| Эзить арьсе, нать, седе // сборник Пурьгинень зэрть; автор: Артур Моро; 1929, декабрь. | Мордовская библиотека |
| Книга: Артур Моро. Пурьгинень зэрть. — Центриздат, Москов, 1931. — с. 34—38 | |
| << Трактор ды цёков << | >> Васень май >> |
|
Эзить арьсе, нать, седе, Мон — робочей цёра? Эзить арьсе, нать, седе, Монь чавот зепен? Ве чияк Аяштян апак мора, Мон одан: Ансяк, ведь, комсь иен? Эзить арьсе, нать, седе, Кода эринь икеле? Кода мон ней эрян Ды ков молян? Мон ванынь Сюпавонь стака меле, Бедной муцицянь Кор ней а кирьдян? Эзить арьсе, нать, седе, Монь корьминець авам Ульнесь пурныця, Арасьсэ эри. Эйдензэ сравтынзе Цецинекс лугава, Нейгак сонзэ Те нужась кери? Эзить арьсе, нать, седе, Монь ломанькс эсть лово. Эрьва косо Монь ланксо пеецть, Кода ветне Ульнесть аволь кововт — Сюпав ломатне Ланксонок нарьксесть? Эзить арьсе, нать, седе, Кемгавтово ие, Кода синдевсь, яжавсь Ташто коесь? Несак кода Паксяванть трактор чии? Латкс сявори Коське-дар поесь? Несак, кода Паксясь вельтявсь лёмзёрсо; Сырьнень морякс Келейстэ сравтовсь; Мон эрян эсь мелесэ, Эсь корсо, Эрямонь чамась Лиякс, полавтовсь? Несак, кода Ней касыть коллективтнэ: Увсо тов Бедной ломать совить; Ирнэзь маштыть Велестэ нарьдивтнэнь; Нужантькак Кирьга парьде повить. Несак, кода Верев ледевсть турбатне, Качамост эйсэ Менеленть вельтизь? Моданть эйсэ Нрьсить фабрикатне, Моданть завотнэ Кшнисэ кортавтызь? Марясыть тон, Кода гайгить моротне Од пингенть коряс Келейстэ верьга, — Те трудицянь вий, Сокицянь сюротне! Седейшкава Молят сынст мельга? Сёксень лопакс Латкос празь аштят? Ды монгак а ванса „Наян” мелеть. А содан мон, Мезьде ней тон арьсят? Эзить арьсе, нать, седе, Сынь тондеть тень питнейть, Сынст марто мон Масторсонть эрян. Сырьнень орёлкс Ливтнить валдо читне; Ды мон — поэтан! Мон раказь моран! Ансяк арьсить Чуро мазыть эйсэ Манчезь, манчезь Мон превень рамамс, Тонь кис лакаволь Верем седейсэ, Тонять весе Гай-морон морамс. Ансяк тонь Вечкевлитень масторсонть, Пине лацо Правлинь пильгеть ваксс, Эрямом неевлия Тонь корсонть, Виде кистэн Нолаштовлинь латкс. Ды весе нень (Од шканть ды од моротнень) Полавтовлинь Чаво мазыть кис, Паксясто тапавлинь Жуй-сюротнень — Велявтовлинь Ютазь-чопоть чис. Арась, арась, Те колияк а ули! Азё эйстэнь, Азё седе васов! Ах, од порам! Од порам — зорянь гули! Ах, од пинге! — Менельсэнть сырьнень ков! |
| Декабрь. 1929 ие. |
| << Трактор ды цёков << | >> Васень май >> |
| Сборник Пурьгинень зэрть; автор: Артур Моро; 1931. | |