Михеень онозо

Курок уш недля топоди, кода ормалгаць Михей. Эзь тук, пек эзь тук сонзэ мельс сэредимась. Чинь-чоп аштек мадезь ды вант потолоксо таракатнэнь ланкс... Михеень койсэ, седеяк улевель берянь, авольть ульгак таракантнэ. Чаво ласнэ ланкса ванумасонть парось аламо. Ней коть ули мезе ланкс ваномс.

Михей содасыньзе уш таракатнэнь обуцяст. Чить промить чопуда таркас, пряст нолтнесызь алов, прок реветь пси шкане. Чопонь пелев весе кармсить пивтеме; веенцнэ валгить кшеде ярсамо, лиятне порнить столь нардамо левшенть эли рудазов пракстас уромить. Пек ярсыцят таракатнэ. Михей соды эйстэст вейке покш таракан — се натой чувтодояк ярсы. Лиясто мик цяторк, цяторк тейни. Истяк Михей эзилине вечк сынст, хлопаесь эйсэст карьсэ, те покшонть сурсо эссе тока сестэяк, зярдо сон пецьковтызе Михеень конянзо ланкс. Те покшось сонензэ неявсь пек ухачокс.

Пек эщо Михеень мельс тусь докторось. Сонзэ ускокшнызь больницясто. Кувака, прок слега, сельмукшсо, ашо коцтонь одижасо. Михей нейгак пеедезь лецьнесы сень, кода вачкодизе конянзо докторось кудов совамсто. Нать сельмукшонзо беряньстэ нейсть. Кода панжизе кенкшенть, бамк эшкевсь кенкш косяконтень. Натой судо прязояк якстерьгац.

Михей сеске раказевсь. Повнясы, кода авазо кежейстэ варштась лангозонзо, врачось жо мольсь Михеень малазонзо ды пеедезь мерсь:

— Азор! Мейсь истямо алкине кудо сроить?... Прям тапавтык эдь!..

Михеень мельс сон сеске тусь. Сонзэ эщо кияк эссе лово покш цёракс. Мелень сёксня школавгак эзизь прима, мерсть — «вишкинят». Тятязо ласте изамояк эссе сайне. А ней врачось покшокс эйсэнзэ лови.

Мейле докторось озавтызе Михеень, кепедизе котьмере пельде панаронзо ды кармась кунсоломо цилемень кондямо турбинень пачк. Мерсь оймень тарксемеде, Михей турбинеденть кутькави, секень вант скокади таркастонзо.

— Пички... тевилявонзо шумбрат! — кеместэ мерсь докторось Михеень аванстэнь, сонсь чевте кецэнзэ валаськавтнинзе Михеень черензэ.

Исяк Михей чокшнэ нилсь ашо ризаня парашка. Вемберть ливезь ланкстонзо чудесь, панарозояк начко. Текеде течи ёжозояк седе паро. Ансяк козумась аламодо меши — истяк овси шумбра.

Лиясто Михеень мельс ледиль ваямозо. Прязо пешкедиль шумдо, рунгозо тарск теиль. Сестэ сон пельсь кудосонть ськамонзо. Михей парсте содасы, косто нажувизе те орманть. Сонсь чумо. Ней уш лембе, кепе чийневель, сон жо лужали краватсо.

Ульнесь виев чады. Баба латкованть пондакшов кискакс скокаезь кеверсь навуз ды лов марто бутрав ведесь. Михей ялганзо марто сёлт брудясь. Покш сёлтось. Валське мартосто обец кирсь. Теевсь натой эрькень кондямокс.

Вансы Михей: сёлтонть прява яксяргот укшныть. Михей — кундамост. Зярс чийнесь мельгаст, шалнозь сась латко пря ды сезизе сёлтонть. Михей кода ульнесь навуз куця ланксо, истя ведесь салызеяк. Васня Михей тандаць — седеезэ кулось. Мейле марясы, прок ливти ковгак, лембе тензэ, паро!... Ансяк ломатне мейсь бути пижнесть.

— Кундык!.. Кундык!..

Месть ульнесть теде мейле, Михей а соды. Кода панжинзе сельмензэ, вансы сон каштом ланксо, копачазь тетянзо овчинань шубасо.

Кодак пичкась, Михей чиезь тусь ульцяв. Эзь кирьде седеезэ. Седе курок неемс Анкань. Месть, каня, мери сон?

Михеень сех паро ялгазо — те Анка. Пек паро сон тейтерькась. Зярдояк а сёвны, мездеяк а пели, зярдояк а нейсак аварьдимадо.

Аволь ансяк текень кис кундызе сонзэ ялгакс Михей. Те пролкасонть Михейшка цёрынетькак арасть. Ули вейке — Будай Филя — ды зрячей пек ломанесь. Тюрьган. Лиятне эли Михейде покшт, сонзэ ялгакскак а ловсызь, эли овси вишкинеть — нолгарьть. Ансяк Анка Михеень иесэ.

Истя советнат ульнесть Михей марто Анкат, истя советнат, зярдояк аявовильть вейкедест-вейкедест.

Татайсэ налксить вейсэ, сёвонень ломать, морамкат тейнить вейсэ, сувтемесэ калонь кундамо, шкергень кочкамо — эрьва ков молильть кавонест.

