6

Райкомонь секретарсь Варламов и эмтеэсонь директорсь Салмов мрдасть Саранскяйста ся пингть, мзярда Поргов ульсь «Мазы пакся» колхозть электростанциясонза. Инженерть саманц колга Салмовти азозь эстокиге, кодак сувась мастерскои. Порговть эса шнасть сембе ширде. Салмов мольсь Митричти и педа-пес кизефнезе, местема Поргов сась. Митричсь тожа кармась Порговть эса шнама.

— Корхтайхть, синь Леховть мархта ванондозь калада комбайнатнень и молотилкатнень, шарондсть ташта тракторхнень перьф?

— Ванондозь, тозонга кенерькшнесь, — виде ваймот азозе Митричсь.

— Ну и мезе азсь? — абондсь Салмов.

— Сонь кургоц аф калада‚ — хитрайста отвечась Митричсь, — ванонды и кизефни, шукадьсы прянц и тага кизефни, а сонць корхтаманц аф кельгсы.

— А кода арьсят, Митрич, мезенди сон ванондозень?

— Рас сась проверямонк, содаф мезенди: тяшти лангозонк.

— Чаят, тяшти?

— Анокс содаф, што тяшти, стак мянь Москуста афолезь куч. Ну кадк тяшти, пади, сяда курок кучихть тяза инженер‚ а то юкстамазь, киндиге аф эряфтама. А Порговть‚ няемс, кяденза эсь вастозост озафтфт.

Салмов стадонга ёмланяль, а тяни крнякс кирендевсь верстакть лангса ащемста и кати эводсь инженерть эзда, кати кяжиясь Митричть лангс, сяс мес ся кенярдсь Порговть саманцты. Салмовть шамац марнек полафтсь.

— Лезды, мярьгат? — кяжвельде и сяка ёткть эвотьфста корхтась Салмов, — пелян, пароц аф папдови. Мяляфтсак, Рузаевкаста кучсесть тейнек главнай инженер? Ся тожа ушедсь работама ляпоняста, корхтась, што ладясы тевть, а меле кармась пильгалонк лотконь шувома и, кда райкомсь афоль стрянда, кафцьконь тонь мархтот пакареньке апак калдорфтт тоса улельхть. Тянь тон шарьхкодить эста? Аш? Ну, вот, аст спасиба партиянь райкомти.

Митрич аф весяласта кеподезе директорть лангс сельмонц.

— А монь мезенкса? Мон мезе маштан, сянь и тиян...

— Сон мульхце, мезенкса. Араль директоркс монь вастозон, и тоса вешентть, мезенкса. А тя, мярьгат, лишнай вал изь прафта?

— Изь прафта, — тяни тага живолгодсь Митрич, — корхнесь комбайнерхнень мархта, кизефнезе Леховть, виде, кяжиякшнесь, кодах няезень рассадань озафнема машинать и копнительхнень. Корхтай, мес ашесть лихне синь паксяв?

— Кяжиякшнесь, мярьгат?

— Кяжиякшнесь.

— А Лехов мезе корхтась тейнза, ашить куле?

— Мезе-бди жалбась, — директорть кургс ванозь отвечась Митрич. — Вроди, запасной частьта синь комбайнаснонды кржа максоме.

— А инженерсь месть?

— А мезе сон азы? Тя ломанць аф минь лацонк. Лапак, тяк лапа кяльцень, а сонь сонцень пряц, — и полафтозе Митрич вайгяленц: — А тон няелить, кодама специалистсь: кшнись шяняды кядьсонза! Тевть лангс аньцек варжаксты и содасы ни. И содасак нинге, мезе азсь? Мярьгсь: аш месть эрь гайканять учсемс заводста. Эряви тязк тиендемс кой-кодама частьт. Ну и аля!

— Орёл, мярьгат? — нинге сяда кяжиясь Салмов. — Ватт ладняс, афолензе чакадь тя «орёлсь» шалхка ланга стане, кода рузаевканнесь. Тон вдь аф содасак, мезе сонь потмосонза. Тяфтапнень ульма вядьмосна кувака, ичкозде поват сонь ульмозонза, — сон стясь и вишкста тусь конторав.

Иляденьбяли Салмов сувась Шиндинати и, бта мезевок аф содай, кармась кизефнемонза, кие стамсь Порговсь и кодама тев мельге сась сей. Теса кода-бди тошказь кизефтезе:

— Азондозе, колхозу якаде марса? — и ширептезе прянц.

