34

Районца ушедозь розень лядемать. Эмтеэсонь мастерскои тяни пцтай кивок ашезь сашенда. Тракторхнень, лафетатнень, комбайнатнень и жнейкатнень механизаторхне, кода боевой позицияс, лихтезь паксяв. Сяда смелхне ушедозь ни бойть: лядьсть лафетаса васенце гектархнень.

Тядде колхосне васенцеда кармайхть лядема раздельнайста. Ламоль пелемада тя од тевть эзда, кой-кона председательхне, да и аф аньцек председательхне, но и колхозникневок сюцесть лафетань нолдайхнень эса и шназь комбайнаса урядамать: «Коськи розсь, лиси паксянь кораблясь и сембонь тисы весть ётазь». Пичедсть, тяфта лама ётай горючайда, а сяда пяк пичедсть сёроть инкса: «Деряй, можна аф прокс кенерьфста нумс? Кодама кармай улема зёрнась?»

Районца лядема ушедсть аф дружнайста. Шинек-венек арнесь паксява Варламов, тарксесь розьбрятнень эзда зёрнат, пей алонза варчсезень и сурса люпшнезень синь. Фкя председательти мярьгондсь: «Тяряфтт, ушетт», омбоцети — «Ванк тонць».

Сембода озадонь седихть васьфтезе сёронь урядамать Валдаев. Сон маштсь Варламовти эняльдема и мекольдень лафетать тоста ётафтозе Леховти, максфтсь лафетать вастс прицепной комбайна. Валдаевть пряц изь сяряде, учсь, мзярда марнек акшеми розть шужярец, коськи зёрнац.

Поргов стаки ащесь уполномоченнайкс «Якстерь тяште» колхозса. Белкинть мархта ётафтсть партийнай собрания, коса механизаторхне, сёронь усксихне сявсть эсь лангозост социалистическяй обязательстват, кие мезе и мзяра кармай лядема, тяляма и усксема. Коммунисттне ладястъ колхозти срокт: мзярда аделамс розть и кедихнень урядамасна и мзярда пяшкодемс государствати сёронь мима планть.

Сярядсь Порговть седиец эмтеэсть инксонга. Эрь илядня сашендсь мастерской и ванондозе, кода моли слесарьхнень и механикнень тевсна. Тяса эряскодсть пяшкодемс эсь социалистическяй обязательстваснон: сёронь урядамать саманцты петемс ташттнень эзда кота комбайнат, кота молотилкат. Синь эрявсть механизированнай токненди. Участковай механикне марса слесарьхнень мархта прибавасть молотилкатненди сифтепт, и тяни синь парста кармайхть работама сортировка вастс.

Ня сембе работатнень Поргов нинге эряскафтозень сяс, мес тя кизоня исть макса од комбайнат. Саранскяйса азозь, што синь сембе прважафт целинав.

Хоть и ламоль тевда, но мастерскойсь Порговть ашезе пичефте, тяни работась тяса Митричсь. Тейнза эрявсь аньцек азомс, мезе тиемс, а кода тиемс, Митричсь содазе сонць. Мастерскойть работанцты пяк лездсь од частень валомась и передвижной электросварочнай агрегатсь. Стакаль тевсь тракторнай бригадава. Тоста сидеста звонясть эмтеэсу, анасть разрешения то перетяжкань тиема, то полафтомс моторть кольцянзон. Но тяфтама разрешения тяни макссесь аньцек сонць Варламов. Виде, Салмов озафнезе Порговть седиенц сянь мархта, што тона кизотнень тожа исть тиендев тракторхненди предупредительнай ремонт, а машинасна работасть. Но Поргов содазе, што тона кизотнень кивок ашезе сявонде бригадаста ломаттнень воляснон; мзярда эрявсь, эста и лоткафнезь машинатнень, штоба петемс. Тяни жа сембонь сявозе эсь кядезонза Варламов. Поргов аф весть тяшнесь тянь колга Варламовти и Салмовти докладнойхть. Сяс и сонценьге кучезь колхозу уполномоченнайкс.

Тячи Поргов тага срхкась райкому. Варламов азозе тейнза:

— Тя кизефксть мархта кадк кармай сашендома Салмов. А тон эряскотт колхозу. Тостонь тефне тяни сяда важнайхть!

