СЯТКНЭ ЯЛА КИРВАЗИТЬ1)
(Икельсь валонь таркас).
„Васень сяткнэ“ — васень колективень кинишка. Комсь вейкес ломань, комсь вейкее литераторт, конатнестэ икеле-пелев лисить виде паронь художникт, невтизь эсь шачост (чамаст).
Минек художественной литературанок эщо пек од. Кеме юронь нолдамо кармась ансяк 1926 иестэ. Се шкаскак ламот сёрмацть ёвтниматкак, стихткак, поэматкак, пьесаткак. Сынст эйсэ печатасть. Весе не сёрмадовкснэ шождынестэ ловновсть, но седеяк шождынестэ стувтовсть. Бути кона-кона сёрмадовкснэ эрясть седе кувать, то тесэ чумось ансяк валмеревтесь: „паксясо унжакаськак сывель“.
1927 иентень минек велесь кенерстясь истят од ломать, конат васень сёрмадовкссост уш кармасть полавтомо художественной литературанть шачонзо. Кода эно аштесть тевтне икеле? Кить-кить арьсесть ды нейгак эщо арьсить: минек художественной литературась эри ансяк колмо-ниле лома вийсэ. Не ломатне, келя, шачтызь литературанть, сындест парсте те шкас кияк а сёрмады.
Истя аволь аши тевесь? Аволь истя. Мезде сёрмацть ды нейгак эщо сёрмадыть „сех партнэ“? Пиже вирьде, сэтьме эрькеде, цёковдо, ташто эрямодонть. Но аламо муят сынст сёрмадовксстост неень эрямодонть, од койтнеде, од ломатнеде, конат сроить од эрямонть, социализмань эрямонть коензэ.
Вана икеленек Цыгановонь стихензэ. Цыганов умок уш сёрмады. Сонзэ ловсть сех парокс. Вана месть моры сон:
|
Косот нудейтне, Эйсест морыйтне, Косот киштийтне — Эрзянь аватне? Мазый пангосо, Викшнень руцясо, Сисемь ленгенень Тюжа карьнесэ. |
Цыганов верьсэ-сельвецэ чуди ташто эрямонть кис. Од моротне повить Цыгановонь эйсэ, оршить тедеензэ стака тошнасо:
|
Ков тусь моротне — 2) Ташто моротне, Пижень баягакс Увный вайгельтне? |
Цыгановнэнь эрявить ташто морот. Революциясь Цыгановнэнь мезеяк эзь максо. И аволь ансяк сонензэ, Цыгановнэнь, весе велень народонтеньгак беряньде башка мезеяк арась. Весе, мезе мартонзо тусь революциясь, Цыгановонь койсэ, „каторжной налет“. А эрямонть мазы-чиза ансяк ташто моротнесэ, ташто койтнесэ, семеричка карьсэ, руця-палясо. Лиякс арьсевельдеряй Цыганов, лиякс моравольгак. А ней:
|
Косот весе ней Вирень керийтне, Ленгень ваткийтне Карень кодыйтне? ......... Емасть весе неть Эрзянь койнетне, Калмавсть врема поц Эрзякс эрямтнэ; Састь тарказост от Тевнеть, пикченеть, — Пингиненть марто Лия од койнеть. |
Истя Цыганов лайшевти ташто эрямонть. Но Цыганов теке стихенть ланкс эзь лотка. Од моротне а вечкевить, од морамкатне — седеяк. Цыганов витни седеензэ нудей вайгельсэ. Нудеесь сонзэ самай думи-ялгазо:
|
Нудей, нудей! Тон ли кортнят Ташто пингень кельнесэ? Седейшкасто тон ли ёвтнят Пинге потмонь вайгельсэ? |
Есениннэнь кодояк эзь чарькодевть революциясь, од койтне, секс сон маштызе эсь прянзо. Но Есенин пек стараясь революциянть чаркодиманзо. Ве шкане сон пачколесь овси революциянть малав и морась радушнасто:
|
Небо, что колокол, Солнце — язык. Мать моя — родина, Я — большевик. |
Есенин большевикекс эзь теевть. Сон „понксонь илиштязь ношкстыксэль комсомолонть мельга“ — и пивнойде васов кинзэ эсть пачкоть. Лиятне морасть велень ды ошонь ютксо смычкадонть, индустриализациядонть, а сон „кабацкой Московонть“ ранговць. Од пингентень кодаяк эзь педя, эсь прядонзояк мольсь мелезэ. Прядо-пилькс тошнакаць мастор ланксо эрямодонть. И тусь масторонть ланксто.
