ЛИПНИ ТОЛ

Сёксь. Кизэнь лембе читне тусть васов. Паксясь чаво. Шождыне ливтнемс казямо вармантень урядазь паксяванть. Кой-кува неявить ансяк куцяс валязь чиньчарамо нетькснэ. Чи лисима пельде ливтить кесаксо шанжавонь коцтнэ. Весе менеленть вельтизь прок телефононь уськсэ.

Виресь шалнозь шалны сёксень вармадонть. Чувтнэ эйстэ васов ливтить почарксазь лопатне. Ансяк сэрей поесь наряжась теке якстере наряцо, — эзинзе певерть лопанзо. Вейке пестэ вармась урнозь канды лопатнень эйсэ омбоце пев.

Паро молемс киява. Кись кшнакс таргазь васов, васов. Минь кавненек сырьгинек ошов. Молемс тенек 60 вайгельбе. Икеле понгонить латк, пандынеть, сэть леень трокс. Пилькне шождынестэ кайсевить варманть мельга.

Чись кадовсь чувтонь сэрь, палозь палы чи валгума ёнксось. Менеленть омбоце бокасто туманонь кондят пельтне капшазь вельтить чи валгуманть эйсэ. Молемс 20 вайгельбе. Мон тандадозь меринь ялгам туртов:

— Чопотеме кармась... а пачкуттяно...

— Кодаяк паряк чийсынек... шагат уставик...

Туинек бойкасто. Пельтне прок вельтямосо вельтизь чинть. Паксястонть кармась марявомо пиземе чине. Кись леткець. Мон эсь пачкан арьсян:

— Пиземе сы... карматано паксянть лайшеме... Ансяк кодаяк а кадовомс, кистэнть зря а туемс...

Мольдяно яла. Кинть ланкс валксь чавкань стая, клюкаизь певерень видьметнень ды шалнозь ливтясть виренть велькска. Састыне, теке сувтемень пачк, кармась суводеме пиземесь. Чопулгаць. Виресь лоткась шалномадо, поназо чопуда модань кондямо, — понгатдеряй тозой, пингезэть мекев а лисиват. Рудазось пильгезэть педи шта лацо. Друг ялгам фатязевсь:

— Ванта. Аволь киява веть молдяно...

Кадовить...

— А тон эзить кадово? — пейдезь меринь ялгам туртов. Ней уш молинек састо. Рудазось нергевсь чапакс лацо. Ведесь чольнесь пильгалонок, теке брага шакшсо чов. А икеле эйсэнек учось чопуда моря потмакс. Пильгалонок понгонить ямат, губорнэть. Апак фатя эшкевинь чувц. Эзинь кенерть пижакадомо, кода гиракстозь прынь крута стенаванть. Прамось монень марявсь ломанень пингешкакс. Телаван ютась пси пар. Аштян боком. Алксось чевте. Ало маряви бульдерди ведьне. Мезе вийсэ серьгединь:

— Ёга-а-а.

— А-а-а...

Отвечась верьде вайгель. Пизементь пачк вайгелесь маряви тапань баягакс.

— Ёга-а-а...

— А-а-а...

— Тон прыть?..

— Прынь...

Састыне мольдяно пандо чирева. Начкинек тюрякс. Озынек оймсеме. Ведесь кельме. Туинек. Мольдяно. Мекев озынек. Пиземесь рисьни. Туманонь морясь салась эйсэнек потмозонзо.

Алдо липнезь липакаць толнэ. Радувамонь пачк карминь пижнеме. Липни толось яла малав сась. Те чопуда потмакссонть толось неявсь менельстэ тештекс. Пачкодинек. Вирь поцо кудо. Кругом пирязь плетеньсэ. Вальмало неяви атя, кецензэ газет, икелензэ липни толнэ. Вальманть пачк ловнынек: „Якстере теште“.

Совинек. Кудонь лембесь пачканок ютась. Пелезь кевкстинек: — можна арась удомс кудосонзо. Сон састыне, сёрмав вайгельсэ, мерсь:

— Кузеде каштом ланкс. Эждинк ловажиненк...