Поргов туль ни, но Варламов лоткафтозе:

— Тон содасак, што ванды Карга велеста прважасазь целинникнень? Прважамать инкса отвечат тон.

— А кие туй? Мзяра ломань?

— Тянь тиендьсы комсомолсь, а тейст лезда Шиндина.

Поргов сяка шиня илять васьфтезе Варвара Степановнать и кнзефнезе, мезе эряви тиемс тейнза‚ кода уполномоченнайнди, целинникнень прважамста. А шобдава стясь ранакиге и тусь Карга вели. Илядень пиземда меле сембе нинге ашезь валдашкоткшне менельсь: аф ламнянь стаки почерясь. Карга велеса бда праздниколь. Финцне шарондсть колхозонь правленияса, омбонцне якасть фкя-фкянь пяльге.

Целинав туйхнень ёткса ульсть сельсоветонь председательсь Бойкина и мирдец — комбайнерсь Бойкин Андрей. Синь мархтост марса гуляндась Бугров атянь фкя унокоц — Митясь. Велеть келес лама вастова морасть гармонияса.

Бойкина нинге исяк содазе, што синь прважамост сай Поргов. Леховть мархта васьфтезь сонь сельскяй Советса, и марса кармасть ванондомонза спискать, кие туй целинав. Тяка ёткова Бойкинать мирдец мольсь ульця кувалма и морась гармониянц коряс:

Вьется в тесной печурке огонь, На поленьях смола, как слеза...

Лехов няфтсь вальмава Андрейть лангс:

— Няйсак, тоннесь месенди?

— Кадк сединянц озафтсы, — пеедезевсь Бойкина. — Кенярдсь, мес тутама.

— А конац срхкафтость тумантень: тон или сон?

— Сон. Мувсь, кода монь сявомс председатель вастстон. Ёрай, штоба меки озалень тракторс. Вов и праздновандай. Аряда хоть ярхцатама пялон, тоса сембось аноклаф ни.

Поргов аделазе спискать ванондоманц и Леховти няфтсь фкя фамилия.

— Соньге целинав прважасть?

— Кинь?

— Ленать.

— Аф. Сон аш спискаса, — и варжакстсь Бойкинать лангс.

— Кадость стирсь туй мархтонк, — пшкядсь Бойкина, — велеса тейнза аш месендемс. Саты ни, пеетькшнесь лангсонза Каргинть тядяц.

Лехов кармась сюцема, што сявсазь колхозста инь цебярь дояркать.

— А тонь эсот нинге кржа муськсть Ленать инкса? — уркстозе Бойкина.

Лехов сембе нинге ашезь согласиндакшне, мес соньфтемонза сёрмадозь Ленать спискав. Поргов лоткафтозе:

— Давайте ладняс арьсесаськ тевть. — И варжакстсы Бойкинать лангс: — А тон, Вера Михайловна, содасак, што Ленась...

— Сембонь содаса. Колмонек касфтсаськ шабать.

Лехов сютямсь.

— Эста кадк туй, — мярьгсь Поргов, — хоть ужяль стирсь, но мезевок аф тият...

— Тонга ужяльдьсак, — рахазевсь Бойкина. — Кулендярятанза Варвара Степановна, максы тейть ужяль... Ну, аряда обедатама.

Порговть мялецоль молемс, но Лехов изь срхка: пельсь тага нолдайхть куля велеть келес.

— Мезьда пелят? — кизефтезе сонь Бойкина и вальмава ювадсь мирденцты, штоба туль куду.

Поргов и Лехов варжакстсть фкя-фкянь лангс, пеедезевсть.

— Аде завтракатама Вера Михайловнать пяле, — пшкядсь Поргов, — вдь тинь марса работаме, может тяда меле афи няйхтяда фкя-фкянь.

Лехов согласиндась.

Нинге кенкш лангса васьфтезень синь Леховть рьвац — Елена Петровна. Сон саворне сюцесь эсост, мес ламос ашесть са. Шра лангс путсть ярхцамбяль и вина.

