КАНДРА

Кармась суньдерьгадомо. Пувась экше варма. Весе паксянть келес срадсь пси кшень тантей чине.

Кандрань бригадазо тусь станов. Сонсь Кандратя ловсь остатка боровкатнень ды капшась сёрмалемест книшказонзо. Чоподанть пачк сельмензэ нейсть уш беряньстэ. Сон эрьва од боровканть вакска ютамсто а ламос лоткиль, книшканзо кепедилиссе верев ды сельмень тетькезь зярскак ваныль эсинзэ крючкатнень лангс, прок вешнесь чаво тарка од цифрантень.

Стансо бригадирэнть учость ужинамо. Нуицятне ойсесть толбандянть перька ды чатмонезь кулосоность, кода лакны котёлсонть ямось.

Толбандянть эйстэ а ламодо ве ёно чалгсезь жниванть ланга ацавель кувака полок — те столень таркас. Кшень порциятне кирпець ладсо вачказельть ниле ваканга. Весе столенть кувалт кавто ёнга ряцек аравтнезельть алюминиень ащо блидят.

Кода Кандратя сась станонтень, сех од нуицясь Ласей Паул кевкстизе сонзэ:

— Зяро пулт савить эрьва ломаньс?

— Кавтосядт пель марто! — гайтев вайгельсэ серьгедсь бригадирэсь, сонсь якстереармеец ладсо вачкодинзе пильгензэ ды макссь честь.

— Вольна-а-а! — рангстась Ласей Паул.

Кандра-низэ кежейстэ варштась мирьдензэ лангс.

— Эйкакшокс тейнят. Сакалдот коть визьдевлить! Паряк теть эщо пионерэнь дудка максомс?

Нуицятне пейдезевсть. Кандра-нинзэ мельс, неявсь, пек тусть эсь валонзо. Сон а ламос чатмонезь одов мерсь.

— Виде, пионерэнь дудка ансяк кадовсь максомс!

— Эх, — укстась Кандратя, прок корштась свежа кошттонть. — Улевельтьдеряй монь пель сядо иетнень таркас ансяк комсешкатне!.. Ды мон сестэ тонь кондямо сыре каргонть лангс аволинь варштаяк. Муевлинь эстень кемгавксово иесэ мазый ударница — ансяк кирьть!

— Мук! Нейгак эщо эзить поздая, — музгорьдезь кортась низэ. — Ки теть а мери — мук!

— Пелян, алимент кармавтыть кедьстэнь пандомо, — отвечась Кандратя.

Весе ойсесть ямдо ярсамо. Кандратя эсь ваканонзо марто озась толбандянть ёжос. А ламос аштезь стясь столь экшстэ ды мольсь ваксозонзо ярсамо Ласей Паулгак.

— А вечкса чоподасо ярсамонть, — невтсь Паул пенчсэнзэ столенть ёнов, — секень вант ямозот таракан пры.

— Вант, пазось верьде аволь сельге ваканозот истя кортамот кис, — пеедезь мерсь Кандратя.

Паул кургстонзо ямонзояк пургизе. Столь экшсэтнеяк кармасть ракамо.

— Ме прок эльдьть цяхатадо! — каявсь Кандра-низэ перьканзо аватнень лангс. — Пазонть лангсо охальничатадо...

Эзть лоткавтово тензэ аватне ракамодо, валонзо стяко ёмасть шумонть потс. Вырк ёртызе Кандра-низэ пенчензэ. Стясь столь экшстэнть ды вередемсь мирьдензэ сюдомо.

— Сыре дурак! Нать превстэ лисить, сырнеме кармить? Виде, превстэ лисить... Истяк пазонтень, мейсь педямс! Кода, дёго, келеть эзь коськ! Шачить бадюлякс, пингезэтькак, нать, кадоват истямокс.

Кандратя капшазь корштнесь вакансто ямонть, кулсоманть кис прянзо а ламодо чиремтизе нинзэ ёнов.

— Ежов монь бабась, прок ривезь! — кармась кортамо бригадирэсь. — Кода сэвевсь ямозо, сестэ пенчензэ ёртызе. Мекс бу седе икеле а ордадомс: яла монень мезеяк кадоволь.