Каштом кирпецьне солазь солавтымизь. Мон кевкстия:

— Нать вечксак „Якстере Тештень“?

— Да вечкса. Умок уш карминь вечкиманзо... Кода арась газет — ёжо а муят...

— Мейсь ськамот эрят?

Путызе газетэнть икелензэ. Варштась кудонть уголс. Састо, лотксезь-лотксезь кармась басямо.

— Стака пек лецтямс ютазенть... Стака ваномс те уголонть ланкс... Яла теке... Кунсолодо. Сырединь, 60 ие эрян мастор ланксо. Ульнинь 20 ие лесникекс. Инязоронть пинкстэ ловнуманть эзия содаяк... Амезе ульнесь ловномс. Получинь грошт. Кода теевсь революциясь...

Укстась кувакасто. Чама санонзо кармасть сорномо. Лампасонть толось састыне пеець. Кармась секе вайгельсэнть ёвтнеме. Те аволь атясь ёвтни; ёвтни липни толось. Монень пачкоцьть аламошка валт.

— Монь ульнесть кавто цёран... Покшось урьвакстозель. А ней ськамон... Цёратне эсь олясо якасть... Красной гвардияв. Кавонест ульнесть коммунист. Войнасто састь... Парсте эринек... Народось вечкимизь. Весть истя тельня... ужинамсто. Марясынек ластеть арцть. Ружия марто совасть кемешка эсинек велень сюпавонь цёрат... Сынь весе ульнекшнесть бандасо. Минек цёратне отряд марто сакшность сынст кунцемест... Те шкас эрясть вирьга. Цёратне эсть кенерть стямо... бандитнэ лецть. Кода варштынь... Кавонест верь поцот... Вишка цёрась тарнось. Ансяк кенерсь пижакадомо: — а-ы-ы-х...

Кавто покш сельветь прасть щеканзо кувалт газетэнть ланкс. Прянзо чаравтозь басясь яла.

— Монь тростимизь... Кавтотне урьвам панаронзо сезись... ды... ды монь пинкстэ гадизь... Мейле кармасть муцямонзо... Керизь грудензэ... Кургозонзо керявксонть эцизь... Вейкесь пижакаць:

— Потяк эсь вереть эйсэ... Симдик остаткадо эсь прят тонсить ловсодо...

Урьвась яла эщо живель... Васня скалкс паразевсь... Валызе верь... Куркстонзо аксорясь верень кесак... Мейле ливтизь ушов. Монь прикладсо кармасть чавомо.

— Вант, — мери, — кода урьват пикс вельде райс нолдасынек... Седелка пикссэ повизь кирганзо... сельмензэ ланкс лиссть...

Ялгам састыне аварць. Атяськак сельведь поцо. Монь кирга парьсэнь пеельть лайсть... Буто кемень колият нилинь. Атянть эйсэ эзинек кунсоло, валтнэ сынсь эцесть седеенек пачк. Атясь яла кортась:

— Мон ёжовтомо напустинь... А повняса месть мартон тейнесть, ансяк мария лецть кавксть, мейле прок пандо лепштимем ды потпилкасо човасть удемем эйсэ...

Састь тень ёжо. Прям, чамам саизе верень эй. Вересь эйкс кельмесь. Повняса, кискась велькссэнь урнось... Совинь кудов. Киякссонть пиень вересь лак лацо валынзе мостина ластнэнь. Эх, ульнесь шкась.

Валське марясть. Монь саимизь больницяв. Цёратнень ды урьванть калмизь музыка марто... Бандитнэнь муизь ды лёднизь секе недлястонть.

Ней совет максы тень пенсия. Маны тесэнь комсомолец тонавтымем ловномо. Невтинзе букватнень. Ней састыне яла ловнокшнан „Якстере Тештенть“ эйсэ. Паро гезетэсь. Чаркодеви.

Сювордызе кеместэ „Якстере Тештенть“ ды сельведень пачк кармась ловномо. Лампасонть толось нимилявкс липаесь.

Вемберть эзинь удо. Сельмсэнь тештекс липнесь вирь поцо кудонь толнэсь.

★