28

Ся веня райкомста срадсть варьхмодема ёткова. Варвара Степановна куду молемста арьсесь, мезе лиссь бюроса. Сембода пяк сон дивандась Степашкинть кеме и виде обуцянц лангс. Вдь аньцек тона кизоня сась ёфси од цёранякс, эрь тевса кулхцондсь Варламовть эса. А тяни вона кода полафтсь, кемокстась.

Ужяль арась тейнза Варламов. Сразу коданга изь са прязонза, мезенкса кармасть споряма. Кие шумусь? Варвара Степановнать сембе кяжец тяни прась Салмовть лангс: тя сон сембе тевть ушедозе Леховть колга... Мес сон фалу эци эсь кяленц мархта? Степашкинть видец: колмоце рабочайть тяряфни пачкондамс Салмов. А мес кирдьсы ширенц Варламов? Тя тейнза изь шарьхкодев.

Варвара Степановнань ёфси вакссонза увазевсь пине. Тяни бта сргозсь и аф азомшка эводсь, кармась молема эрязста, эрязста. И вов уле валдонять пачка сон няи каршезонза сай ломань. Васенда мес-бди трнатозевсь сембе телац, а мзярда содазе, што каршезонза сайсь — Поргов, сон шабакс кенярдсь, и тусть сельмоведенза. Тяни ули сонь васьфтиец-прважаец...

— Коста, роднойняй, эвондать? Коза юмсеть? — кенярдембачк Варвара Степановна ашкодсь Порговть перьф и палазе.

Ня кафта ломаттне тяни эряйхть фкя мяльса, фкя ёньца. Мзярда аф васедихть хоть фкя-кафта ши, тейст-арам, ётай целай киза. Сяс и Порговське шабакс кенярдсь и виде ваймот азондозе, мес тона илять ашезь сав куду, мезе исяк шить тиендсь Карга велеса. Меколи мярьгсь:

— А ётай илять, Варюша, тон кенереть тумс райкому, а мон васетькшнень Митричть мархта.

— Митричть? — дивандазевсь Варвара Степановна.

— Да, Митричть. Якань пялонза. Кодак сувань кудозонза, рьвац эстокиге аварьгодсь, кармась анама мирденц инкса прощения. Митричсь сонцьке цють аф пильгозон сюконясь.

— А тон кизефтелить, мезенкса?

— Кизефнине, синь мезевок аф корхтайхть. Азозе, што ванды сай мастерскои и сембонь пингста кармай анама прощения, а мон стаки ашень шарьхкодь, мезенкса.

— Кадк, мезе сон аф азы, а тон сявк работама. Вдь Митричсь аф аньцек цебярь работник, но и ломанцьке цебярь. Сон цють ли аф шачсь мастерскойса.

Корхнеманьбачк афи приметазь, кода пачкодсть Шиндинать кудонц каршес.

— Борис, аде пялонк суватама.

Поргов тапарясь:

— А кода, Варюша, суватама? Мезе азы тядяце?

Шиндина куликска изь ти, кундазе сонь кядьта и сявозе мархтонза.

— Аде, тят пель, роднойняй, тядязе содатанза.

Шинь стяма вастсь крьвязсь пожаркс. Поргов лоткась кенкш лангс:

— Варюша, давай ванцаськ, кода стяй шись, а? Вдь корхнихть, што светть лангса сембода цебярсь шить стямац. Весть кода-бди тонцьке срхксеть...

— Аде пялонк, меле листяма садозонк и тоса васьфтьсаськ шить лисеманц. Аде, а то тяста курок паньцамазь постуфне.

Кафцьке марязь пряснон однякс-однякс: пеетькшнесть, палсесть, якасть кядень кундазь, ёразь лувомс тяшттнень.

Да и шиське ашезь эряскода лисемс вирть фталда, сонга бта изь ёра визделгофтомс кельгихнень, конатнень нльне кельгомска аф сатни пингсна.