Цыганов — аволь Есенин. Сон знярс эщо Есенинэнь таркантень эзь пра. Но сонзэ моротнесэ Есенинэнь коштось пурнась паро пизэ. А стяко сон энялды нудеензэ икеле:
|
Эщо весть нудейть кандымизь Вайгель песэнк вирьнентень. Чуди лей ваксс озавтымизь И ветимизь гайтненень. |
Цыгановонь моростонзо а муят ве валгак, кона кортаволь коллективдэ, трактордо ды ломаньде. Цыгановнэнь тошна сеть ломатнень ютксо, конат теить од тев, конат тапить таштонть. Цыгановонь моронзо эль моравить. А каиньдерясы куркстонзо нудеень дутканзо, секень вант поэзиянзо калмасы ташто моротнень лыткаст поц. Од ломатне лоткить чаркодиманзо.
Цыганов эщо аволь сыре. Од удемтне синдевить ков эряви. Ташто лукшонть поцто лисемс седе курок ды кармамс морамо лия вайгельсэ — лия морот. Морамс ули мезде. Касы од велесь. Тракторось мекевланк велявты велень эрямонть. Цыганов машты морамо. Но сонзэ поэзиязо ве пильксэнть чалгась уш калмос. А кадыньдерясынзе ташто моронзо Цыганов, омбоце пильгезэяк чалги ды рунгонек ваи калмонтень, лецниманзояк кияк а карми.
Омбоцесь Григошин Яков. Сондензэ ламо кияк эзь сёрмат. Сайсынек васняяк ёвтниманзо. Колмошка кинига пурнави эйстэст.
Ансяк печатьс пек эсть понго, пек аламо ютксост маштувикснэде. Григошинэнь ёвтниманзо а маштувить кавто ёндо: 1) Григошинэнь арась художественной келезэ. Сон а машты художественной кудонь сроямо. Срои эсь койсэнзэ мазый кудо, лиси — „саразонь пильге ланксо“. Ломатне Григошинэнь ёвтнимасонзо кодат бути пелеломать: а кортамо, а якамо, а тевень тееме. 2) Григошинэнь ёвтнимасонзо, конатнесэ сон сёрмады Октябрянь революциядонть, коштось аволь минек, чинесь эйсэст эсэрень. Минь весе содасынек кода ютась Октябрянь революциясь велесэ. Минь эзинек стувто се шкатнень, знярдо сокицятне пултасть помещикень кардастнэнь, пансесть варма мельга киска-бояртнэнь. Те ульнесь виде-паронь революция, коната трудиця народонть теизе масторонь азорокс. Ансяк Григошинэнь койсэ те революциясь лиякс ютась. Сон истя ёвтни: „Пурнавсть атятне, мольсть бояронтень, чавизь аламодо пей ланга и секе марто кадызь... Мейле учителесь кармась тонавтомост революциянть тейнеме“. Чаркодиде, ков пурды Григошин? Революциясь чаркодеви ды тееви ансяк интеллигентнэнень. Интеллигенциянть Григошин лови трудицятнень ветицякс. Пролетариатонть, пролетариатонь партиянть сон истувтызе.