— Андрей симозе эсь талеканц и тусь Бугрофнень пяли, — азозе Елена Петровна.

Обед малати менельсь валдомсь, и цють аф сембе велесь лиссь ульцяв. Финцне весялатольхть, гуляндасть целинав туйхнень мархта, омбонцне ванондсть синь лангозост, а Марса няевсь, што Карга велесь мзярдонга ашезь сотце тяфтама праздник.

Обедамда меле Бойкинать кудста сембе мольсть сельскяй Совету. Тяза сувась Ленавок. Сон наряжаф ки ланс: пильгсонза хромовай кямот, прясонза парьхциень мазы руця, конань мзярда-бди казезе Каргин.

— Коса чемоданце? — кизефтезе Бойкина.

Сараев Васясь сявозе, — и нинге сяда пяк крьвязсть Ленань щекапрянза. Тяни ёфси исть солав сельмонзон алда равжа китьксне, конатнень Поргов няезень, мзярда ульсь синь пялост.

— Эх‚ дурак Каргинонте! — апак учсек пшкядсь Поргов. — Кодама стирь нолдай велеста...

Сембе варжакстсть Ленать лангс, а сонь тусть сельмоведенза.

— Эсь мяльсот туят или велеряйхнень эзда ёрат кяшемс? — родной алят кизефтезе Поргов.

Ленань изь азов валоц.

— Мес кяши ломаттнень эзда? — инксонза отвечась Бойкина. — Монь мархтон аф юмай!

Вальмалга ётасть Белкин и Бугров атя. Поргов и Лехов лиссть каршезост. Белкин весяланяль ни, няевсь, марса ульсть Бугров атянь мархта. Бугров атя кармась сембонь тердемост эсь пялонза:

— Борис Константинович, тячи монь праздникозе, пуромсь куду сембе семьязе. Содасак, трактористть эряфса тяфтама шитне эрьсихть аф сидеста.

Кода изь терде Бугров атя, сякокс сембе атказасть, ашель ни мзярда. Аф лама пингта меле сельскяй Советть каршес паньфтольхть грузовой машинат и колхозонь автобуссь. Машинатнень перьф сембода пяк пульхксь Сараев Вася. Тячи сон няевсь сире ломанькс, бта велеть эса сон сембода оцюсь и сяда лама кивок аф отвечай целинникнень прважамаснон инкса. Вася апак лотксек нежетькшнесь Порговти и кизефнезе то тянь, то тонань, а меле сембонь тиендезе стане, кода Поргов мярьгондсь.

Тяса жа ащесь Бугров атявок: якстерь кирпицекс палсь сонь кеме сялдазоц, лангсонза сатиновай панар, од равжа брюкат, солидолса ватьф кямонза пиндолдсть шить каршеса. Сон тожа ласькондсь и указовась Васяти, мезе тиемс.

Курокста сельскяй Советть каршес пуромсть сембе целинникне. Радняста мельгаст кандозь чемоданцнон и кяскавснон. Машинатнень перьф ащесть велень сембе од цёратне и стирьхне. Финцне рахсесть, омбонцне авардсть. Фкяти ужяль ульсь прважамс кельгома цёрац, омбоцети — кельгома ялгац. Оцюфнень ёткова пульхксть шабатневок. Морасть гармонияса, кштисть.

Лихтезень эсь чемоданонзон Бойкинаське.

— А коса Андрейце? — кизефтезе Поргов. — Эряви тумс ни.

— Вона, сембе пинге палси ялганзон мархта: коданга аф прощандави.

Кодама-бди кафта стирьхть нежедсть Андрейти и тердезь гармонияса морама, но Бугров Митя ашезе нолда, оду кармась корхнема:

— Андрей, кульк, кульк, мезе корхтан. Кодак молят, эстокиге тоса азк... Ну, вообчем, тон содасак, мезе мярьгомс, аньцек тямак юкста.

— Азса, вдь мярьгонь азса и азса.

— Тон содасамак монь, Андрей,.. вдь аньцек мон маштан дизельть топливнай аппаратонц ладяма... Тянь тожа азк. А кодак кульсазь тянь тостонь начальникне, эстокиге тердьсамазь. А мон сразу лийкстан, и карматама марса работама, марса эряма. Мон вдь содаса, тинь тоса получатада од дизельхть. Москусь шарьхкодьсы, кодама машинат тоза кучемс. А мон карман синь латцемост, тянь маштса аньцек мон. Парста карматама эряма.