— Аде куду, Борис, аде, — эряскофтсь Варвара Степановна. — Ломатть няйсамазь...

— А минь мезевок ашеме сала. Кадк сембе няйсамазь, кадк содасамазь, — Поргов люпштазе мяштезонза Варвара Степановнань прянц. Кафцьке павазуфтольхть.

Тёсса шавф колма вальмаса кудсь Порговти няевсь псьмаронь куднякс. Сон потмосонза кунара ни крнянякс кеворькшни Пелагея Афанасьевна — Варвара Степановнать тядяц: учендсь стиренц эса. Сон аф весть ни варжакснесь вальмава, аф весть ни путнезе пиленц кенкш нярняти, штоба кулемс, мезень колга корхнихть стиренц мархта инженерсь. Тядянь седить мезьсонга аф кардасак! А сяс, кодак сувасть стиренц мархта Поргов, панжезе потмонц.

— Кати кие кошярдязь ульцяса тнярс нюрьгондема? Суваледе куду и ащеледе, кие шоряй, што ли?

— Аньцек тяни аделавсь заседанияньке, — аралась пря Варвара Степановна.

Пелагея Афанасьевна потмова пеедезевсь: «Васькафнят, стирняй, мон няедязь, мзярда саде», — и эрязста крьвястезень пянакуду мараф пенганзон.

Курокста моркшть лангс эвондасть рюмкат и ярхцамбяль. Порговть мяльсь пяк тусь тяфтама васьфтемась. Пелагея Афанасьевнать седи ваксстонь валонза солафтозь сонь потмонц, бта сувась эсь кудозост‚ якай мельганза эсь тядяц. Варвара Степановна керсь пачк свежай куяр, салыяфтозе, шовазень пяльксонзон и фкя пяльксть максозе Порговти.

Пелагея Афанасьевна кеподезе эсь рюмканц. Поргов няезе сонь добрай сельмованфонц.

— Ну, — пеедезевсь Пелагея Афанасьевна, — мезенкса сиптяма?

Варвара Степановна визделгодсь. А Поргов стясь, чёкадезе рюмканц и мярьгсь:

— Шумбрашинкса, Пелагея Афанасьевна!

— Аньцек шумбрашинкса? — тошказь кизефтезе Варвара Степановна и нолдазе няренц.

— И кельгоманкса! — поладозе Поргов. — Сиптяма кельгоманкса!

Ваймама лиссть саду.

Нильгемоньшка марлюфне, перяфть кафцьке ширьганза сидеста касы вишняксне кяшезь эсь ёткозост Шиндинать мархта Порговть.

— Кда тон содалить, Варюша, конашкава кувакаста таргавсь тейне ётай весь, — пшкядсь Поргов.

Шиндина путозе прянц Порговть мяштезонза, и тусть кенярдемань сельмоведенза. Яфодсь шобдавань кельме кожфкя, эсь ётковаст тошказевсть марлю лопатне, бта синьге кенярдсть алост ащи ломаттнень инкса. Марлюфнень прява кувакаста таргавсть шить сюролданза. Кельгихне юкстазь шить стяманц.

Поргов палазень Шиндинать начка сельмонзон:

— Тяни мон аф эряван тоньфтемот, Варюша. Кулить? Аф эряван.

Сяда вишкста либорьгодсть марлю лопатне. Кельгихнень шамазост праф фкя кельме лопась нльне эвфтезе Порговть, и сон аерфтозе Варать шамаста щеканц.

Варась саворне рахазевсь:

— Лопать эзда эводеть, а нинге танкистат!

Боризське рахась, но «танкист» валсь бта пидезе сонь седиенц. Вдруг арась инголенза Анфисась и бта ванць лангозонза, сельмонза сенепт, оцюфт. Поргов абонфста шовазе шаманц, бта ёрась сргоземс, но сякокс ванцть лангозонза Анфисань сельмонза, аньцек тяни пялес коньфста, ордатфста. Поргов стясь вастстонза.

