49

Бугровть пяльде Поргов сась шоподема ёткова. Звонясть тейнза райкомста и азозь, што иляденьберьф учи эсонза «Возрождения» колхозста Чуйкин. Поргов нльне кенярдсь тя куляти, пяк мялецоль васедемс Чуйкинть мархта, ёрась хоть мезе кулемс Анфисать колга.

Анфисать мархта васедемда меле недяляньберьф Поргов изь мушенда эстейнза васта. Коза изь моль, мезе изь тиенде, шинек-венек инголенза ащесь ся картинась, кона лиссь Анфисать квартираса. Эстоньбере бта сенем качам керсь сельмонзон, содазе, што районть келес корхтафтыхть эсонза. Кафцьке аватне тейнза ужяльхтельхть, фкя лаца пичефтезень пичефксснон.

Райкомса Порговть васьфтезе Чуйкин, но аньцек кенерсть сувамс кабинету, мельгаст сувась Анфисась. Палсь сонь шамац: кати пельсь, кати виздсь Порговть эзда. Сон аньцек весть кеподезень Порговть лангс сельмонзон, щекапрянза валовсть сельмоведьса.

Полафтсь Порговське: кой-мзярс юмась сонь кялец, ашезе сода, кодама валса васьфтемс ингольдень рьванц. Инголенза ащесь сяка жа Анфисась, конань мархта кемонь кизода инголе явсь фронтса. Бта мезевок и изь полафта шамастонза, станяк жа пиндолдсть серай, круглай сельмонза, мярьгат аньцек тяни валхтозе прястонза солдатскяй пилотканц.

— Серьгеевна! — эстокиге уркстозе Асять Чуйкин. — А мезе мархтот корхтаме? Юкстайть, што ли? Кирдить сельмоветтнень.

Поргов стясь вастстонза, сёлгозень вальмянь занавескатнень, а тоса нежедсь Анфисанди и маластонь ломанькс вадердазень фталу Анфисать шяярензон.

— Анфиса, мон содаса... — мезе-бди ёрась азомс Поргов, но сонь перязе Чуйкин.

— Минь саме тев мельге, Борис Константинович...

Поргов саворне ётась и озась эсь вастозонза:

— Корхтада, кулхцонттядязь.

Анфисась сумкастонза таргась телеграмма и путозе шрать лангс, Порговть инголи. Поргов лувозе сонь весть, омбоцеда, но мезевок изь шарьхкоде. Тоса тяштьф: «Учтама эсот, уск партийнай характеристика». Поргов кизефтезь варжакстсь Анфисать лангс.

— Ёрай кадомонк, — зоотехникть вастс пшкядсь Чуйкин, — аспирантурав туй тонафнема.

Порговть седиста бта пялькс лунгодсь, марязе, кода кармась шавома седиец.

— Тага ворьгоди эздон?! — апак арьсек пшкядсь Поргов.

— А мес тага? — пшкядсь Анфисась. — Мон тонь эздот козонга ашень ворьготькшне, Поргов ялгась...

Поргов шарьхкодсь, што аф тяфтама валхт эрявольхть азомс Анфисати. Тя аф ни ся Анфисась, кона ульсь мархтонза войнаса. Тя Анфисась ичкозе ащи сонь эздонза. И аф сонь тевс указовамс тейнза, мезе и кода тиемс. Но Поргов сякокс кяжиель, обжафоль.

— Козонга, Мельтиадова ялгась, аф туят!

Анфиса нервнайста пеедезевсь:

— Васендакиге, Борис Константинович, монь фамилиязе аф Мельтиадова, а Волкова. А обмоцесь, мезенди мон тейть эряван? Нолдамак, Борис Константинович...

Поргов арьсезевсь, нолдань нярьхть мярьгсь:

— Аф тейне эряват, а колхозти...

Дежурнайсь кандсь телеграмма. Поргов эрязста лувозе телеграммать, и кодак дежурнайсь сёлгозе эсь мельганза кенкшть, сон няфтсь телеграммать лангс:

— Обкомста самозон кивок козонга аф туй!

— Тя афкукс корхтат или аньцек сельмот шарфнят?

— Афкукс! Афкукс! Нинге весть афкукс! — нервничендась Поргов.

— Боря, тон тят кяжия, но мон тейть азса, — тяни тонафтыень вайгяльса корхтась Анфисась‚ — тон аф прясот арьсят тянь колга, а седисот...

— Тя тевсь монь, — ашезе када Поргов сонь корхтама. — А тон козонга аф туят.