— Кадовсь эщо! — рангстась низэ. — Прят пезэмскак саты. Дай, злыдарь, пря-киськезэть валса, паряк, седе превейгадат! Визьдевлить коть сыре-чидеть. Ёвтык, мейсь теть эрявсь пазонтень уромомс? Кода теть а визькс?

— Визькс а педи киськс! — невтсь Кандратя эсь пулакшонзо лангс.

— Тьфу, киска! — сельгсь Кандра-низэ мирьдензэ ёнов.

— Нейсак, Павел Ильич, кодат видельть валон: аволь пазось, паз ава ваканозот сельгсь! — мерсь бригадирэсь Паулнэнь.

— Узы-ы, киска! — прок алкукс киска узавтсь Кандра-низэ.

— Гав, гав! — чова вайгельсэ онгсь Кандратя.

Ласей Паул валяясь толбандянть вакссо ды ве кедьсэ ёзась пекензэ. Столь экшсэтнеяк ракамодонть каднызь ярсамост. Ансяк Омелькань Филятя ськамонзо марявсь цямкамодо, коцькерясь котёлонть потмакссто тустотнень.

Вармакс ютась Кандра-низэ станонть потс. Курок стякшность аватнеяк ды вейте-вейте тукшность мадеме.

Кандратя кандсь берима пенгть, путсь колмо-ниле полинат жартнэнь лангс ды кармась цигаркань тееме. Менельсэнть, прок сырнень мекшт, липнесть певтеме тешть. Апак нуе розенть потсо пижнесь кочкодык.

— Тон, Кандря-леляй, ай арсят, нать мадеме? — кевкстизе Паул бригадирэнть.

— Ней, брат, монь тевень кальдявт! — арсезь мерсь Кандратя. — Монень ней мадемскак а козонь. Бабась ваксозонзо а нолдасамам. Учан часошка... Кадык матедеви седе парсте, мейле уш пушкасояк а сыргозтеви — коть пря-песэнзэ леднек.

Пенгтне цятортсо кармасть паломо. Толось якстере кельсэнзэ нолсесь килеень полинатнень. Толбандястонть пакся цирькун ладсо перть-пелев кирнавтнесть тюжя сяткт; сынь васня зярскак ливтясть чоподанть потмов, тосо а ламос кирдсть ве таркасо, прок оймсесть, ды мейле уш соласть. Паул ацась толбандянть ёжос олгт, лангаст каясь чапан, кандсь лия одижат.

— Дай теске мадьтяно! — кенярдозь мерсь Паул.

— А берянь, — согласясь мартонзо Кандратя.

Ласей Паул мадсь кунст, пильгензэ вельтинзе чапансо. Кандратя прась ваксозонзо пеке-киське лангс ды чатмонезь кармась ваномо, кода икелензэ налкси толось.

— Кандра-леляй, а шка эщо нить пря-песэнзэ пушкасо ледемс? — пейдемань пачк кевкстнесь Паул.

— Ней эщо тандавтсак — седеензэ сезсы, — састо мерсь бригадирэсь. — Довакс мон ай арьсян кадовомо.

Друк Паул велявтсь Кандратянень чама ёндо ды энялгадсь:

— Кандра-леляй, ёвтнекая, инескеть, мезеяк эсь эрямостот!

— Сутямомс, эдь, эряволь, — аволь кеместэ мерсь Кандратя, ды шикадсь толонть потс кавто эчке полинат.

Паул чаркодсь, што Кандратянь эсинзэяк ули кортамо мелезэ, эряви ансяк энялдомс а ламос, ды юксеви келезэ.

— Чокшнесь эщо аволь умонь, — энялдсь Ласей Паул, — удомс шкась кадови байтяк. Нуеманокак ванды ансяк обедс. Ёвтнекая!

Кандратя витинзе пенгтнень, сайсь тонол-пе, кирвазтизе цигарканзо ды козкстась.