Истят Григошин ёвтниманзо. Кодат стихензэ? Ёвтниматнеде васов эсть туе. Кода сон моры таштодонть, лиси прок ёнсто:
|
Минь шалнынек, минь талнынек Подушноенть каямсто, Промкс кудосо минь виздинек Эрзянь кельсэ кортамсто. |
Те — истя. Тень кияк эссе стувто. Но аволь тень эйсэ минек пингень поэтэнть задачазо. Эли Григошиннэнь амезде лиядо морамс? Кунсолок, Григошин, мезде морыть эрзянь од цёратне:
| Кулось Ленин — минек ветицянок, Яла теке партиясь касы. Сонзэ кис пуцынек весе прянок, Бути таго истямо шка сы. Ней уш васов ютасть стака читне Хоть менельс таго пельть пурнавкшныть... Сокицясь паксясо сюро види, Робочеесь чави калянь кшнинть. |
| (Салдин). |
Марясак, од ломатненень, конат ойменек-седейнек сюлмавозь революциянть марто, овси а эряви синтремс прясь темань вешнезь. Эрьва чись, эрьва недлясь, эрьва ковось, конань эрясынзе минек советэнь масторось, — покш тема. Ансяк машт морамо те пингень кельсэ.
Григошин — индивидуалист. Сонзэ эрямонь кизэ моли весемеде башка, тевензэ-валонзо, мельс паронзо пиить-палыть ансяк эсь поцонзо. Ялга-ломаннень сон а машты потмонзо чамдамо. Секс Григошинэнь поэзиязо седейс а педи.
Григошин ве шкане снартнесь морамо те пингень кельсэ. Сон саизе умонь сёрмадовт стихензэ „Чикор-лагор эрямонок“ ды пезэнзэ сюлмась истят валт:
|
Эрьга пурнан мон од превнеть, Эрьгва раман мон од сбруйнеть, Модам тракторсо сокаса, Кшнинь айгорсо лац тапаса. |
Не ниле срочкатнесэ „чикор-лагор эрямось“ яла теке эзь витевть. Григошин ульнесь и кадовсь индивидуалистэкс. Од превтнеде пурнак куть цела улав, но од сбруйть и трактор сынст ланкс яла теке а рамат, нужа чистэнть ськамот, коллективтеме, яла теке а лисят. Башка хозяйстванть эрямозо яла теке карми молеме „чикор-лагор“. Те вана Григошиннэнь кодаяк а чаркодеви.
Григошин снартнесь сёрмадомо авань эрямодояк. Сон марясь, кода эрзянь аватне кармасть бажамо валдо эрямонтень, ды сёрмадыксэльсе эрзянь аванть од патретэнзэ. Сёрмаць Григошин стих „Од тейтерень моро“ и лиссь те стихстэнть вана мезе:
|
Мирдемь эйстэ мон а пелян, Женотделстэ од превть саян, Монь сазорнэм — пионерка, Монь патинем — комсомолка, Сыре патям — делегатка, Покш уряжом — коммунистка. Весе пурныть сынь од превнеть, Витить-петить сынь од тевнеть. |
Куть прак, куть стядо аштек те стихенть ловномодо мейле. Стихесь лемдязь од тейтерень морокс, но морыцясь — мирдень кецэ ава! Кода истя? Ды мекс те „од тейтересь“ весе патянзо-уряжонзо сёрмадынзе активисткакс, сонсь политикантень суронзояк а думи токавтомо, надии ансяк женотдел ланкс.
