Улеза мекольцекссь // сборник Велень расскаст; автор: Родькин С. И.; 1938, июль. Мордовская библиотека
Книга: С. Родькин. Велень расскаст. — Мордовское Государственное Издательство, Саранск, 1939. — с. 33—40

<< Казна << >> Васедема >>

УЛЕЗА МЕКОЛЬЦЕКССЬ

Микитарясь явфтозе мирденц алянц эзда и лоткась работамда колхозса. Сонь ответоц сяколь: «Коза молян, потяй идезень дряй шава куду кадса: аляньке работай, сявок саты, чай тейнза колма ломанць тряви!»

Илять, коста сашендсь мирдец работама вастса авась мярьгондсь, штоба, тонац келькселезе да сияк нинге мярьгондель: «Ах монь Анютазе, акша Кулюнязе, кода мон тонь кельктя!..» А кда Микита коста-коста сиземать мархта аф тиельхце тянь, эста Микитарясь ордашкоткшнесь, уженга афоль кая Микитанди. Саволь эста Микитанди эсьтейнза сюволямс пянакудса. Но Микита пцтай наголь ванондольхце аванц мяленц, сяс мес сон аванц пяк кельгольхце. Сон алясь — сятявдонга-сятяв, сетьме, аф пяк корхтафкшу ломань.

Весть розь нума пингть колхозсь получандась метеорологическяй станциять эзда телефонограмма, што ня шитнень учсеви пизем. Колхозти эрявсь аделамс мекольдень апак лятть и сотф розень гектархне (колхозсь лиссь розень урядама колмоце шись). Омбоце бригадань бригадирсь Илькань Петясь прважась лядема кафта жнейкат и бригадастонза сембе алятнень пеелемса лядема, мельгаст кучезень сембе бригадастонза аватнень. Аньцек шовдава ашезь лисе паксяв, кода и инголи, Анюта. Сяс бригадирсь сась сонь инксонза саду. Анюта удось крназь марлють эшксса. Петя стяфтозе сонь.

— Эвфтемайть! — кяжиста азозе Микитарясь, кеподезе прянц и кармась шовамост нинге уды сельмонзон. — Коза эряскадат, чай аф пожар!

— Аф пожар, но пизем. Садасак, што эряви лятьфсь сотомс, марамс крескас, ату может розсь колемс ряд лангса, кда ули пизем да пизьси ламос, — убедительнайста отвечась каршезонза Петя.

— Чай моньфтомонга улихть сотыхть? А мон идезень шава куду штоли кадса?

— Сотыхть улихть, но эряви сембонди молемс — сяда курок аделавихть. Кудцень пякстак, а идьцень вона идень ясляв.

— Мыль мезь, кандса мон тоза идезень! Д сон монь эздон аф явфтови мезьдонга. Архт ворьть тяста, тят эняльдкшне перьфкан, сембе сяка аф молян.

— Аф молят — штраф путтама мирдцень лангс. Колмоксть ни вага атказать, симулянтка, — кяжиста мярьгсь Петясь и тусь марлюфнень йоткова садста.

— Ах, прахаванясь сяволензе. Тонга баяркс арать, пинень сельме улефтярят, — сюдось Микитарясь бригадирть эса. Сон ашезь мушенда васта эсьтейнза и стаки увась. Лакась кяжсь потмосонза. Сельме кабанза пичедьфста ульсть нолдафт, кели шамац палсь. Учсь илятть эса: сай мирдец, кинди аердцыне кяжензон. — Сай сонць — лоткафтса работамда, пежеть тоба лоткафтса, ату сон виде вайме: старандай, стак шави пря...

Микитаряти илядсь сашендсь аф эряскодозь. Сон таргавсь тейнза недлянь кувалмоса. Мярьгондихть, шись обедти самс моли офта лангса, а обедта меле нумол лангса. Но Микитаряти пяк ламос таргавсь и обедта мелеське. Кода-аф кода, а илядсь сась. Вага вальмятненди ни прашендсть мады шить цильфонза — вальмятне бронзовайста пиндолдсть. Шись, кона тячи шиньберьф пяк пицесь, валгсь туця алу. Анюта лифтезе прянц вальмава и учсь. Ульцява кеподсь туцякс пуль, сяс Анюта сьолгозе вальманц. Пульсь ашезь йотне снярс, мзярс йотасть жувататне: инголи тувотне, мрьнязь сай пурьхцнень мархта, мельгаст васне, сяльде траксне, а мекпяли, пцтай шовдаста, и учатне, конатнень вярозсна, эрьфнемок эсь тядяснон, парасть. Анюта потязе траксонцка, а лядихне и сотыхне нинге ашесть сашенда.

