| Чиськак кельме, автор: Салдин С. А. // сборник Васень сятк, 1929. | Мордовская библиотека |
| Книга: Васень сятк. Эрзянь морот ды ёвтнимат. Пурнынзе А. Дуняшин. — СССР-энь Наротнэнь Центрань Издательствась, Москов, 1929. — с. 16—17 | |
| << Эрзянь комсомолонтень << | >> Кунсолок, кунсолок! >> |
|
ЧИСЬКАК КЕЛЬМЕ
Чиськак течи кода бути кельме. Лов куцятне палыть чеерь толкс. Аволь вейке монгак правтынь сельведь, Кода совинь мавзолеенть поц. Весе содыть, кие течи кулось, Ансяк тенень кемемс пек стака. Мон мария, кода завод увнось, Теке пакся куншкасо шакал 1) — Кулось Ленин! — увны кежей вармась. — Эри Ленин! — ранги пиже вирьсь. Кие пакшакс авардеме кармась? — Те лайшицясь ульнесь мокшонь стирь. 2) Чиськак течи кода бути кельме, Яла теке те кельмесь юты. Ужо... лоткан... пандя... иля нерне, Ванта, кода нужась-чись поты. Ленин пинкстэ кармась сон потамо, Те нужанть тапатано нейгак. Лия пинге кармась тенек само, Лия думт якить минек превга. Кулось Ленин — минек ветицянок, Яла теке партиясь касы. Сонзэ кис пуцынек весе прянок, Бути таго истямо шка сы... Ютась шканть лецниса мон сеецтэ, Пек качамов менелесь ульнесь. Перекопонть ланкс эцинек сестэ, Порсть эйсэнек вачо-чись, сиесь... Ней уш васов ютасть стака читне, Хоть менельс таго пельть пурнавкшныть, Сокицясь паксясо сюро видни, Робочеесь чави калянь кшнинть. Ансяк течи... чиськак натой кельме, — Юткстонок калмов тусь покш ломань. Аволь вейкень сельмстэ чудить сельветь, Кулумантень лучи кулумаль. |
| 1) Шакал — зверь↩ |
| 2) Стирь — тейтерь.↩ |
| << Эрзянь комсомолонтень << | >> Кунсолок, кунсолок! >> |
| «Чиськак кельме», автор: Салдин С. А. // сборник Васень сятк. Эрзянь морот ды ёвтнимат. — 1929. | |