Снартнесь Григошин сёрмадомо советэнь оц кочкамотнеде. Те тевесь — политической покш кампания. Кона поэтэсь а сёрмады перевыбортнэде, се мень поэт?! Эрьвейке сёрмады эсь койсэнзэ. Григошингак. Советэнь оц кочкамотнень пинкстэ велетнева кеместэ мольсь классонь боруцямо. Кулакнэ азаргадозь кискакс велявтнить се шкане. Григошинэнь стихстэ истят тевть а муят. Сонзэ тевензэ молить пек валанясто.
|
Эрзят талныть, Газет ловныть, ................... Артя-дедай, ну поведай (?) Месть теть кортан, месть теть ёвтан. Конат эрьсить зепень токазь, Конат маньшить яказь-паказь, Конань парост салазь-колазь, Эрить-аштить винань нолазь, Кона лечи сельгезь-пувсезь, Кона яки кувсезь-нувсезь — Нень а кочкамс, нень а ладямс Советнэнень тевень гадямс. |
Те вана тенк велень промкс. Истя вана Григошин кармавць велень народонть советэнь кочкамо: илядо нолда, дескать, советс винадо симицятнень, салыцятнень, орожиятнень ды нузякснэнь, а кулакнэде илядо мелявт. Мень ней кулакт советэнь масторсо, советэнь властесь весе вейкецтэ теимизь. Паряк аволинек „сёлнояк“ те стихенть, но Григошин сонзэ эйсэ корты аволь эсь пельдензэ. Григошинэнь невтиманзо коряс, истя тонавты трудицятнень партиянь-советэнь газетэсь. Теде рустнэ мерить политическое ханжество, миньгак истя.
|
...Видьменть ёрцы — цють валясы, Моданть унжакс поксорясы. Истя яла эрьсесь Гара, Сонзэ койсэ яла паро. |
Те стихсэнть весе Григошин — прянек-пильгенек. Ниле-вете иеть меельсек чикорць-лагорць Григошинэнь поэзиянть крандазозо — и эзь цидярт. Калаць тыки меельсь пелев. Ламо иеть сокась Григошин мода эсь поэзиянзо алов, но тев яла теке эзь листь:
|
„Видьменть ёрцы — цють валясы, Моданть унжакс поксорясы“. |
Григошинэнь поэзиязо кулось. Колияк, нать, а вельмияк.
Кривошеев ульнесь „сех паро“, истямокс кадовсь те шкаскак. Истя арьсить кить-кить. Истя думи Кривошеев сонськак. Карматано кортамо вицтэ, киньгак мельде апак пеле.
Кривошеевень эсинзэ кизэ. А Цыгановонь, а Григошинэнь ваксс сон а ладяви. Кривошеевень моростонзо таштоськак а неяви, одоськак а маряви. Сон сайсь кодамо-бути куншка видь и арды се таркаванть. Секс самай Кривошеевень стихензэ аволь художественной произведеният, а фотографиянь снимкат. Жив ломань эйстэст а неяви. Кривошеев прок аволь мастор ланксо эрияк. Куйсь буто сон чувто пряс, ваны тосто, ков сельмезэ неи, и сёрмады: кожа шуми виресь, кода лажны цярахманось, кода моры цёковось. Ве нармуньгак а кекшеви Кривошеевень сельме икельде, ансяк жив ломанесь, коната срои весе эрямонть, кодаяк а понги Илькань сельмс. А стяко нать Кривошеев куконь эрямонть лайшевти:
|
Виренть крайсэ Чувто прясо Кокшкинесэ Кукось лайши. ...... Арась куконть Ялгинезэ. Ков а моли — Ськаминензэ. |
Кривошеев — сонськак истя. Ков а варшты — яла ськамонзо, эсь прянзо, эсь мелензэ-валонзо марто.
Кривошеев машты морамо: келезэяк валаня, валонь кис, кода мерить, зепс а сови. Но моронзо пек содейс а педить. Ве шкане Кривошеев снартнесь коллективде морамо. Сёрмаць стихотворения „Эй, куцясо!“ 1927 иестэ те ульнесь. Минь те стихенть сестэ печатынек „Якстере Тештес“. Те стихесь ламонь паметь маштнесь — истя мик мельс тукшнось. Веенстнэ шнасть стихенть прянек-пильгенек, омбонстнэ — пек эсть капша шнамо. Вана месть ульнесть сёрмадозь се стихсэнть.