— Эрясть-айшть, кода ёвкссо мерезь, атят-бабат кавонест, — састыне кармась ёвтнеме Кандратя. — Ульнесь сынст вейкине какшост. Эрясь сон тетянзо-аванзо марто, прок пазонть кавалало. Ансяк мольсь те а кувать. Атясь прась — кулось. Бабась калмизе. Топодсть сестэ какшонтень, дабишь монень, кавксо иеть. Пек кеместэ сювордымизь нужась казямо рукавцясонзо! Кал ладсо карминек пикстерьдеме кедьсэнзэ. Менеме яла нокинек, пикстерьдинек. Кинень охота вачодо пильгтнень веньстямс? А сон, нужа-матушкась, свисти ды свисти. Кода чаво сусекезэнек лазызе прянзо остатка чеересь, терьдимем авам ды мерсь: «Азё, мери, цёрынем пурнамо». Ульнесь тундо. Рощасонть морасть цёковт, вальманок икеле коштангалесь пиже сарахансонзо тетянь кедьсэ путовт килеесь... Проштинь эсь авкаенть марто, саинь сумкине ды туинь Куляз ёнов, вирень сторонав, чарынь-крандазонь теицятненень, лазонь-шочконь пилсицятненень. Теевинь ништеекс... Эрямось неень коряс сестэ пек берянель. Сеедьстэ ульнесть вачо иеть, пожарт, эрьва мень морт-халерат, шайтянт, — ней те эрямонть ледстнемскак страшна! Монь ништеень ремеслам эзь удала. Монтеменьгак эйстэдест ульнесть певтеме. Молят бувала ульцява ды ванат: тесэ ништей, тосо ништей, каршо вастат ништей, мельгаткак моли ништей! Эрьва вальманть ало теке тев маряви «паз максозо», «паз максозо». Пек эзь вечкевть пазось тень сестэ уш. Жуликень кондямокс тень неявсть сонзэ ледстницятнеяк ды пазось сонськак. Седеяк покордавилинь «не прогнёвайся» валтнэде. Коть мон эзинь чаркоде, мезде сынь кортыть, но марсилинь сынст истя сеедьстэ, натой онстонгак неть валтнэ карвокс бизнэсть пилесэнь... Берянь, цёрабай, ништеекс! Те шкас повняса, кода виздилинь ульцясо ялгадон. Цють мезе кинь обидясак эли истяк мекскак а ладят, ништей теть мерить. Те шка покордамо монень сестэ весе светэнть лангсо арасель! Мон эсь прям эйсэ ловинь будулмакс: касоманть касы, лезэ эйстэнзэ а ломаньнень, а эстензэ чувтонтень... Истя злыдарничинь кавто иеть...

— Аштекая а ламос! — перечизе Паул Кандратянь, ды ношкстась станонть ёнов. Мекев сась берима пенге марто.

— Те ладс! — шнызе сонзэ бригадирэсь.

— Мезть кармить тейнеме пурнамодо мейле? — кевкстнесь Ласей Паул.

— Мейле, — таго ушодызе кортамонзо Кандратя, — сивединь тувонь ваномо подпаскакс. Мон стада мельга кавксошка иеть якинь. Ванынь тувоткак, вазткак, реветькак, ванынь скалткак ды, натой, галаткак... Не паро-читненьгак савсь ваномс! Тувонь ваномась истяк а берянь. Пси чине паньсыть лей чирес, косо рудаз, ды коть чоп удок. Берянель ансяк славась... Тувонь ваныцятнень седикеле ловсть сех берянь, прок кодамояк нулготькс ломанекс. Сынсь пастухнэяк, — ревень эли скалонь ваныцятне, — мик сыньгак пеелесть лангсонок... Вазтнэнь ваномсто эрявить пильгть ды пильгть! Тесэ ульть эряза. Кодак чись а ламодо карми пидеме, кепсесызь пулост ды — теке неевтест!.. Мон васня оймень пиемс чийнинь яла мельгаст, кодаяк вейс а пурнави сралезь стадам. Мейле чаркодинь ёрокозост: кода сынь авольть ардтне, яла теке мекев пурнавить, нама, бути пек васов а оргодить. Учок ансяк экшэньдямонть. Сех пек, цёра, тусть мелезэнь реветне. Сынь ваз ладсо ай артнить. Пси шкане нолдтнесызь пряст, промить ве куцяс, баграсояк а лутневить вейкедест-вейкедест. Срасть вечкить экшэ тарка Якшамоне, виде, бойкасто стадась яки, но таго яла, кода мернить ней, тевть ветят ревень весе обчестванть марто... Реветне пачк вейсэ эрсить, истят сынь коллективист! Вечкилия ревень ваноманть! Лиянень весе реветне неявить вейкеть понасо, меремс, оровтсо кснав ладсо. Мон бувала, кодамо покш стадась аволь уле, весень чамава содылинь ды аволь ансяк содылинь, эрьвейкентень, сатовольтьдеряй валон, лемгак путовлинь. А уш реве-левкстнэнь вечкилинь, палсемест аноколинь! Понаст чевть, прок пух, сынсь ванькскеть, добройнеть...