Анфиса стясь, ётась кабинетть кувалмова и мзярда кярьмодсь кенкш килети, мярьгсь:

— А тонафнема мон туян! Монь примамазь ни. Нинге Москуста тумстон корхтафоль тевсь. Лучи арьсек тейне, штоба удалаза кизе.

Анфисась ащесь шуфтомфста. Марнек полафтсь сонь шамац. Марязе, кода жиланзон эзга шудесь кельме версь, бта молаткаса эрьхнесть пря боконзонды. Лама киза прясонза кирнезе сон Порговть. Мзярда стакаль тейнза, сон лятьфнезе сонь лемонц, ликанц, и аромкшнесь седиец горять эзда. И вдь рьвакс омбоцеда тушендсь аньцек сяс, штоба юкстамс Порговть, аф лятьфнемс сонь лемонц, юкстамс ликанц и вайгяленц.

И вдруг апак учт, апак няйхть эвондась Поргов. Но радостть вастс Анфисать вельхксс кеподсь равжа туця, вельхтявсь эздонза шинять валдоц и лямбоц.

Может, аф сяшкава маряволь Анфисати горясь, кда улель сон ськамонза. А тяни шинек-венек лемнесы алянц ёмла Борянясь, кизефнесы, коса сон, мес мархтост аф обедакшни, коса сон утци, мес аф сашенды куду. «Тяни Поргов тейне чужой, — арьсесь эсь потмованза. — Юкстамс! Куроконе юкстамс сонь!» Эсь потмованза прощандась мархтонза и ласькозь лиссь кабинетста.

Поргов мезе-бди пшкядсь мельганза, но Анфиса ашезе куле.

Аньцек мзярда валгсь райкомонь крылецть лангста, сон шарьхкодсь, што эряскодомс тяни тейнза аш коза: Поргов мзярдонга тейнза аф мрдай!

* * *

Кочуринть приемнайса Поргов арьсесь, кода азондсы обкомонь секретарти семьянь историянц, кда кизефтьсазь. «А, пади, афи сянкса тердемань!» — петнезе эсь мяленц. Ламос пичедемс изь сав: приемнай лиссь сонць Кочурин и сявозе мархтонза кабинету. Секретарсь весялаль. Озафтозе Порговть каршезонза и кармась азондома, кода сон якась Москуву, мезе корхтасть мархтонза партиянь Цекаса, кодама платт аноклавихть тоса велень хозяйствать кеподеманцты.

— Ну и тейнтьке усконь кенярдема, — мзолгодсь Кочурин, — электростанциянтень строямац кемокстаф, ярмакт, материалхт-калмоча получатада, лиякс мярьгомс, тевсь ладявсь!

Порговсь кенярдсь, што Кочурин ушедозе крхтаманц аф сонь семьянь историянц эзда, и сонцьке мзолгодсь:

— Зобовоньке тяни вяри комоти! Сон эсь шачема шинц лаца учи тя станциять строяманц.

— А тон, деряй, аф радовандат?

Поргов отвечась аф сразу: васенда изь сменда азомс эсь мяленц. Тоса виденцясь:

— А мон, видеста азомс, афолень карма строяма тяфтама станция.

— А мес? — дивандазевсь Кочурин.

— Тейне-арам, ярмякнень карьхцясайнек, а тевсь... Конешна, или кемокстаф, ушедсаськ...

— Срок макссть кафта кизот, — поладозе Кочурин.

— Аф срокть эса тевсь, Фёдор Михайлович...

— А мезьса ина? — ашезе када сон Порговть корхтама.

— Кафкса колхост сувасть пайс. Ку, кадк станциясь максы колма сядот киловатт. А мезе тя? Кода корхнихть, сараз аф рястави тя энергиять мархта.

— Тя уж тон зря, Борис Константинович, зря тяфта корхтат! — нльне кяжиясь Кочурин. — Мезе тии аньцек ся, кда валдоптсаськ электричестваса колхозникть кудонц? Тя вдь коммунизмать сельмоц панжи велеряйть кудса!

Кочурин сонць агрономоль и аф пяк парста содазе станциянь строяма тевть. Сяс Порговть мархта кемоста споряма изь карма. Сон кода-бди обжавсь: обкомонь секретарсь старандай, а райкомонь секретарть аф мялезонза сонь старандамац. Кизефтезе Порговть:

— Борис Константинович, тон азк эсь мяльцень сяда шарьхкодевиста.

— Ну, кода нинге сяда шарьхкодевиста? — Поргов кядьгопорьса шовазе ранендаф щёканц. — Минь районцонк ули колхозонь председатель, Сараевась. Содасасть? Сон путсь меленцязост кептерьшка динаманя, и панжевсь «коммунизмань сельмось» колхозникнень кудса.