|
Ульнесь пожар. Теевсь од жар; Сонзэ псистэ Прок чинть эйстэ. Моли лембе Перть, вай, пельде... Ней эрядо, Ней ладядо Чизэ лиссь уш Тынь ней садо. Пары бука Турба прясо, Терди: „Нука“, Эй, куцясо!.. |
Эсть манявт сеть, конат пек эсть капша стихенть шнамо. Сёрмадозь стихесь аволь беряньстэ, лиякс меремс — ушо ёндо стихесь пек мазый, шум эйсэнзэ знярыя, но потмозо те стихенть — ундо. Минь астяко ламо кортатано те стихтенть. Те стихесь прок зеркалань пачк невти тенек Кривошеевень поэтэнь шачонзо. Те стихесь, ламо апак корта, невти тенек, кода чаркоди Кривошеев коллективень эрямонть.
1924 иестэ Кривошеев снартнесь валгомо чувтонзо прясто масторов, снартнесь ломатнень малав молеме ды ваномо, месть арьсить не ломатне, кода сынь сроить од коллективень веленть. Кривошеев мода ёжонтень яла теке эзь валговт. Кежейстэ урныця тракторонтень пельсь молиманзо. Сон, ве ёно аштезь, сёрмаць кемень-кеветее мазый срочкат ды тусь мекев чувто прязонзо.
„Эй, куцясо!“ стихсэнть Кривошеев (сон те шкас яла истя думи) „славинзе“ весе революциянть, колхозонь сроямонть ды од ломатнень. Те стихтэнть мейле оймась Кривошеевень седейзэ; мекев кундась сон „Вайсень кулянь ды Коклаць палянь“ пулос.
Кривошеевде пайстомо ломань кодаяк а мериват.
Цёрась сон од, тонавтозь, содасы эрямо ладонть. Ансяк вейке сонзэ пайстомо-чизэ — эзь педя кодаяк мастор ланксо эрямонтень. Неень шкатне ды тевтне кода бути сонзэ ваксска ютыть. Секс, нать, поэзиястонзо а муят жив ломань.
Те пек берянь. Те пингене истямо установка марто поэтэсь кувать а цидярды. Кривошеевнень думамка тень кувалма седе кеместэ. Эли сон карми морамо ташто (неень) лацо — и минь сонзэ эйстэ овси отказатано, эли сон пултасынзе „ташто караблянзо“, сы миненек и мартонок ве пильге лувсо карми лездамо эсь поэзиясонзо социализмань сроямонтень.
* * *
1927 иесь макссь тенек вадря урожай. Кайсть истят од селькорт, конат уш васень стихсэст „кундызь буканть рогадо“. Те од виесь сась минек литературантень „апак хватя“ и лажакаць сразу од вайгельсэ:
| Астяк батрачка тонть, поэт, шачтынзеть, Астяк, поэт, совить тон комсомолс. Революциясь даол поцо кастынзеть, Ней тон покшат, — тон палт Октябрянь толкс! |
| (Артур Моро). |
Од поэтнэ тусть мартост од морот и од политической установка — эрьва стихсэнть, эрьва сёрмадовкссонть улезэ (хоть знярояк) партиянть течинь политиказо:
| Эрзянь тейтерьтне морыть гай морот, Одирьвакс балалайкась урьни. Мон а кирьца ней, нужа, тонть корот, Марясак кода трактор зэрьни? |
| (Артур Моро). |
Не срочкатнесэ — од поэтнэнь программаст ды устававксост. Те устававксонть сынь саизь васень стихсэст, и эсть туе ланкстонзо те чис.
Минек од поэтнэде ламо. Но сынст ютксто те шкас невтизь невтизь пряст паро ёндо ансяк ниле-вете ломань. Ансяк нетнеде знярс кортамскак сави. А. Моро, А. Лук‘янов, В. Радаев ды С. Салдин — неть од поэтнэ. Ниленест ютксто конаньгак арась мик средней образованиязо.
