| Садовник // сборник Васень цвет; автор: Прончатов, И. Н.; 1936. | Мордовская библиотека |
Книга: И. Прончатов. Васень цвет. Стихотвореният. — Мордовской Государственной Издательствась, Саранск, 1939. — с. 32—34 |
|
| << Мон эль сан << | >> Токнок Испаниянь седей >> |
|
Эрьва чи, зярдо варштаван садс, Прок панораманть эйстэ неян, Кода виде янтнэнь кувалма срадсть Умаринань рядт, тусто аллеят. Венельксэсь коть веть, эль зорянь лазозь — Свал кешни чувтнэнь чевтине сувнэс. Яксекшни садовникесь малазост Эрьва чистэ: Суксов кеднеть лутни, Вадни эйсэст. Вельксэнзэ хрусталень Умарьтне видьмевть, стакасто нурить. Ваннокшны содавикс анис, маленть — Тарадост эсь эськава кутморить. Ды кунсолы, кода пиже гаест Миллиононь атом пельде кучить Сонензэ сюк пря! Мелензэ саи Кенярксось — сюпав шачомаст учи. Иредят течи садга чинентень, Сон перька канневи шожда ялтсо. Сыре дедай, аозак эзементень, Эрямодонть ёвтнек лембе валсо! Пирявтонтень новольсть лопав тарад Ваксозот умарть кеверить тештекс. Ах, кода садсонть аштемась паро, Монь мелем лопань шошкстнэде пешкедсь! Но повнят: ульнинь эйкакш — сэльге. Яксинь мельгат, нолдтнекшнынь свал сельведть. Сестэ монь кис, мазый умарь мельга Те садс венстить пирявтка покш кедеть. Раксезь ваннось сэреть попонь церась... Умаренть сейсь, кона ашолдыль човкс Ды повнян, каршот, чирьстэ аразь, Ертызе — конязот сон лазовсь. Тон туекшныть, коть эзть тук сельведеть, Но камакшот кежтнэде чикордыльть. Ды паксядо пуворьксэв покш кедеть Апак кармавт кеместэ сювордыть. Кувать савкшнось ютамс эрямонь кись Сокасонть летьке модантень нежедезь. Ламо пингеть эждясь секе жо чись, Ламот ансяк эзть ульне допрок эждязь. Се ютась уш. Ютазесь а вельми. Те закондонть кортамскак а мезекс. Бути сестэ умарь вешме пелить, Се чувтстонть умарть монень ней сезнек. Те закондонть кортамскак а мезекс! Бути тонь сюпавт эзть ловт ломанекс, Эзть лотксекшне кортнеме ваксозот, Ней тон минек Филиппов... Иваныч... Секс, што шкась од ийть цветявтсь шачозот — Ней, зярдо варштан колхозонк садс, Прок панораманть эйстэ неян, Кода васов, сельметь икельга срадсть, Умаринань рядт, виде аллеят. Ды кунсолат, кода пиже гаесь Миллионнонь атом пельде кучи Каршозот сюк пря! Тонь мелеть сае, Кенярксось — сюпав шачомаст учат! |
| 1936 ие. |
| << Мон эль сан << | >> Токнок Испаниянь седей >> |
| Сборник Васень цвет; автор: Прончатов, И. Н.; 1939. | |