— А тейнть эрявихть сразу электрическяй тракторхт? Ёратада электричестваса пидемс-панемс пярякат? Тя пяк ни! Тон ошень аршинца эряфть тяк унксне.

Поргов шарьхкодсь, што сонь корхнеманза Кочуринть мяльс ашесть ту, но сякокс эсь мяленц азозе видеста:

— Мон, Фёдор Михайлович, ёрань мярьгомс: аф венептьсы ли ётамбачк тейнек кяденц Волгань токсь?

— Ах, вона тон мезе арьсят! — рахазевсь Кочурин. — Пелян, пейнте канцькстайхть, Борис Константинович. Волгань токсь аноклави аф саразонь ряснемс, сонь эсонза учихть сяда оцю тефт, ялганяй. Так тон аньцек тянкса аф ёрат строямс Мокшеть лангс станция? — И штоба лоткафтомс тянь колга спорямаснон, азозе: — Молят куду, куроконе ваность бюроса и райисполкомонь заседанияса станциянь строямать колга кизефксть. Эрявихть анокламс ломатть... Мон тердихтень аф тянкса, — меколи ёфси лия вайгяльса ушедсь Кочурин, — хотя и тянксонга эряволеть тердемс, но ули нинге фкя тев. — Кочурин аф ламос мезе-бди арьсесь, сюволясь инголенза путф каготнень эса и кармась корхтама лия, сяда ляпе вайгяльса: — Борис Константинович, мон тердихтень...

«Ушеткшни»‚ — кфчядсь Порговть пряса, и трнатозевсь ронгоц.

— Недляшка ни ётась, кода Шиндина, тонь рьвяце, макссесь тяза заявления: анай пря тонафнема высшай партийнай школав. Сон тянь колга тяда инголенга корхнесь, но тяни сельмоведь мархта эняльди. Обкомонь бюрось согласиндась эняльксонц мархта, ёратама кучемс. Кода тон ванат?

Порговть коськсь курга потмоц, васенда изь мушенда, мезе азомс. Меле шалкхкалонза мторгодсь:

— Мон мезевок аф содан, — трнатозевсть трванза, — тейне изь корхне... изь срхксе....

Кой-мзярс сетьмось кабинетсь. Кочурин няезе, кода тарсть Порговть ранендаф щёкастонза саттне, марнек акшемсь шамац. Кочурин лиссь моркшенц ваксста, озась Порговть мархта ряцок.

— Тон, Борис Константинович, тонць шарьхкодьсак, мес тяфта тись обкомсь. И Шиндинатьке аш кода судендамс. Хоть и мон лац аф содаса сембе историянтень, но... тейнза стака...

— Да-а‚ историясь стака‚ — куфкстсь Поргов.

— Пади, тячи стака азондомс, кадсаськ сяльденди? — Кочурин няезе, конашкава муцяфста марясы прянц Поргов.

— Да, пожалуй, оду азондса, — нинге сяда стакаста куфкстсь Поргов.

— Ну и пара! — весяласта азозе Кочурин. — Минь нинге васеттяма. Но тон тят нервниченда.

Поргов тусь обкомста, кода корхнихть, тапафста. Инголенза арсесть кизефкст, кизефкст: «А местема тейнза тумс эздон? Ну, Анфисась кадк туй, и сон аф эряви кирнемска. А тя, глупайнясь, мезьда эводсь? Сембе содасазь, што аф сон, аф мон тя тевса аф шумуфтама. Мес сон тяшкава пря шави? Аф, аф туй Варюшась монь эздон козонга! Лестяса!» — и прибавазе машинать газонц.

Куду пачкодсь пялеветь малас. Варвара Степановна ашезь уда: учендсь эсонза.

— Ну, кода? — нинге кенкш лангса кизефтезе мирденц; сон содазе, што обкомса обязательна корхтасть сонь туманц колга.

— Хе, ворьгодема срхкать! — обжафста азозе Поргов. — Мон мезевок аф содан, а тон обкомса тефт тиендят?

— Кода арьсесть монь тумазень колга? — тага кизефтезе Варвара Степановна. — Обкомса мезе азсть?

— Варюша, мес педеть тонафнемати? — Поргов кярьмодсь рьванц кргас, палазе. — Тон содасак, што Анфисась туй... А тон ков?

— Монга туян, Борис. Аф нолдасамазь тонафнема, туян ков няихть сельмоне, — Шиндинась комафтозе прянц. — Тейне тяса аш эряф!

