| Вирьсэ, автор: Илька Морыця // сборник Васень сятк, 1929. | Мордовская библиотека |
| Книга: Васень сятк. Эрзянь морот ды ёвтнимат. Пурнынзе А. Дуняшин. — СССР-энь Наротнэнь Центрань Издательствась, Москов, 1929. — с. 119—121 | |
| << Тундонь чи << | >> Кедровой пешть (П. Глухов) >> |
|
ВИРЬСЭ
Вирь куншкасо, полянасо Касы ашо килейне; Сонзэ прясо, сильге ланксо Цёков цёки морыне: — Пижине тон, лугине, Полянасонть касыйне, Канта, анта росыне, Тимбол хрусталь веднине. Ух, тынь, цецят — цецинеть, Наряжавкскеть лугиненть, Касодоя парынеть, Артодоя тундыненть... Виренть поцо, пек васоло Вейгель „я-ай“ маряви; Виреськак эсинзэ кельсэ „Я-а-нть“ каршо кувцеви — Я-ай, я-ай-я-ай!.. Кукшкадынь полянас, Кунсулан я-ай-енть Друк шалнозевсть лопатне, Явовсть кавтов таратнэ — Вирь полянанть крайнестэ Лиссь эрзянь од тейтерне: Цеця пусма кецэнзэ, Руцинезэ ашине. Ашти ризнань седейсэ. — Мейсь тон, мазый тейтерьне, Тейтерь — бояр-авине, Ськамот ютат вирьневанть, Роштя пуло киневанть? Иля пельть тон, тейтерьне, Мон а карман нарьгамот, Улят ансяк ялгинем Карман ансяк содамот. Бояр-ава тейтерьне, Ютак, сака малазон. Мазый толга павине, Озак адя ваксозон. Оймат-теят, ёжо саят, Кавто-колмо вал каят; Невцак косо тон эрят, Кудов эщо кенерят. Кадык, сюдык ризнамот, Берянь-чисэ эрямот. Пштине сельметь пейдевтить, Мазый кургот ракавтык. Ольга ялгам весёлгаць, Турвинензэ пейдезевсть. Кетьте-пецек кундынек, Кудов моразь сырьгинек. ★
|
| << Тундонь чи << | >> Кедровой пешть (П. Глухов) >> |
| «Вирьсэ», автор: Илька Морыця // сборник Васень сятк. Эрзянь морот ды ёвтнимат. — 1929. | |