Эрзянь литературань келесь — пек од кель. Парсте апак чова — путной стих а шождыне сёрмадомс. Ды аволь ансяк те. Минек арась стихень сёрмадума форманок. Эрявсь вешнемс. Эрявсь сроямс. Не поэтнэнь кист мазый. Шлязь эсь ливейсэст, сельветьсэст.
Вана икеленек Артур Моро. Те цёранть стихензэ парт; пешксеть — ушо ёндояк, потмо ёндояк. Но те цёранть лацо кияк эзь пие-пало стихень сёрмадума тевень кис.
Ламо а лад тарка литературань кинть ланксо. Ваномс эряви эсь прянть мельга седе пштистэ. Цют ильведиват — секень вант прят синцак. Артур ильведевкшнэсь. Пурдакшнось виде кинть ланксто. Цют эссе синть прянзо. Меля кизна стихсэнзэ „Кукукснек кукушка“ сон сёрмаць истя:
|
Прясон шляпа, кецэнь перчаткат, трость, Пильксэнь вандолдыть англичанонь гетрат. Эрзятненень теевинь паро гостекс Кевкснить эйсэнь: кода эрят, ялгай? |
Седе васов уш ардомскак аков! Велень цёра, батрак, понксь Московов, сёрмаць ниле-вете стихт, наряжась шляпасо ды гетрасо и велень ялганзо туртов, конатнень ютксо шачсь-кайсь, теевсь ансяк гостекс. Ко ёндо „шнамс“ тень кис Артуронь? Ламо мурнимкат ульнесть Артуронь. Сынь стяко эсть ёма. Артур витизе кинзэ:
|
Ошсо робутан, Лемем — робочей. Ней лиякс эрян — Лиякс моран ней. |
Артур ней уш эрзянь велентень аволь гость. Сон эрзянь народонтень, батрак тяканстэнь — паро ялга:
|
Монь мелем — пургине лацо Чопуданть эрзятнестэ яжамс. Эрзянь масторонть наряжамс сацо — Улезэ козонь эрямо самс. |
Артур ланкс можна надиямс. Сон валонзо стяк а ёвтасы.
Артур вакссо ашти Алёша Лук‘янов. Алёшань кизэ эсинзэ. Артур вечки шум, сятордума, лакштордума. Алёша — лиякс: сон моли састо, но маряви васов и седейс педи:
|
Повнясак, кода Пилень кельмевтнить? Повнясак, кода Вальмазнок стукить? Канды бурясот Кудонок вальсить, Вешки вармасот Минек тандавтнить. |
Истя Алёша ильтизе теленть. Парсте сёрмадозь те стихесь.
Алёша ков эри яла касы. Меельсь сёрмадозь стихензэ невтить, кода касы Алёшань талантозо. Но ве шкане Алёшаяк чиремкшнэсь виде кинть ланксто. Те сборниксэнть ули сонзэ стихезэ — „А моры скрипкась“. Ловныяк парсте те стихенть и тыненк неявомо карми, кода васов тукшнось Алёша берянь кияванть. Се шкастонть Алёша ды Артур эрясть прок аволь XX вексэяк. Сынь прянек-пильгенек чавсть Пушкин мельга, Есенин мельга. Эсть муе тарка-эземь. Алёша пачколесь овси пентень.
|
Ойматоць цёрань Гайги скрипкинесь, Тейтерень поцто Маць палы толнэсь. |
Те стихсэнть упадочничестванть программазо: кода поэтэсь туи классовой кинть ланксто, сестэ лотки морамодо поэтэнь скрипкась, поэзиянть палы толозо мади. Но Алёша яла теке эссе макст прянзо ёмамо. Сон кеместэ чалгась моданть ланкс, кармась политиканть тонавтнеме ды откстомтызе ойми-седеензэ. Морамояк лиякс кармась:
|
Кинель леесь парьсеекс лымбаксни, Волнасонзо береконзо шли. Кинель леесь ваясь сюро паксяс, Тракторось народонть вейс пурны, Кинель леесь лиякс ней чуди. |
* * *
Касыть эрзянь од поэтнэ ды сёрмадыцятне. Касы ды ламолгады эрзянь художественной литературась. Ульнесть Кривошеев, Григошин. Тарказост шачсть Лук‘янов, Артур Моро, Радаев, Салдин. Сынст ваксс прок пиземеде мейле панк касыть Зиньковт, Иркаевт ды лият.