Кандратя витизе пинжак сивензэ, шочизе верьсе плащанть. А ламос чатмонемадо мейле варштась менеленть лангс ды кармась кортамо седе капшазь.

— Эринь сестэ, нама, икелень коряс седе парсте. Эсинь велесэ ванынь а ламо. Свал косояк ве ёно. Кудодо-кудос яксемадонть куломс мелем молькшнесь! Тече ярсат ды удат ве кудосо, ванды — шабрасо, мейле понгат таго лиянь кедьс, весе веленть ютасак. Уцилинь косо понгсь, но седе сеедьстэ киякссо. Мейсэ якат паксява, секень эйсэ удаткак. Рудаз шкане пракстат зярдояк а коськенить. Эх, Павел Ильич, карьть ламо калавтынь! Кодак недля юты — одт давай. А сёпса: минек, пастухтнэнь, эрьвейкесь стараясь андомо седе «парсте». Понгат сюпавнэнь: каить пешксе вакан чапаськадозь ям, сывелесь прок левш-тапо — зяро мелеть порть, яла теке меньгак тансть эйсэнзэ арась. Тонсь содат, кода эрси велесэ. Каштомтнэнь уштнесызь зоря ланга, чокшнес псист а кирдеви. Мейле брустят кельме модамарьде, меельсь пелев чапамо ловсо марто кашадо. Кашанть вечкилия... Середняконь кудосо андсть текеде, ансяк бути модамарьтне арасельть ды ямост сывельтемель.

— Сынсткак ямост чапамоль? — кевкстсь Паул.

— Яла теке! — мерсь ёвтницясь ды авулдась кедьсэнзэ. — Чапамо ямдо эрьва кудосо андсть. Те ульнесь прок закон... Тень таркас пек тантейстэ ярснилинь паксясо. Кодак обедстэ озат лисьма чирес, пель кше увтят! Тантей, брат, ведь марто рошксесь, почодсак печтенть салсо. Ух, кодамо тантей!

— Кандра-леляй, — пшкадсь Паул, — марсеви, буто тонть козейкат сюпавонь семиястоль, кода истя сон лиссь экшэзэть?

— Тень ёвтнеса, — мерсь бригадирэсь, — тонеть, цёрабай, тень эряви содамс ды парынестэ судозот чапомс! Васня ансяк зярояк валт ёвтан эсь кувалман. Мон стада ваномсто истяк аштемадонть ды тошна-чиденть морсилинь нудейсэ... Нудеень ульнесть рога марто, морамсто гог, гог тейнильть. Нама, неень радионть вакссо монь музыкась... кода меремс, ну, прок саразось цёковонть вакссо!..

— Саразось — те буто радиось, цёковось — тонть нудейтне? — пеедезь кевкстизе Паул Кандратянь.

— Улезэ тонть ладсо! — согласясь Кандратя. — Ну, вот... Бувала чокшне кода карман седямо, кесак тейтерь ваксозон чиить. Лиясто ёжост маштомс киштить! Седеяк паметтэме весень кадылинь эсь лужаня моросон... Кода топодсть тень кемгавксово иеть, ёртыя локшом, сивединь ве кулачокнэнь роботникекс. Ломанесь сон ёжоволь. Кирдсь кабакке, састыне симдясь православной эрзятнень винадо, монь кондятнэ яжасть лангозонзо ловажат-пакарьть, сюро тензэ виднесть. Тевезэ мольсь, перть велетнестэ ярмактнэ тензэ чудесть эрьва чистэ, эрьва чассто, чудесть чольнезь! Кассь ярмаконь мешокозо, кассь сонзэ пекезэяк... Боцькакс пупавсь!