— Тянь мон содаса, Митя. Сяс тоза и молян: кельгса работамазень...

— Монга, Андрей, кельгса, но монь лацон мастярда аф лама, содасамак монь. Тон аньцек тертьфтемак.

— Ну, мярьктяма, тертьфття, а тонь тага аф нолдатядязь? Эста кода? А мон тертьфття, кодак молян, азан кафта-колма валхт, и шавихть тейть телеграмма. А рьвяце тага кундай эзозт?

Митя комафтозе прянц.

— Да-а! Керомань, чёртсь. Ну и керомань! Кода нарошна, сявсь и шачфтсь. А тяни ков туят? Деряй, нолдасамань атязе. Ну и керомань!

— А моннесь, брат, аф тяфтама, — фалендась Андрей. — Кда мон мярьгонь — тят шачфне, значит, и изь шачфта.

Сембе рахазевсть, кулемок Бугров Митянь «горянц». Аньцек ашезь сода, мезе тиендевсь тя пингть сельскяй Советса. Бойкина кода-повсь леснезе Ленать:

— Николай кельктянза, тянь мон содаса, пади, нинге меки терттянза.

Ня валхне бта сязезь Ленань седиенц. Сон сонцьке содасы, што Николай сонь кельгсы. Аф весть няендезень Николайнь начка сельмонзон, мзярда улендсть кафонест. Содасы‚ што сембе тевть тиендьсы аф Николай, а сонь тядяц — велень святошась. Ся злодейсь явоштсы кельгомнянц эзда. Ленась кяжиясь Николайнь лангс, мес кулхцондсы тядянц. Тянкса аф весть ни Лена панцезе сонь эсь ваксстонза, ёрась вестенге мархтонза аф васетькшнемс. Но, деряй, кирди кельгиень седись? Илять паньцы, а меле сонць жа кафта-колма ши аварькшни. Шинек-венек ащихть сельминголенза Николайнь равжа кудрянза, пиндолды сельмонза. Ков аф моли: пилесонза кайги сонь ляпе эчке вайгялец. Мады вастонц лангс, а сонць кулхцонды, аф марявихть ли сонь пильгонь шятяфонза. И тяни Ленанди сави явомс. Тяда меле аф няйсыне сонь сельмонзон, аф кульсы вайгяленц, аф сюдердасыне равжа кудрянзон. Кода яви ся кинятнень-яннатнень мархта, коза шятнесть синь пильгсна? Деряй, юкставихть Мокшеть беряконза, коса вень-вень ащекшнесть аньцек кафонест? Синь сотцезь, коса морайхть цёфксне, куване ётайхть вирь мацихне.

Лена прась Бойкинать кргас и азондсь аньцек фкя вал: «Коля», «Коля»...

Бойкина кармась сюцема Николайнь эса:

— А мес ина изь са прважамот?

— Сон аф содасы. Кда содальхце — туцятнень вельф лиель тяза... Вера, пади, звонят тоза...

— Аш месть звонцемс. Апак звоняк сяда пяк кармай сярядема инксот седиец.

Лена кулхцондозе Бойкинть, лиссть сельскяй Советста и марса тусть автобусти. Сон кандозе Бойкинать чемоданонц и ульцянь ялганзонды азозе, што моли станцияв прважамонза.

Аватне кармасть прощандама туйхнень мархта. Андрейнь автобусти прважазе Митя ялгац. Пефтомксть синь палсесть, пефтомксть корхнесть Митянь тертьфтеманц колга.

Поргов озафтозень туйхнень машинатненди. Саворне срхкасть вастстост. Автобусонь вальмава Лена яфиезе кяденц Порговти. Поргов лятьфтазе, кода синь васедсть седть песа. Но эста Ленань сельмонза палсть штатолкс, тяни, кода цятконят, коцасть. Порговти ламос няевсь Ленань кядец, ичкозде кулевсть машинатнень эзда гармониятнень вайгяльсна.