Михеень онозо // сборник Кандра; автор: Салдин С. А.; 1934. Мордовская библиотека
Книга: С. Салдин. Кандра. Ёвтнимат. — ОГИЗ ГИХЛ, Москов-Ленинград, 1934. — с. 46—51

<< Черькст << >> Липни тол >>

МИХЕЕНЬ ОНОЗО

Курок уш недля топоди, кода ормалгадсь Михей. Эзь тук, пек эзь тук сонзэ мельс сэредемась. Чинь-чоп аштек мадезь ды вант потолоксо таракантнэнь лангс... Михеень койсэ, седеяк улевель берянь, авольть уледеряй таракантнэ. Чаво лазтнэ лангс ванномасонть парось седеяк а ламо. Ней коть ули мезе лангс ваномс.

Михей содасынзе уш таракантнэнь обоцяст. Чить промить чопода таркас, пряст нолдтнесызь алов, прок реветь пси шкане. Чопонь пелев весе кармить пивтеме; веенстнэ валгить кшеде ярсамо, лиятне порнить левштапонть эли кше паморькс лангс ургацить. Пек ярсыцят таракантнэ. Михей соды эйстэст вейке покш таракан — се натой чувтодояк ярсы. Лиясто мик цяторк, цяторк тейни. Истяк Михей а вечкилинзе сынст, хлопаесь эйсэст карьсэ, те покшонть сурсо эссе тока сестэяк, зярдо сон пецьковтызе Михеень конянзо лангс. Те покшось сонензэ неявсь такодамо ухачокс.

Пек эщо Михеень мельс тусь докторось. Сонзэ ускокшнызь больницясто. Кувака, прок слега, сельмукшсо, ашо коцтонь одижасо. Михей нейгак пеедезь ледьстнесы, кода эшкизе конянзо докторось кудос совамсто. Нать сельмукшонзо беряньстэ нейсть. Кодак панжизе кенкшенть, бамк эшкевсь кенкш косяконтень. Натой судо прязояк якстерьгадсь.

Михей сеске раказевсь. Повнясы, авазо кежейстэ варштась лангозонзо, врачось жо мольсь Михеень малас ды пеедезь мерсь:

— Азор! Мейсь истямо алкине кудо строить?.. Прям тапавтык, эдь!..

Михеень мельс сон сеске тусь. Сонзэ эщо кияк эссе лово покш цёракс. Мелень сёксня школавгак эзизь прима, мерсть — «вишкинят». Тетязо ласте изамояк эссе саине. Ней врачось покшокс эйсэнзэ лови.

Мейле докторось озавтызе Михеень, кепедизе котьмере пельде панаронзо ды кармась кунсоломо цилемень кондямо турбинень пачк. Мерсь оймень таргсеме. Михей турбинеденть кутькави, секень вант скокади таркастонзо.

— Пички... тевилявонзо шумбрат! — кеместэ мерсь докторось Михеень аванстэнь, сонсь чевте кедьсэнзэ валаськавтнинзе Михеень черензэ.


Исяк Михей чокшнэ нильсь ашо ризаня порошка. Вемберть ливезь лангстонзо чудесь, панарозояк начко. Текеде течи ёжозояк седе паро. Ансяк козомась а ламодо меши — истяк овси шумбра.

Лиясто Михеень мельс ледиль ваямозо. Прязо пешкедиль шумдо, рунгозо тарск теиль. Сестэ сон пельсь кудосонть ськамонзо. Михей парсте содасы, косто кундызе те орманть. Сонсь чумо. Лембе уш, кепе чийневель, ней сон лужали краватсо.

Ульнесь виев чады. Баба латкованть, пондакшов кискакс скокаезь, кеверсь навоз ды лов марто бутрав ведесь. Михей ялганзо марто зёлт брудясь. Покш зёлтось. Валскестэ обедс кирдсь. Теевсь натой эрькень кондямокс.

Вансы Михей: сёлтонть прява яксяргот укшныть. Михей — кундамост. Зярс чийнесь мельгаст, шалнозь сась латко пря ды сезизе сёлтонть. Михей кода ульнесь навоз куця лангсо, истяк ведесь салызеяк. Васня Михей тандась — седеезэ кулось. Мейле марясы, прок ливти ковгак, лембе тензэ, паро... Ансяк ломатне мейсь бути пижнесть.

— Кундынк!.. Кундынк!..

Мезть ульнесть теде мейле, Михей а соды. Кода панжинзе сельмензэ, сон каштом лангсоль, копачазь тетянзо овчинань шубасо.


Кодак пичкась, Михей чиезь тусь ульцяв. Эзь кирьде седеезэ. Седе курок неемс Анкань. Мезть, каня, мери сон?

Михеень сех паро ялгазо — те Анка. Пек паро сон тейтерькась. Зярдояк а сёвны, мездеяк а пели, зярдояк а нейсак аварьдемадо.

Аволь ансяк текень кис кундызе сонзэ ялгакс Михей. Те пролкасонть Михейшка цёрынетькак арасть. Ули вейке — Будай Филя — ды зрячей пек ломанесь. Турьган. Лиятне эли Михейде покшт, сонзэ ялгакскак а ловсызь, эли овси вишкинеть — нолгарьть. Ансяк Анка Михеень иесэ.

Истя советнат ульнесть Михей марто Анкат, истя советнат — зярдояк а явовильть вейкедест-вейкедест.

Татайсэ налксить вейсэ, сёвонень ломанть, морамкат тейнить вейсэ, сувтемесэ калонь кундамо, шкергень кочкамо — эрьва ков молильть кавонест.