— Тон мес? — эводсь Шиндина и ёфси маласа кулезе тядянц вайгяленц:

— Вара, ламос тяда аще, кельмотяда, — и марявсь Пелагея Афанасьевнань кажелфоц, тусь меки куду.

Шиндинань озась седиец: «Борис няезе тядязень, визделгодсь».

Шись ванць ни куттнень вельф, лямбоц марявсь нльне марлю лопатнень пачка. Садса сяда весяласта чильнязевсть, лиендсть нармоттне фкя марлють пряста омбоцети, апак лотксек мезе-бди вешендсть.

Эмтеэсонь мастерскойть ширеста кайгозевсь радиось: дикторсь мольфтсь шобдавань зарядка. Поргов ащесь люмбафста.

Шиндина стясь вастстонза, нежедсь Порговти и кизефтезе:

— Месть, Боря, тон? Мезе-мезе лядьсь мялезот?

Поргов ашезе сода, мезе отвечамс. Сон ванць Варать сельмос, пельсь: ся сембонь шарьхкодезе.

— Тя мон стак, улема, удомазе сась.

Варась путозень сонь лафту лангозонза кядензон.

— Мезе-бди сёпат эздон, аф ёрат панжемс потмоцень. Маряк, мезе-мезе лядьсь мялезт? Азк видеста!

Порговсь изь кирде и педа-пес азондозе Анфисать колга.

— Кельголить сонь?

— Да‚ — комафтозе прянц. — Кельголине.

Варать кольсь мялец, бта юмаец юмась.

— Может, мон зря эцян тейть? Мес инголькиге ашить аза?

— Тя ульсь кунара ни, и тонь честцень кивок аф токасы. Эста кельгонь, и ётась; а тяни келькте тонь, аньцек тонь.

Кафцьке меки весялгодсть, гулянякс кулдордсть эсь ётковаст.

* * *

Вов мезе Поргов азондсь садса Варати:

Войнань колмоце кизоня, сёксенда, военкоматса наразь Порговть кудрянзон, а недляда меле сон ульсь ни танковай училищаса. Курсантонь шитне-ветне Порговти таргавсть кувакаста-кувкаста, коданга изь учев ся шись, мзярда получай танка и туй бойс.

Сась тундась, коськсть китне. Порговть ялганзон мархта марса ускозь фронту. Мзярда арафтозь стройс аф оцю вирнянь ваксс, мархтост корхнесь танковай корпусонь командирсь — генерал-майорсь. Ётась стройть кувалмова, лоткась Порговть каршес, ванозе пильгста пряс и кизефтезе:

— Аф пелят бойс молемацень?

— Ялганень мархта аф пелян, — Поргов сонцьке ашезе сода, мес тяфта отвечась.

— А кда ськамот токадят, эста кода? — пеедезевсь генералсь.

— Эста ни аш мзярда пелендемс, эряви араламс пря.

Генералсь нинге весть пеедезевсь Порговть шабань вайгяленц лангс и сяда лама мезевок изь корхта. Озафтозь связной танкас.

Стакат ульсть шитне-ветне. Врагть нинге оржатольхть пейнза, хоть и казьфонза синьфтольхть ни. Савсь шинек-венек, апак лотксек панемс противникть мельге, фашисттне пейса сускондсть эрь вирь порати, ляй берякти.

Ся пингть радисткакс штабса работась од стирня, Мельтиадова Анфиса. Сон аделась кемонь класст, и ялгань келес тусть добровольна армияв радисткакс. Сидеста Поргов куленькшнезе радионь наушникста сонь ляпе вайгяленц. Аф весть мархтонза корхнесь радио вельде. Поргов кульсы Анфисань вайгяленц и апак удок явай удомац, апак ярхцак топоди пекоц. Коса ба афоль уль сон: бойса или походса — фалу учсесь, мзярда наушникса кульсы: «Ёлка, Ёлка! Я Сосна, я Сосна! Как меня, слышите?».