— Пяляскодоть тон, Варюша, што ли?

— Пяляскодомать ашень пяляскода, Борис, а тумс эряви. Тон тят кяжия лангозон, тянь тиса тонь инксот. Туян и тейть сяда тёждя кармай улема. Тяк юксни, тонь ули цёраце! Минь тутама кафцьке, а тинь кафонень ляттада... Шабать седиец эряви петфтамс эстейть... — Варвара Степановнати сяда лама мезевок изь азов: кяшезень сельмонзон.

Поргов ламос корхнесь рьванц мархта, но рьвац или авардсь или куфкснеманьбачк корхнесь:

— Туян, туян!

Шиндинать и Волковать нолдамаснон колга Поргов путозе кизефксть райкомонь бюроса. И тясонга бта анокс сембе аноклафтольхть: сембе корхтасть‚ штоба кафцьконь нолдамс.

Сяка илядня Порговти сувась Анфисась прощандама. Азсть фкя-фкянди тифтень-кафтонь вал, и аделавсь сембе корхтамасна. Ёфси ни кенкш лангса Волковась мярьгсь:

— Шабать аф сатнихть кафта учебниконза...

Поргов мезевок изь отвеча, нльне ашезь стрянда, кода сёлгозе мельганза Анфисась кенкшть.

Нинге сяда стакаста марязе прянц Поргов илять эсь кудсонза. Варвара Степановнань аноклафтольхть чемоданонза. Маласонза аварди тядяц. Порговти бта кафтова явовсь белай светсь. Мезе мярьгомс? Кодама валхт нинге эрявихть азомс рьванцты, штоба сон путольхцень чемоданонзон эсь вастозост? Нежедсь малазонза и цють кулевиста пшкядсь:

— Варюша, арьсек ладняс!..

Варвара Степановна кеподезень аварькшнеф сельмонзон:

— А тейне, чаят, тёждя тумс эздот? Но тяфта эряви, Борис, лиякс аш кода тиемс. Миньфтемонк тонга эшендят и ладняс арьсесак, кода сяда тов сави тейть эрямс и кинь мархта, — урякодсь оцю вайгяльхть и пштедезе прянц Порговть пси мяштезонза.

— Пяле вень маласа вальмалу сась машина. Варвара Степановнать янгась седиец, кармась указовама:

— Борис, пожалуйста, тят яка рдазу воротник мархта панарса. Муськопнень марсить сяка корзинкати, тядязе кармай сявондемост и муськондемост. Сон кармай якама пялот, аньцек тяк урксне. Сон вдь мондедон пяк кельктянза. Керогазсь лияста крьвязькшни, ватт мельганза, пожар тят тие. Тялонди рамак эстейть тёплайхть, лямбе белья, кргацень ашкоряк шарфса, тон вдь как цють, так и козат, ванфтк пряцень, Борис.

Поргов кулхцондсь и кой-мзярс юкснезе, што тячи туй эздонза рьвац. Тейнза-арам, синь срхкасть марса колхозу или вири, и Варюшась, кода фалу, тонафты эсонза, кода ванфтомс пряц то тянь, то тонань эзда.

Автомашинань фаратнень валдснон эзда пиндолдсть телефоннай столбатне, кить трвава касы кусторкснень вельфке лиендсть виндряфт. Поргов ванць кить кувалмос и мес-бди пароль мялезонза. Но тя ульсь аф ламос: пачкодсть станцияти, и нежедсь поездсь. Мекольцеда Поргов палазе рьванц, и начксть щёканза авань сельмоветтнень эзда.

Мзярда сёлговсь Шиндинать мельге вагононь кенкшсь, Поргов ськамонза лядсь шава и шобда перронть лангс. Сидеста, сидеста пиксось сонь седиец, и коса-бди аф ичкозе вагононь шарыхнень калтыемаснон ёткса пайгонякс циннясь цёрошкянь вайгяль: «Аляй! Аляй! Тяни минь лядоме кафонек! Аляй!»... Порговть трнатозевсь телац и варжакстсь поездть мельге. Васенда няевсь, кода кончазе мекольдень вагонць якстерь сельмонц, бта сонга прощандась Порговть мархта, а тоса сявок кяшевсь шобдать потмос. Стака, стака... Порговти-арам, тя минутаня шамсь сембе светсь, фкявок живой ломань изь ляда масторть лангс. Сонь токазь лафтути:

— Прважайть и саты, аде куду, Борис Константинович!

Поргов варжакстсь и кенярдсь: вакссонза ащихть Степашкин и Бугров Алексей.

1955—1961 к.