Ульсь ни поздна. Машты ковсь (сон ульсь пяле) кеподсь ни вяри, сон ульсь нинге якстерь, а аф сиянь тюссоль. Йотай туцятне, сяконь содасть, кяшендезь сонь. Туцятнень йоткова няфнезь пряснон, аф кунардонь лисьф, шуроста ащи тяштенятне. Аньцек тя пингть паксять ширде марявсь морось — моразь састь розень соты аватне, мархтост и алятне, конат лядсть пеелемса. Фкя-фкянь коряс и йотазь кафта жнейкатне и пеелемса лядихне и мельгаст соты аватне аделазь розть и маразь крескас.

Микитаряти мирдец учевсь.

— Сать? — ордажста ащезь кизефтезе Анюта. Сон озафоль кудинголе скомнять лангса и нюряфнесь нюрям.

— Сань, — отвечась Микита, — мес мяльфтема ащат?

— Стак. Ярхцат?

— Аф, минь тозк тумстонок ужнаме.

— Маряйть, тяни ва мезь. Саты ни урафнемс...

— Аф шарьхкодян, мезь лабордат.

— Мярьгонь саты пряцень шавондомс.

— Мезь, мезь? — тага кизефтезе Микита, аф шарьхкодемок мезе тиевсь аванц мархта.

— Лоткак, мярьгонь, пользафтома работамда колхозса, — отвечась Микитарясь тяни кяжиста.

— Мес или фатядезь тячи? Поздна, поздна!...

— Ах лима-сюна, ашедязь фатя ли тонцень, прастой улефтярят. Шавонтт вага стак. Тячи сашендсь бригадир лоскодсь — прахаванясь сяволезе — и тюрьфни эсон работама. А тонць думондак, потяй идть шава куду штоли кадса. Мон тяфтаня корхтань и Петяндинге. А сон: «Аф молят — мирдцень работаф шинзон нардасайнек». Микита думондазевсь, сяльде азозе: Васькафнят.

— Васькафнят! — дразнязь азозе Анюта мирденц сяка валонц.

— Мон штоли кальдяв арьсян? Ва мезяма, аф вете иттот трямс, тон илясовок сафтсак. Няйть, сай Москуста Пятувонь Микольсь, наряжаф, бта баяр, идензовок и авацка наряжафт, архт вятьк сонь работама колхозу!.. Тон думондат, што сон работазь станя наряжазень. Аф. Тоньцке кулендить: сяви мезь-мезь мархтонза и — Москуву. Лангозонза туй тавар лоскод, а тяса содасак мзяра ваткай! А тон дряй сонь лацонза аф сафтсак. Вага вандыкиге печк тувонять и архт срхкак, китнень-ятнень содасайть куванят.

Микита тя корхтамати изь шарфта кодамовок мяль, сяс мес аванц ня валонза тейнза, честнай аляти, ульсть аф седи вакска. Сяс сон гразязь азозе: «Казась ломань капстас сувсесь кафксть — удалакшнесь, а колмоцеда повсь. Станя, ватт, пови и Миколь спекулянтске». Аванц валонза «нардасазь трудошитнень» аф ламда аердазь Микитань. Кода мля, вдь сон лувондови сонць ударникокс, а вдруг да трудшинзон нардамс йорайхть аванц инкса. Йорась молемс правленияв, но думондась, што кивок тоса аф ули — пингсь поздна ни. Сяс сон мрдась меки.

* * *

Вишке пизем тусь варьхмодема лангс. Пиземсь изь лотксе и шовдаванга. Пизесь тяни сетьмоста, пингонь-пингонь и резьнязь. Сяс тячи работама ашесть лисе. Колхозонь председательсь пуроптсь заседания. Заседанияса членда башка ульсть рядовой колхозникт и колхозницат, тердьфтольхть Микита и Микитаряське. Ульсть обсуждандафт всякай тефть: райзоть разнорядканц коряс, тя колхозу эряви нинге фкя самосброска — правлениясь путозе кучемс завхозть станцияв «Сельхозснабу» тя жаткать инкса; нинге добувамс кяскафт; корхтаф пинем лядемать колга, што панда пряса пинемсь кенерьсь ни — акша. Няда меле кулцхонтфоль омбоце бригадань бригадирсь Илькань Петясь. Сон азсь колма-ниле ломатть, конат тисть тя важнай, сьоронь урядама пингть лама прогулда, атказакшнесть молемс работама. Ня ломаттнень йоткс повсь и Микитаряське. — Вага сявомс Микитарять, — корхтась сяда меле бригадирсь, — Мирдец ударник, а аванц фкявок трудошиц аш. И мон думондан, што тяса виноват и Микитавок. Месть сон патачкат максси! Эряволь сонцень лангс штраф путомс, сяльде содальхце... Помещенияса кулевсть аф одобрительнай вайгяльхть.