— Якаме. Лама изь сав кизефнемс, но няемс, инженерсь пара. Кучф тяза кой-кодама тевоньконь проверяма... Сон тянь эстейть азсы. А «Возрождения» колхозса магарыч мархтонза цють ашеме сим, — Шиндина рахазевсь, — ташта колеснай тракторть ёраськ мимс колхозти.

Салмов кулхцондсь ваймонь апак тарксек, мяльхне сускондозь эцесть прязонза. Тозерявсть сялдазстонза саннятне, няемс, крьвязсь потмоц, но Шиндинати изь няфте пря, ёрась апак лотксек мзолдомс.

— Кода ваны эмтеэсоньконь лангс? Тянь колга мезевок корхтась?

Шиндина отвечась аф сразу:

— Тянь колга изь сав кода-бди корхтамс. Ах, да, — эстокиге бта стряндась сон, — вов мезе мярьгсь: мезенди, кле, усадьбаса кирдьсасть ташта машинатнень? Максость колхосненди, кадк синць петьсазь комбайнатнень и молотилкатнень и работайхть мархтост.

Поргов Шиндинати корхтась аф тяфта, Шиндинась ня валхнень прибавазень сонць, ёрась хоть аф ламняда токамс Салмовть седиец. Сон аф весть ни корхнесь и спорсесь Салмовть мархта синнеф машинатнень петемаснон колга. Эрь кизоня колхоснень эзга аф сатнихть комбайнатне, колхоснень ламоснон токсост понжафтома машинада башка аш сёронь ароптома машинат. Тя тевти пчкяльхть ба сложнай молотилкатне, но синь ряцок комбайнатнень мархта ащесть ёрдафста. Салмов верондафтозень Варламовть и бюронь сембе члеттнень, штоба аф возсемс ташта машинатнень мархта, а сёрмадомс обкому и получамс од машинат.

Салмов тяни лемдезе Шиндинать, кода корхнихть, лемса-пилеса:

— Варвара Степановна, коса сон, ся ёню инженерсь?

— «Возрождения» колхозста исяк ускине «Мазы паксяти». Сараева кодак кулезе, што инженер сась, тейнзонга ёразе няфтемс электростанцияснон.

Салмовть кяженза лиссть лангу:

— Ванан, ванан, ломанць ашезь кенере самс, а тинь шкайкс ни тиесть, лядсь аньцек озондомс лангозонза.

Шиндина рахазевсь:

— Мес шкайкс? Сон инженер, и тейнек эряви сявомс ширденза сембонь, мезе содай. Минь районцонк сонь кодямонза фкявок специалист аш.

Директорсь мезе-бди мторгодсь, но Шиндина ашезе шарьхкоде. Тянь мархта и аделась корхнемасна.

Салмов сувась кабинетозонза и ламос ащесь ськамонза. Седиенц эса кода пинет порсть, изь тушенда прястонза Поргов: мес-бди пельсь эздонза. Сон тага лятьфтазе Рузаевкаста сашентф инженерть.

«А, пади, тя, — арьсесь сон, — кафксть сяда кляузнай?.. Кда мезе муй — туян работаста! Кадк муйхть монь кодямон дураконя, кона эрь кизоня ташта комбайнатнень и тракторхнень вастс сатни од машинат!»

Стенастонь часттне эрьхтсть вейхксоксть. Конторать каршеса, ульцять тона бокса, кулевсь, кода работась ошень электростанциять двигателец. Салмов звонясь Варламовти.

— А мон кудунга ашень яка, пяк ни лама тевда пуромсь, — жалбась Салмов. — Кулить, минь районозонк Москуста сась кодама-бди инженер? Аш? Сась и кенерсь ни усадьбасонк шаромс, колхозга якамс. Пади, молян, азондса?

Ки кувалма Салмов арьсесь, кода сяда лац азондомс Варламовти, мезе кульсь инженерть колга. И вов сон озаф ни Варламовть каршес:

— Проверямонк сась. Стяфтозе прянц лангс марнек эмтеэсоньконь. Кой-мезьса лездсь комбайнерхненди, и тяни сят аф содасазь, кода шнамс сонь. Ищейкакс шарозе сембе усадьбаньконь, повсть сельминголенза калада и ташта машинаньке... Вадезе Митричтьке седиенц. Аф стак тихтедсь тяза тя ломанць. Кенерсь ни якамс Шиндинать мархта колхоснень ланга.

— Ну и мезе? — озадонь седихть кизефтезе Варламов, и фкя кургужесонза няевсь пеедемань мянькскя.

— Шиндинати панчсезе потмонц. Сюци эсонк, мес аф явсаськ колхоснень ланга ташта машинатнень.

