| Сёрма деданень // сборник Пурьгинень зэрть; автор: Артур Моро; 1930, 30 марта. | Мордовская библиотека |
| Книга: Артур Моро. Пурьгинень зэрть. — Центриздат, Москов, 1931. — с. 50—57 | |
| << Чикаго ош << | + |
|
Сюкпря, дедай, Сюкпря, сиянь сакалнэ! — Тон эрят яла? Мон, дедай, касан! Кунсолок, Ёвтан теть паро валнэть, Кунсолок, корьминецькем, Ёвтан. Дедай, дедай, Тонь лемет Ара-Яша, Весе пингет Ванат стадат, Паро пищат тонь — Кши ды каша, Паро робутат Карть кодат. Весе пингет Якик веледе велес, Весе пингет ёмась Амезень кис, Паро теить Сюпавонь мелес, Тонсь эзить пачкоть Валдо чис. Лия лацо, Школав эзить яка, Мик, церькувасо, Тон, эзить моравт; Ансяк мернить монянь: — „Эйдне, Тяка, Монь лацо — Пингет иляк ютавт”. — Ведь монгак, Дедай, якинь тонь маро, Кши сускомонь пурнамо Васов. Пек сестэ Ульнесь тенек апаро, Пек апаро, Ды молемс аков. Колияк а стувтовить Не валтнэ: „Кинялень томбале Пурнынек”. Паро мукшнить Ведь потмакссо калтнэ, Минь тонь марто Сельведть валнынек. Ведь, монгак, Келей пакся куншкасо Тонь марто, дедай, Ванынь стадат. Пужонь цецякс Мон касынь нужасо, Ледить мельзэт — Эсь прят, мик, сюдат. Шкась лиясто Эрьси циганава, Пек маньши сон Ломатнень эйсэ, Апак хватя Эсь ломаньдет яват, Апак хватя А улят вейсэ. Тон кадовкшнить, Дедай, теск пиеме, Мон Сибирев Эйкакш куц понгинь. Эринь сестэ — Прясо начко леме,*) Эрьва чистэ — Сизьгеменьксть рангинь. Шкась лиясто — Чоледе-цянавнэ: Канды паро Од ломанень сец, Азарьсь кискакс Кит ланксо акавнэ, — Цеця сюлмот Пейдезь максни кец. Шкась лиясто — Прок ёвкссо тол-ава: Пек васов, Васов эйсэт терьди. Шкась лиясто — Сияс оршазь пава, Ведь авакс Лем тветсэ аварьди. Мон понгинь Сибирьстэ мекев велев, Велестэ нумолокс — Московов. Тон пурдыть Амельсэ калмо пелев, Ансяк човоньс Палыньзеть сэнь ков. Ансяк човоньс, Содык, дедай, човоньс, Мик ковось, корьмакам, Жалиньзеть. Благой ломать, Паньсть умок тонь сёвоньс, Благой шкась Спискасто нардыньзеть. Тон содасак, Пек парсте содасак, Кулы ломать — Мекев а стякшныть. Мон арсян Те меревтенть ёвтасак: „Паз икелев Пульзязь а пракшныть”. Мон арсян, Тон, ансяк, чатьмонят, Ченярдат Тумо ало семе. Курок, нать, уш, Курок сельмет конят, — А варшты ёнот Ломань сельме. Секс, нать, истя Цеця ланкс озадо Нудейсэт Лейнень сюкпря максат, Чова кальс Аштят неждязь комадо, Сельведь марто Морынет тарксят: „Ёмавтыя Мон сырьнесэ сурксом, Ёмавтыя Цвецямо порам. Те морось — Куломстон ули курксон, Те моронть марясы Монь полам”. Нармутне, дедай, Эйсэт кунсолыть. Сельведтет Цецятне нуваргацть. Сырнень морот Нармутне а колыть, Кельмсэ чавозь Кальтне рипакацть. Вай, дедай, Вай, сиянь сакалнэ, Иля вало Чудирькс сельветь!.. Кунсолок Ёвтан теть паро валнэть, — Чись мизолды тенек Чить ды веть. Стяк лей крайстэнть, Варштак кедет алга: Мейсэ видезь Тонь нарьги паксясь, Чарькодика: Зняро тосо ялга, Од пингесь Прок покш кшнинь пандо стясь. Модась вельтявсь Якстере лугасо, Лугась эйсэт Оймсеме мани, Эрьва ревесь икельдет Содассо: Нужань изни Сынст эйсэ ваны. Минь, дедай, Курок тонь марто вейсэ Калонь кундамо Кинялей мольдян. Од пингеденть, Откстомозь седейсэ, Од моро Лём вирьганть Ранкстатан! |
| 30 март. 1930 ие. |
| *) Леме — коськилда — лишай.↩ |
| << Чикаго ош << | + |
| Сборник Пурьгинень зэрть; автор: Артур Моро; 1931. | |