— Кодамо панарсо якиль? — друк кевкстизе Паул ёвтницянть.

— Мейсь тонеть панардонзо содамс! — дивазевсь Кандратя.

— Мон некшнинь меля истямо пекев ломань... — салавинька пеедсь Паул.

— Косто некшнить? — а кемезь варштась бригадирэсь Паул лангс. — Сон умок уш кулось.

— Газетстэ, — отвечась Паул.

— Кунсолок! — ацерьгадозь мерсь Кандратя. — Видеяк, пекезэ озорнойшкаль. Чистэ пиядо глохтясь, секс пекевельгак... Сон кабаксо аштемадо башка кодамояк лия тевс эзь маштово. Весть натой видстэ тень мерсь: «Куя ломанесь, келя, сех пайстомо ломань, сонензэ пингензэ перть сави кандтлемс лишной сталмо. Туи, мери, мелезэть, понгавтомсдеряй котмерезэть пондонь гира?» Истямо, брат, сон ульнесь гуй, седе а ков! Кавто иеть кедьсэнзэ роботынь. Те шканть перть сон седеяк сюпалгадсь. Кармась макснеме ярмак долгс, весе веленть коморонзо потс сювордызе... Кодак ломаненть сайсызь подушноень кис остатка скалнэнзэ, бертьсэ тензэ чии! Лиясто аволь сонензэяк, васня монень сыть, пильгезэнь анокт сюконямо, штобу мон, значит, вал кисэст каявлинь... Тото, брат, кежень сестэ сыльть! Текеде, некак, кадыяяк азоронть. Карминь эйстэнзэ нулгодеме мик...

Толбандянть вакска цильнезь ливтясь озяске, мельганзо келей пуло ладсо усковсь раужо покш нармунь. А ламос аштезь овсе маласто марявсь кундазь озяскенть вайгелезэ.

— Вик, вик, вик...

— Весть истя иредьсь прясон чавия ды туинь, — кортась яла Кандратя. — Пель иень кис жаловнямгак эзия сае! Мейле сивединь покш братонстэнь. Теяк ульнесь сюпав, ансяк седе лавшоль. Ёжовчись тензэ эзь сатне!.. Куломс эссе вечке сон эсь родной братонзо — кабаконь кирьдицянть. Иень иень вейке-вейкест марто эзть корта, коть эрясть ве куринкасо! Больчом, текень кувалт сиведимемгак сон... вишка братонть кежензэ савтомань кис. Ды монськак теньсэ прок кеж пандынь азоронтень!

Кандратянь вайгелезэ лисьма прясто чудиця ведьне ладсо састыне дорнось. Паул кулсонось сельмень конязь, прок симезь-симсь.

— Ульнесь те омбоце братонть, — марявсь бригадирэнть вайгелезэ, — вейкине тейтерезэ. Мазымень тейтересь аволь пек мазыель, но рунгс пазось эссе обидя. Сэреель, виевель... Мон сестэ вечкилинь, пек вечкилинь шабра велестэ ве тейтерька. Эх, кода вечкилия! Оланя тускезэ тень пазавакс ульнесь. Чекавлинь эйзэнзэ... Кодак вастовдано мартонзо, — минь вастнелинек чуросто, — озатано козоньгак а неявома таркас ды чатмоньдяно... Паро чатмонезь аштемс вечкемат вакссо. Озат бувала ёжозонзо, прят путсак элезэнзэ, а сон черьсэть налкси... Прок онстон те весе ульнесь. Нейгак ледьстямстонзо, секень вант, сельведень кснавкс кармить певереме!

— Кулось нать? — сергедсь Паул.

— Мейсь кулось? — мерсь ёвтницясь. — Полавтыя те каркадилэнть лангс!

Бригадирэсь невтсь кедьсэнзэ станонть ёнов ды сельгсь.