Весть бойда меле Поргов тертьфоль штабу. Анфиса венептсь тейнза кафта сёрмат. Кафцьконь лангс тяштьфоль сяка жа адрессь, коста кучфт: «Крюковскяй почта, того же села, Мордовскяй АССР».

— Кинь-бди седиец пяк сяряди инксот, младшай лейтенант ялгась, — шутендась радисткась. — Сразу кафтонь сёрма кучсихть.

Поргов сявозень сёрматнень, и трнатсть кяденза. Мес тядяц кучсь марса кафта сёрмат? Фкя сёрмать эса тяштьфтольхть поклотт, и кизефнезе, кода сон эряй, надиясь, што шкайсь ванцы эряфонц. Омбоце сёрмась ушетфоль тяфта:

«Идняй-тряйняй, омбоце шись аф панчсевихть сельмоне, шинек-венек авардян: миньге кудозонк сувась горясь»...

Поргов конезень сельмонзон. Сон шарьхкодсь, што мезе-бди лиссь алянц мархта, конань сявозь войнань ушедома шинякиге.

Тоса ванозень мекольдень строчкатнень, коса тядяц сёрмадсь: «Хоть тон, иднязе, ванфтк пряцень, а то аф ули калмаезевок...»

Радисткась шарьхкодсь, што Порговть сатозе оцю горя. Сон аньцек ёрась кизефтемс, но Поргов сонць азозе:

— Алязень...

Шиньберьф Поргов киндиге изь няфне пря. Шоподема ёткова сонь музе Анфиса, нежедсь малазонза, ужяльдезь пшкядсь:

— А вдь алятненди тяфта пичедемс аф ладяй.

Поргов кеподезень сельмонзон и, кода шаба, сонць аф содасы мезенди, кизефтезе:

— А тонь, Анфиса, ули аляце?

— Корхтайхть, ульсь, но мон тонадонь ни аляфтома.

— А коса тонь аляце?

— Моннеть шавозь кулакне, колхоснень тиемста.

Тяда меле Поргов нинге сяда тонадсь радисткати. А аф лама пингта меле тейст сашендовсь фкя котелокста коршамс супта. Тяфта стака шитнень пингста синь шовордазь кшиснон-салснон, куцюснон-котелокснон. Борять зепса фалу мушендовсь танцти сускомня, мзярда вачендсь Анфисань пекоц; фалу седиезонза пачкотькшнесь пара валня, мзярда тоскавась Боря. Васенда Поргов вешендсь кодама-повсь туфталхт, штоба сяда сидеста няендемс радисткась, тоса сонць Анфиса аф пелезь, аф виздезь эфирста мушендозе Порговть вайгяленц.

Весть сёксень шиста‚ мзярда лама шинь бойда меле танкисттне лоткасть ваймама Украинань вели, Поргов мольсь Анфисань пяли и приметазе, што радисткась марнек полафтсь: оласть сельмонза, кольсь стирень шамац, шобда китькст тифтедсть сельмонзон алга. Васенда ашезе азонда Порговти, кяшендезень эздонза сельмонзон, а тоса якстерьгодсь, палазе Порговть казяма щеканц и пилезонза тошкась:

— Пидек кулуфнень потмоса печонканят, лия мезевок аф моли потмозон.

Поргов аф сразу шарьхкодезенб Анфисань валонзон, тоса фатязе, кода шабань, кядезонза и ламос-ламос палсезе.

Сёксети войскатне ётасть границаньконь тона бокс. Ашель мзярда тейст сидеста васетькшнемс. Сёксень фкя илядня Анфиса кярьмодсь Порговть кргазонза и сельмоведьбачк азозе, што тейст сави явомс. А колма шида меле Анфисань прважазь тылу.