Те сборниксэнть комсь вейкее автор. Те цифрась корты ламонь кис. Минек художественной литературась кармась касомо алдо, чопуда велестэ. Селькортнэ, конат исяк ансяк тонацть сёрмадомо ды ловномо, течи уш кундасть од литературань тееме. А зря кундасть.
Саемс хоть И. Прокинэнь. Сон аволь умок кармась сёрмадомо. Кавто иес сёрмаць ансяк стих и вейке ёвтнима. И эряви меремс: Прокин сёрмадомо машты.
Ламо сёрмадыцятнеде. Те — аволь берянь. Ансяк сёрмадомс эряви апак капша. Кой-кить думить истя: „Сёрмадан ёвтнима, кулаконть рисуваса те ёвтнимасонть зверькс, конань яла теке повасы беднякось. Те и карми улеме художественной произведения“. Истя сёрмадытькак. Весе сёрмадыть ве колутка ланкс. Григошин, например, истя сёрмады:
|
Дёголь Прока — декшке, Мекс пек пекеть покшке, Сельметь цяплашкашка, Судот рукавцяшка, Келеть покш коймешка... |
Кода тынк койсэ, те кулакось — художественной образ? Истят ломать улить косояк масторонть ланксо? Арасть. Те ломанесь — аволь кулак. Те — ёвксонь чудовища. Истя сёрмадуманть — синьдень трёшник питнезэ.
Минек поэтнэ стихсэ и ёвтнимасо сёрмадыть коллективизациядонть. Те пек паро. Но — кода сёрмадыть? Сёрмадыть схемасо, художественной краскавтомо:
|
Аволь коське кше сускомост, Ямонть сывелень пидить. Пешксеть сюродо утомост — Вачо пеке а кандыть. |
| (Ильфек.) |
* * *
Ней весе уш содасызь, кодамо паро канды коллективесь велень трудицятненень. Коллективтнэ касыть прок панк. Но коллективтнэнь эрямосост ламо асатыкс таркат. Коллективга улить истят ломать, конат пелить коллективтнень икеле аштиця трудностеде и мутить ялгань превтнень. Велева — ламо коллективт. Эрьва велесэ улить кулакт, конат боруцить коллективтнень каршо. Партиясь ды советэнь властесь весе виест путыть и нолдыть велень хозяйстванть социализмань киява. Партиянть марто велув — беднякнэ ды середнякнэ; каршозост — кулакнэ. Велесэнть алкуксонь класс ютксо боруцямо. Те темась вана неень шкастонть — самай паро тема минек поэтнэнень ды писательтненень.
„Васень сяткнэ“ лиссть. „Васень сяткнэ“ — минек художественной литературанть праздникест. Кадык те сборникесь ацы паро ки лия сборникнэнень, конатнень кувалт кармить касомо алкуксонь художественной литература. Сыньтемест минек художественной литературась акурок касы; сыньтемест культурань революциясь курок а пачкоди эрзянь велев.
Алек. Дуняшин.
1) Те статьясь седе покшсто карми улеме печатазь рузонь кельсэ сёрмадозь сборниксэ, конань курок нолдасы Центриздатось.↩
2) Не стихтнэ эсть сова те кинигантень.↩
 |
В России: В связи с наличием в этой работе цитат из некоторых авторов, она в полном виде перейдёт в Общественное Достояние не ранее 2066 года.
В США: Данная работа перейдёт в Общественное Достояние в 2025 году. |