— Ожуда мон фкя-кафта вал азан, — ушедсь председательсь Павел Григорьевич, стямок шра ваксста. Аф ламда думондама меле сон поладозе: Конешна, штрафовандамс Микитань аванц инкса минь праваньке аш. Но эряви азомс тейнза, хуш авацень пяк кельксак — тя и пяк пара! — но тяконь шовор тон кельк и правдатьке. Мярьгтяма видеста, ударниконь лемонь каннемась и аванц работама аф кучсемась — марс аф васедихть кафта вещатне ломаньца, кона канни почетнай лем. Тяфта, Никит Тимофеевич, тиендемс тейть, а станя жа и сембе колхозникненди, аш кода. Кда кизефтемс, молеви ли Анюта работама? Ответсь ули аньцек фкя: «Да». Кинди мля велеса панчф идень яслясь? Аф тейнек, колхозникненди, штоли? Сяс, монь койсон, што идезе аш кода и коза кадомс — тя аф оправдания. Мон думондан, што тя заседанияса Микита и Микитарясь, пяконя арьсемок тя тевть колга, сявихть эсьтейст вал и азсазь, што синь тя пингонь эсь прянь вятемасна ули мекольцекссь, меки оду аф мрдайкс. Монь сембе. Кинь валоц ули.

— Мярьгода тейнь корхтамс, — пшкядсь Матерь, васень бригадаста ударницась. — Минь, колхозник ялгат, содасаськ, што омбоце бригадась наголь илядонды фталу, и тядденге вага илядсь. Колма гектархт суроснон кочкомда мзярда аделазь? Нинге колмочись. Мзярс сатсь капсемс фкя тише капась? Колма шит, а? Тя, ялгат, позор. Тяфтаня ли эряволь тиендемс. Аф, аф тяфтаня. А кда кизефтемс работама аф лисихнень, кинди минь работатама. Эстейнек? Эстейнек. Сяда курокста, пингстонза, цебярьста, кржа имафкс мархта, урядасаськ сьороть, — ули мезе ускомс государствав, сяда лама прай и трудошитиге. Виде штоли?

— Виде, — кулевсть вайгяльхть.

— Пара! А мес омбоце бригадась иляткшни фталу? А вага мес. Сандр калхт кунци, колхозу прянцка аф няфнесы, Анюта кудса, Вера тожа (пуромихть синь эздост!), азорават... Аф кати-кинди вдь эряви работаньке, а эсьтейнек! Ва мезяма, аванят, Вера, Анюта, улеза тя мекольцекссь, аряда сембе, кода фкя, листяма пинемонь сотома, няфтесть эсь прянтень, што тиньге машттада арама аф сялдома, а шнама ломанькс, а тяфтама ломанькс аратада обязательна, кда йоратада сатомда тянь. Ну-ка, арьсесть тянь и путость мялезонт...

Тя шовор Микита, кона аф пароста марязе эсь прянц, виздезь (сонь лангозонза ванцть) мольсь аванцты, кие тяда инголе ащесь прянь алу нолдазь, и кати мезень колга синь кармасть тошкама. Мзярда Матерь азозень лядыкс валонзон, Микитарясь киньге лангс аф ванозь йотась ужеста сяда инголи, кеподезе прянц (свежай шамац ульсь якстерь якстерь анизкс) и виноватайста, прощениянь аназь, азозе.

— Тя улеза мекольцекссь, колхозник и колхозница ялгат, карман работама лисендема сембодонга рана и фкявок прогулфтома...

...Ульцяса эчкста пизесь пиземсь. Велеть кувалмос шудерькскава шудесь мутнай ведсь — куя, жаднай равжа модась топодсь ни симомда. Переса панде йоткне вельф пяшксет ведьта. Перень сьоротне, садтне и яровойхне кенярдсть учф пиземть саманцты.

Июль 1938 к.

<< Казна << >> Васедема >>
«Улеза мекольцекссь», сборник Велень расскаст; автор: Родькин С. И.; 1939.

Последнее обновление страницы: 2018.05.26
На главную