— Ну и кадк явсыне, кда максфт тейнза тяфтама прават.

— Тяряфнесь ни: «Возрожденияса» ёрасть магарыч симомс.

— Улема, шутендась сон, а тон верондат.

— Тейне Варвара Степановна азондозе. А уш шутендасть синь или афкукс, кие содасы?

— А тон тят шарфне мяль. Вярде сафне фалу тяфта тиендихть. Мяляфтсак, мезе тиендсь Рузаевкаста саф инженерсь? Тонць вдь азонкшнить сонь дейканзон. Ну и тяцка тяфта: шумнай, шумнай, комотни, комотни и эшенди. Аньцек тячи, што ли, работат?

— Э-ге! Тят шарфне мяль, — изь согласинда директорсь Варламовть мархта. — Сон пяк ёжуста ёрасы шарфтомс тевть. Минь тяса государствать линиянц мельге ваттама, а сон сась и ёрай тиемс милость: пяле питнеда мимс машинатнень.

— А кие тейнза мярьги?! — нльне кяжиясь Варламов. — Азсак валцень и мярьгат...

— А, чаят, сон тянь аф содасы? Содасы, што машинатнень минь аф мисаськ. А мезе азыхть колхозса? Варламов и Салмов — аф цебярь ломатть, бюрократт. А сон, Поргов, ёню, милосливай. Шарьхкодьсак политиканц? — Салмов путозе суронц оржа шалхконц пес.

Варламов кой-мзярс мезевок изь отвеча, арьсесь Салмовть валонзон лангса, тоса стясь, ётась кабинетонц туркс и отвечась:

— Кати стане, кати аф, но тейне азондозе обкомонь васенце секретарсь Федор Михайлович, местема кучф тяза Поргов. Тейнза мярькф, штоба мульхце туфталть, мес машинаньконь ёмла производительностьсна. Ну и кадк вешенди! Тяряфтсы мумс. Мусы — минь астама тейнза спасиба и прважасаськ куду. Тяк юксне, што сон коммунист и лишнай мезевок аф тии, а кда тии, то... минь аф шабатама, тяса вдь ули райком. А содасак, мезе нинге корхтась Федор Михайлович? — тяни лоткась Варламов кабинетонц кучкас, тяйнялгофтозень сельмонзон и ламос ванць директорть лангс. — Федор Михайлович кошардомань корхтамс инженерть мархта, пади, петфтави сон тязк. Петфтави? Кода чаят?

Салмовть полафтсь шамац, но тись пря стане, бта тейнзонга пара улель, кда лядоль тяза инженерсь:

— А содасак, Степан Иванович, вдь тя штуканьке, Леховсь, кенерсь ни жалбамс инженерти, бта райкомсь обижазе, кржа макссь тейнза запасной частьта, комбайнасна апак петть.

Варламов мезевок изь отвеча. Сон нежедсь моркшенц малас, люпштазе звоноконь кнопкать. Сувась райкомонь дежурнайсь — ёфси од цёра.

— Ванды шобдава вешесть и тердесть тяза саф инженерть, сон коса-бди колхозса.

— Сон «Мазы пакся» колхозса, — эряскодсь азомс дежурнайти Салмов‚ — звоняк тоза.

Дежурнайсь шукадезе прянц и лиссь. Варламов изь лотксе мековасу якамда и корхтамда:

— Мярьготь, Лехов васетькшнесь ни? Деряй, ся ляды? Соньфтемонза мезевок аф тиендеви...

Салмов якафтозень Варламовть мельге сельмонзон: ков ся ётай, тоза ванць сон. Меколи срхкась тума.

— Да‚ — пшкядсь Варламов ёфси лия вайгяльса, — тонь самдот инголе тейне звонясь Валдаев и эняльдсь, штоба идемс ваймонц: кафта лафетатнень вастс кучемс тейнза фкя самоходка. Корхтай, колхозникне аф мярьгихть нумс роснень лафетаса, пелихть гагтясазь. Пади, полафтсаськ? Кадк озай шяйтанть седиец.

— Сонга звонясь? — абондсь Салмов. — Лафетатнень колга удомонга аф кадондсамазь, сембе анайхть вастозост комбайнат... Вдь лафетатне аф молихть минь паксяньконди. Тя содаф. Тя вдь Украинаса нуйхть лафетаса, тоса тевсь лия, тоса сёротне аф минь лацонк. А минь тяса аф туй, — тевонь содайкс аделазе корхтаманц.

