянь-авань шинь карша сялондоть урьвяцень мархта, сянкса и родительхневок кяжьясть лангозт, сянкса и няендят тяфтама аф цебярь отт“. Но фкявок ононь содай ашезь мярьгя: „тяддень кизоть аф шачи суроця“. А Иванонь сяколь пеконь сярядемацка.

Сась кочкома пинксь. Сембе лиссть суронь кочкома. Тусь идензон мархта Иванга.

Нежець уманц малас и эсь сельмонзонды аф веродай, што умась соньцень и ланксонза суроське сонне. Алашацка лоткась сонць умать ланкс, но сон сякокс аф верондай. Уманц ланкс тяшттьке бта соньць тяштезя видемда меля, а верондама кодонга аф сявсы!

„Юкстайня моньцке умать и алашазевок дураськаць, — ломань ума ланкс лоткась! — думандай эсь потмованза Иван — хоть меки мрдак! Сурось аф монне“...

Васькась ламос ванць алянц ланкс и мекпяли мярьксь:

— Месть шарондат умать ланга, месть тапсесак суроть? Умась минне! Мяляфцак, вов тя межать ланкста равжа варсихне салазь алхнень? — и няфтезя алянцты ся межать, конань ланкста варсихне салазь алхнень и коза матодовкшнесь сонць.

Аньцек эста Иван шарьхкоць и кенярьдезь юваць:

— Эх, господи! Тишевок ланксонза аш, вов кода! Тяни кда шкайсь максольхце кяц!

Васькась не валхнень ланкс кяжьясь, ляць мялезонза агрономсь, а сяда пяк ляць мялезонза ся, кода аляц ёразя сонь пиксомда и мярьксь:

— Аф „шкайсь“ касфтозя и аф сон макссы кяц. Кда аф агрономсь, тон тулеть ба куду, и тяса афоль ульба сукска! И учендолеть куломозт. Мзярда максоль тейть „шкайсь“ тяфтама сура!

Кенерсь сурось цебярь сурось, но нинге аф стама цебярь, кодама цебярьхть суронза велестост лисьф колхозть, конатнень эса аш фкявок содука, Иванонь суросонза лама содукада.

Кемоста озасть Иванонь пряс цёранц и агрономть валонза, вестькя аф макссихть покой.

Сась сёксесь. Иван, коста аш тефт куца, кармась якама колхозс ванондома, кода тяса вяцазь тевснон, кода эряйхть. Тяла пяли сёрматфць эсь лемозонза газетат, журналхт и кармась виде мяльса морафнемя. А тялонда сидеста ушоць якама агрономти и кати месть мархтонза тошксемя...

Тунда пяли Иван кармась корхнемя беднай ломатнень мархта, штоба молельхть колхозу.

Сась великай постсь. Фкя недяльшине видеста Ивантть пяли арць агрономсь и кочкафць бедняконь пуромкс. Пуромксса агрономсь лувсь доклад коллективнай хозяйствать цебярь шинц колга и тундань видемати анокламать колга.

Беднякне фкя вайгяльса лийфцть путфкс: „Организовандамс колхос, а Иван Прокофичть — председателекс“!..

Сась тундась и Иван колхозник мархта лиссь видема!