— Превтемелинь сестэ... Кармасть весе тень кортамо, — авамгак, роднян-раськеньгак, — штобу мон кучовлинь тетянстэнь покш кудат. «Те тонть часият, — кортась сестэ авам, — истямо сюпавонь тейтерь вечки эйсэть». Монь эсиньгак бачканть сюпав-чизэ превень прок веляськавтынзе... Арсинь сонзэ вельде ломанькс лисеме, ды те псинть пачк кучинь покш кудат. Кода тетясь марясь, ки чиявты тейтерензэ, келезэяк кундатотсь. Покордамодонть чамазо модакс раужкадсь... Ништей арси саеме родной тейтерензэ! Покш кудатнень сеске панинзе, мельгаст панимем моньгак. Ковонь ютазь уш мон аштинь тейтерензэ марто венець ало. Серьдешноентень савсь тыки максомс эсь вечкема тейтерензэ роботникенстэнь.

— Мейсь согласясь? — кевкстизе Паул Кандратянь.

— А мезть ульнесь лият тейнемс сонензэ, — отвечась Кандратя. — Тейтерензэ уш пекиявтыя.

Пувась экшэ вармине, нардызе жартнэнь лангсто куловонь чова келькшэнть, ды почтсо прок почодынзэ толбандянть вакссо ломаньтнень.

— Тонть зяро, Паул, иеть? — апак учо кевкстизе сонзэ Кандратя.

— Кевейксэе!

— Парт теветь, цёрабай! — укстазь мерсь бригадирэсь. — Пек сявады сельмем лангозот. Мазыйстэ пингеть печтясак! Пек мазыйстэ! Сеть умарькснэстэ, конатнень путынек неть иетнестэ ды путтано ней, ламо умарьть сезят. Монь кондятнэнень уш а учовить сынст кенеремаст — калмс вандано. Арась, а учовить. Иенек ламо... сырединек!..

Ёвтницянть вайгелезэ прок сивсь. А ламос арсемадо мейле кармась кортамо верьга вайгельть.

— Монь эйсэ вана весе ловить шуткав ломанекс ды, видеяк, мон вал мельга зепс а эцнян. Лиясто келем эрси пици палаксонь кондямо, бути уш сон киньгак пицесы, шлязьгак а шляви! Но ломаньтненень сельмс седе пры се, мезесь ашти лангсо... Лангс ваномс мон нейгак весёлан. Монь зярдояк а нейсамак ацерьгалемадо!.. Кургом латякарькс а кандтлян. Эрямось кувать эйсэнь кирдсь казямо рукавцясонзо, сон тонавтымем нужанть сельмс ваномо смелстэ, апак сорно, прянь апак новольстя... Секс самай свал ваныньгак весе лангс пеедезь. Ков седе берянель эрямом, ков седе кеместэ свистясь эйсэнь нужась, тов мон седеяк алякс кирьдилия эсь прям. Истя мон теилинь седикеле... ды лиякс а кодальгак! Сестэ, рангт иля ранго — кияк а марятанзат. Пек уш ламольть рангицятнеде... Ней тевесь лия. Ней, брат, мон ансяк сускинь умарентень, — кадык сон эщо пиже, таркань-таркань сэпей, — яла теке суския ды фатинь, нейке уш сон тантей, кодамо ули танстезэ допрок кенеремстэнзэ? Теке шкастонть прок потстон кияк корты тень: «Тон, сыре кандо, иля учнеяк. Умаренть кенеремс сукстнэ ловажаткак сэвсызь». Кода, тонть койсэ, шождыне монень тень марямс? Стака, Павел Ильич! Монь кургом нейгак икеле ладсо яла пееди, но потсон седеем уш раужкадсь. Сявады сельмем тонть кондямо од ломатнень лангс. Эх, сявады! Часливойдядо тынь, цёрат... Пингесь тынк казидизь истямо питней казнесэ, истямо казнесэ, конань чаркодемс тынк зярс-мезе превенккак а сатыть! Кенярдт, Павел Ильич! Минь уш, атятне, макссынек весе виенек, кона эщо чуди сансонок, макссынек тынк паро эрямонть тееманзо кис...

Кандратя сорны кедьсэнзэ тейсь цигарка ды кармась сокарямо кельме куловтнэнь. Сон вешнесь жарнэ.