— Тя няеви. Тон давай, полафтк Валдаевти, ужяль чёртсь. Мук костонга комбайна тейнза. — Варламов таргась моркшенц потмоста телеграмма и ёрдазе Салмовть инголи.

— Кинди макссаськ? — анокс кизефтезе сон.

Директорсь варжакстсь телеграммать лангс:

— А тозерсь сась станцияв?

— Аньцек самдот инголе звонянь, ваготтне нинге ашет, но ня шитнень сайхть. — Варламов сявсь кагод, карандаш, корхтась и тяшнесь: — Леховти — сяда центнер, Валдаевти — сяда, вете сятт — тона эмтеэсонь колхосненди. Чуйкин сяви? Кармай видема?

— Аф сяви. Синь лама видесть тозерда. Мярьги, поздаськ ни тозеронь видемать.

— Поздаськ, а государственнай планць районцонк апак пяшкотть, содасак сянь? — Варламов уркстозе Салмовть.

— Мон содаса, но агронопне...

— Мезе агронопне? — кяжиясь Варламов. — Синь вдь аф отвечайхть планть инкса. Эрь цифрась вов тяза озай, няфтезе шовоненц и венептезе Салмовти кагод листть, конанди тяшнезень колхоснень лемснон: — Явить лядыкс тозер видьмотнень и лемстон кучт председательхненди телефонограмма. Кадыть получасазь и видесазь. Спасиба обкомти, што макссть видьмот, тёжянь центнерть мархта сисем сятт гектар прибавай отчётоньконди.

Тяфта Варламов кафонест Салмовть мархта сидеста арьсекшнезь райононь тефнень. Варламовда башка райкомса ульсть нинге колма секретарьхть, райисполкомонь председатель, но Варламовда и бюронь членть Салмовда сире работникт райкомса ашельхть. Вов и синь ськамост арьсекшнезь сембе тефнень. Виде, районца ламос ни работай райисполкомонь председательсь Зобов, но сон фалу заняфоль лия тевса: строясь кит, школат, медпунктт.

Эмтеэсонь директорсь райкомста тусь аф куду, а меки конторав. Сувась кабинетозонза и ламос арьсесь Порговть району кадоманц колга.

Тоса сявсь и вень кучкать звонясь «Мазы пакся» колхозть правлениязонза, дежурнайть кядьста кизефнезе сембонь, мезе тоса тись Поргов. А мзярда ся азондозе, кода электричествать нолдамста тиендевсь пожар, Салмов омбоце шиня ранакиге стяфтозе шоферонц и тусь колхозу. Аньцек кенерсь сувамс правленияв, эстокиге тяза ласьксь Гурьянов, кона азондозе, мезе лиссь Каргинть тракторонц мархта.

— А коса симондсь?

— Лац-ряц аф содаса, но исяк тяса нолдазь электростанцияньконь, ну и ужин тисть, улема, тоса. Каргинцьке тосоль.

— Значит, сембе симондсть? — кенярдсь Салмов.

— Мон аф содаса, паксясолень, — виде ваймот азондсь Гурьянов. — Тейнь сонць Каргин тянь азондозе. Да, уш, наверна, копордафтозень Сараевась, тяшка радость: нолдавсь электростанциясь.

— А тонь нльне ашедязь терне, Дмитрий Павлович? — ужяльдезе Салмов Гурьяновть. — А тага кие тосоль?

— Сяда лама аф содан.

— Значит, инженерть, Порговть, кода эряви каванязь?

— Ся тосоль, каванязь. Ну, а мезе тиемс тракторть мархта?

— Ах, да, тон тракторть колга? — стряндась Салмов. — Мезе тиемс? Ваность ладняс и буксирса ускость эмтеэсть пирьфс.

— Пади, тонць, Карп Максимович, ванцак? — Гурьянов кенярдсь, што директорсь фкявок валса изь сюце тракторть инкса. — Сейчас Бугровське моли паксяв.

— Мезевок аф эряви, ускость тинць, — нинге сяда спокойнаста мярьгсь Салмов. — Архт, а Каргинть мархта мон монць меле корхтан. Архт.

Гурьянов эрязста лиссь правленияста. Аньцек кенерсь валгомс крылецть лангста, вальмянь клянцти чакась Салмов — мрдафтозе меки.

— Мон, Дмитрий Павлович, эряскодан лия колхозу, — пцтай салаване корхтась Салмов, — а сяс аф молеван тракторть ванома... Тоса тонць ладняс ванк... тевть шарьхкодьсак.

Гурьянов люкштядезе прянц и ласькозь тусь паксяв. Салмов эряскодозь озась машиназонза, тусь видеста Варламовти.