Ков седе малав Анка-мезень кудонтень пачкоць Михей, тов седеяк ливтязь ливтяволь. Михей уш нейсы Анкань ашо прянзо, сон вечкима таркасонзо — виход икеле. Михей арьсесь эсь пачканзо, молян салавине удалдо тандавца. Эзь кирьть седеезэ, цяхазь прок ранкстась:

— Анка!

Кепедизе прянзо Анка ды кежейстэ лацо варштась лангозонзо. Татайсэ налксиманзояк эссе кат.

— Тон мекс? — абунгадозь кевкстизе Михей.

— Мон ней мартот налксеме а карман... — мерсь Анка ды кармась ёвтнеме. — Минь совинек колхойс!... Монгак якинь промксов. Кантор икеле ульнесь, ламо атят кедь кепецть. Монь тетямгак. А тонь ават пижнесь яла... Сон аволь сознательной... Истя монь тетям мерсь... А сон сёвнызе тетянь...

Михей чувтомозь кунсолось ялганзо, абунгадумань пачк эзь сода, месть тейнемс.

Анка путозь-пуць валтнэ эйсэ:

— Моньгак ават сёвнымим. Кода промксто самсто неимим, мерсь тень: Михейнень, келя, иля сакшно. Тон колхозницат. Серькат, мери, яжасынь. А тетянь кочкизь председателькс. Сон бедной. Кулаконь каршо моли ды сёрмадомояк машты. Тетям чокшнэ ёвтнесь: сы, мери, тенек трактор... крандазонь кондямо, кшнисэ весе пингедезь, поцонзо тол. Соки лишмевтеме, а уш урны — пургине лацо. Понгиньдерят алонзо — сюлот мерькасыньзе! Ансяк сон ломать а тапи, ансяк модать соки...

Михей васеньцеде мари истят тамашат. Сон кармась арьсеме те тол марто крандаздонть. Дивакс тензэ неяви се, кода ламо кармась содамо Анка те шкастонть, зярдо сон сэрець.

— Колхойсэ панжить миненек сад! — таго кармась кортамо Анка. — Кармить андоманок калацядо, ловсонь кашадо, пельс пиезь алдо. Сёрмацамизь пионерэкс. Мон карман чистэ якамо. Кода касан, улян учительница эли делегатка.

Синдевсь Анкань вайгелезэ, варштась Михей ланкс ды укстазь мерсь.

— Тонь марто минь явовдано... Тынь аволь колхойсэтядо...

Петерьсэ кармасть чудеме Михеень сельведензэ, марясы, прок седейстэнзэ панкс лутасть. Варштась лавтовонь трокс Анка ланкс, васоцть сельмест ды аламос аштезь урнозь Михей напустясь кудов.

Кодак чийсь кудов Михей, куйсь каштом ланкс, копачась суманьсэ ды кармась салава аварьдеме. Пек састь кежензэ аванзо ланкс. Чикордыть пеензэ, кирга парезэнзэ прок пиень ал пезнась.

Сех покш тараканось валксь стенаванть састо, истя састо сон зярдояк эзь моль. Лангозонзо ванозь седеяк ацерьгаць Михей, плестядизе тараканонть, стенантень ансяк начко тарка кадовсь.

Кувать чокшнэ авазо терць Михеень ужинамо. Эзь валк.

— Мейсь ордадыть? — кевкстизе авазо.

Михей эзь пшкатькак. Сон ней анок карьсэ ёртомо аванзо ланкс. Кареськак кедь маласонзо ульнесь — эзь ёрто, кирсь.

Вемберть Михей он нейсь. Сон неизе, буто сась кшнинь крандазось, ланксонзо Анка пееди. Ождятне кецэнзэ уськень, эчкт. Мейле нейсь такодамо мазый сад. Умарькснэ, лёмзёркснэ ашо кисиясо прок вельтязь — тветить. Ве чувтонть ланксо, твет поцо, буто письмар, мейле велявсь сон Анкакс ды таго мызолсо пееди. Мейле буто Анка венстизе кедензэ ды сынь кавонест ливтясть пантнэнь ды виренть велькска. Пачкоцть пельтненень. Теде мейле валксть мода ланкс ды озасть кшнинь крандазонтень. Крандазось прок крандас, ансяк урны пек ды чикорды лиякс — заслонка лацо.

Сыргойсь Михей. Авазо алкукс калдорць заслонкасонть — куйсь турбань пекстамо.

— Михей, азё тетять терьдик завторкамо, — мерсь авазо.

Михей кежейстэ:

— Азё тонсь!..

Пек дивазевсь Михеень авазо не валтнэде. Зярдояк истя кежейстэ цёразо эзь корта мартонзо.

— Мон теть невтян «азё тонсь»! — авулдась авазо. Михей кундынзе кедензэ, прок кечкайсэ. Авазо тандаць мик.

— Вай, месть тейни цёрам! Нать, превстэ лисить?..

— Тон тонсь превстэ лисить... Весе колхойс совить, тон каршо молят. Несознательной... Мон, а сёрмацтыньдерят, кулок — кече ведь теть а кандан, пенге полина а лазан!..

Вейке оймсэ Михей меринзе не валтнэнь. Ки соды месть эщо улевельть, аволь совадеряй те шкастонть тетязо.

— Ну, баба, — мерсь совамсто тетязо, — мон тонь сёвнумат ланкс эзинь вано. Колхойс совинь... Минек ялгантень лия ки арась.

Прянь-полдань синдезь напустясь Михей Анканень ёвтамо...