Ков седе малав Анка-мезень кудонтень пачкодсь Михей, тов седеяк ливтязь-ливтяволь. Михей уш нейсы Анкань ашо прянзо, сон вечкема таркасонзо — виход икеле. Михей арсесь эсь пачказо: «Молян салавине удалдо тандавтса». Эзь кирьдь седеезэ, цяхазь прок рангстась:

— Анка!

Кепедизе прянзо Анка ды кежейстэ ладсо варштась лангозонзо. Татайсэ налксеманзояк эссе кадт.

— Мон ней мартот налксеме а карман... — мерсь Анка ды кармась ёвтнеме. — Минь совинек колхозс!.. Монгак якинь промксов. Кантор икеле ульнесь, ламо атят кедь кепедсть. Монь тетямгак. А тонть ават пижнесь яла... Сон аволь сознательной... Истя монь тетям мерсь... А сон сёвнызе тетянь...

Михей чувтомозь кунсолось ялганзо, абунгадумань пачк эзь сода, мезть тейнемс.

Анка путозь-путсь валтнэ эйсэ:

— Моньгак ават сёвнымем. Кода промкссто самсто неимем, мерсь тень: «Михейнень, келя, иля сакшно. Тон колхозницат. Серькат, мери, яжасынь». Монь тетянь кочкизь председателькс. Сон бедной. Кулаконь каршо моли ды сёрмадомояк машты. Тетям чокшнэ ёвтнесь: «Сы, мери, тенек трактор... крандазонь кондямо, кшнисэ весе пингедезь, потсонзо тол. Соки лишмевтеме, а уш урны — пургине ладсо. Понгиндерят алонзо — сеск мерькатанзат. Но сон ломанть а тапи, ансяк модат соки...»

Михей васенцеде мари истят тамашат. Сон кармась арсеме те тол марто крандаздонть. Дивакс тензэ неяви, кода ламо кармась содамо Анка те шкастонть, зярдо сон сэредсь.

— Колхозсо панжить миненек сад! — таго кармась кортамо Анка. — Кармить андоманок калацядо, ловсонь кашадо, пельс пиезь алдо. Сёрмадсамизь пионерэкс! Мон карман чистэ якамо. Кода касан, улян учительница эли делегатка...

Синдевсь Анкань вайгелезэ, варштась Михей лангс ды укстазь мерсь.

— Тонть марто минь явовдано... Тынь аволь колхозсотадо.

Петерьсэ кармасть чудеме Михеень сельведензэ, марясы, прок седейстэнзэ пангс лутасть. Варштась лавтовонь трокс Анка лангс, васодсть сельмест ды а ламос аштезь урнозь Михей напустясь кудов.

Кодак чийсь Михей кудов, куйсь каштом лангс, копачась суманьсэ ды кармась салава аварьдеме. Пек састь кежензэ аванзо лангс. Чикордыть пеензэ, кирьга парезэнзэ прок пиень ал озась.

Сех покш тараканось валгсь стенаванть састо, истя састо сон зярдояк эзь моле. Лангозонзо ванозь седеяк ацерьгадсь Михей, плестядизе тараканонть, стенантень ансяк начко тарка кадовсь.

Кувать чокшнэ авазо тердсь Михеень ужинамо. Эзь вало.

— Мейсь ордадыть? — кевкстизе авазо.

Михей эзь пшкадеяк. Сон ней карьсэ ёртоволь аванзо лангс. Кареськак кедь маласонзо ульнесь — эзь ёрто, кирдсь.


Вемберть Михей он нейсь. Сон неизе, буто сась кшнинь крандазось, лангсонзо Анка пееди. Ождятне кедьсэнзэ уськень, эчкт. Мейле нейсь мазый сад. Умарькстнэ, лёмзеркстнэ прок ашо ялавсо вельтязь — тьветить. Ве чувтонть прясо, тьвет потсо, буто письмар, мейле велявтсь сон Анкакс ды таго мызолсо пееди. Друк Анка венстинзе кедензэ, ды сынь кавонест ливтясть пандтнэнь ды виренть велькска. Пачкодсть пельтненень. Теде мейле валгсть мода лангс ды озасть кшнинь крандазонтень. Крандазось прок крандаз, ансяк урны пек ды чикорды лиякс — заслонка ладсо.

Сыргозсь Михей. Авазо алкукс калдордсь заслонкасонть — кузсь турбань пекстамо.

— Михей, азё тетять тердик завторкамо! — мерсь авазо.

Михей кежейстэ:

— Азё тонсь!..

Пек дивазевсь Михеень авазо не валтнэде. Зярдояк истя кежейстэ цёразо эзь корта мартонзо.

— Мон теть невтян «азё тонсь»! — авулдась авазо. Михей кундынзе кедензэ, прок кечказсо. Авазо тандадсь мик.

— Вай, мезть тейни цёрам! Нать, превстэ лисить?..

— Тон тонсь превстэ лисить!.. Весе колхозс совить, тон каршо молят. Несознательной... Мон, а сёрмадстыньдерят, кулок — кече ведь теть а кандан, пенге полина а лазан!..

Вейке оймсэ Михей меринзе не валтнэнь. Ки соды месть эщо улевельть, аволь совадеряй те шкастонть тетязо.

— Ну, баба, — мерсь совамсто тетязо, — мон тонь сёвномат лангс эзинь вано. Колхозс совинь... Минек ялгантень лия ки арась!

Прянь-полдань синдезь напустясь Михей Анканень ёвтамо.

<< Черькст << >> Липни тол >>
«Михеень онозо», рассказ; автор: Салдин С. А.; книга: Кандра. Ёвтнемат. 1934.

Последнее обновление страницы: 2016.09.12
На главную