— Ванфтк пряцень, — паламстонза мярьгсь Анфиса, — и мяляфтк, што тяни минь кафонек карматама учемот. Кучсек сиденяста сёрмат.

— Кда шачи цёраньке‚ обязательна макск тейнза монь лемозень!

— А кда стирня шачи, эста кода лемдемс? — и кайги вайгяльхть аварьгодсь Анфиса.

Срхкась вастстонза автомашинась и минутада меле кяшевсь сельмингольде.

* * *

Поргов лоткась азондомда, крхкаста таргазе ваймонц. Шись вярель ни. Эряволь хоть аф ламняда ваймамс. Но Шиндина нинге лама ёрась содамда сонь фронтонь эряфонц колга.

— А коса тяни ся стирнясь?

— Мон монцьке аф содаса... Войсканьке апак лотксек мольсть Берлину. А монь пицефста и ёжефтома таргамазь танкаста и прважамазь госпитали. Колма шида меле сань ёжес. Марнек ашкотфолень биитса. Исть панчсев сельмоне и кургозе, исть куле пилене. Сембе вастоне пчкясть, а тя вов лядсь, — няфтезе щёканц.

— А Анфиса коса? — тага кизефтезе Шиндина.

— Сон кучсесь сёрмат, но тейнза отвечасть, што мон госпитальсан, а вастозень кивок ашезе сода. Мзярда арань ломанькс, кучень сёрма тядянц лемс, Смоленскяй области, коза сон тусь. Аф лама пингта меле сёрмазе сась меки, лангозонза тяштьфоль: «Адресатсь аш». Курок монценьге прважамазь тылу — Свердловскяи. Тоста кучсень тага кафта сёрмат, но сёрмане сашендсть меки: «Адресатсь аш».

Шиндина крхкаста таргазе ваймонц:

— Да-а, лама эряф колась тя проклятай войнась. Вов моньге ялгазень эряфоц изь удала. Волкова Асять, «Возрожденияста» зоотехникть, содасак?

Поргов азозе, што аф содасы, няезе аньцек копорь ширде.

— Ну вот, соньге васенда шавозь фкя мирденц, тоса лиссь лётчиконди, и аф лама пингта меле сяньге шавозь. Минь марса тонафнеме институтса, и марса кафцьконь кучемазь тя району. Тяни касы сонь цёраняц...

Омбоцеда саду сась Пелагея Афанасьевна. Сон кандсь од газетат и сёрма. Шиндина ванозе конвертть и азозе, што сёрмась как раз Асять эзда, Москуста. Но лувомонза изь карма, максозе меки тядянцты.

— Пара ломанць Ася, — поладозе Корхтаманц Шиндина. — Тяни курок ни сай.

— Улема, колган тяшнеть тейнза?

— Месть тон? — нльне эводсь Шиндина. — Чяй, аф шабан.

— А мезьда пелят, Варюша? Тяштть, аст эздон привет, кда кельгсамак.

Шиндина якстерьгодсь. Ванозень частонзон:

— Борис, пинге ни срхкамс работама, — палазе Порговть. — Тон архт инголи, а то ломатть няйсамазь.

— Тон тядонга виздят? Кда тяфта — вандыкиге аде загсу! Аш месть кяшендемс ломаттнень эзда!

Шиндина токафтозе Порговть трванцты суронц:

— Т-с-с-с! Местема пешкодат? Кенерьхтяма тозонга молемс, аньцек тят пешкода.

Работама тусть марса. Крылецть лангса ламос, мянь коза сатсь сельмованфоц, ванць стиренц и сай пингонь овонц мельге Пелагея Афанасьевна. Кенярдсь сон, пяк ни мялезонза тусь Поргов. А сяс эрязста урядазе кудонц и тусь сазоронц пяли, штоба панжемс кеняртьф потмонц.